1. Ang Dios Bala ang Balasulon sang aton Pag-antos?

Kon Ngaa Importante ang Sabat sa Sini

Madamo nga tawo ang indi gusto magsimba sa Dios kay abi nila sia ang rason sang pag-antos.

Pamensara Ini

Ginapagua sang madamo nga lider sang relihion sa ila mga panudlo nga ang Dios amo ang rason sang aton pag-antos. Halimbawa, ang iban nagasiling nga:

• Ang mga kalamidad silot halin sa Dios.

• Ang mga bata nagakapatay bangod kinahanglan sang Dios sang dugang nga anghel sa langit.

• Ang Dios may ginapaboran sa mga inaway, nga isa ka rason sang grabe nga pag-antos.

Pero posible ayhan nga sala ang ginatudlo sang mga lider sang relihion? Ano abi kon indi gali komporme ang Dios sa ila?

Ang Ginasiling sang Biblia

Indi ang Dios ang rason sang aton pag-antos.

Kay kon sia ang rason, wala ina nagasanto sa iya mga kinaiya nga ginatudlo sang Biblia. Halimbawa:

‘Matarong ang tanan nga ginahimo sang Dios. Matarong sia kag matadlong.’—DEUTERONOMIO 32:4.

“Imposible nga ang matuod nga Dios maghimo sing malaut, nga ang Labing Gamhanan maghimo sing sayop!”—JOB 34:10.

“Ang Labing Gamhanan wala nagapatiko sang katarungan.”—JOB 34:12.

Wala ginabaton sang Dios ang relihion nga sala ang ginatudlo parte sa iya.

Lakip sa sini ang mga relihion nga nagatudlo nga ang Dios amo ang rason sang aton pag-antos, kag ang mga relihion nga nagaentra sa inaway kag pagpamintas.

“Ang mga manalagna nagapanagna sing kabutigan sa akon ngalan. Wala ko sila ginpadala ukon ginsugo, kag wala ako magpakighambal sa ila. Ang ila ginapanagna sa inyo indi matuod nga palanan-awon, . . . kag pagpangdaya sang ila tagipusuon.”—JEREMIAS 14:14.

Ginkondenar ni Jesus ang pagkahipokrito sang mga relihion.

“Indi tanan nga nagasiling sa akon, ‘Ginuo, Ginuo,’ makasulod sa Ginharian sang langit, kundi ang nagahimo lamang sang kabubut-on sang akon Amay sa langit. Madamo ang magasiling sa akon sa sina nga adlaw: ‘Ginuo, Ginuo, wala bala kami nagtagna sa imo ngalan, kag nagtabog sang mga demonyo sa imo ngalan, kag naghimo sing mga milagro sa imo ngalan?’ Apang isiling ko sa ila: ‘Wala ako makakilala sa inyo! Palayo kamo sa akon, kay nagahimo kamo sing malain!’”—MATEO 7:21-23.