Leksion 10
Mga Buhat nga Ginadumtan sang Dios
Ano ang dapat nga batyagon mo sa mga butang nga ginasiling sang Dios nga malain? (1)
Anong sahi sang seksuwal nga paggawi ang sayop? (2)
Paano dapat tamdon sang isa ka Cristiano ang pagbutig? (3) pagsugal? (3) pagpangawat? (3) kasingki? (4) espiritismo? (5) pagpahubog? (6)
Paano malandas sang isa ka tawo ang malain nga mga buhat? (7)
1. Ang mga alagad sang Dios nagahigugma kon ano ang maayo. Apang dapat man sila magtuon sa pagdumot kon ano ang malain. (Salmo 97:10) Nagakahulugan ina sang paglikaw sa mga buhat nga ginadumtan sang Dios. Ano ang pila sina nga mga buhat?
2. Pagpakighilawas: Ang paghulid antes sang kasal, panglahi, bestialidad, paghulid sa suod nga himata (incest), kag homoseksuwalidad mabug-at tanan nga sala batok sa Dios. (Levitico 18:6; Roma 1:26, 27; 1 Corinto 6:9, 10) Kon ang duha wala makasal apang nagapuyuay, dapat sila magbulagay ukon magpakasal.—Hebreo 13:4.
3. Pagbutig, Pagsugal, Pagpangawat: Si Jehova nga Dios indi mahimo makabutig. (Tito 1:2) Ang mga tawo nga maluyag sang iya kahamuot dapat maglikaw sa pagbutig. (Hulubaton 6:16-19; Colosas 3:9, 10) Ang tanan nga porma sang pagsugal may kakagod. Gani ang mga Cristiano wala nagapakigbahin sa bisan anong sahi sang sugal, subong sang mga loterya, palumba sang kabayo, kag bingo. (Efeso 5:3-5) Kag ang mga Cristiano wala nagapangawat. Wala sila hungod nga nagabakal sing kinawatan nga butang ukon nagakuha sang mga butang nga wala sing pahanugot.—Exodo 20:15; Efeso 4:28.
4. Kaakig, Kasingki: Ang dimapunggan nga kaakig mahimo magdul-ong sa masingki nga mga buhat. (Genesis 4:5-8) Ang tawo nga masingki indi mahimo mangin abyan sang Dios. (Salmo 11:5; Hulubaton 22:24, 25) Sayop ang magtimalos ukon magbalos sing malaut sa malain nga mga buhat nga mahimo himuon sang iban sa aton.—Hulubaton 24:29; Roma 12:17-21.
5. Mga Salamangka kag Espiritismo: Ang iban nga mga tawo nagapangabay sang gahom sang mga espiritu agod mabulong ang mga balatian. Ang iban nagahiwit sa ila mga kaaway agod magmasakit sila ukon mapatay pa gani sila. Ang gahom sa likod sining tanan nga mga buhat amo si Satanas. Gani ang mga Cristiano indi dapat makigbahin sa bisan diin sini. (Deuteronomio 18:9-13) Ang pagpabilin nga suod kay Jehova amo ang labing maayo nga pangamlig batok sa mga paghiwit sang iban sa aton.—Hulubaton 18:10.
6. Pagpahubog: Indi malain ang mag-inom sing diutay nga alak, serbesa, ukon iban pa alkoholiko nga ilimnon. (Salmo 104:15; 1 Timoteo 5:23) Apang ang lakas nga pag-inom kag pagpahubog malain sa mata sang Dios. (1 Corinto 5:11-13; 1 Timoteo 3:8) Ang sobra nga pag-inom mahimo makahalit sang imo lawas kag makaguba sang imo pamilya. Mangin kabangdanan man ini nga madali ka mahulog sa iban nga mga pagsulay.—Hulubaton 23:20, 21, 29-35.
7. Ang mga tawo nga nagabuhat sang mga butang nga ginasiling sang Dios nga malain “indi makapanubli sang ginharian sang Dios.” (Galacia 5:19-21) Kon ginahigugma mo gid ang Dios kag luyag mo sia pahamut-an, makapanginpalos ka sa sining mga buhat. (1 Juan 5:3) Tun-i nga dumtan kon ano ang ginasiling sang Dios nga malain. (Roma 12:9) Makig-upod sa mga tawo nga may diosnon nga mga batasan. (Hulubaton 13:20) Ang hamtong nga Cristianong mga kaupdanan mahimo mangin tuburan sang bulig. (Santiago 5:14) Labaw sa tanan, magsalig sa bulig sang Dios paagi sa pangamuyo.—Filipos 4:6, 7, 13.
[Retrato sa pahina 20]
Ginadumtan sang Dios ang pagpahubog, pagpangawat, pagsugal, kag masingki nga mga buhat