LEKSION 02

Ang Biblia Nagahatag sing Paglaum

Naimprinta nga Edisyon

Ang mga tawo sa bilog nga kalibutan may mga problema nga nagahatag sa ila sing kasubo, kabalaka, kag kasakit. Naeksperiensiahan mo man bala ini? Mahimo nagaantos ka bangod sa balatian ukon napatay ang imo pinalangga. Basi nagapamangkot ka, ‘Mangin maayo pa ayhan ang sitwasyon?’ May makapaumpaw gid nga sabat ang Biblia sa sina nga pamangkot.

1. Paano ang Biblia nagahatag sing paglaum?

Wala lang ginapaathag sang Biblia kon ngaa madamo sing problema, kundi ginasugid man sini ang maayong balita nga sa indi madugay madula na ang tanan nga problema. Ang mga promisa sa Biblia ‘makahatag sa imo sing maayo nga palaabuton kag paglaum.’ (Basaha ang Jeremias 29:11, 12.) Ini nga mga promisa makabulig sa imo nga masarangan ang mga problema, mangin positibo, kag padayon nga mangin malipayon.

2. Ano nga klase sang palaabuton ang ginapromisa sang Biblia?

Ang Biblia nagapromisa sang palaabuton nga “wala na sing kamatayon, ukon paglalaw ukon paghibi ukon kasakit pa.” (Basaha ang Bugna 21:4.) Ang mga problema nga nagapaantos sa aton subong, pareho sang kaimulon, inhustisya, balatian, kag kamatayon madula na. Nagpromisa ang Biblia nga ang mga tawo magakabuhi sing wala katapusan sa Paraiso diri sa duta.

3. Ngaa makasalig ka nga matabo gid ang mga promisa sang Biblia?

Madamo nga tawo ang nagalaum nga mangin maayo pa ang sitwasyon sa ulihi, galing indi sila sigurado kon matabo gid man ini. Pero sigurado gid nga matabo ang mga promisa sang Biblia. Makumbinsi pa gid kita nga matabo ini kon ‘usisaon naton sing maayo ang Kasulatan.’ (Binuhatan 17:11) Samtang ginatun-an mo ang Biblia, ikaw ang makasiling kon bala mapatihan gid man ang mga promisa sini parte sa palaabuton.

USISAA PA GID

Usisaon naton ang pila ka promisa sang Biblia sa palaabuton kag hibaluon kon paano ini nagabulig sa mga tawo subong.

Mga piktyur: Kinalain sang sitwasyon subong sangsa ginapromisa sang Biblia nga sitwasyon sa palaabuton. Pareho man sini ang makita sa ubos.

4. Ang Biblia nagasiling nga may paglaum kita nga mabuhi sing wala katapusan nga wala na sing pag-antos

Tan-awa ang nalista nga mga promisa nga mabasa sa Biblia. Diin sa sini ang nanamian mo gid? Ngaa?

Basaha ang mga bersikulo sa kada promisa, kag binagbinaga ini nga mga pamangkot:

Sa banta mo, ini bala nga mga bersikulo nagahatag sing paglaum? Makahatag man bala ini sing paglaum sa imo pamilya kag mga abyan?

Imadyina nga nagakabuhi ka sa kalibutan nga

WALA NA SING . . .	ANG TANAN MAY . . .
pag-antos, pagtigulang, kag kamatayon.—Isaias 25:8.	kahigayunan nga makita ang nabanhaw nila nga pinalangga diri sa duta.—Juan 5:28, 29.
nagamasakit kag may diperensia sa lawas.—Isaias 33:24; 35:5, 6.	maayo kag mapagsik nga panglawas.—Job 33:25.
inhustisya.—Isaias 32:16, 17.	bastante nga pagkaon, komportable nga balay, kag makalilipay nga obra.—Salmo 72:16; Isaias 65:21, 22.
nagaantos bangod sa inaway.—Salmo 46:9.	matuod nga kalinong kag paghidait.—Salmo 37:11.
makadumdom sing malain nga mga hitabo.—Isaias 65:17.	kabuhi nga wala sing katapusan sa maayo nga kahimtangan.—Salmo 37:29.

Ang bata nga nagmasakit nag-ayo na kag ginahakos niya ang iya nanay.

Ang tigulang nga tawo nangin bataon na kag ginatulod niya ang wheelbarrow nga puno sang utan.

5. Ang mga promisa sang Biblia makabulig subong

Madamo nga tawo ang naluyahan ukon naugot pa gani sa mga problema nga nagakatabo subong. Ginatinguhaan gid sang iban nga mangin maayo ang sitwasyon. Tan-awa kon paano ang promisa sang Biblia nga mangin maayo ang sitwasyon sa ulihi nakabulig sa mga tawo subong. Tan-awa ang VIDEO, dayon binagbinaga ang masunod nga mga pamangkot.

VIDEO: Gusto Ko Dulaon ang Inhustisya (4:07)

Mga piktyur: Eksena sa video nga ‘Gusto Ko Dulaon ang Inhustisya.’ 1. Sang bata pa si Rafika, nga nagapamupo sang cotton upod sa mga tawo nga pareho sa iya ang rasa. 2. Nalipay gid si Rafika sang nakita niya nga nagatipon ang mga tawo nga sarisari ang rasa sang una niya nga pagtambong sang kombension sang mga Saksi ni Jehova.

Sa video, ano nga inhustisya ang naeksperiensiahan ni Rafika?
Bisan pa wala nadula ang inhustisya, paano ang Biblia nakabulig sa iya?

Ang paglaum sa palaabuton nga ginasiling sang Biblia makabulig sa aton nga indi maluyahan kag masarangan ang mga problema. Basaha ang Hulubaton 17:22 kag Roma 12:12, dayon binagbinaga ini nga mga pamangkot:

Ang paglaum bala nga ginasiling sang Biblia makabulig sa imo subong? Ngaa?

KON MAGSILING ANG IBAN: “Ang mga promisa sang Biblia sa palaabuton indi man mapatihan.”

Ngaa importante nga usisaon mo ang mga ebidensia nga mapatihan gid ini?

SUMARYO

Ang Biblia may mga promisa parte sa malipayon nga palaabuton. Nagahatag ini sa aton sang paglaum kag nagabulig sa aton nga masarangan ang mga problema subong.

Rebyu

Ngaa kinahanglan sang mga tawo ang paglaum?
Ano ang ginasiling sang Biblia parte sa palaabuton?
Paano ang paglaum sa palaabuton makabulig sa imo subong?

Petsa nga natapos ini nga leksion:

Ang Puede Mo Himuon

Usisaa pa gid ang mga promisa sang Biblia paagi sa pagbasa liwat sang mga bersikulo nga makita sa sini nga leksion.

Iban pa:

Your other goal

DUGANG NGA IMPORMASYON

Hibalua kon ano pa ang mabulig sang paglaum.

“Hope—Where Can You Find It?” (Awake!, Abril 22, 2004)

Hibalua kon paano ang paglaum sa palaabuton makabulig sa mga may malala nga balatian.

“Makabulig Bala ang Biblia Kon May Malala Ako nga Balatian?” (Artikulo sa website)

Samtang ginatan-aw mo ini nga music video, imadyina nga ara ka kag ang imo pamilya sa ginpromisa sang Biblia nga Paraiso.

Akon Handurawon (3:37)

Basaha kon paano nagbag-o ang kabuhi sang aktibista sang natun-an niya ang ginatudlo sang Biblia nga paglaum sa palaabuton.

“Indi Ko Na Kinahanglan Pa Bag-uhon ang Kalibutan” (Ang Lalantawan, Hulyo 1, 2013)