Kapitulo 22
Indi Pagkalangkagi ang Ginbiyaan!
ANG KATUMANAN sang tagna sa Biblia maathag nga nagapakita nga kita karon yara na sa ganhaan sang mahimayaon nga bag-ong sistema sang mga butang sang Dios. Sa dili madugay wala na ang malaut nga kalibutan, kag upod sa sini amo ang pagbakho, kapaslawan kag kasubo nga gintuga sini. Ang duta himuon nga isa ka Paraiso nga sa diin ang mga sumilimba sang matuod nga Dios makaagom sing himpit nga kabuhi sing dayon. Tuhoy sa pagkapat-od sang iya mga saad nahanungod sining mga butang, si Jehova nagsiling kay apostol Juan: “Isulat, bangod ining mga pulong matutom kag matuod.” (Bugna 21:1-5) Apang, bisan daw makatilingala, ang iban nga mga tawo nga nakahibalo sining mga kamatuoran nagabalik sa pagkabuhi sang kalibutan nga siling sang Dios laglagon niya. Daw ano ka makapasubo! Ngaa ginahimo nila ina?
2 Sang una nga mabatian nila ang maayong balita nahanungod sa Ginharian sang Dios kag kon ano ang himuon sini, malipayon nga ginbaton nila ini. Apang importante man nga magpadayon padulong sa Cristianong pagkahamtong, ginapadalom ang paghangop sa Pulong sang Dios kag nagapangita sing mga paagi sa pag-aplikar sini sing bug-os sa kabuhi. (Hebreo 6:1, 11, 12) Kon bangod sang kakulang sing apresasyon, patumbayaan sang isa ang paghimo sini, indi na niya pagkabigon nga hamili ang pribilehiyo sa pag-alagad sa Dios. Ina nga tawo mahimo nga matak-an sa paghulat sang pisikal nga mga pagpakamaayo nga ginsaad sang Dios, kag indi mag-apresyar sang iya kinahanglanon nga mag-uswag sa espirituwal kag sang pagkaimportante sang pagpakigbahin sing bug-os nga mahimo sa pagbantala kag paghimo sing disipulo nga hilikuton nga ginapahimo sa aton karon sang Dios. Ang pagpaayaw sang mga handum para sa materyal nga mga pagkabutang kag ang daw makalilingaw nga butang mahimo nga magsugod sa pagkuha sang dugang kag dugang nga bahin sang iya tion. Ginabutang niya nga ikaduha ang espirituwal nga mga interes. Indi sing madali, kundi sing amat-amat, nagabalik sia sa kalibutan.—1 Timoteo 6:9, 10.
3 Ang isa ka tawo mahimo magsiling nga luyag niya maluwas padulong sa “bag-ong duta,” agod magpuyo sa isa ka kalibutan nga sa diin nagapuyo ang pagkamatarong. Apang ginasakdag bala sang mga kaupod nga iya ginapili ang iya ginasiling? Sa pagkamatuod, sa kada adlaw indi malikawan ang pagpakig-angot sa mga tawo nga wala nagaalagad kay Jehova—sa trabaho, sa eskwelahan, kon nagapamalaklon, kag bisan sa balay. Apang sa tion sang mga pahuway sa trabaho, antes kag sa tapos sang klase sa eskwelahan, kon nagatelepono ukon nagaduaw sa mga abyan, sa tion sang mga paglingawlingaw, sin-o ang iya ginapili? Importante gid bala ini? Ang Biblia nagapaandam: “Dili kamo magtalang. Ang malain nga mga paghiliupod nagadunot sang maayo nga mga pamatasan.” (1 Corinto 15:33) Apang ano ang “malain nga mga paghiliupod”? May kinatuhayan bala nga ang iban nga mga tawo wala nagasimba kay Jehova, nga sila nagahimo lamang sang kon ano ang husto sa ila kaugalingon nga mga mata? Pasad sa aton naton-an na, nahibaloan naton nga ang amo sina nga sahi sang mga tawo indi maluwas padulong sa “bag-ong duta.” Ang bisan sin-o nga nagapakanubo sang mga talaksan ni Jehova kon nagapili sing mga abyan sa indi madugay makasapo liwat sang ila kaugalingon sa kalibutan nga pagdumdom nila sang una ginbiyaan na nila. Apang ang nagapaandam nga mga halimbawa nga narekord sa Kasulatan makaamlig sa aton batok sa amo nga dalanon kon tandaan naton ini sing tinagipusuon.—1 Corinto 10:11.
“GINSULAT SUBONG PAANDAM SA ATON”
4 Sang ginluwas ni Jehova ang Israel gikan sa pagkaulipon sa Egipto, daw ano yadto nga paumpaw para sa ila! Ang mapintas nga pagpigos nga naeksperiensiahan nila sa tapos mapatay si Jose naghimo sang Egipto nga subong sang isa ka mainit nga hurno nga sa diin gintagbong sila. (Exodo 1:13, 14; Deuteronomio 4:20) Apang nian si Jehova nagpadala sing napulo ka kalalat-an sa Egipto. Nangin maathag ang kinatuhayan sang matuod nga Dios kag sang mga diosdios sang Egipto. Gani, sang magbiya ang Israel sa duta, ang “nagasalakot nga kadam-an” sang mga di-Israelinhon nag-upod sa ila, subong nga sa karon ang “dakung kadam-an” nagapain sa kalibutan kag nagapakig-upod sa nagkalabilin sang espirituwal nga Israel. (Exodo 12:38) Apang ano ang natabo sa kampo sa tapos sang Exodo?
5 Ang Cristianong disipulo nga si Esteban nagpaathag: “Sa ila tagipusuon nagbalik sila sa Egipto.” Pila ka bulan lamang ini sa tapos sila ginluwas. (Binuhatan 7:39, 40) Ano ang nagahatag sing pamatuod sa sini? Naghimo sila sing tinday nga bulawan—ang butang nga ila naandan sa Egipto—kag nagsiling nga sila may “piesta kay Jehova.” Apang gin-ilog nila ang mga Egiptohanon. (Exodo 32:1-6) Naakig gid si Jehova sa ila. Ang ila ginhimo talangkod nga nagsumpakil sa Kasugoan nga ginhatag sa Bukid nga Sinai. Linibolibo ang nadulaan sing kabuhi. Ngaa natabo ini? Bisan pa nahibaloan nila ang kasugoan ni Jehova, maathag nga wala sila magtukod sing tinagipusuon nga apresasyon sa sini kag sa kamatuoran nga ang matuod nga Dios nagatuytoy sa ila.
6 Sang maghalin sila sa Egipto, ang Israel kag ang “nagasalakot nga kadam-an” nga nag-upod sa ila nakahibalo nga amo ini ang husto nga butang nga himuon. Apang pagligad sang isa ka tuig wala pa gihapon sila makalab-ot sa Ginsaad nga Duta; wala pa sila sing mga puluy-an sa “duta nga nagailig sing gatas kag dugos.” Bugana sila sa kalan-on sa pisikal, kag labi na sa espirituwal. Ang haligi nga panganod kag kalayo naghatag sing masunson nga pamatuod nga si Jehova nagatuytoy sa ila. Sa Dagat nga Pula kag sa Bukid nga Sinai nasaksihan nila ang makapulunaw nga pamatuod sang gahom ni Jehova. Ang Kasugoan nga katipan naghatag sa ila sing espirituwal nga kalan-on kag paumpaw. Naghatag man ini sa ila sing daku nga mahimo sing personal, nga nagapakita sa ila kon sa ano sila dapat magpasibu sang ila paggawi, sang ila panghunahuna, sang ila mga motibo, agod nga mangin kalahamut-an sila kay Jehova. Apang sa baylo nga apresyahon ang tanan nga ginahimo ni Jehova para sa ila, ginkalangkagan nila ang pisikal nga mga butang nga ginatigayon nila anay sa Egipto. Ang makagod nga pagkalangkag nagdul-ong sa kalaglagan para sa madamo.—Numeros 11:4-6, 31-34.
7 Wala madugay sa tapos sini, nagpadala si Moises sing mga lalaki agod mag-espiya sa Ginsaad nga Duta. Sang magbalik sila nag-ugyon sila tanan nga yadto sa pagkamatuod “nagailig sing gatas kag dugos.” Apang ang napulo sa mga espiya hinadlokan sa mga tawo didto kag sa ila nakutahan nga mga siudad. Wala sila magsalig kay Jehova sa bug-os nila nga tagipusuon kag bangod sini ang tagipusuon sang iban nagkurog sa kahadlok. Sa liwat ang ila panghunahuna nagbalik sa Egipto, kag naghambalanay sila sing mga plano nga magbalik didto. Bangod sang ila kakulang sing pagtuo, ang bug-os nga kaliwatan sang 20 ka tuig ang edad kag paibabaw napatay sang ulihi sa kahanayakan, kag wala gid makasulod sa Ginsaad nga Duta.—Numeros 13:27-33; 14:1-4, 29.
8 Sa sulod sang 400 ka tuig sa wala pa ini, pareho man nga leksion ang ginpadaku sa isa ka tuhay nga danyag. Ang hinablos ni Abraham nga si Lot nagpuyo sa Sodoma, nga malaut sa moral apang isa ka siudad nga bugana sa materyal. Daku gid ang imoralidad sa Sodoma kag sa distrito sini amo kon ngaa namat-od si Jehova nga laglagon ini, nga indi na liwat pagtukuron. Ginpadala ang mga anghel agod luwason si Lot kag ang iya panimalay. Sang ginpaandaman ni Lot ang iya palaabuton nga mga umagad nga lalaki, sa ila mga mata “daw subong [sia] sang isa ka tawo nga nagalahog.” Apang indi yadto lahog. Sa pamanagbanag ginpadali sang mga anghel si Lot kag ang iya pamilya paguwa sa siudad kag ginsingganan sila nga magpalagyo nga wala nagabalikid. Ang ila kabuhi nasandig sa ila pagtuman. Ginsunod ni Lot kag sang iya duha ka anak nga babayi ang ginsiling sa ila kag naluwas. Apang ang asawa ni Lot nagpangalag-ag sa pagbiya sang materyal nga mga butang nga ginbiyaan. Bangod sang pagbalikid, nadula niya ang iya kabuhi kag nangin haligi nga asin. Ginpasulod gid bala naton sa aton tagipusuon kon ano ang kahulugan sina? Agod indi naton mawasi ang punto, ginlakip ini ni Jesus sa isa ka paandam tuhoy sa hilingagawon nga pagpalagyo gikan sa daan nga sistema sa aton adlaw. Bilang pagpaandam sa mga sobra ka mabinalak-on sa materyal nga mga pagkabutang sia nagsiling: “Dumduma ang asawa ni Lot.” (Genesis 19:12-26; Lucas 17:31, 32) Ano ang makaamlig sa aton batok sa mga tugalbong nga nagsiod sa mga Israelinhon kag sa asawa ni Lot?
“PAGPANGITA SING MAS MAAYO NGA DUOG”
9 Agod indi maimpluwensiahan sa pagbalikid, dapat kita magpalambo sing nagauswag nga pagtuo sa kon ano ang sa palaabuton. Ang Hebreo 11:1 nagapaathag sang pagtuo subong “ang napasalig nga pagpaabot sang mga butang nga ginalauman, ang maathag nga pagpasundayag sang mga katunayan nga indi pa makita.” Isa ini ka pasalig ukon garantiya, subong sang isa ka titulo sang duta, nga aton matigayon ang ginsaad sang Dios. Ang pagtuo napasad sa malig-on nga pamatuod, kag subong resulta may yara kita malig-on nga mga rason sa pagtuo sa butang nga indi pa makita sang pisikal nga mata. Indi ini madali nga pagpati, ukon pagkahanda sa pagpati bangod lamang daw maayo ini. Agod makatigayon sing matuod nga pagtuo, dapat naton tinguhaan nga mahibaloan sing personal ang pamatuod nga amo ang sadsaran sini. Dapat man naton binagbinagon sing mahalungon kon paano ang aton ginaton-an may kaangtanan sa aton kabuhi kag sa pagpalambo sing matuod kag tinagipusuon nga apresasyon sa sini.
10 Si Abraham may subong sina nga pagtuo. Subong resulta, sa sugo ni Jehova ginbiyaan ni Abraham ang bugana nga siudad sang Ur sa Caldea kag nagsaylo sa malayo nga Canaan, ang duta nga wala pa niya anay makita. Nagpuyo sia didto subong isa ka dumuluong, nga wala nagapakig-angot sa bisan anong siudad nga ginharian subong kalig-onan. “Ginhulat niya ang siudad nga may matuod nga mga sadsaran [ang Mesianikong Ginharian ni Jehova], ang manunukod kag manugbuhat sini amo ang Dios.” Kon ginkalangkagan niya ang kabuhi sa Caldea, wala sing duhaduha nga nagbalik sia. Sa baylo, ‘ginpangita [niya] ang mas maayo nga duog, nga amo, ang langitnon.’ (Hebreo 11:8-16) Indi yadto pila ka tuig lamang, ukon ayhan napulo ukon duha ka pulo ka tuig, nga gintinguhaan ni Abraham yadtong “mas maayo nga duog.” Ginhimo niya ini tubtob sang mapatay sia, 100 ka tuig ukon kapin pa sa tapos niya ginbiyaan ang Ur. Wala lamang sia magsiling nga may pagtuo sia; ginpakita niya ini paagi sa iya mga binuhatan. Subong resulta sigurado ang iya padya. Pat-od gid ang palaabuton nga pagkabanhaw niya nga, siling ni Jesus, ‘sa Dios, si Abraham nagakabuhi.’—Lucas 20:37, 38; Santiago 2:18.
11 Apang kamusta ang anak ni Abraham nga si Isaac, kag ang anak ni Isaac nga si Jacob? Wala gid nila matilawi ang Caldeanhon nga paagi sang pagkabuhi. Apang wala nila ini gintamod subong rason sa pagtinguha kon ano ini. Sang maton-an nila gikan sa ila mga ginikanan ang mga saad ni Jehova ginpasulod nila ini sa ila tagipusuon. Nagpalambo sila sing pagtuo kaangay sang kay Abraham. Sila, man, ‘nagtinguha sang mas maayo nga duog.’ Wala sila ginakahuya sang Dios.—Hebreo 11:9, 16, 20, 21; Genesis 26:24, 25; 28:20-22.
12 Sa pihak nga bahin, ang utod ni Jacob nga si Esau wala mag-apresyar sang espirituwal nga mga butang. Nagpangasawa sia sing mga babayi nga wala nagasimba kay Jehova. Sa baylo nga pakabahandion ang balaan nga mga butang, ginbaligya niya ang iya pagkapanganay sa baylo sang isa ka kalan-on. (Genesis 25:29-34; 26:34, 35; Hebreo 12:14-17) Isa sia ka tawo nga luyag busgon ang iya pisikal nga pagkagutom karon. Ang anak nga babayi ni Jacob nga si Dina, nahulog man sa daku nga gamo. Ngaa? Bangod luyag niya mag-upod-upod sa pagano nga “mga anak nga babayi sang duta.”—Genesis 34:1, 2.
13 Kon, kaangay nanday Abraham, Isaac kag Jacob, imo gid ‘ginatinguhaan ang mas maayo nga duog,’ para sa kabuhi sa idalom sang Mesianikong Ginharian ni Jehova, indi pagtuguti ang imo kaugalingon nga maganyat pabalik sa kalibutan. Dumduma, ang kalibutan wala nagatanyag sing dayon nga palaabuton. “Apang sia nga nagahimo sang kabubut-on sang Dios magapabilin sing dayon.” Kag daw ano ina ka makaalayaw gid nga kabuhi!—1 Juan 2:17.
[Mga Pamangkot sa Pagtinuon]
1. (a) Ano nga mga pagpakamaayo ang yara lamang sa unhan para sa matutom nga mga alagad sang Dios? (b) Apang, ano ang ginhimo sang iban nga tawo?
2. (a) Agod malikawan ina nga resulta, ano dapat ang himuon sang isa ka tawo sa tapos maton-an ang kamatuoran? (b) Kon indi niya mahimo ini, ano mahimo ang mangibabaw sa iya panghunahuna, kag ano ang resulta?
3. (a) Ngaa makatalagam nga pilion subong mga abyan ang mga tawo nga wala nagasimba kay Jehova? (b) San-o mahimo madali nga masapwan sang isa ka tawo ang iya kaugalingon nga yara sa matawhay nga pagpakig-upod sa sina nga mga tawo?
4. (a) Ano ang nangin kabuhi sang Israel sa Egipto sa tapos mapatay si Jose? (b) Ngaa nagbuylog ang “nagasalakot nga kadam-an” sa Israel sang ginluwas sila gikan sa Egipto? (c) Paano inang matagnaon nga drama natuman sa aton adlaw?
5. (a) Wala madugay sa tapos sila maluwas, paano sila ‘nagbalik sa Egipto’? (b) Ngaa natabo ini?
6. (a) Ano nga mga aman ang ginhimo ni Jehova para sa ila sa kahanayakan? (1 Corinto 10:3, 4) (b) Ngaa ang iban nagsugod sa pagkalangkag sang ila anay naandan sa Egipto?
7. (a) Sang magbalik ang mga espiya nga dala ang ila mga balita, ngaa ang mga tawo naghambalanay nga magbalik sa Egipto? (b) Ano ang resulta? (Hebreo 3:17, 19)
8. (a) Agod maluwas si Lot kag ang iya pamilya sang ginlaglag ang Sodoma, ano ang dapat nila himuon? (b) Ngaa nangin haligi nga asin ang asawa ni Lot? (c) Ano ang nagapaandam nga mensahe sina para sa aton?
9. Ano ang pagtuo, kag paano naton mapalambo ini?
10. (a) Paano si Abraham naghatag sing pamatuod sa iya pagtuo, kag tubtob san-o? (b) Paano naton mahibaloan nga ang iya ginhimo husto?
11. Paano ginpakita nanday Isaac kag Jacob nga sila man, may pagtuo?
12. Ano ang nagdul-ong kanday Esau kag Dina sa daku nga gamo?
13. (a) Ano ang kahimtangan sang kabuhi para sa mga tawo nga bahin sang kalibutan karon? (b) Ano ang magaamlig sa aton nga indi maganyat sa pagbalik sa sini?