Ang Pinakalapnag nga Libro sa Kalibutan
“Ang Biblia amo ang libro nga pinakalapnag nga nabasa sa maragtas. . . . Mas madamo nga kopya sang Biblia ang napanagtag sangsa bisan ano nga libro. Ang Biblia ginbadbad sa mas madamo nga tion kag sa mas madamo nga hambal, sangsa bisan ano nga libro.”—“The World Book Encyclopedia.”1
SA PILA ka bahin, ang kalabanan nga libro daw subong sa mga tawo. Ginabalhag ini, mahimo magbantog, kag—luwas sa pila lamang nga daw wala nagadaan—nagadaan kag ginakalimtan. Ang mga librarya amo sa masami ang nangin mga lulubngan sang dimaisip nga libro nga daan na, wala ginabasa kag, gani daw patay na.
Apang, tumalagsahon gid ang Biblia bisan sa tunga sang daw wala nagadaan nga mga sinulatan. Bisan pa ginsulat ini sang nagligad nga 3,500 ka tuig, ginagamit gihapon ini. Amo ini ang pinakalapnag nga libro sa duta.a Kada tuig, mga 60 milyones ka kopya sang bug-os nga Biblia ukon mga bahin sini ang ginapanagtag. Ang una nga edisyon sini gin-imprinta sa movable type nga makina nga gin-imbento sang isa ka Aleman nga si Johannes Gutenberg sang 1455. Sugod sadto ginabanta nga apat ka bilyon nga Biblia (sa kabug-usan ukon sa bahin) ang naimprinta. Wala na sing iban nga libro, relihioso man ukon indi, ang makalagas sa sini.
Ang Biblia amo man ang libro nga pinakalapnag nga nabadbad sa maragtas. Ang kompleto nga Biblia ukon ang mga bahin sini nabadbad sa kapin sa 2,100 ka hambal kag dialekto.b Sa dimagkubos, ang isa ka bahin sang Biblia matigayon sa kaugalingon nga hambal sang kapin sa 90 porsiento sang tawhanon nga pamilya.2 Sa amo, ini nga libro naglapnag sa madamo nga pungsod ano man ang rasa kag tribo.
Mahimo nga ang estadistika lamang indi isa ka rason para sa imo nga usisaon ang Biblia. Walay sapayan, ang sirkulasyon kag ang kadamuon sang badbad sini makadalayaw, nagapamatuod nga madamo ang naluyag sa Biblia. Sa pagkamatuod ang pinakamabakal kag nabadbad sing pinakalapnag nga libro sa bug-os nga maragtas sang tawo takus nga binagbinagon.
[Mga nota]
a Ang masunod nga pinakalapnag nga publikasyon ginahunahuna nga amo ang pula sing panghapin nga pulyeto nga Quotations From the Works of Mao Tse-tung, nabaligya ukon napanagtag sa ginabanta nga kadamuon nga 800 milyones ka kopya.
b Ang estadistika tuhoy sa kadamuon sang hambal ginpasad sa mga numero nga ginbalhag sang United Bible Societies.
[Retrato sa pahina 6]
Ang Gutenberg nga Biblia, sa Latin, amo ang una kompleto nga libro nga naimprinta gikan sa movable type