Bug-os Tion nga mga Ministro Nagapanguna sa Pagbantala nga Hilikuton

Ayhan ang una sang mga Saksi ni Jehova nga nagduaw sa inyo isa ka bug-os tion payunir nga ministro ukon misyonero. Sanglit ang mga Saksi ni Jehova wala sing ginasuweldohan nga ministeryo, ayhan nagapalibog kamo kon paano ining mga tawo bug-os tion nga makaministeryo.

Ang tanan nga Saksi ni Jehova nga dedikado kag nabawtismohan mga ministro, apang ang kalabanan sa ila may pamilya ukon iban pa nga mga obligasyon nga nagapugong sa ila sa paghugod sing daku nga oras kada semana sa ila ministeryo. Apang, linibolibo ka Saksi sa bug-os nga kalibutan ang nagpasibu sang ila pagkabuhi agod nga paagi lamang sa part-time nga trabaho masarangan nila ang ila nabuhinan nga mga galastohan kag sa amo makahugod sila sing 1,000 ka oras ukon kapin pa kada tuig sa ministeryo.

Matuod, ang bug-os tion nga payunir nga mga ministro wala sing madamo nga kuwarta nga magasto nila sa ila kaugalingon, apang para sa ila amo ini ang paagi sa pagpangita anay sa Ginharian sang Dios. Kag madamo nga pagpakamaayo ang nabaton nila. Isa gid ka maayo nga eksperiensia ang mahambal lamang ang iban nahanungod sa Pulong sang Dios sing mga 90 ka oras kada bulan. Ginapauswag sang bug-os tion nga ministro ang iya kalantip sa ministeryo kag may tion man sia sa pag-atipan sang interes nga ginapakita. May makapalig-on ini nga mga resulta. May yara sila sang ila materyal nga kinahanglanon kag ginaapresyar man nila kon ano ang yara sa ila.—⁠Mateo 6:​33.

Sang Pebrero 1943, gintukod sang Watch Tower Society ang Watchtower Bible School of Gilead. Ang katuyoan amo ang paghanas sa eksperiensiado bug-os tion payunir nga mga ministro sa pag-alagad subong mga misyonero sa iban nga mga pungsod. Ang lima ka bulan nga kurso ginahuman sing mahugod nga pagtuon sang Biblia, sang maragtas sang Biblia, sang organisasyon ni Jehova, kag sang may kaangtanan nga mga tema sa paghanda para sa pag-alagad sa iban nga pungsod.

Ginabayaran sang Sosiedad ang plete padulong sa asaynment sang misyonero kag nagaaman sing maayo nga pagkaon kag kasarangan nga mga puluy-an para sa misyonero. Ginahatagan man sini ang tagsa ka misyonero sing diutay nga reimbursement para sa personal nga mga gasto. Ang mga misyonero nagabulosbulos sa pagpalakat sang puluy-an paagi sa pagpamakal, pagluto, kag pagpaninlo. Paagi sa sining makatarunganon nga pag-atipan, ang mga misyonero makahugod sing dimagkubos 140 ka oras kada bulan sa pagbantala sa balay kag balay kag sa paghiwat sing mga pagtuon sa Biblia upod sa interesado nga mga tawo.

Madamo sining mga misyonero ang ginaasayn linibo ka milya ang kalayuon gikan sa puluy-an kag pamilya. Dapat sila magpasibu sa isa ka tuhay nga talaksan sang pagkabuhi kag kultura, sa bag-o nga batasan sa pagkaon, sa tuhay nga klima, kag sa paghambal sing tuhay nga hambal. Ginahimo nila ini bangod ginahigugma nila ang katawhan kag may mabaskog sila nga handum nga buligan sila sa pagtuon nahanungod sa Ginharian sang Dios.

Kutob sang 1943 tubtob sang 1985, ang Watchtower Bible School of Gilead nakahiwat sing 80 ka klase kag nakapadala sing kapin sa 6,000 ka misyonero. Sa idalom sang pagdumala sang Sosiedad, nanguna ini sila sa pagpasangkad sang edukasyon sa Biblia sa bug-os nga Aprika, Sentral kag Bagatnan nga Amerika, sa Sidlangan, kag sa Bagatnan Pasipiko, kag daku ang ila nahimo sa Europa.

Bisan kon ang mga Saksi ni Jehova bug-os tion nga nagaministeryo subong mga payunir ukon subong mga misyonero ukon indi bug-os tion, nagaalagad sila nga wala sing pinansial nga daug. Ginagamit nila ang ila kaugalingon nga tion kag kuwarta, kag ang ila kaugalingon sa pagbulig sa iban nga makatigayon sing ihibalo nga nagadul-ong sa kabuhi nga walay katapusan.—Juan 17:​3.

● Paano ang iban sang mga Saksi ni Jehova makahugod sang ila bug-os nga tion sa ministeryo, kag ngaa ginahimo nila ini?

● Paano ginahanas ang mga ministro para sa pagkamisyonero?

● Paano ginasakdag ang mga misyonero sa ila asaynment sa luwas?

[Mga piktyur sa pahina 22]

Wala: Ginaklasehan nga hulot sang Gilead School, Brooklyn, N.Y., E.⁠U.⁠A.

Tuo: Misyonero nagatudlo sang Pulong sang Dios sa Papua New Guinea

[Mga piktyur sa pahina 23]

Ang payunir nga mga ministro kag mga misyonero nagabantala sang Pulong sang Dios sa nanuhaytuhay nga pungsod

Brazil

Dominican Republic

Espanya

Sierra Leone, Aprika