Pagbag-o sa Tanan nga Butang
“Ang Isa nga nagalingkod sa trono nagsiling: ‘Yari karon! ginabag-o ko ang tanan nga butang.’ Nagsiling man sia: ‘Isulat ini, kay ining mga pulong masaligan kag matuod.’”—BUGNA 21:5.
1, 2. (a) Ano ang ginpamangkot ni Solomon sang nagligad nga tatlo ka milenyo? (b) Ano sa karon ang daw nagasumpakil sa mga pulong ni Solomon?
“WALA sing bag-o nga butang sa idalom sang adlaw.” Amo ini ang mga pulong sang maalam nga si Hari Solomon. Sa pagpadayon, sia namangkot: “May butang bala nga nahanungod sini sarang masiling: ‘Tan-awa, bag-o ini’?” (Manugwali 1:9, 10) Paano naton sabton ini nga pamangkot karon?
2 Wala bala ang siensya kag teknolohiya nagdala sing madamo nga bag-ong mga butang sa sining ika-20 nga siglo? Tan-awa lamang ang kalibutan sang paglakbay, ang jet nga mga eroplano sini, ang madasig nga mga awto, kag ang mga bullet train. May yara man makatilingala nga mga pag-uswag sa telekomunikasyon, sa paggamit sing nagaorbit nga mga satelayt, kag sa paglansar sing mga salakyan sa espasyo nga nagpahugpa sang mga tawo sa bulan. Kag kamusta ang moderno nga mga kasangkapan sa kusina, mga repridyeretor, kag mga makina sa paglaba nga nagapuni sa madamo gid nga kabalayan? Ang iban nga mga tawo mahimo magasiling, ‘Ti, may bag-o gid sa idalom sang adlaw!’
3. Anong makakulugmat nga kahimtangan ang nagluntad diri “sa idalom sang adlaw”? (Lucas 21:25, 26; Salmo 53:1)
3 Apang hulat anay! May yara man makahaladlok, makatulublag gid, nga makita sa idalom sang adlaw. Ano ina? Ti, ang duta nangin isa ka kampo nga naarmasan! Nagsugod ini sang 1914 sang magdabdab ang Inaway Kalibutanon I. Sa una nga tion, ang mga machine guns, mga eroplano, mga tangke, kag mga submarino gingamit sa inaway. Sa wala pa ang 30 ka tuig, nagsunod ang Inaway Kalibutanon II. Apat ka beses ang kalabawon sang pagkamalaglagon sini sa kabuhi kag sa pagkabutang sang sa una nga kalibutanon nga inaway. Makahaladlok nga naggamit ini sing labi pa ka makamamatay nga mga hinganiban—flamethrower, napalm bomb, kag sang ulihi bomba atomika—ang manughanda sang dalan para sa demoniko nuklear nga mga kasangkapan nga karon nagabutang sa katalagman sang kaluwasan sang katawhan diri sa duta.
4. (a) Ano nga balayan ang ginapatuhuyan ni Solomon sa paghambal sing “wala sing bag-o nga butang”? (b) Paano ang kaalam kag gugma sang Dios kitaon sa iya nahimo kag ano pa ang iya himuon “sa idalom sang adlaw”?
4 Makasiling gid bala kita, nian, nga “wala sing butang nga bag-o sa idalom sang adlaw”? Huo, makasiling kita sini, kay ining tanan nga produksion natabo sa sulod sang balayan sang materyal nga kalibutan nga ginapuy-an sang katawhan. Bisan pa kon magpalupok ang tawo sing hydrogen-fusion nga mga bomba, indi ini butang nga bag-o. Ang hydrogen fusion nagakatabo na sa adlaw sa binilyon ka tuig. Amo ini ang tuburan sang daku nga enerhiya nga nagaiwag, nagapainit, kag nagapapagsik sang aton duta. Ang kapawa gikan sa adlaw may ginatuga man reaksion sa chlorophyll sa berde nga mga tanom, nagapadamo sang kalamay kag starch nga amo ang pinakakalan-on sang indi maisip nga buhi nga mga butang sa palibot naton. Makapasalamat gid kita nga ang labing maalam nga Manunuga sang duta naghimos sining kontrolado, mapuslanon nga pagpaguwa sing nuklear nga enerhiya para sa aton duta! (Salmo 104:24) Bisan pa ang didiosnon nga mga tawo nagaplano sa paggamit sang nuklear nga mga imbento para sa pagpatay sa madamo, makalilipay nga “laglagon [sang Dios] ang mga nagalaglag sang duta.”—Bugna 11:18.
5. (a) Ngaa husto si Solomon sa paghambal: “Wala sing bag-o nga butang sa idalom sang adlaw”? (b) Paano ang estilo sang kabuhi sang dihimpit nga tawo nagapamatuod sa mga pulong ni Solomon?
5 Husto si Solomon sa pagsiling: “Wala sing bag-o nga butang sa idalom sang adlaw.” Kay wala sing bag-o nga butang nahanungod sa mga materyalis, sa tuburan sang enerhiya, kag sa kinaugali nga kasuguan nga nagaporma sang sadsaran para sa pisikal nga sistema sang mga butang sang duta. Madugay na ini nga bahin sang tinuga sang Dios. (Salmo 24:1; Bugna 4:11) Wala sing bag-o nga butang sa pagbutlak kag sa pagtunod sang adlaw, sa bitula sang panahon, kag sa kinaugali nga siklo sa pagbunyag kag sa pagpabag-o sa duta. Kag tuhoy sa estilo sang kabuhi sang dihimpit mamalatyon nga tawo, wala gid sing bag-o nga butang, walay sapayan sang nagabalhin nga mga uso. Bisan sa manggaranon nga mga katilingban, ang kabuhi sang madamo nangin sulit-sulit, kag sa ulihi nangin “makatalaka.” Sa sulod sang mga 70 ukon 80 ka tuig, ang makasasala nga tawo ‘nagalakat padulong sa iya dayon nga puluy-an’—ang lulubngan. Subong ginasiling ni Solomon: “Ang nagligad na amo ang magaabot; kag ang nahimo na amo ang himuon; kag gani wala sing bag-o nga butang sa idalom sang adlaw.”—Manugwali 1:4-9; 12:5.
“Bag-o nga Tinuga” sa Idalom sang Adlaw
6. (a) Ngaa indi dapat paabuton ang pagtuga sing bag-o nga mga butang sa malapit nga palaabuton? (b) Paano kag san-o si Jehova nagtuga sing butang nga “bag-o sa idalom sang adlaw”?
6 Sa pagkamatuod, sa pisikal nga paagi “wala sing bag-o nga butang sa idalom sang adlaw”; ukon indi man si Jehova magtuga sing bag-o nga materyal nga mga butang sa sulod sang karon nga 7,000-ka-tuig nga adlaw sang pagpahuway gikan sa iya mga buhat sang pagpanuga. Apang may bag-o nga butang nga nagguwa sa idalom sang adlaw. San-o? Natabo ini sang tuig 2 B.C.E. sang ang anghel ni Jehova hinali nga nagpakita sa kubos nga mga manugbantay sang mga karnero malapit sa Betlehem agod ibalita ang bag-o nga balita. Sia nagsiling: “Yari karon! Ginatunda ko sa inyo ang maayong balita sang dakung kalipay nga manginsa bug-os nga katawhan, kay natawo sa inyo karon nga adlaw sa siudad ni David ang Manluluwas, nga si Cristo nga Ginuo.” Nian ginbuylugan sia sang isa ka kadam-an sang balaan nga mga anghel sa pagdayaw sa Dios kag nagasiling: “Himaya sa Dios sa kahitaasan, kag paghidait sa duta sa tunga sang mga tawo nga may maayong kabubut-on.”—Lucas 2:8-14.
7. (a) Anong bag-o nga butang ang natabo sang ginbawtismuhan si Jesus? (b) Paano ginbuksan ni Jesus ang dalanon para sa dugang pa nga mga hitabo?
7 Sa edad nga 30 anyos, ginbawtismuhan ining Manluluwas sa tubig sang Jordan. Sa gilayon, natabo ang isa pa ka bag-o nga butang sa idalom sang adlaw. Ginalaragway ini sang Lucas 3:21, 22, sa sining mga pulong: “Sang nagapangamuyo [si Jesus], nagbukas ang langit kag ang balaan nga espiritu nagkunsad sa dagway nga lawasnon subong sang salampati sa ibabaw niya, kag nagguwa ang tingog sa langit: ‘Ikaw ang akon Anak, nga hinigugma; sa imo nahamuot ako.’” Sa sadto nga punto si Jesus nangin “bag-o nga tinuga,” isa ka hinaplas sang espiritu nga Anak sang Dios. (2 Corinto 5:17) Sa sulod sang nagsunod nga tatlo ka tuig kag tunga, nagpanaksi sing daku si Jesus sa Ginharian sang Dios, kag gintipon niya ang iya unang mga disipulo. Nian, sang 33 C.E., sa tapos sang iya mahalaron nga kamatayon kag pagkabanhaw subong espiritu, nagpakita si Jesus “sa atubangan sang Dios” agod buksan ang dalan para sa dugang pa nga makatilingala nga mga hitabo diri sa “idalom sang adlaw.”—Hebreo 9:24; 1 Pedro 3:18.
8. Paano gintuga ang “bag-o nga tinuga”?
8 Sang adlaw sang Pentecostes sadto nga tuig, ginpasagahay ni Jesus ang balaan nga espiritu sa iya matutom nga mga disipulo, sa pagpakita nga sila ginhiusa sa iya subong mga anak sang Dios. Si apostol Pablo naghambal tuhoy sining “bag-o nga tinuga” sa 2 Corinto 5:17, 18, nga nagasiling: “Kon ang bisan sin-o nga tawo yara kay Cristo, bag-o sia nga tinuga; ang daan nagtaliwan, yari karon! ang bag-o nga mga butang nagluntad. Apang ang tanan nga butang gikan sa Dios, nga nagpasag-uli sa aton sa iya kaugalingon paagi kay Cristo kag naghatag sa aton sing ministeryo sang pagpasag-uli.”
9. Ano nga katuyuan ang gintuman sang “bag-o nga tinuga”?
9 Ginpatuhuyan ni apostol Pedro ining “bag-o nga tinuga,” nga nagasiling: “Kamo ‘pinili nga kaliwatan, harianon nga pagkasaserdote, balaan nga pungsod, katawhan nga isa ka pinasahi nga pagkabutang, agod nga ibantala ninyo sa luwas ang gamhanan nga mga butang’ sang nagtawag sa inyo gikan sa kadudulman pakadto sa iya kalatingalahan nga kapawa.” (1 Pedro 2:9) Samtang diri sa duta, ang harianon nga pagkasaserdote makugi nga nagbantala “sang gamhanan nga mga butang sang Dios” nga may kaangtanan sa iya mga katuyuan paagi sa Ginharian. Ang mga katapo sining “bag-o nga tinuga” nga nakatapos sang ila dutan-on nga dalanon sing matutom ginbanhaw sa tapos si Jesus nagsulod sa templo ni Jehova.—Binuhatan 2:11; Roma 8:14-17; Malaquias 3:1, 2.
“Ang Pagtuga Liwat”
10. (a) Ano ang ginsiling ni Jesus nahanungod sa “pagtuga liwat”? (b) Sa ano gin-agda nga mag-ambit ang mga katapo sang “bag-o nga tinuga”?
10 Apang, ining “bag-o nga tinuga” nga nagsugod kay Jesucrsito amo lamang bala ang “bag-o” nga butang nga nagguwa “sa idalom sang adlaw”? Indi! Samtang yari pa sa duta, si Jesus nagsiling sa iya mga disipulo: “Sa pagkamatuod nagasiling ako sa inyo, Sa pagtuga liwat, kon ang Anak sang tawo maglingkod sa iya mahimayaon nga trono, kamo nga nagsunod sa akon magalingkod man upod sa napulog-duha ka trono, nga nagahukom sa napulog-duha ka tribo sang Israel.” (Mateo 19:28) Ang “diutay nga panong” ni Jesus nga mga natilawan kag napamatud-an nga mga disipulo—144,000 sila—ginaagda sa pag-ambit kay Jesus sa iya Ginharian kag ‘maglingkod sa mga trono sa paghukom sa napulog-duha ka tribo sang Israel.’—Lucas 12:32; 22:28-30; Bugna 14:1-5.
11. Anong duha ka bahin sang halad ni Jesus ang ginlaragway sa Adlaw sang Katumbasan, kag paano?
11 Sin-o, nian, ining “napulog-duha ka tribo”? Ang kahimusan nga ginhimo ni Jehova para sa Adlaw sang Katumbasan sa dumaan nga Israel nagahatag sing ideya. Kada tuig, sa ikapulo nga adlaw sang ikapito nga bulan, ang mataas nga saserdote nagahalad sing toro nga baka subong halad sa sala “para sa iya kaugalingon kag sa iya panimalay.” Naglaragway ini sa halad ni Jesus nga gin-aplikar sa “iya panimalay” sang kabulig nga mga saserdote. Apang kamusta naman ang iban nga mga Israelinhon? Masunod, papalaran sang mataas nga saserdote ang duha ka kanding. Ang isa sini ginaihaw niya subong “ang kanding sang halad tungod sa sala, nga para sa katawhan.” Sa tapos matu-ad ang mga sala sang katawhan sa ibabaw sang ikaduha nga kanding, ginabuhian niya ini padulong sa kahanayakan. Sa amo ining duha ka kanding naglaragway sang pagbubo ni Jesus sang iya dugo nga kabuhi subong halad kag sang iya bug-os nga pagdala sang mga sala sang tanan nga katawhan luwas sa iya saserdotenhon nga panimalay.—Levitico 16:6-10, 15.
12. Paano ginapaathag sang isa ka diksionaryo ang kahulugan sang “pagtuga liwat”?
12 “Ang napulog-duha ka tribo sang Israel” may pareho nga kahulugan sa Mateo 19:28. Ang aplikasyon sini indi lamang para sa hinaplas sang espiritu nga kabulig nga mga saserdote ni Jesus kundi nagalakip man sa nabilin tanan nga bahin sang katawhan. Ang An Expository Dictionary of New Testament Words, ni W. E. Vine, nagapaathag sang Griegong tinaga nga gingamit diri para sa “pagtuga liwat,” nga pa·lin·ge·ne·siʹa, subong “bag-o nga pagkabun-ag . . . espirituwal nga pagkabun-ag liwat,” kag nagdugang: “Sa Ma[teo] 19:28 ang tinaga gingamit, sa diskurso sang Ginuo, sa mas masangkad nga kahulugan, tuhoy sa ‘pagpasag-uli sang tanan nga butang’ (Binu. 3:21, R.V.), sang, subong resulta sang Ikaduha nga Pagkari ni Cristo, ‘ginapalingkod [ni Jehova] ang Iya Hari sa Iya Balaan nga bukid sang Sion’ (Sal. 2:6) . . . Paagi sa amo matuman ang pagluwas sa kalibutan gikan sa gahom kag paglimbong ni Satanas kag gikan sa mapiguson kag dicristiano nga mga manuggahom sang mga pungsod.”
13. (a) Ano ang ginapakita sang nanuhaytuhay nga bersion sang Biblia subong kahulugan sang pa·lin·ge·ne·siʹa? (b) Gani ano ang matabo “sa idalom sang adlaw”?
13 Nahisanto sa sini, ang mga badbad sang Biblia nagabadbad sang pa·lin·ge·ne·siʹa sing nanuhaytuhay subong: pagkabun-ag liwat, bag-ong kalibutan, bag-ong pagkatawo, kalibutan nga nabun-ag liwat, kalibutan nga maabot, Bag-ong Tinuga, bag-ong kahimusan sang kabuhi, bag-ong dag-on. Nahangpan mo bala ina? “Ang napulog-duha ka tribo sang Israel,” nga nagarepresentar sa tanan nga katawhan, pagahukman ni Cristo kag sang iya matutom nga kabulig nga mga saserdote. May kaangtanan ini sa pagkabun-ag liwat, isa ka daku nga pagbag-o sang tanan nga gintuyo ni Jehova para sa sining duta, diri “sa idalom sang adlaw.”
“Ang Tion sang Pagpasag-uli”
14. (a) Suno sa Binuhatan 3:20, 21, ano ang dapat hulaton ni Jesus? (b) Paano kag san-o ginpalingkod si Jesus subong Hari?
14 San-o matabo inang pagkabun-ag liwat? Sa Binuhatan 3:20, 21, si Pedro nagahambal tuhoy kay “Jesus, nga dapat huptan sang langit tubtob sa tion sang pagpasag-uli sang tanan nga butang nga ginpamulong sang Dios paagi sa baba sang iya balaan nga mga manalagna sang dumaan nga tion.” Nagatudlo ini sa paghulat ni Jesus sa tuohan sang Dios sa mga langit tubtob “matuman ang gintangdo nga tion sang mga pungsod.” (Lucas 21:24; Salmo 110:1, 2) Nian, sang 1914, ginpalingkod gid sa pagkamatuod ni Jehova ‘ang iya hari sa Sion, sa iya balaan nga bukid.’ Ano nga pagpasag-uli ang natabo sadto?—Salmo 2:6.
15. (a) Ano ang natabo “sa idalom sang adlaw” sa tapos si Jesus makalingkod sa trono? (b) Paano natuman ang Mateo 25:31-34 kag Isaias 11:6-9?
15 Una, nakita ang isa ka bag-o nga butang sa idalom sang adlaw, bangod ang nabilin nga matutom nga kabulig nga mga saserdote ni Cristo—ang katapusan nga mga katapo sang “bag-o nga tinuga”—gintipon kag nagsugod sa ‘pagbantala sining maayong balita sang natukod nga Ginharian.’ Masunod, ang “dakung kadam-an” ginatipon “gikan sa tanan nga pungsod” para sa kaluwasan sa “dakung kapipit-an.” (Mateo 24:14; Bugna 7:9, 14) Sa karon ang nakalingkod sa trono nga Hari, si Jesucristo, nagapain sang mga tawo, “subong sang manugbantay nga nagapain sang mga karnero gikan sa mga kanding.” “Ang mga karnero” amo sila nga nagapakita sang ila kaugalingon subong matarong sa Hari kag sa iya hinaplas sang espiritu nga mga utod sang “bag-o nga tinuga.” Busa, ining “mga karnero” ginaagda sa pagpanubli sing walay katapusan nga kabuhi sa dutan-on nga bahin sang Ginharian ni Jehova. Ginaagom na nila ang espirituwal nga paraiso nga napasag-uli diri sa duta.—Mateo 25:31-34, 46; Isaias 11:6-9.
16. (a) Ano nga paghukom ang ginahimo karon? (b) Anong dugang pa nga paghukom ang matabo sa tapos sang Armagedon?
16 Ang paghukom sa mga pungsod kag sa “mga karnero” sa karon nga tion amo ang tuhoy sa pagkatakus sa kaluwasan sa tion sang “dakung kapipit-an.” (Mateo 24:21, 22) Apang, amo bala ini ang paghukom nga ginpatuhuyan sa Mateo 19:28? Indi, kay dugang pa nga paghukom ang himuon ni Cristo kag sang iya kabulig nga mga saserdote sa tapos sinang kapipit-an. Amo ini ang paghukom sa malaragwayon nga “napulog-duha ka tribo sang Israel,” ang katawhan nga luwas sa harianon nga pagkasaserdote. Ang numero nga “napulog-duha” nagapakita sing pagkabug-os sang katawhan nga pagahukman. Nagalakip ini sa mga makalampuwas sa “dakung kapipit-an,” sa mga anak nga ipanganak nila, kag sa binilyon ka katawhan nga banhawon sa duta.
17. Sin-o ang hukman sa amo nga tion, kag suno sa ano nga “mga binuhatan”?
17 Nahanungod sini, si Pablo nagsiling sa Binuhatan 17:31 nga ang Dios “nagtangdo sing isa ka adlaw nga hukman niya ang napuy-an nga duta sa pagkamatarong paagi sa tawo [Cristo Jesus] nga iya gintangduan kag naghatag sia sing kalig-onan sa tanan nga tawo paagi sa pagbanhaw sa iya gikan sa minatay.” Ang “napuy-an nga duta” sa tapos sang Armagedon nga nahuman sang tanan nga katawhan sa duta sa amo nga tion, indi paghukman suno sa nagligad nga mga sala nga nahimo sa tion sang karon nga sistema sang mga butang. Sa baylo, sila “hukman sing indibiduwal suno sa ila mga binuhatan” nga nahimo sa bag-ong duta samtang nagabenepisyo sila sa gawad ni Cristo.—Bugna 20:13; Mateo 20:28; 1 Juan 2:2.
18. (a) Subong ginpakita ni Isaias, ano ang magaguwa sa amo nga tion “sa idalom sang adlaw”? (b) Ano nga mga pulong sang saad ang matuman sa amo, kag ano ang mahimo paabuton naton sa dayon nga palaabuton? (Roma 8:21)
18 Daw ano kaayo nga mga butang ang magaguwa sa idalom sang adlaw sa amo nga tion! Ang espirituwal nga paraiso magasangkad sa isa ka literal nga paraiso, sa katumanan sang orihinal nga katuyuan ni Jehova sa sini nga duta. Ang aton Dios nagasiling sa aton nga ‘ang duta amo ang iya palatungan sang iya mga tiil,’ ang santuaryo nga sa diin pagasimbahon sia, kag sia man nagsiling: “Himuon ko nga mahimayaon ang duog sang akon mga tiil.” (Isaias 66:1; 60:13) Gani diri sa idalom sang adlaw, ang duta himuon nga isa ka mahimayaon nga paraiso, isa ka hardin sang kalipay, nga sa diin ang himpit, mahidaiton, kag nahiusa nga katawhan magadayaw sa iya Dios kag Manunuga tubtob sa walay katubtuban. “Masaligan kag matuod” ang makakulunyag nga mga pulong sang saad ni Jehova: “Yari karon! ginabag-o ko ang tanan nga butang”! (Bugna 21:5) Kag sa dayon nga palaabuton, daw ano ka makatilingala nga bag-ong mga tinuga ang kabay nga tugahon sang aton mahigugmaon nga Dios diri sa idalom sang adlaw sa pagpahalipay sa iya tawhanon nga pamilya!
Paano Mo Sabton ang Tuhoy sa mga Hitabo “sa Idalom sang Adlaw”?—
◻ Sa anong kahulugan nga wala sing “bag-o nga butang”?
◻ San-o kag paano nagguwa ang “bag-o nga tinuga”?
◻ Ano ang ginalakip sang “pagtuga liwat”?
◻ Paano ginahimo ang “tion sang pagpasag-uli,” kag ano ang daku nga resulta?
[Laragway sa pahina 26]
Daw ano ka makakulugmat nga komentaryo sa ginatawag nga sibilisasyon nga ang kalibutan nagagasto karon sa mga armas sing daku nga kantidad nga 1.9 milyones ka dolyar kada minuto! Sobra na ini sa pagpakaon, pagpabiste, kag paghatag sing puluy-an sa tanan nga tawo sa kaliwatan sang tawo nga nagakabuhi sa kaimulon karon. Sa pihak nga bahin, ang natipon nga megaton nga mga bomba makalaglag sa tanan nga katawhan sa duta—lima ka bilyon kita—sing 12 ka beses. Apang ginreport nga tunga sa milyon sang mga pinakamautok sang kalibutan ang ginagamit sa paghimo sing labi pa ka makahalapay nga mga hinganiban sa paglaglag.
[Ginkuhaan]
U.S. Army photo