NAGALALA NGA SITWASYON SA KALIBUTAN

4 | Proteksioni ang Imo Paglaum

KON NGAA IMPORTANTE INI

Ang pagkabalaka bangod sa nagalala nga sitwasyon sa kalibutan may epekto sa panglawas kag balatyagon sang mga tawo. Madamo sa ila ang wala na nagalaum nga magaayo pa ang sitwasyon. Ano ang ila ginahimo?

Ginalikawan sang iban nga mamensar parte sa palaabuton.
Ang iban naman nagainom ukon naga-drugs para malipatan nila ang ila kabalaka.
May nagasiling man nga gusto na lang nila mapatay. “Ano pa ang pulos sang kabuhi?” siling nila.

Ang Dapat Mo Mahibaluan

Ang iban mo nga mga problema temporaryo lang, kag mahimo gulpi lang nga mag-ayo man ang sitwasyon.
Bisan pa indi magbag-o ang imo sitwasyon, may mahimo ka para mabatas ini.
Ginasugiran kita sang Biblia sang matuod nga paglaum. Ang permanente nga solusyon sa tanan nga problema sang katawhan.

Ang Puede Mo Himuon Subong

Ang ginasiling sang Biblia: “Indi gid ninyo pagkabalak-i ang buas, kay ang buas may kaugalingon nga mga kabalaka. Ang tagsa ka adlaw may kaugalingon nga mga palaligban.”—Mateo 6:34.

Ang subong nga adlaw lang ang kabalak-i. Indi pagpasugti nga indi mo na mahimo ang imo mga responsibilidad subong bangod sa pagkabalaka mo sa matabo buas.

Ang pagpamensar sa indi maayo nga mga butang nga basi matabo magadugang lang sang imo stress, kag magapaluya sang imo paglaum nga magaayo ang sitwasyon sa palaabuton.

KON ANO ANG PUEDE HIMUON—Mga Tip nga Makabulig

MAGPOKUS SA POSITIBO

Ang ginasiling sang Biblia: “Masubo ang tanan nga adlaw sang tawo nga nalisdan, apang daw pirme lang may kapiestahan ang tawo nga may malipayon nga tagipusuon.” (Hulubaton 15:15) Kon magpokus ka lang pirme sa problema, basi indi mo makita ang solusyon. Pero kon positibo ka lang, mahimo makapamensar ka gid sang solusyon sa imo problema.

Limitahi ang tion nga ginagamit mo sa pagtan-aw sang mga balita.
Pagkatapos sang kada adlaw, pamensara ang duha ukon tatlo ka butang nga puede mo maapresyar.
Maghimo sing listahan sang imo mga hilimuon, pero isulat lang ang para sa sini nga adlaw. Idetalye ang imo mga hilimuon, para pagkahapon makita mo gid nga may natapos ka.

MAGPABULIG

Ang ginasiling sang Biblia: ‘Ang nagapain sang iya kaugalingon . . . nagasikway sang tanan nga praktikal nga kaalam.’ (Hulubaton 18:1) Indi ka makatakas sa madalom nga buho kon ikaw lang. Kinahanglan may magbutong sa imo.

Magpangayo sang bulig sa imo pamilya ukon mga abyan.
Magpangita ka man sing mga paagi para mabuligan mo sila. Kon may ginahimo ka para sa iban, makabulig ini sa imo nga mangin balanse ang pagtan-aw mo sa imo mga problema.
Kon nagakadulaan ka na sang paglaum kag daw gusto mo na mapatay, maayo nga magpadoktor ka. Kay kon kis-a, mga sintoma ini sang balatian pareho sang depresyon. Madamo ang nabuligan sang nagpadoktor sila.a

a Ang Magmata! wala nagarekomendar sang bisan ano nga paagi sang pagpabulong.

Ang Biblia May Ginasugid nga Matuod nga Paglaum

Ang manunulat sang salmo sang una nagpangamuyo sa Dios: “Ang imo pulong suga sa akon tiil, kag kapawa sa akon dalanon.” (Salmo 119:105) Binagbinaga kon ngaa amo gid sina ang Pulong sang Dios, ang Biblia.

Kon nagalakat kita sa isa ka madulom nga gab-i, ang suga nagabulig sa aton nga makita ang aton ginalaktan. Pareho man sina ang Biblia. May ara ini praktikal nga kaalam nga makagiya sa aton kon kinahanglan naton maghimo sing mabudlay nga desisyon.

Ang kapawa halin sa suga makapasanag sang aton dalanon agod makita naton kon ano ang ara sa unhan. Pareho man sina ang Biblia. Ginapakita sini sa aton nga may paglaum nga maayo nga palaabuton.

Ang Biblia isa ka sagrado nga libro. Ginasugid sini indi lang ang kasaysayan sang tawo halin sa ginsuguran kundi ginasugid man sini ang matuod nga paglaum para sa palaabuton. Ginasabat sini ang masunod nga mga pamangkot:

Paano?

Kon paano nagsugod ang pag-antos: Ang Biblia nagasiling nga “paagi sa isa ka tawo nagsulod ang sala sa kalibutan kag ang kamatayon paagi sa sala, kag naglapnag ang kamatayon sa tanan nga tawo bangod sila tanan nakasala.”—Roma 5:12.

Ngaa?

Kon ngaa indi masolbar sang paggahom sang tawo ang aton mga problema: Ang Biblia nagasiling nga “wala sing ikasarang ang tawo sa pagtuytoy sang iya tikang.” (Jeremias 10:23) Ginapamatud-an ina sang nagakatabo sa kalibutan subong.

Ano?

Kon ano ang himuon sang Dios para masolbar ang sitwasyon: Ginasugid sang Biblia nga “pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa.”—Bugna 21:4.