Kapitulo 17

Tuhay nga Panimuot sa Pagkamatinumanon

SA SULOD sang madamo nga tuig sa wala pa ginlaglag ang Jerusalem sang mga Babilonianhon, ginpaandaman ni Jehova ang mga Judiyo sang nagapakari, kag kon ngaa. Ginsunod nila ang mga huyog sang ila batinggilan nga mga tagipusuon sa baylo nga tumanon ang Dios.—Jeremias 25:8, 9; 7:24-28.

² Wala ginapilit ni Jehova ang bisan sin-o nga alagdon sia, apang, sing makatarunganon, ginapatuman niya ang pagkamatinumanon sa tanan nga nagahandum sang iya kahamuot kag mga pagpakamaayo sang kabuhi nga nagaupod sa sini. Sa tapos ginluwas ang Israel gikan sa Egipto, si Jehova nagsiling sa ila: “Kon tumanon gid ninyo ang akon tingog kag bantayan ang akon katipan, nian kamo gid mangin akon pinasahi nga pagkabutang gikan sa tanan nga katawhan, kay akon ang bug-os nga duta. Kag kamo mangin isa ka ginharian sang mga saserdote kag isa ka balaan nga pungsod sa akon.” (Exodo 19:5, 6) Sa tapos mahambal sang Dios sa ila ang iya mga ginapatuman kag mabatian nila ang pagbasa sang “tolon-an sang katipan,” sila sa ila kaugalingon nga kabubut-on nagbaton sang salabton nga upod sa sadto nga kaangtanan sa Dios.—Exodo 24:7.

³ Apang, madali lamang nga nagpakita ang rebelyuso nga espiritu. Wala ginsikway sing dayag sang mga anak sang Israel ang ila pagtuo kay Jehova; apang, supak sa iya kasugoan, ginsamo sang madamo ang Egiptohanon nga mga buhat sa pagsimba kay Jehova. (Exodo 32:1-8) Sang ulihi ginpangitaan sang iban sing sayop ang mga tawo nga gingamit ni Jehova subong iya kitaon nga mga tiglawas. (Numeros 12:1-10; 16:1-3, 31-35) Subong isa ka pungsod, ang Israel nagpakita sing kulang nga pagtuo sa pagtuman sang pulong sang Dios, bangod sang kahadlok sa tawo. (Numeros 13:2, 31-33; 14:1-4; Hebreo 3:17-19) Kon ang mga sayop indi hungod, ang mapainubuson nga mga mahinulsulon makapangayo sing kapatawaran. Apang sa sulod sang siam ka siglo, hungod nga ginsikway sang pungsod ang una isa ka sugo sang Dios, dayon isa pa gid, kag sa masami ang madamo sini. Ang mga butang nga ila ginhimo kag ang resulta sini narekord sa Biblia subong nagapaandam nga mga halimbawa para sa aton.—2 Cronica 36:15-17; 1 Corinto 10:6-11.

⁴ Sang mga adlaw ni Jeremias, sa tapos sang sulitsulit nga mga paandam tuhoy sa malain nga mga bunga sang ila dalanon, ginpahamtang ni Jehova sa atubangan sang mga Judiyo ang huwaran—ang mga Recabnon. Mga di-Israelinhon ini sila, mga kaliwat ni Jonadab nga nagpakita nga sia bug-os nga nag-ugyon sa indi pagtugot ni Jehu sing karibal kay Jehova. Ining si Jehonadab (ukon, Jonadab) subong patriarkal nga ulo sang tribo sang mga Recabnon nagsugo sa ila nga maglikaw sa alak tubtob san-o, kag indi man magpuyo sa mga balay ukon manguma kundi magpuyo sa mga layanglayang subong mga manlulugayaw. Sa amo mangin simple lamang ang ila pagkabuhi, hilway sa pagpatuyang sang kaugalingon kag sa mga bisyo sang pagkabuhi sa siudad, samtang nagasimba kay Jehova upod sa mga Israelinhon, nga sa tunga nila nagapuyo sila.

⁵ Sanglit ang mga Judiyo nagdumili sa pagpamati kay Jehova, ang Unibersal nga Soberano, mapaabot bala nga ang mga Recabnon magtuman sa ila tawhanon nga amay? Nagtuman sila, kag isa gid ka huwaran. Bisan pa nagdangop ang mga Recabnon sa Jerusalem sang ginsalakay sang militar nga kusog sang Babilonia kag Siria ang Juda, nagpadayon sila sa pagpuyo sa mga layanglayang. Apang daw ano kalig-on ang ila pamat-od nga indi magtandog sing alak, bisan pa ang katawhan nga kaupod nila gintugutan sa pag-inum sini? Paagi kay Jeremias ginpasulod ni Jehova ang mga Recabnon sa hulot-kalan-an sang templo, ginbutang sa atubangan nila ang mga tagayan sang alak kag gin-agda sila sa pag-inum. Nangindi sila. Ngaa? Maathag nga gin-apresyar nila ang debosyon sang ila amay kay Jehova, nahantop nila ang iya mahigugmaon nga kabalaka para sa ila kaayohan, kag gani gintuman nila ang iya sugo. Nahamuot si Jehova sa sining maayong huwaran sang pagkamatinumanon nga nagbuyagyag sang kakulang sing pagkamatinumanon sang mga Judiyo kay Jehova.—Jeremias 35:1-11.

⁶ May mga tawo karon nga kaangay sang mga Recabnon. Amo ini sila ang “iban nga mga karnero” sang Ginuo. Kon bala magainum sila sing alak indi ang hulusayon karon. (Ipaanggid ang 1 Timoteo 5:23.) Isa ini ka personal nga butang basta lamang indi sila mag-inum sing lakas ukon magpahubog. (Hulubaton 23:20; 1 Corinto 6:9, 10) Apang importante ang diosnon nga pagkamatinumanon. Tuhay sa Cristiandad, nga amo ang antitipo sang apostata nga Israel, ginapakita sang modernong-adlaw nga Recabnon nga klase paagi sa ila mga buhat nga nahibaloan nila ang bili sang diosnon nga pagkamatinumanon. Paano sila makabenepisyo sa sini?

⁷ Bangod sang ila debosyon, ginsaaran ni Jehova ang mga Recabnon nga may dakung matagnaon nga kahulugan para sa aton adlaw, nga nagasiling: “Bangod nga nagtuman kamo sang sugo ni Jonadab nga inyo amay, kag nagbantay sang tanan niya nga sugo, kag naghimo suno sa tanan nga ginsugo niya sa inyo, busa amo ini ang ginasiling ni Jehova sang mga kasoldadosan, ang Dios sang Israel: ‘Si Jonadab nga anak ni Recab indi gid makulangan sing tawo nga magatindog sa akon atubangan.’” (Jeremias 35:18, 19) Lakip sila sa mga naluwas sa Jerusalem sang ginlaglag ini sang 607 B.C.E. Kag ang klase nga ila ginlandong makalampuwas sa nagapakari nga kalaglagan sang Cristiandad kag sa tanan nga bahin sang kalibutan nga nagkaugalingon kag nagdumili sa pagkilala sang pagkasoberano ni Jehova.

Kon Ngaa Mahimo nga Indi Mahapos ang Magtuman

⁸ Madamo nga tawo ang nabudlayan sa pagtuman. Nagdaku sila sa isa ka kalibutan nga sa diin ang tanan ‘nagahimo sang luyag niya.’ Mahimo nga naluyagan nila ang ila ginaton-an nahanungod sa kabuhi sa idalom sang Ginharian sang Dios. Apang kon padulmon sang bugal ang ila panghunahuna, mahimo nga mag-isol sila sa pila ka ginapatuman sang Dios ukon pangitaan nila sing sayop ang paagi sang pagpaalinton sini. (Hulubaton 8:13; 16:18) Amo sina ang problema ni Naaman, nga pangulo sang Sirianhon nga hangaway sang mga adlaw ni manalagna Eliseo.

⁹ Gin-aro si Naaman. Apang bangod maisog nga ginpabutyag sang isa ka lin-ay nga Israelinhon nga bihag ang iya pagtuo nga si Naaman mag-ayo kon magkadto lamang sia sa manalagna ni Jehova nga si Eliseo, si Naaman naglakbay padulong sa Israel. Paagi sa mga kabayo kag mga kangga sa inaway nagkadto sia sa balay ni Eliseo. Si Naaman kilala nga tawo kag ginpaabot niya nga magguwa si Eliseo agod magsug-alaw sa iya kag dayon paagi sa isa ka seremonya, manawag kay Jehova kag magkumpaskumpas sang iya kamut sa ibabaw sang may aro nga unod tubtob mag-ayo ini. Sa baylo, si Eliseo nagpadala lamang sing mensahero agod silingan sia nga magkadto sa Suba Jordan kag maligo didto sing makapito.—2 Hari 5:1-12.

¹⁰ Naigo ang bugal ni Naaman. Naglakat sia nga akig. Apang sa tapos ang iya mga alagad mangatarungan sa iya, nagpaubos sia nga may pagtuo. “Gani naglusong sia kag naglumoy sing makapito sa Jordan, suno sa pinamulong sang tawo sang matuod nga Dios; kag ang iya unod nag-uli kaangay sa unod sang diutay nga bata kag nagtinlo sia.” Nakombinse si Naaman nga si Jehova amo lamang ang matuod nga Dios, kag narealisar niya nga, walay sapayan sang iya reaksion sang primero, ang mga direksion nga ginhatag ni Eliseo naghalin gid sa Dios.—2 Hari 5:13-15.

¹¹ Makita mo bala ayhan ang pila sang mga kinaiya ni Naaman sa imo kaugalingon? Subong matuod sa iban pa nga mga di-Israelinhon nga nagpakita sing pagtuo, si Naaman ginagamit sa Kasulatan sa paglaragway sa “iban nga mga karnero” nga nagbuylog sa matuod nga pagsimba. Ini sila tanan, bangod natawo sa sala, may balatian anay sa espirituwal. Dapat nila tanan pangitaon ang bulig sang hinaplas nga alagad nga klase ni Jehova kag dayon tumanon ang itudlo sa ila sining “ulipon” gikan sa Pulong sang Dios. (Mateo 24:45) Ang iban sang una wala mag-apresyar sang tanan nga laygay sa Kasulatan nga ginhatag sa ila—subong sang kinahanglanon nga magtambong sing regular sa mga miting sang kongregasyon, ang pagkaimportante sang pagkanapain sa kalibutan ukon sang Cristianong bawtismo sa tubig. Mahimo nga nag-isol sila sa pagdedikar kag sa pagpabawtismo sa tubig bangod ang ila tagipusuon nagpamatok sa kinahanglanon nga ‘ipanghiwala ang kaugalingon’ agod mangin sumulunod ni Cristo. Sa pila ka kaso ginhikayan nila ang paagi sang paglaygay sa ila sang responsable nga mga utod sa kongregasyon. Apang sa ulihi ang tanan nga luyag gid mangin “iban nga mga karnero” sang Ginuo dapat magtuon sang pagkaimportante sang pagkamapainubuson kag mahigugmaon nga pagkamatinumanon.—Santiago 4:6; Mateo 16:24.

Mga Sugo nga Makahatag sa Aton sing Benepisyo

¹² Sa tion nga aton makilala si Jehova kag ang iya mga dalanon, maapresyar naton kon daw ano ka matuod ang mga pulong nga iya ginhambal anay sa iya mga alagad: “Ako, si Jehova, nga imo Dios, nga nagatudlo sa imo kon paano ka makabenepisyo, nga nagatuytoy sa imo sa dalanon nga laktan mo. O kon pamatian mo lamang ang akon mga sugo!” (Isaias 48:17, 18) Ang hanuot nga handum ni Jehova amo nga malikawan sang iya katawhan ang kalamidad kag makaagom sing kabuhi paagi sa pagpamati sa iya mga sugo. Nahibaloan niya kon paano kita ginhimo kag kon ano ang magahatag sa aton sing matuod nga kalipay. Nagapaandam sia sa aton batok sa paggawi nga makapalain sa aton ukon makahalit sang aton relasyon sa iban.

¹³ Ang mga nagpamati sa iya paandam batok sa pagpakighilawas kag panghilahi naamligan gikan sa emosyonal nga kagamo, balatian kag ilehitimo nga mga anak nga ginbunga sini. (1 Corinto 6:18; Hebreo 13:4) Paagi sa pag-aplikar sang laygay subong sang sa 2 Corinto 7:1, nahilway sila gikan sa pagkagiyan sa tabako kag sa iban pa nga droga, nga nagahalit sang lawas kag mahimo magresulta sa maaga nga kamatayon. Ang iya sugo nga ‘maglihi sa dugo’ nakabulig sa iya mga alagad sa pagpalig-on sang ila pagsandig sa iya subong ang Isa nga nagauyat sang tanan nila nga paglaum para sa palaabuton nga kabuhi, kag sa amo man nga tion nag-amlig ini sa ila batok sa makahaladlok nga mga balatian nga sarang mapalapta paagi sa dugo nga ginatughong.—Binuhatan 15:28, 29.

¹⁴ Tubtob yari kita sa kalibutan, kinahanglanon nga makig-angot kita sa sini sa pila ka paagi. Apang si Jehova nagapaandam sa aton nga indi magbutang sang aton paglaum sa sini, indi mangin bahin sini. Nahibaloan niya kon ano ang palaabuton sang kalibutan. Daw ano ka binuang kon hinguyangon ang kabuhi sa pagtukod sang butang nga rumpagon sang Dios! Malain pa, ang mga nagahimo sini makasapo nga may bahin sila sa madangatan sang kalibutan nga ila ginhuguran sang ila kabuhi. Busa, daw ano ka mapuslanon ang laygay nga ginhatag sang Anak sang Dios: Pangitaa ang Ginharian sang Dios! Unaha ini sa imo kabuhi!—1 Juan 2:17; Mateo 6:33.

¹⁵ Nahibaloan sing bug-os ang aton ginakinahanglan, ginahanda ni Jehova ang iya katawhan para sa kabuhi sa iya matarong nga bag-ong sistema sang mga butang. Ang paglalis ni Adan nagdul-ong sa dikahimpitan sang tawo, pagkadula sing dayon nga kabuhi kag pagguwa sa Paraiso. Sa pagkamatuod agod malakip kita sa mga tawo nga ginapakamaayo sang mga butang nga nadula ni Adan, dapat kita maghatag sing pamatuod nga nagapamati kita kon nagahambal ang Dios. Kag paano sia makighambal sa aton sa tion sang Milenio nga maabot, samtang ang katawhan ginadala sa kahimpitan? Paagi sa Mesianikong Ginharian. May yara man bala kitaon nga mga tiglawas sa duta ina nga pangulohan? Huo. Ang Hari may “mga prinsipe sa bug-os nga duta” nga magaalagad sa iya. (Salmo 45:16; ipaanggid ang Isaias 32:1, 2.) Paagi sa mahigugmaon nga pagtuman sa sining mga prinsipe, ipasundayag sang katawhan ang ila pagpasakop sa ila langitnon nga Hari.

¹⁶ Bilang paghanda para sa sina nga tion, nagaaman karon si Jehova sing paghanas paagi sa iya kitaon teokratikong organisasyon. Sa sulod sang kongregasyon nagbangon sia sing tigulang nga mga tawo sa espirituwal, ukon mga gulang. Nagaaman sila sing ginakinahanglan nga pagdumala para sa mga miting sang kongregasyon kag nagapanguna sa pagbantala sang mensahe sang Ginharian. Ginabuligan nila ang tanan nga luyag mag-alagad kay Jehova sa pagtuon kon paano iaplikar ang mga prinsipio sang Biblia sa ila kabuhi kag mahigugmaon nga nagapaandam sila batok sa mga siod nga makahalit sang kaangtanan sang isa sa Dios. Ang mga Saksi ni Jehova sa bug-os nga kalibutan nakahibalo man nga ang pagpamati sa mga pagtuytoy sang mga gulang masami nga nagresulta sa pagkaluwas sang kabuhi sa tion sang mga bagyo, mga linog kag masingki nga kinagubot. Ang kongregasyon indi iya sang mga gulang; kundi iya sang Dios. Ang mga gulang wala nagapangangkon nga inspirado sila. Apang, subong ginapakita sang Kasulatan, ginagamit sila sang Dios sa pagpanguna, kag ang pagtuman sa ila nagapasundayag sing pagtahod para sa kahimusan nga ginagamit ni Jehova sa paghanda sang iya mga alagad para sa kaluwasan pasulod sa iya Bag-ong Kahimusan.—Binuhatan 20:28; Hebreo 13:17.

¹⁷ Apang, indi lamang ang handum nga malakip sa mga makalampuwas sa nagapakari nga kalaglagan sang kalibutan ang nagapahulag sa sina nga pagtuman. May kapin pa. Ano? Amo ang apresasyon sa kabuhi kag sa tanan nga aman sang Dios sa pagsakdag sini. Ang pasalamat sa iya mga dulot nga nagapamanggaranon sang aton kabuhi—ang ikasarang sa pagpangatarungan, sa pag-apresyar sang katahom kag espirituwal nga mga kinaiya, ang ikasarang sa pagkilala kag sa pagsimba sa aton Manunuga. Subong man, ang pagkahibalo sang daku nga gugma sang Dios nga nagpahulag sa iya nga ihatag ang iya kaugalingon nga Anak sa paghalad sang iya kabuhi agod nga makatigayon kita sing kahigayunan nga mabuhi sing dayon.

¹⁸ Para sa mga nakakilala sa Dios sing maayo, ang pagtuman indi mabudlay. Ang sibu nga paghangop sang iya mga katuyoan kag mga ginapatuman, upod ang pag-eksperiensia sang maayong mga resulta sang pag-aplikar sini, wala nagabilin sing duhaduha sa ila hunahuna nga ang paghimo sang mga butang suno sa paagi sang Dios amo lamang ang rasonable kag makatarunganon nga dalanon. Ginakilala nila ini nga isa ka proteksion. Isa man ini ka paagi sa pagpakita sang ila gugma sa Dios. Nagakalipay sila sing daku sa pagtuman sa iya.—1 Juan 5:3; Salmo 119:129.

[Mga Pamangkot sa Pagtinuon]

1. Ngaa gintugutan ni Jehova ang mga Babilonianhon nga laglagon ang Jerusalem?

2. (a) Sing makatarunganon, anong mga kaayohan ang nasandig sa pagtuman sa Dios? (b) Paano ang Israel nakatigayon sing katipan kay Jehova?

3. (a) Sa anong mga paagi sa tapos sadto nagpakita ang Israel sing rebelyuso nga espiritu kay Jehova? (b) Ngaa ginrekord sa Biblia yadto nga mga hitabo?

4. (a) Sin-o ang mga Recabnon? (b) Anong mga obligasyon ang ginpatuman ni Jonadab sa ila?

5. Paano huwaran ang mga Recabnon sa pagkamatinumanon?

6. (a) Sin-o sa karon ang kaangay sa mga Recabnon? (b) Sin-o ang nangin antitipo sang malalison nga Israel?

7. (a) Anong makapalig-on nga saad ang ginhatag ni Jehova sa mga Recabnon? (b) Anong paglaum ang ginatanyag sina para sa modernong-adlaw nga Recabnon nga klase?

8. Ngaa madamo nga tawo ang nabudlayan sa pagtuman?

9. (a) Ano ang natabo nga ginpangita ni Naaman si Eliseo? (b) Ano ang iya ginpaabot, apang ano gid ang natabo?

10. (a) Ano ang reaksion ni Naaman? (b) Ano sang ulihi ang nagpahulag sa iya sa pagtuman? (c) Ano ang resulta?

11. (a) Sa anong mga paagi ang “iban nga mga karnero” ginlaragway ni Naaman? (b) Anong importante nga mga leksion ang dapat naton tanan ton-an?

12, 13. (a) Ngaa makabenepisyo kita sa pagtuman sa mga sugo ni Jehova? (b) Paano ini mailustrar?

14. Paano kita makabenepisyo kon pangitaon anay naton ang Ginharian sa baylo nga madalahig sing dikinahanglanon sa kalibutan?

15. (a) Agod malakip sa mga makatigayon liwat sang nadula ni Adan, ano ang dapat naton ton-an nga himuon? (b) Paano si Jehova makighambal sa aton sa tion sang Milenio?

16. Ngaa proteksion sa karon ang pagtuman sa mga gulang, kag paano ini isa ka maayong paghanda para sa kabuhi sa Bag-ong Kahimusan sang Dios?

17. Ano ang dapat magpahulag sa aton nga mangin matinumanon?

18. Kon makilala na naton ang Dios sing maayo, paano naton ginatamod ang pagtuman sa iya kag sa iya organisasyon?