Ang Paagi sang Pagtudlo ni Jesus

ISA ka adlaw ginsingganan ni Jesus ang isa ka tao nga dapat niya higugmaon ang iya isigkatao. Ang tao namangkot kay Jesus: ‘Sin-o ang akon isigkatao?’ Bueno, nahibal-an ni Jesus ang ginahunahona sang tao. Naghunahona ang tao nga ang mga tao lamang nga kaliwat niya kag kaangay niya sing relihion ang iya mga isigkatao. Gani tan-awon ta kon ano ang ginsiling sa iya ni Jesus.

Nag-istorya sia tuhoy sa isa ka Judiyo kag isa ka Samaritano. Nahibal-an na naton nga indi luyag sang mga Judiyo ang mga Samaritano. Bueno, amo ini ang sugilanon ni Jesus.

Isa ka adlaw may isa ka Judiyo nga nagaduhog sa bukid padulong sa Jerico. Apang ginlumpatan sia sang mga kawatan. Ginkuha nila ang iya kuarta kag ginbakol sia tubtob nga daw patay na sia.

Sang ulihi, naglabay ang isa ka Judiyong saserdote. Nakita niya ang tao. Ano sa banta mo ang iya ginhimu? Ti, nagtabok sia sa pihak sang dalan kag nagpadayon. Nian may naglabay liwat. Isa sia ka Levita. Wala man sia magdulog sa pagbulig. Makita mo ang saserdote kag ang Levita sa malayo.

Apang sin-o ang nagabulig sa ginbakol? Isa sia ka Samaritano. Ginabulong niya ang mga pilas. Nian gindala niya ang Judiyo sa duog nga makapahuway sia kag mag-ayo.

Sang matapos ang sugilanon, si Jesus nagsiling: ‘Sin-o sa tatlo sa banta mo ang nangin isigkatao sa ginbakol nga tao?’

Ang tao nagsabat: ‘Ang Samaritano. Maluloy-on sia sa tao nga ginbakol.’

Si Jesus nagsiling: ‘Husto ina. Gani lakat ka kag himua man ini sa iban.’

Wala mo bala maluyagi ang paagi sang pagtudlo ni Jesus?