Paglipay Para sa Napung-awan
“Ang bug-os nga tinuga nagaugayong sa kasakit sing tingob tubtob karon.” (Roma 8:22) Daku ang pag-antos sang tawo sang ginsulat ina sang nagligad nga kapin sa 1,900 ka tuig. Madamo ang napung-awan. Busa, ang mga Cristiano ginlaygayan: “Magpamulong nga may paglipay sa napung-awan nga mga kalag.”—1 Tesalonica 5:14.
Karon, ang kapung-aw sang tawo daku pa gid, kag madamo pa nga tawo sang sa nagligad ang napung-awan. Apang dapat bala kita makibot sa sina? Indi, kay ginapakilala ini sang Biblia subong ang “katapusan nga mga adlaw” kag ginatawag ini nga “ital-ital nga tion nga mabudlay atubangon.” (2 Timoteo 3:1-5) Si Jesucristo nagtagna nga sa katapusan nga mga adlaw, may yara “makahaladlok nga mga talan-awon.”—Lucas 21:7-11; Mateo 24:3-14.
Kon ang katawhan nagaantos sing malawig nga paghimud-os, kahadlok, kasubo, ukon iban pa negatibo nga balatyagon, masunson sila ginapung-aw. Ang kabangdanan sang kapung-aw ukon sobra nga kasubo mahimo nga amo ang kamatayon sang isa ka hinigugma, diborsio, pagkawasi sang trabaho, ukon wala nagaayo nga balatian. Mapung-awan man ang mga tawo kon ginapalambo nila ang balatyagon sang pagkawalay pulos, kon ginabatyag nila nga napaslawan sila kag nagpasubo sa tanan. Ang bisan sin-o mahimo mahalitan sang makapulung-aw nga kahimtangan, apang kon ginapalambo sang isa ka tawo ang balatyagon sang pagkawalay paglaum kag wala sing nakita nga dalan paguwa sa malain nga kahimtangan, mahimo magaresulta ang daku nga kapung-aw.
Ang mga tawo sadto anay nakabatyag man sing kaanggid nga mga balatyagon. Si Job nag-antos sing balatian kag personal nga kasubo. Nagbatyag sia nga ginbayaan sia sang Dios, gani gintak-an sia sa kabuhi. (Job 10:1; 29:2, 4, 5) Si Jacob ginpung-aw tungod sa ginahunahuna nga pagkapatay sang iya anak, nagdumili nga lipayon kag naghandum nga mapatay. (Genesis 37:33-35) Nagkasubo tungod sa daku nga sala, si Hari David nagpanalabiton: “Nagakalisud ako sa bug-os nga adlaw. Ginapunaw ako.”—Salmo 38:6, 8; 2 Corinto 7:5, 6.
Karon, madamo ang ginapung-aw bangod sang sobra nga pagpabug-at sa kaugalingon, nagatinguha sa paghimo sang adlaw-adlaw nga rutina nga labaw sa masarangan sang ila hunahuna, balatyagon, kag lawas. Maathag nga ang kahuol, upod ang negatibo nga mga panghunahuna kag mga balatyagon, nagaapektar sang lawas kag nagadul-ong sa kemikal nga pagkaditimbang sa utok, busa nagaresulta sa kapung-aw.—Ipaanggid ang Hulubaton 14:30.
Bulig nga Ginakinahanglan Nila
Si Epafrodito, isa ka unang-siglo nga Cristiano gikan sa Filipos, “ginpung-awan bangod nabatian [sang iya mga abyan] nga nagmasakit sia.” Si Epafrodito, nga nagmasakit sang ginpakadto sia sa Roma sang iya mga abyan sa pagdala sing mga aman para kay apostol Pablo, ayhan nagbatyag nga ginpalisdan niya ang iya mga abyan kag nga ginkabig nila sia nga kapaslawan. (Filipos 2:25-27; 4:18) Paano nakabulig si apostol Pablo?
Ginpapauli niya si Epafrodito dala ang sulat sa mga abyan sa Filipos nga nagsiling: “Batuna ninyo [si Epafrodito] sa Ginuo sa bug-os nga kalipay; kag padunggan ninyo ang mga subong sa iya.” (Filipos 2:28-30) Ang katunayan nga mataas ang pagkabig ni Pablo sa iya kag nga gin-abiabi sia sang mga taga-Filipos sing mainit kag mahigugmaon, pat-od nga naglipay kay Epafrodito kag nagbulig sa pagdula sang iya kapung-aw.
Sa walay duhaduha, ang laygay sang Biblia nga “magpamulong nga may paglipay sa napung-awan nga mga kalag” amo ang labing maayo. “Dapat mo mahibaluan nga ang iban nagakabalaka sa imo subong isa ka tawo,” siling sang isa ka babayi nga nag-antos sing kapung-aw. “Dapat mo mabatian nga may magasiling, ‘Nahangpan ko; magaayo ka.’”
Ang tawo nga ginapung-aw masami nga kinahanglan magmatumato sa pagpangita sing mahinuklugon nga tawo nga matu-aran niya. Ini sia dapat mamati sing maayo kag magpailob katama. Likawan niya ang paglaygay sa napung-awan ukon paghambal sing subong sang, ‘Indi ka dapat magbatyag sing amo sina’ ukon, ‘Sala ina nga panimuot.’ Ang balatyagon sang tawo nga ginapung-aw maluya, kag inang mamulayon nga mga komento mahimo lamang nga labi nga magapalain sang iya balatyagon tuhoy sa iya kaugalingon.
Ang isa nga ginapung-awan mahimo magbatyag nga walay pulos. (Jonas 4:3) Apang, dapat niya dumdumon nga ang importante amo ang kon paano ginapabilihan sang Dios ang isa. ‘Wala pagpakamahala’ sang mga tawo si Jesucristo, apang wala ini magbalhin sang iya matuod nga kapuslanan sa Dios. (Isaias 53:3) Magsalig nga, subong nga ginahigugma sang Dios ang iya palangga nga Anak, ginahigugma man niya ikaw.—Juan 3:16.
Naluoy si Jesus sa mga nagaantos kag nagtinguha sa pagbulig sa ila nga makita ang ila indibiduwal nga kabilihanan. (Mateo 9:36; 11:28-30; 14:14) Ginpaathag niya nga ginapabilihan sang Dios bisan ang magamay kag indi importante nga mga pispis. “Walay isa sa ila nga malipatan sa atubangan sang Dios,” siling niya. Labi pa gid ang pagpabili niya sa mga tawo nga nagatinguha sa paghimo sang iya kabubut-on! Tuhoy sa ila si Jesus nagsiling: “Bisan pa ang mga buhok sa inyo ulo naisipan tanan.”—Lucas 12:6, 7.
Matuod, mabudlay para sa isa nga ginapung-awan sing daku, nga nadala sang iya mga kaluyahon kag mga kakulangan, ang magpati nga ginapabilihan sia sing daku sang Dios. Mahimo sia magbatyag nga indi sia takus sa gugma kag pag-ulikid sang Dios. “Ang aton tagipusuon nagatagudili sa aton,” siling sang Pulong sang Dios. Apang amo bala ina ang butang nga ginabasihan? Indi. Nakahibalo ang Dios nga ang mga makasasala nga tawo mahimo maghunahuna sing negatibo kag magatagudili pa sang ila kaugalingon. Gani ang iya Pulong nagalipay sa ila: “Ang Dios daku pa sa aton mga tagipusuon kay nakahibalo sia sang tanan nga butang.”—1 Juan 3:19, 20.
Huo, ang aton mahigugmaon nga langitnon nga Amay wala lamang nagatan-aw sang aton mga sala kag mga sayop. Nakahibalo sia sang makatarunganon nga mga kahimtangan, sang aton bug-os nga dalanon sang kabuhi, sang aton mga motibo kag mga tinutuyo. Nakahibalo sia nga napanubli naton ang sala, balatian, kag kamatayon kag busa may daku nga mga limitasyon. Ang katunayan nga nagabatyag kita sing kasubo kag kalisud sa aton kaugalingon isa mismo ka pamatuod nga indi naton luyag makasala kag wala maghimo sing sobra pa. Ang Biblia nagasiling nga kita “nasakop sa kaluyahon” batok sa aton kabubut-on. Gani ang Dios nagasimpatiya sa aton malisud nga kahimtangan, kag maluluy-on sia nga nagapatugsiling sa aton mga kaluyahon.—Roma 5:12; 8:20.
“Si Jehova maluluy-on kag mainayuhon,” pasalig sa aton. “Subong sa kalayo sang sidlangan sa katundan, amo kalayo ang iya pagpahilayo sa aton sang aton mga paglalis. Kay nakilala niya ang aton kahimtangan, nagadumdom sia nga kita yab-ok.” (Salmo 103:8, 12, 14) Sa pagkamatuod, si Jehova “Dios sang tanan nga paglipay, nga nagalipay sa aton sa tanan naton nga kapipit-an.”—2 Corinto 1:3, 4.
Ang bulig nga ginakinahanglan sing labi sang mga napung-awan nagagikan sa pagsuod nila sa ila maluluy-on nga Dios kag pagbaton sang iya pangagda nga ‘itugyan ang ila lulan sa iya.’ ‘Mapaumpawan [gid niya] ang tagipusuon sang mga nalisdan.’ (Salmo 55:22; Isaias 57:15) Gani ang Pulong sang Dios nagapalig-on sang pangamuyo, nga nagasiling: “Magtugyan sang inyo tanan nga paghimud-os [kay Jehova], kay sia nagakabalaka sa inyo.” (1 Pedro 5:7) Huo, paagi sa pangamuyo kag pangalaba ang mga tawo nagasuod sa Dios kag nagaagom sing “paghidait sang Dios nga nagalabaw sa tanan nga hunahuna.”—Filipos 4:6, 7; Salmo 16:8, 9.
Ang praktikal nga mga pagbalhin sa estilo sang kabuhi makabulig man sa isa nga malandas ang kapung-aw. Ang pisikal nga ehersisyo, pagkaon sing maayo nga kalan-on, paghaklo sang preska nga hangin kag pagpahuway sing nagakaigo, kag paglikaw sang sobra nga pagtan-aw sing TV importante tanan. Nabuligan sang isa ka babayi ang mga napung-awan paagi sa pagpahimo sa ila sing mapagsik nga pagdayandayan. Sang ang isa ka napung-awan nga babayi nagsiling: “Indi ko luyag magdayandayan,” mapinalanggaon apang malig-on sia nga nagsabat: “Huo, magadayandayan ka.” Ang babayi nagsiling: ‘Naglakat kami sing anum ka kilometro. Pagpauli namon, kinapoy sia, apang nag-ayo ang iya pamatyag. Indi ka magapati kon daw ano ka mabuligon ang lakas nga ehersisyo kon indi mo ini pagtilawan.’
Apang, kon kaisa imposible madaug sing bug-os ang kapung-aw, bisan pa gintilawan na ang tanan, lakip ang medikal nga mga terapiya. “Gintilawan ko na ang tanan,” siling sang isa ka gulanggulang nga babayi, “apang yara gihapon ang kapung-aw.” Sa kaanggid, masami nga imposible karon ang pag-ayo sa bulag, bungol, kag piang. Apang, ang mga napung-awan makasapo sing paglipay kag paglaum paagi sa tayuyon nga pagbasa sang Pulong sang Dios, nga nagahatag sang pat-od nga paglaum sang permanente nga paumpaw gikan sa tanan nga balatian sang tawo.—Roma 12:12; 15:4.
Kon San-o Wala Na sing Pung-awon Liwat
Sang ginlaragway ni Jesus ang tuman kalain nga mga butang nga mahanabo sa duta sa katapusan nga mga adlaw, sia nagdugang: “Kon ining mga butang magsugod sa pagkahanabo, maghangad kamo kag bayawa ang inyo mga ulo, kay ang pagtubos sa inyo nagapalapit.” (Lucas 21:28) Si Jesus nagapamulong nahanungod sa pagtubos pakadto sa matarong nga bag-ong kalibutan sang Dios, diin “ang tinuga gid hilwayon sa kahiulipnan sang pagkamadinulunton kag makaagom sang mahimayaon nga kahilwayan sang mga anak sang Dios.”—Roma 8:21.
Daw ano nga paumpaw para sa katawhan ang mahilway sa mga lulan sang nagligad kag magbugtaw kada adlaw nga may daw kristal katin-aw nga hunahuna, nalangkag sa paghimo sang hilikuton sa sina nga adlaw! Indi na pagtublagon ang bisan sin-o sang kapung-aw. Ang pat-od nga saad sa katawhan amo nga “pahiran [sang Dios] ang tagsa ka luha sa mga mata nila, kag wala na sing kamatayon, ukon kalisud ukon paghibi ukon kasakit pa. Ang nahaunang mga butang nagtaliwan.”—Bugna 21:3, 4.
Luwas kon tuhay ang ginasambit, ang tanan nga mga ginbalikwat sa Kasulatan gikan sa New World Translation of the Holy Scriptures.
© 1992, 2001 Watch Tower Bible and Tract Society of Pennsylvania. Amon ang tanan nga kinamatarong sa pagbalhag.
T-20-HV Gin-imprinta sa Hapon