2. Kita Bala ang Balasulon sang Aton Pag-antos?

Kon Ngaa Importante ang Sabat sa Sini

Kon huo ang sabat, buot silingon posible nga may mahimo kita para madula ang pag-antos.

Sa masunod nga mga rason sang pag-antos, asta sa diin ang puede ibasol sa tawo?

Pag-abuso.

Ginabulubanta sang World Health Organization (WHO) nga 1 sa kada 4 ka adulto ang nakaagi nga ginsakit sang bata pa sila, kag 1 sa kada 3 ka babayi ang nakaeksperiensia sang pisikal ukon seksuwal nga pag-abuso (ukon sining duha gid).
Kalisod Bangod sang Kamatayon.

“Ginbulubanta nga 477,000 ang hungod nga ginpatay sa bilog nga kalibutan sang 2016,” siling sang World Health Statistics 2018, nga ginbalhag sang WHO. Kag may 180,000 pa ka tawo nga ginbulubanta nga napatay sa mga inaway kag kinagamo nga natabo sina nga tuig.
Balatian.

Sa isa ka artikulo nga ginbalhag sa magasin nga National Geographic, ang manunulat nga si Fran Smith nagsiling: “Sobra sa isa ka bilyon ka tawo ang nagapanigarilyo, kag ang tabako amo ang ginahalinan sang lima ka nagapanguna nga rason sang kamatayon: balatian sa tagipusuon, stroke, impeksion sa baga, chronic obstructive pulmonary disease, kag kanser sa baga.”
Indi Palareho nga Pagtrato sa mga Tawo.

Si Jay Watts, nga isa ka psychologist, nagsiling nga ang kapigaduhon, indi palareho nga pagtrato bangod sang estado sang pangabuhi, diskriminasyon sa rasa kag sa magkatuhay nga mga sekso, pagbakwit, kag pagkompetensiahanay nangin kabangdanan sang grabe nga kabalaka, depresyon, kag kahadlok.

DUGANGI ANG IMO NAHIBALUAN

Tan-awa ang video nga Ngaa Gintuga sang Dios ang Duta? sa jw.org/hil.

Madamo nga pag-antos ang kahimuan mismo sang mga tawo.

Kalabanan sini resulta sang korap nga mga gobierno nga nagapabudlay sa kabuhi sang pumuluyo nga ila kuno ginaserbisyuhan.

“Ginagamhan sang tawo ang iya isigkatawo sa iya kahalitan.”—MANUGWALI 8:9.

Puede mabuhinan ang pag-antos.

Ang mga prinsipio sa Biblia makabulig para mangin mas maayo ang panglawas kag ang relasyon sa iban.

“Ang malinong nga tagipusuon nagahatag sing kabuhi sa lawas, apang ang kaimon daw balatian nga nagaut-ot sang mga tul-an.”—HULUBATON 14:30.

“Isikway ninyo ang tanan nga sahi sang dumot, kaakig, kasingkal, sininggitanay, masakit nga hambal, kag ang tanan nga kalainan.”—EFESO 4:31.