Isa Bala ka Libro Para sa Imo?

“Wala sing katapusan ang paghimo sing madamo nga libro,” siling ni Solomon sang nagligad nga 3,000 ka tuig. (Manugwali 12:​12) Ina nga obserbasyon labi gid nga nagakaigo karon. Dugang pa sa kinaandan nga mga libro nga daw wala nagadaan, linibo ka bag-o nga libro ang ginaimprinta kada tuig. Bangod sang tuman kadamo nga libro nga mapilian, ngaa dapat mo basahon ang Biblia?

MADAMO nga tawo ang nagabasa sing mga libro agod lamang malingaw ukon agod makatuon, ukon ayhan bangod sining duha ka rason. Amo man sa pagbasa sing Biblia. Ang pagbasa sini makapauswag sa imo kag makalilingaw man. Apang indi lamang amo sina ang matigayon sa Biblia. Isa ini ka tumalagsahon nga tuburan sang ihibalo.​—⁠Manugwali 12:​9, 10.

Ginasabat sang Biblia ang mga pamangkot nga madugay na ginapalibugan sang tawo​—⁠mga pamangkot tuhoy sa aton nagligad, sa aton karon kahimtangan, kag sa aton palaabuton. Madamo ang nagapalibog: Diin kita maghalin? Ano ang katuyuan sang kabuhi? Paano kita makasapo sing kalipay sa kabuhi? Magapabilin bala sing dayon ang kabuhi sa duta? Ano ang aton palaabuton?

Ang tingob nga kusog sang tanan nga ebidensia nga ginpresentar diri maathag nga nagapamatuod nga ang Biblia sibu kag masaligan. Nabinagbinag na naton kon paano ang praktikal nga laygay sini makabulig sa aton agod mangin mapuslanon kag malipayon ang aton pagkabuhi karon. Sanglit ang mga sabat sini tuhoy sa karon nga kahimtangan makaalayaw, pat-od nga ang mga sabat sini tuhoy sa nagligad kag ang mga tagna sini tuhoy sa palaabuton takus nga talupangdon naton sing maayo.

Kon Paano Matigayon ang Labing Daku nga Benepisyo

Madamo nga tawo ang nagsugod sa pagbasa sing Biblia apang nag-untat sila sang may nasapwan sila nga mga bahin sini nga mabudlay hangpon. Kon amo sina ang natabo sa imo, may pila ka butang nga mahimo makabulig sa imo.

Pilia ang isa ka masaligan nga badbad sa modernong-adlaw nga lenguahe, subong sang New World Translation of the Holy Scriptures.⁠a Ang iban nga mga tawo nagasugod paagi sa pagbasa sing mga kasaysayan sang Ebanghelyo tuhoy sa kabuhi ni Jesus, nga may maalamon nga mga panudlo, subong sang masapwan sa Wali sa Bukid, nga nagapakita sing paghangop sa kinaugali sang tawo kag nagabalay kon paano naton mapauswag ang aton kabuhi.​—⁠Tan-awa ang Mateo kapitulo 5 tubtob 7.

Dugang sa diretso lang nga pagbasa sing Biblia, ang tema por tema nga paagi sa pagtuon makahatag sing impormasyon. Nagadalahig ini sing pag-analisar sa kon ano ang ginasiling sang Biblia tuhoy sa isa ka partikular nga tema. Mahimo nga makibot ikaw sa kon ano gid ang ginasiling sang Biblia tuhoy sa mga tema subong sang kalag, langit, duta, kabuhi, kag kamatayon, subong man sa Ginharian sang Dios​—⁠kon ano ini kag kon ano ang himuon sini.⁠b Ang mga Saksi ni Jehova may programa para sa tema por tema nga pagtuon sa Biblia, nga ginaaman nga wala sing bayad. Mahimo ikaw mamangkot tuhoy sini paagi sa pagsulat sa mga manugbalhag, nga ginagamit ang nagakaigo nga direksion nga nalista sa pahina 2.

Sa tapos mausisa ang ebidensia, madamo nga tawo ang naghinakop nga ang Biblia naghalin sa Dios, nga ginapakilala sang Kasulatan subong si “Jehova.” (Salmo 83:18) Ayhan indi ka kumbinsido nga ang Biblia naghalin sa Dios. Ngaa indi ini usisaon para sa imo kaugalingon? Nagasalig kami nga sa tapos sang pagtuon, pagpamalandong, kag ayhan maeksperiensiahan ang praktikal nga balor sang wala nalatiran sing tion nga kaalam sini, magapati ka nga ang Biblia isa matuod ka libro para sa tanan nga tawo, kag labi na​—⁠isa ka libro para sa imo.

[Mga nota]