Kapitulo 13
Tion sang Bag-o nga Kabuhi
ISA ka daku nga palaabuton ang maluwas sa katapusan sang malaut nga kalibutan karon. Nalangkag kita nga makapalayo sa mga inhustisya, kakagud kag kasingki sining kalibutan. Apang may butang pa nga kapin ka halandumon sang sa maluwas kita. Ano ina? Ang kamatuoran nga ang tanan nga mangin bahin sang “bag-ong duta” makatigayon man sing kahigayunan nga mahilway gikan sa ila mga dikahimpitan, gikan sa balatian kag kasakit sang kabuhi, huo, gikan sa kamatayon pa. (Bugna 21:1-5) Apang, agod mahanabo ini, dapat dulaon ang sala. Paano ina matabo? Naangot ini sa ginlaragway ni Jesucristo nga “bag-o nga kabuhi.”
2 Sa iya mga apostoles, si Jesus nagsiling: “Sa bag-o nga kabuhi, kon ang Anak sang tawo maglingkod sa iya trono nga mahimayaon, kamo nga nagsunod sa akon magalingkod man sa napulog-duha ka trono, nga nagahukom sa napulog-duha ka tribo sang Israel.” (Mateo 19:28) Ang bag-o nga kabuhi mangin isa ka tion sang “pagpasag-uli,” isa ka tion “nga ang tanan bag-uhon,” suno sa iban nga mga badbad sang Biblia. (The Emphasised Bible, ni Rotherham; The Jerusalem Bible) Paagi sa sining bag-o nga kabuhi, mangin posible para sa mga tawo nga maagom liwat ang kahimpitan nga yara sa tawo sang ginsuguran.
3 Bangod sang sala nga napanubli kay Adan, ang tanan nga anak niya dapat mapatay, kag madamo ang nag-antos sing makapasubo nga balatian nga nagdul-ong sa kamatayon. (Roma 5:12) Indi mabakal sang kuwarta ang kahilwayan gikan sa kamatayon. Wala sing hilikuton nga mahimo ang dihimpit nga tawo nga magahimo sa iya nga takus hilwayon ukon ang iban. Suno sa balaan nga katarungan, agod matigayon liwat sang katawhan ang kahigayunan nga mabuhi sing dayon, dapat ihalad ang isa ka halad nga tupong sa bili sang nadula ni Adan, nga amo, ang himpit nga tawhanon nga kabuhi. Wala sa mga anak ni Adan ang makahalad sina nga kabuhi.—Salmo 49:7-9; Manugwali 7:20.
4 Sing maluluy-on, naghimo si Jehova sing kinahanglanon nga aman paagi sa pagpadala sang iya bugtong nga Anak, si Jesus, sa duta subong isa ka himpit nga tawo agod ihalad ang iya kabuhi subong “tumbas nga gawad.” (1 Timoteo 2:5, 6) Daw ano ka dalayawon nga pagpasundayag sing dibagay nga kaluoy kag sang gugma sang Dios sa katawhan! Ang kabuhi nga nangin posible bangod sini indi isa ka butang nga aton makuhaan sing kinamatarong subong sang suweldo kundi isa ka regalo gikan sa Dios. Apang, ginahatag lamang ini sa mga tawo nga nagakilala gid sang ila pagkinahanglan sa sining balaan nga aman, nagatuo sa sini kag nagapasundayag sina nga pagtuo paagi sa pagtuman sa Anak sang Dios. (Roma 6:23; Juan 3:16, 36) Apang san-o maeksperiensiahan sang katawhan ang mga benepisyo sina nga halad?
MGA BENEPISYO KARON GIKAN SA HALAD NI CRISTO
5 Ang mga benepisyo nag-apektar sa gilayon sang kabuhi sang tawo sa tapos ginpresentar ni Jesucristo (sa papel sang dakung Mataas nga Saserdote sang Dios) ang bili sang iya halad sa atubangan sang Dios sa langit. Una, sugod sang Pentecostes 33 C.E., ining mga benepisyo naeksperiensiahan sang mga gintawag nga mga manunubli kaupod ni Cristo, nga magaalagad subong mga hari kag mga saserdote upod sa iya sa langit. (Binuhatan 2:32, 33; Colosas 1:13, 14) Nian, sing talalupangdon sang 1935, ang mga tawo nga nagbaton sang paglaum nga dayon nga kabuhi sa duta nagsugod sa pagpakita sang ila kaugalingon. Ang ila paglaum man nangin posible bangod sang halad ni Cristo. (1 Juan 2:1, 2) Ining progresibo nga aplikasyon sang bili sadto nga halad ginpakita sang mga hitabo nga natabo sa Adlaw sang Katumbasan sang dumaan nga Israel.
6 Ang nagahalad sa balaan nga tabernakulo sang Israel, kag sang ulihi sa templo, amo anay ang isa ka mataas nga saserdote nga isa ka katapo sang Levinhon nga panimalay ni Aaron. Ang iban nga mga lalaki sa panimalay ni Aaron mga kabulig nga saserdote, kag ang nabilin nga mga lalaki sa tribo ni Levi nag-alagad subong ila mga kabulig. Sa pag-aman sing tabon sa mga sala, ang mataas nga saserdote nagahalad sing duha ka sapat, nga ang dugo sang tagsatagsa sini ginapresentar sing tuhay sa Labing Balaan, subong amo ang ginpatuman ni Jehova. Ang una amo ang tinday nga baka nga ginahalad sang Aaroniko nga mataas nga saserdote para sa “iya kaugalingon kag sa iya panimalay,” nga nagalakip sang bug-os nga tribo ni Levi. (Levitico 16:11, 14) Masunod amo ang kanding nga ginadulot subong halad tungod sa sala “para sa katawhan,” ang napulog-duha ka tribo. (Levitico 16:15) Dugang pa, ang mga sala sang bug-os nga Israel ginatu-ad sa ibabaw sang ulo sang buhi nga kanding, kag dayon ginabuhian sa kamingawan. (Levitico 16:21, 22) Ano ang kahulugan sining tanan?
7 Ginapaathag ni apostol Pablo nga ang katumanan sini nasentro sa isa ka halad ni Jesucristo. “Si Cristo nagsulod, indi sa balaan nga duog nga ginhimo sang mga kamut, nga kaangay sang matuod, kundi sa langit gid, karon sa pagpahayag sa atubangan sang Dios tungod sa aton . . . sa pagwala sang sala paagi sa paghalad sang iya kaugalingon.” (Hebreo 9:24-26) Nian ngaa gindala ang dugo sang kapin sa isa ka sapat sa Labing Balaan sa Adlaw sang Katumbasan sang Israel anay? Amo sadto agod ipatalupangod ang nanuhaytuhay nga bahin sang himuon sang himpit nga tawhanon nga halad ni Jesus. Kag isa pa ka bahin ang ginpadaku paagi sa pagtu-ad sang mga sala sang pungsod sa ibabaw sang ulo sang buhi nga kanding kag dayon ginabuhian sa kamingawan.
8 Subong nga ang dugo sang tinday nga ginhalad para sa panimalay ni Aaron una nga gindala sa Labing Balaan, gani man ang mga benepisyo sang halad ni Jesus gin-aplikar una para sa mga makaupod ni Cristo sa langitnon nga pagkasaserdote. Ginhimo ini kutob sang 33 C.E. Si Jesucristo wala sing mga sala nga dapat tumbasan, subong sang kay Aaron, apang may sala ang iya mangin kabulig nga mga saserdote. Ginlaragway ini sila sang tribo ni Levi. (1 Pedro 2:4, 5) Ang pagpresentar sang dugo gikan sa ikaduha nga halad, ang kanding sang halad tungod sa sala “para sa katawhan,” nagpakita nga ang iban sa katawhan magabenepisyo gikan sa halad ni Jesus sa tapos sang langitnon nga klase. Mga tawo ini sila nga makatigayon sing kabuhi sa napasag-uli nga Paraiso sa duta. Ginlaragway sila sang “napulog-duha ka [indi saserdotenhon] nga mga tribo sang Israel” sa Adlaw sang Katumbasan. (Mateo 19:28; Salmo 37:29) Indi lamang nga si Jesus napatay tungod sa ila tanan sini, kundi ginadala niya ang mga sala sang mga tawo nga para sa ila napatay sia sing mahalaron kag nagdala sa ila sing paumpaw. Ginapakita ini sang kamatuoran nga, sa ulihi, sa tapos matu-ad ang mga sala sang Israel sa ibabaw sang buhi nga kanding, ginbuhian ini sa kamingawan, nga indi na makita liwat.—Salmo 103:12; Isaias 53:4-6.
9 Para sa tanan nga nagatuo sa mahigugmaon nga aman ni Jehova paagi kay Cristo, ang matuod nga kapatawaran sang mga sala kag matinlo nga tindog sa atubangan sang Dios, posible karon walay sapayan sang ila nagligad nga dalanon sang pagkabuhi. Makatigayon sila sing indi mabilihan nga pagpakamaayo sang paghalad sing balaan nga pag-alagad sa Dios upod ang matinlo nga konsiensia. (1 Corinto 6:9-11; Hebreo 9:13, 14) Apang wala ini nagakahulugan nga sa karon ginahatagan sila sing kabuhi nga hilway sa tanan nga epekto sang sala. (1 Juan 1:8-10; Roma 7:21-25) Para sa mga magagahom sa langit upod kay Cristo, ina nga kabuhi maagom lamang kon matapos na nila ang ila dutan-on nga dalanon kag banhawon padulong sa pagkadimamalatyon sa langit. Para sa iban nga katawhan, ang kompleto nga paumpaw gikan sa sala mangin posible paagi sa bag-o nga kabuhi.
“BAG-O NGA KABUHI”
10 Subong ginsiling ni Jesus, ang bag-o nga kabuhi matabo “kon ang Anak sang tawo [Jesucristo] nagalingkod sa iya trono nga mahimayaon.” (Mateo 19:28) Sa pagkamatuod, wala matabo ang tanan nga butang sa gilayon nga nakalingkod na sia sa trono. Sa tapos makalingkod sa trono si Jesus sang 1914 C.E., gintinloan niya anay ang langit kag gintabog si Satanas kag ang iya mga demonyo. Nian ginbanhaw niya ang iya hinaplas nga mga sumulunod sa langitnon nga himaya. (Bugna 12:5, 7-12; 1 Tesalonica 4:15-17) Wala lamang ginhatagan sing “napulog-duha ka trono” ang matutom nga mga apostoles ni Cristo nga ginsaad sa ila, kundi sing progresibo ang tanan nga iban pa sa 144,000 ginapalingkod sa trono sa langit sa ila pagkabanhaw gikan sa minatay.—Bugna 3:21.
11 Samtang nagahingapos ang pagpili sa mga tawo nga magahuman sang langitnon nga klase, ang pagtipon sa dakung kadam-an sang “iban nga mga karnero” nagsugod, labi na kutob sang 1935. Ini man sila, nagsugod sa pagtigayon sing mga benepisyo gikan sa halad ni Cristo, ‘nagabunak sang ila mga panapton nga malaba kag nagapaputi sini sa dugo sang Kordero.’ Ginabuligan sila sa ‘pagsuklob sing bag-ong pagkatawo nga gintuga suno sa kabubut-on sang Dios sa matuod nga pagkamatarong kag pagkatutom.’ (Bugna 7:9, 10, 14; Efeso 4:20-24) Nagadamo ang ila kadamuon, nagabenepisyo sila gikan sa mga aman sang Dios paagi kay Cristo nga makadul-ong sa ila pagkabuhi sing dayon sa napasag-uli nga Paraiso.—Bugna 7:17; 22:17.
12 Sa dili madugay, karon, ang malaut nga kalibutan pagalaglagon. Si Satanas kag ang iya mga demonyo itagbong sa kadadalman. Ang isa ka libo ka tuig nga Adlaw sang Paghukom para sa katawhan magasugod. Si Jesucristo amo ang mangin Nagadumala nga Hukom, kag pat-uron niya nga ang tanan mahatagan sing bug-os nga kahigayunan kag daku nga bulig agod nga makatuon sila sang matarong nga mga dalanon ni Jehova kag makasunod sa sini. Ang hinaplas nga mga sumulunod ni Cristo nga nagpamatuod sang ila kaugalingon subong nagahupot sing integridad tubtob sa kamatayon magaambit upod sa iya sa hilikuton, ‘nga nagahukom sa napulog-duha ka tribo sang Israel.’ (Lucas 22:28-30; Bugna 20:4, 6) Wala ini nagakahulugan nga ang hukman lamang nila amo ang kinaugali nga mga anak sang Israel. Sa baylo, hukman nila ang tanan nga ginlandong sang “napulog-duha [indi saserdotenhon] ka tribo sang Israel” sa Adlaw sang Katumbasan. Nagalakip ini sa bug-os nga kalibutan sang gingawad nga katawhan. (1 Corinto 6:2) Ang mga makalampuwas sa dakung kapipit-an mangin amo ang una nga makabenepisyo gikan sa sini nga programa sa pagbayaw sa katawhan. Apang binilyon pa ang makaambit man, kay ang mga hukman magalakip sa “mga buhi kag mga patay.” (2 Timoteo 4:1; Binuhatan 24:15) Daw ano ka makakulunyag kon ang mga patay nga nalakip sa halad nga gawad ni Cristo magabalik! Daw ano nga mga luha sang kalipay kon ang mga nagahigugmaanay magkitaay liwat!
13 Mangin tion ini nga, sa katapusan, ang katawhan mahilway sa pisikal kag mental nga mga balatian nga bunga sang sala. Sang yari sa duta, gin-ayo sa gilayon ni Jesus ang mga tawo nga paralitiko, bulag ukon bungol ukon apa, kag ang mga tawo nga ang ila unod nadeporma ukon ang ila kusog nagluya bangod sang balatian. Yadtong gamhanan nga mga binuhatan isa lamang ka laragway sang iya himuon para sa tanan nga katawhan sa tion sang iya Isa ka Libo ka Tuig nga Paggahom. Upod ang maayong rason, ang bisan sin-o nga makasaksi ukon makaeksperiensia sinang dalayawon nga pamatuod sang kaluoy ni Jehova kag dayon magasikway sa iya pagkasoberano pagalaglagon sing dayon. Apang paagi sa pagtuon sang matarong nga mga dalanon ni Jehova, ang panghunahuna kag motibasyon sang mga nagapasundayag sing sinsero nga pagtuo kag pagkamatinumanon amat-amat nga magauswag tubtob nga matigayon nila ang bug-os nga kahimpitan. Sila nga mga nagahigugma kay Jehova makaeksperiensia gid sing pagpasag-uli, isa ka bag-o nga kabuhi. Daw subong bala nga hatagan sila sing bag-ong nga umpisa sa kabuhi upod ang bag-o nga amay, ang Dayon nga Amay, si Jesucristo.—Isaias 26:9; 9:6.
14 Nian, sa tapos makapasar sa katapusan nga pagtilaw sa katapusan sang isa ka libo ka tuig, adoptahon sila ni Jehova nga Dios paagi kay Cristo subong kaugalingon nga mga anak sang Dios, subong bahin sang Iya himpit unibersal nga pamilya. Daw ano ka makapalig-on nga paglaum ini—indi lamang para sa mga makalampuwas sa dakung kapipit-an kundi para man sa tanan nga minatay nga banhawon agod makaambit sa kalipay sang kabuhi sa Paraiso nga duta!—Roma 8:20, 21.
[Mga Pamangkot sa Pagtinuon]
1. (a) Anong dalayawon nga kahigayunan ang magahulat sa mga makalampuwas padulong sa “bag-ong duta”? (b) Apang ano ang kinahanglan sina?
2. Ano ang “bag-o nga kabuhi” nga ginpatuhuyan sa Mateo 19:28?
3. (a) Ano ang nangin resulta sang sala ni Adan? (b) Ngaa wala sa mga anak ni Adan ang makahilway sang ila kaugalingon gikan sa mga epekto sang napanubli nga sala?
4. (a) Paano gin-aman ang kinahanglanon nga gawad? (b) Paano kita makabenepisyo gikan sa sini?
5. (a) Sin-o ang una nga nakabenepisyo gikan sa halad ni Cristo? (b) Ano pa nga grupo ang nakabenepisyo, kag labi na kutob san-o?
6. Balaya sa malip-ot ang natabo sang Adlaw sang Katumbasan.
7. (a) Anong isa ka halad ang ginlandong didto? (b) Ngaa kapin sa isa ka sapat nga halad ang gingamit?
8. (a) Paano ang mga paagi sa Adlaw sang Katumbasan nagapakita kon sin-o ang una nga makabenepisyo gikan sa halad ni Cristo? (b) Ano nga aplikasyon sang halad ni Jesus ang ginapakita sang halad tungod sa sala “para sa katawhan”? (c) Ano pa nga kamatuoran ang ginailustrar sang pagbuhi sa kanding sa kamingawan?
9. (a) Anong mga pagpakamaayo ang ginaagom karon sang mga nagatuo sa halad ni Cristo? (b) Ano pa nga mga benepisyo ang magaabot sa ulihi?
10. (a) San-o nagsugod ang bag-o nga kabuhi? (b) May nahatagan na bala sing mga trono sa katumanan sang saad ni Jesus?
11. Sa anong paagi mabatyagan na sang “iban nga mga karnero” ang mga epekto sang bag-o nga kabuhi?
12. (a) Sin-o ang ginlaragway sang “napulog-duha ka tribo sang Israel” nga ginpatuhuyan diri ni Jesus? (b) Sin-o luwas pa sa mga makalampuwas ang makabenepisyo gikan sa bag-o nga kabuhi?
13. Paano ang mga epekto sang isa ka libo ka tuig nga Adlaw sang Paghukom isa gid ka bag-o nga kabuhi?
14. Anong hamili nga kaangtanan ang matigayon sang tanan nga makapasar sa katapusan nga pagtilaw?