Sugilanon sang Kabuhi

Ang Paghimo sing Disipulo nga Hilikuton Nagdihon sang Akon Kabuhi

Panugiron ni Lynette Peters

Nagkari sila agod paibakwiton kami. Isa ka lalaki nga matanda sa pagtiro ang nagpuesto sa ibabaw sang tinukod. Ang marino nga mga soldado naghapa sa hilamon, nga nagauyat kag handa sa paggamit sang ila mga pusil. Samtang nagadalagan kami pakadto sa nagahulat nga helikopter sadto nga Domingo sang aga, gintinguhaan namon sang akon kaupod nga mga misyonero nga magpabilin nga kalma. Gilayon kami nga naglupad. Pagligad sang napulo ka minuto, ginpasakay kami sa barko sang mga militar, nga nakadungka malapit sa baybay.

PAGKAAGA, nabalitaan namon nga ang hotel nga gindangpan namon sang nagligad nga gab-i ginbombahan sang mga rebelde. Ang madugay na nga pagkadikontento sang mga taga-Sierra Leone nagresulta sang ulihi sa nagasandukot nga inaway. Ang tanan nga dumuluong, lakip na kami, ginpilit nga maghalin gilayon sa pungsod pagkabaton sing aviso. Agod ipaathag kon ngaa amo sini ang natabo sa akon, pasugira ako halin sa umpisa.

Nagdaku ako sa British Guiana, nga gintawag nga Guyana sugod sang 1966. Ang akon pagkabata didto sang katuigan 1950 masadya gid. Ginapabaloran sang kalabanan nga mga ginikanan ang edukasyon, kag ang mga pamatan-on ginapaabot nga may mataas sing grado. Madumduman ko pa ang ginsiling anay sang isa ka klerk sa bangko sa akon amay, “Ngaa kadaku gid sang ginabayad mo para sa edukasyon sang imo mga anak?” Nagsabat si Tatay, “Ang pinakamaayo nga edukasyon lamang ang makagarantiya sang ila kadalag-an.” Sadto nga tion, naghunahuna sia nga ang pinakamaayo nga edukasyon matigayon sa kilala nga mga eskwelahan. Nagbag-o ang iya pagtamod sang ulihi.

Sang 11 anyos ako, ang akon iloy nagtuon sa Biblia upod sa mga Saksi ni Jehova. Nagtambong sia sa Kingdom Hall upod sa amon kaingod. Nakumbinsi sila nga duha nga bangod sang ila nabatian sadto nga gab-i, nasalapuan na nila ang kamatuoran. Sang ulihi, ginsugiran man ni Nanay ang amon isa pa ka kaingod. Wala magdugay, sila nga tatlo nagtuon upod sa mga misyonero nga sanday Daphne Harry (Baird sang ulihi) kag Rose Cuffie. Wala pa isa ka tuig, si Nanay kag ang iya duha ka abyan ginbawtismuhan. Lima ka tuig pagkatapos sadto, naghalin ang akon amay sa Seventh-Day Adventist Church kag ginbawtismuhan subong isa sa mga Saksi ni Jehova.

Sang mga bata pa kami sang akon duha ka manghod nga babayi—kami nga tatlo ang kamagulangan sa napulo ka kabataan—pirme kami nagaduaw sa puluy-an nga ginaistaran nanday Daphne kag Rose bilang mga misyonero. Nagapamati kami sa ila mga eksperiensia sa pag-alagad sa latagon. Malipayon kag mapisan gid ini nga mga misyonero sa pag-atipan sa espirituwal nga kaayuhan sang iban. Bangod sa ila halimbawa, ginhandum ko man nga mangin isa ka misyonero.

Apang, ano ang nagbulig sa akon nga huptan nga tulumuron ang mangin bug-os tion nga ministro walay sapayan nga ang akon mga himata kag mga kabutho interesado sa pagkuha sing mataas nga edukasyon agod makatigayon sing madinalag-on nga karera? Tuman kadamo ang makasululay nga mga oportunidad—mahimo ako mag-ukod sa pagtuon sing abogasiya, musika, medisina, ukon iban pa. Ang maayo nga halimbawa sang akon mga ginikanan nagbulig sa akon. Nagkabuhi sila nahisanto sa kamatuoran kag mapisan sila sa pagtuon sa Biblia kag sa pagbulig sa iban nga makilala si Jehova.a Dugang pa, pirme nila ginaagda sa amon balay ang bug-os tion nga mga ministro. Bangod sa ginpakita nga kalipay sining mga kauturan, nagbakod ang akon handum nga dihunon sang paghimo sing disipulo nga hilikuton ang akon kabuhi.

Ginbawtismuhan ako sa edad nga 15 anyos. Nian, nagpayunir ako sang makatapos ako sing hayskul. Ang una nga nabuligan ko nga magdedikar kag magpabawtismo amo si Philomena, nga nagatrabaho sa ospital. Ang kalipay nga makita sia nga ginhigugma man niya si Jehova labi pa gid nga nagpabakod sa akon handum nga magpadayon sa bug-os tion nga ministeryo. Wala madugay pagkatapos sadto, gintanyagan ako sing maayoayo nga trabaho sa gobierno diin nagatrabaho ako subong isa ka sekretarya. Ginbalibaran ko ini kag sa baylo, nagpadayon ako sa pagpayunir.

Sa amon balay gihapon ako nagaistar, kag padayon kami nga ginduaw sang mga misyonero. Nanamian gid ako sa pagpamati sa ila mga eksperiensia! Labi pa gid ini nga nagpabakod sa akon handum nga magmisyonero, bisan pa nga daw imposible ini. Sadto anay kag tubtob karon, ang mga misyonero ginapadala sa Guyana. Isa ka adlaw sang 1969, bisan pa nga nakibot, nalipay gid ako sang mabaton ko ang imbitasyon nga mag-eskwela sa Watchtower Bible School of Gilead sa Brooklyn, New York.

Isa ka Asaynment nga Wala Ko Ginpaabot

May yara 54 ka estudyante gikan sa 21 ka pungsod sa ika-48 nga klase sang Gilead. Napulog-pito kami nga mga dalaga. Bisan pa nga 37 ka tuig na ang naglipas, madumduman ko pa gihapon yadtong lima ka bulan nga pag-eskwela. Indi lamang mga kamatuoran gikan sa Kasulatan ang amon natun-an kundi pati man ang praktikal nga mga panugda kag laygay para sa pagkabuhi subong palaabuton nga mga misyonero. Halimbawa, natun-an ko nga magsunod sa instruksion, mangin timbang sa mga moda, kag magbatas walay sapayan sang indi maayo nga mga sirkunstansia.

Pirme ginpadaku sang akon mga ginikanan ang importansia sang regular nga pagtambong sa mga miting. Ang bisan sin-o nga nagamulumasakit lamang agod indi makatambong sa mga miting kon Domingo wala ginatugutan sa pagpakigbahin sa iban pa nga mga aktibidades. Apang, sa malip-ot nga tion samtang nagaeskwela sa Gilead School, nangin indi regular ako sa pagtambong sa mga miting. Isa ka Biernes sang gab-i, ginpaathag ko kanday Don kag Dolores Adams, ang mag-asawa sa Bethel nga nagapasakay sa akon sa ila salakyan pakadto sa mga miting, kon ngaa indi ako makatambong. Abaw, kadamo gid sang amon asaynment kag report! Paano pa ako makatambong sa Teokratikong Eskwelahan Para sa Ministeryo kag Miting sa Serbisyo? Pagkatapos nga mapaathagan ako ni Brother Adams, nagsiling sia: “Himua kon ano ang ginasiling sang imo konsiensia.” Ginpamatian ko ang iya laygay kag sugod sadto nga gab-i, wala na ako magpalya sa mga miting. Sa sulod sang madamo nga tinuig, luwas lamang sa di-malikawan nga mga rason, pirme gid ako nagatambong sa Cristianong mga miting.

Sang magtungatunga pa lang ang amon kurso, naghinambalanay na kami kon diin ayhan kami ipadala. Nagdumdom ako nga ipadala ako sa Guyana, diin kinahanglan gid ang bulig sa hilikuton nga pagbantala. Handurawa lamang ang akon kakibot sang mahibaluan ko nga indi na ako magabalik. Sa baylo, ginpadala ako sa Sierra Leone, Katundan nga Aprika. Nagpasalamat gid ako kay Jehova nga natuman gid man ang akon handum nga mangin misyonero malayo sa amon!

Madamo sing Dapat Matun-an

“Katahom gid” amo ang akon una nga impresyon sa Sierra Leone, lakip ang madamo sini nga pukatod kag bukid, linaw kag baybayon. Apang, ang matahom gid sa sini nga pungsod sa Katundan nga Aprika amo ang mga pumuluyo sini, kay bangod sang ila gugma kag kaayo, bisan ang mga dumuluong makabatyag nga ginaabiabi sila. Nakabulig gid ini nga malandas sang mga misyonero ang ila kahidlaw. Mahuyugon ang mga taga-Sierra Leone sa pagsugilanon tuhoy sa ila mga kustombre kag kultura kag sa pagbulig ilabi na sa mga bag-uhan nga mangin sampaton sa paghambal sing Krio, ang pinulungan sa pungsod.

Ang mga nagahambal sing Krio madamo sing realistiko nga mga hulubaton. Halimbawa, ang hulubaton nga ang amu nagapangabudlay, ang baboon nagakaon, nagakahulugan nga ang nagasab-ug indi pirme ang nagaani. Husto nga ginalaragway sini ang inhustisya nga lapnag gid sa kalibutan!—Isaias 65:22.

Makalilipay gid ang hilikuton nga pagbantala kag paghimo sing disipulo. Malaka lang ang indi interesado sa Biblia. Sa sulod sang madamo nga tinuig, ginbuligan sang mga misyonero kag sang madugay na nga mga alagad ni Jehova ang mga tawo—bata kag tigulang—sang tanan nga pangabuhi kag tribo nga batunon ang kamatuoran.

Si Erla St. Hill, ang akon una nga kaupod sa pagmisyonero, mapisan gid. Indi lang sia mapisan sa ministeryo kundi sa hilikuton man sa amon puluy-an bilang mga misyonero. Ginpahangop niya sa akon ang importansia sang madamo nga butang, subong sang pagpangilala sa mga kaingod, pagduaw sa nagamasakit nga mga Saksi kag mga interesado, kag kon puede, pagsakdag sa mga kahimusan sa lubong. Ginpatudok man niya sa akon ang importansia sang paghapit bisan dali lang agod kamustahon ang mga utod nga nagaistar sa teritoryo pagkatapos sang pag-alagad sa latagon. Bangod sini, nakatigayon ako sing mga iloy, mga utod, kag mga abyan, kag ang akon asaynment nangin ang akon puluy-an.—Marcos 10:29, 30.

Nakigsuod man ako sa mabuot nga mga misyonero nga nag-alagad upod sa akon. Ang iban sa ila amo ang akon kaupod sa kuarto nga si Adna Byrd, nga nag-alagad sa Sierra Leone sang 1978 tubtob 1981, kag si Cheryl Ferguson, nga akon kaupod sa kuarto sa sulod sang 24 ka tuig.

Mga Pagtilaw sa Tion sang Inaway Sibil

Sang 1997, mga isa ka bulan pagkatapos nga gindedikar ang bag-o nga mga pasilidad sa sanga sang Sierra Leone, napilitan kami nga mag-ibakwit, subong sang ginsambit sa umpisa, bangod sa inaway. Anom ka tuig antes sina, napalig-on gid kami sa pagtuo sang mga Saksi sa Liberia nga nagdangop sa Sierra Leone agod likawan ang inaway sa Liberia. Ang iban nag-abot nga wala gid sing dala. Walay sapayan sang mabudlay nga kahimtangan, nakigbahin sila sa ministeryo kada adlaw. Ang ila gugma kay Jehova kag sa mga tawo makatalandog gid.

Karon nga kami naman ang mga refugee sa pungsod sang Guinea, gin-ilog namon ang halimbawa sang taga-Liberia nga mga utod kag padayon nga nagsalig kay Jehova kag gin-una ang mga intereses sang Ginharian. Pagligad sang isa ka tuig, nagbalik kami sa Sierra Leone, apang sa sulod sang pito ka bulan, liwat nga nag-inaway kag kinahanglan nga mag-ibakwit liwat kami padulong sa Guinea.

Sang ulihi ginsugiran kami nga nag-istar kuno sa amon puluy-an bilang mga misyonero ang mga miembro sa Kissy sang isa sang nagainaway nga mga grupo kag gin-ati ukon ginpierde nila ang tanan namon nga pagkabutang. Sa baylo nga magkasubo, nagpasalamat gid kami nga buhi kami. Diutay na lang ang amon pagkabutang, apang nalampuwasan namon ining mabudlay nga kahimtangan.

Pagkatapos sang amon ikaduha nga pag-ibakwit, nagpabilin kami sang akon kaupod nga si Cheryl sa Guinea. Gani, kinahanglan nga magtuon kami sa paghambal sing Pranses. Gingamit gilayon sang pila sang akon kaupod nga mga misyonero ang ila natun-an nga Pranses, nga wala gid nagakabalaka bisan pa nga magsala sila sa paghambal. Ako naman indi luyag nga magsala, amo nga nagahambal lamang ako sing Pranses kon kinahanglanon gid. Mabudlay gid ini. Dapat pahanumdumon ko ang akon kaugalingon adlaw-adlaw kon ngaa yari ako sa Guinea—agod buligan ang iban nga makilala si Jehova.

Amat-amat nga nag-uswag ako paagi sa pagtuon, paagi sa pagpamati sa iban nga talunsay sa paghambal, kag paagi sa pagpabulig sa mga kabataan sa kongregasyon, nga prangka kon maghambal. Nian, sa wala ginapaabot, ang organisasyon ni Jehova naghatag sing kinahanglanon gid nga bulig. Sugod sang Septiembre 2001, wala labot sa bulig sa pagtanyag sing mga libro kag mga brosyur sa mga tawo nga may lainlain nga mga relihion, Ang Aton Ministeryo sa Ginharian nagahatag sing mga panugda sa pagtanyag sing mga magasin. Mas may kompiansa na ako karon sa ministeryo, bisan pa nga indi pa ako talunsay sa paghambal sing Pranses.

Bangod naghalin ako sa isa ka daku nga pamilya, mahapos ako nga nakapasibu sa madamo nga tawo, kag isa ka bes, 17 kami sa amon puluy-an bilang mga misyonero. Sa sulod sang akon 37 ka tuig nga pagmisyonero, nakaupod ko ang kapin sa 100 ka misyonero. Isa gid ka pribilehiyo nga makilala ko ang madamo gid, sila tanan may nagkalainlain nga personalidad apang ang tanan nagapangabudlay nga may isa ka tulumuron! Kag daw ano gid ka makalilipay nga magpangabudlay upod sa Dios kag makita ang mga tawo nga nagabaton sang kamatuoran sang Biblia!—1 Corinto 3:9.

Subong misyonero, wala ko matambungan ang madamong importante nga mga hitabo sa amon pamilya, subong sang kasal sang akon mga manghod. Talagsa ko lang makita ang akon mga hinablos. Isa ini ka sakripisyo para sa amon sang akon pamilya, nga nagpalig-on gid sa akon sa pagpabilin nga misyonero.

Apang, natigayon ko sa akon pagmisyonero ang mga butang nga nawasi ko sa akon pamilya. Bisan pa ginpakamaayo ko nga magpabilin nga di-minyo, madamo ako sing espirituwal nga mga anak, indi lamang yadtong ginbuligan ko sa pagtuon sa Biblia kundi ang iban man nga nangin mga abyan ko. Dugang pa, nakita ko ang pagdaku, pagminyo, kag pagpamilya sang ila mga kabataan nga nagpadaku man sang ila mga anak sa kamatuoran. Kaangay ko, ginpadihon man sang iban sa ila ang ila kabuhi sa hilikuton nga paghimo sing disipulo.

[Footnote]

[Mga mapa sa pahina 15]

(Para sa aktual nga pormat, tan-awa ang publikasyon)

Ginpadala ako sa Sierra Leone, Katundan nga Aprika

GUINEA

SIERRA LEONE

[Piktyur sa pahina 13]

Ang akon duha ka manghod, nga kaupod ko nga naghinguyang sing madamong makalilipay nga tion upod sa mga misyonero sang katuigan 1950

[Piktyur sa pahina 14]

Upod sa mga kabutho sa ika-48 nga klase sang Gilead

[Piktyur sa pahina 16]

Dedikasyon sang mga pasilidad sang sanga sa Sierra Leone