Isa ka Leksion Tuhoy sa Pagkamainayuhon

NAHIBALUAN mo bala kon ano ang pag-ihig-ihig?⁠— Bueno, ang pag-ihig-ihig amo ang pagkaugot sa isa ka tawo bangod lamang mahimo nga lain ang iya hitsura ukon mahimo nga lain ang iya hambal. Gani ang pag-ihig-ihig amo ang paghupot sing malain nga balatyagon ukon opinyon sa isa ka tawo antes mo sia makilala sing maayo.

Sa banta mo ayhan husto nga maugot ka sa isa ka tawo bisan pa nga indi mo pa sia kilala sing maayo kon ano sia nga sahi sang tawo ukon bangod lamang lain sia?⁠— Indi, ang pag-ihig-ihig indi husto, kag indi man ini mainayuhon. Indi kita dapat magpakita sing malain nga batasan sa isa ka tawo bangod lamang lain sia sa aton.

Hunahunaa ini. May kilala ka bala nga lain ang kolor sang iya panit ukon lain ang iya hambal sa imo?⁠— Ayhan may kilala ka pa gani nga mga tawo nga lain ang ila hitsura bangod naaksidente sila ukon nagamasakit. Mainayuhon ka bala kag mahigugmaon sa mga tawo nga lain sa imo?⁠—

Kon mamati kita sa Daku nga Manunudlo, nga si Jesucristo, mangin mainayuhon kita sa tanan. Indi dapat mangin importante sa aton kon diin nga pungsod maghalin ang isa ka tawo ukon kon ano ang kolor sang iya panit. Dapat kita mangin mainayuhon sa iya. Bisan pa indi tanan nga tawo subong sini, isa ini ka leksion nga gintudlo ni Jesus. Hambalan naton ini.

Ang isa ka Judiyo nga nagapang-ihig-ihig sa iban nagpalapit kay Jesus kag namangkot, ‘Ano ang dapat ko himuon agod mabuhi ako sing dayon?’ Nahibaluan ni Jesus nga luyag lamang sia pahambalon sang tawo nga dapat kita mangin mainayuhon sa aton lamang mga kaliwat ukon kasimanwa. Gani sa baylo nga sabton ang pamangkot, ginpamangkot ni Jesus ang tawo: ‘Ano ang ginasiling sang Kasuguan sang Dios nga dapat naton himuon?’

Ang tawo nagsabat: ‘Higugmaa si Jehova nga imo Dios sa imo bug-os nga tagipusuon, kag higugmaa ang imo isigkatawo subong sang imo kaugalingon.’ Si Jesus nagsiling: ‘Husto ang imo sabat. Padayuna ang paghimo sini kag matigayon mo ang kabuhi nga walay katapusan.’

Apang, indi luyag sang tawo nga mangin mainayuhon ukon mahigugmaon sa mga tawo nga lain sa iya. Gani nagtinguha sia nga mamalibad. Ginpamangkot niya si Jesus: “Sin-o gid bala ang akon isigkatawo?” Ayhan luyag niya nga isiling ni Jesus: “Ang imo mga isigkatawo amo ang imo mga abyan” ukon, “Amo sila ang mga tawo nga pareho sa imo sing hitsura.” Bilang sabat sa pamangkot, ginsaysay ni Jesus ang sugilanon tuhoy sa isa ka Judiyo kag isa ka Samaritano. Amo sini ang natabo.

May isa ka tawo nga nagdulhog gikan sa siudad sang Jerusalem pa Jerico. Ini nga tawo isa ka Judiyo. Samtang nagalakat sia, ginbanggaan sia sang mga kawatan. Ginsumbag nila sia tubtob nga natumba sia sa duta kag ginkuha ang iya kuwarta kag ang iya mga panapton. Ginsapote sia sang mga kawatan kag ginbiyaan nga halos patay na sa higad sang dalan.

Madugaydugay, naglabay ang isa ka saserdote. Nakita niya ang tawo nga nahalitan sing tama. Ano kuntani ang himuon mo?⁠— Bueno, ang saserdote naglikaw sa pihak sang dalan. Wala gani sia magdulog. Wala niya ginbuligan ang tawo.

Nian naglabay man ang isa ka relihioso nga tawo. Isa sia ka Levita nga nag-alagad sa templo sa Jerusalem. Madulog ayhan sia agod magbulig?⁠— Wala. Pareho gid sa saserdote ang ginhimo niya.

Sang ulihi, isa ka Samaritano ang naglabay. Makita mo bala sia nga nagapaliko sa dalan?⁠— Nakita niya ang Judiyo nga nagahamyang sa duta nga nahalitan sing tama. Sadto, ang mga Samaritano kag mga Judiyo wala gid nagasapakay. (Juan 4:⁠9) Gani pabay-an lamang bala sining Samaritano ang tawo? Magasiling bala sia sa iya kaugalingon: ‘Ngaa abi buligan ko ini nga Judiyo? Indi niya ako pagbuligan kon ako ang mahalitan?’

Bueno, gintulok sang Samaritano ang tawo nga nagahamyang sa higad sang dalan, kag naluoy sia. Indi niya mabatas nga pabay-an lamang sia nga mapatay. Gani nanaug sia sa sapat nga iya ginasakyan, ginpalapitan ang tawo, kag ginbulong ang iya mga pilas. Ginbubuan niya ini sing lana kag alak. Makabulig ini agod mag-ayo ang mga pilas. Nian ginsamburan niya sing tela ang mga pilas.

Mahalungon nga ginhakwat sang Samaritano ang nahalitan nga tawo kag ginpasakay sa iya sapat. Nian hinayhinay sila nga naglakbay tubtob nakalab-ot sila sa isa ka dalayunan, ukon gamay nga otel. Didto nag-arkila ang Samaritano sing hulot nga madayunan sang tawo, kag gin-atipan niya sia sing maayo.

Nian ginpamangkot ni Jesus ang tawo nga kahambal niya: ‘Sin-⁠o sa sining tatlo sa banta mo ang maayo nga isigkatawo?’ Ano ang isabat mo? Amo bala ang saserdote, ang Levita, ukon ang Samaritano?⁠—

Ang tawo nagsabat: ‘Ang tawo nga nagdulog kag nag-atipan sa nahalitan nga tawo amo ang maayo nga isigkatawo.’ Si Jesus nagsabat: ‘Husto ka. Lakat ka kag himua man ini.’​—⁠Lucas 10:25-⁠37.

Indi bala isa gid ini ka maayo nga sugilanon? Maathag nga ginapakita sini kon sin-⁠o ang aton mga isigkatawo. Indi lamang ang aton suod nga mga abyan. Kag indi lamang ang mga tawo nga pareho naton sing kolor sang panit ukon pareho naton sing hambal. Gintudluan kita ni Jesus nga mangin mainayuhon sa mga tawo bisan diin man sila maghalin, bisan ano man ang ila hitsura, ukon bisan ano man ang ila hambal.

Subong sini si Jehova nga Dios. Wala sia nagapang-ihig-ihig. ‘Ginapasubang sang inyo langitnon nga Amay ang iya adlaw sa malauton nga mga tawo kag sa maayo nga mga tawo,’ siling ni Jesus. ‘Kag nagapaulan sia sa maayo nga mga tawo kag sa mga indi maayo.’ Busa, dapat kita mangin mainayuhon sa tanan, kaangay sang Dios.​—⁠Mateo 5:​44-​48.

Gani kon may makita ka nga nahalitan, ano ang himuon mo?⁠— Ano kon ang tawo naghalin sa iban nga pungsod ukon ang kolor sang iya panit lain sa imo? Isigkatawo mo sia gihapon, kag dapat mo sia buligan. Kon sa banta mo indi mo sia mabuligan bangod gamay ka pa, mahimo ka mangayo sing bulig sa may edad na nga tawo. Ukon mahimo nga tawgon mo ang pulis ukon ang manunudlo sa eskwelahan. Pagpakita ini sing pagkamainayuhon, kaangay sang Samaritano nga tawo.

Luyag sang Daku nga Manunudlo nga mangin mainayuhon kita. Luyag niya nga buligan naton ang iban, bisan sin-⁠o man sila. Amo kon ngaa ginsaysay niya ang sugilanon tuhoy sa mainayuhon nga Samaritano.