Hibalua Kon Ano ang Matuod

Ang Problema

Sa masami, ang diskriminasyon nagasugod sa sala nga impormasyon. Binagbinaga ang masunod nga mga halimbawa:

May mga employer nga nagapati nga ang mga babayi indi makasarang sang mabug-at nga mga obra, ukon sang mga obra nga nagakinahanglan sang abilidad ukon kaalam.
Sa Europe, sang mga 500 asta 1500 C.E., gin-akusahan ang mga Judiyo nga naghilo sang mga bubon kag nagpalapta sang mga balatian. Sang naggahom ang mga Nazi, ginpasipalahan liwat ang mga Judiyo. Gin-akusahan sila nga sila ang rason sang krisis sang ekonomiya sa Germany. Bangod sini, ang mga Judiyo nangin biktima sang grabe nga diskriminasyon, nga kon kaisa, nagakatabo gihapon subong.
Madamo ang nagapati nga ang mga tawo nga may kasablagan pirme nasubuan ukon negatibo.

Ang mga tawo nga nagapati sa sining sala nga mga impormasyon mahimo magpangita sang mga halimbawa ukon mga ebidensia para suportahan ang ila diskriminasyon. Kag para sa ila, ang bisan sin-o nga indi mag-ugyon sa ila, ignorante.

Prinsipio sa Biblia

“Ang tawo nga wala sing ihibalo indi maayo.”—HULUBATON 19:2.

Ano ang buot silingon sini? Kon wala kita kabalo kon ano ang matuod, mangin sala ang aton mga desisyon. Kon patihan naton ang sala nga mga impormasyon, mangin indi husto ang aton pagtan-aw sa mga tawo.

Kon Ngaa Makabulig Kon Hibaluon Naton ang Matuod

Kon kabalo kita kon ano ang matuod parte sa mga tawo, indi kita magpati dayon sa sala nga impormasyon nga ginasiling sang iban batok sa ila. Kag kon marealisar naton nga sala gali ang aton pagpati parte sa isa ka partikular nga grupo sang mga tawo, posible gid nga sala man ang aton pagpati parte sa iban nga grupo, amo nga tinguhaan na naton nga hibaluon gid anay kon ano ang matuod.

Eksperiensia: Si Jovica (Taga-Balkans)

Samtang nagadaku si Jovica, nga ginsambit sa una nga artikulo, pirme niya mabatian sa mga tawo, sa balita, kag sa mga programa sa TV ang negatibo nga mga report parte sa isa ka tribo. “Grabe gid ang akon diskriminasyon kag dumot sa sini nga mga tawo,” siling niya. “Kag abi ko, insakto lang nga amo sina ang akon ginabatyag sa ila.

“Pero sang nag-entra ako sa army, napilitan ako nga maupod ang mga soldado nga halin sa sini nga tribo. Gani mas nakilala ko kon ano gid sila. Natun-an ko pa gani ang ila lenguahe kag nagapamati na ako sa ila mga kanta. Nanamian na ako mag-upod sa ila kag nagbag-o gid ang akon pagtan-aw sa ila. Pero bal-an ko nga puede magbalik ang akon diskriminasyon. Gani ginalikawan ko ang mga balita nga nagapakalain sang ila tribo. Wala naman ako nagalantaw sang mga pelikula ukon sang comedy nga mga programa diin ginahimo sila nga kaladlawan. Narealisar ko nga mahimo magresulta sa kaakig kag dumot ang diskriminasyon.”

Ano ang Mahimo Mo?

Dumduma nga indi tanan nga tawo sa isa ka partikular nga grupo palareho sing batasan.
Batuna nga mahimo indi kompleto ang impormasyon nga nabal-an mo parte sa iban.
Siguraduha nga insakto ang impormasyon kag masaligan ang ginhalinan sini.