Si Jehova—Sin-o Sia?
SI Henri Mouhot, isa ka Pranses nga manuglagulad sang ika-19 nga siglo, nanghagbas sang iya alagyan sa masiot nga kagulangan sang Cambodia, antes makalab-ot sa isa ka daku nga kanal nga nagalikop sa isa ka templo. Amo ini ang Angkor Wat, ang pinakadaku nga relihioso nga monumento sa kalibutan. Sa isa lang ka pasiplat masiling gid ni Mouhot nga ang nalumutan na nga templo ginpatindog sang tawo. “Gintukod sang dumaan nga mga tawo kaangay ni Michelangelo,” sulat niya, “mas daku ini sangsa bisan ano nga napatindog sang Gresya ukon Roma.” Walay sapayan nga ginbiyaan ini kag ginpatumbayaan sa sulod sang mga siglo, wala gid sia magduhaduha nga ining masibod nga tinukod may isa ka desinyador.
Makawiwili nga amo man sini ang pangatarungan sang isa ka tulun-an sang kaalam nga ginsulat sang nagligad nga mga siglo, nga nagasiling: “Sa pagkamatuod, ang tagsa ka balay may nagtukod, apang sia nga nagtukod sang tanan nga butang amo ang Dios.” (Hebreo 3:4) Ang iban mahimo mamatok, ‘Indi pareho ang kahimtangan sang kinaugali nga mga butang kag ang hinimuan sang tawo.’ Apang, indi tanan nga sientipiko nagaugyon sa sina nga pagpamatok.
Sa tapos mapilitan sa pag-ugyon nga ang “biokemikal nga mga sistema indi mga butang nga wala sing kabuhi,” si Michael Behe, katapo nga propesor sa biochemistry sa Lehigh University, Pennsylvania, E.U.A., namangkot: “Mahimo bala nga ang biokemikal nga mga sistema gindesinyo nga may kaalam?” Nagpadayon sia sa pagsugid nga ang mga sientipiko nagadesinyo karon sing daku nga mga pagbag-o sa buhi nga mga organismo paagi sa metodo nga genetic engineering. Huo, ang buhi kag walay kabuhi nga mga butang mahimo “matukod”! Sang gin-usisa niya ang buhi nga mga selula nga makita lamang sa mikroskopio, natalupangdan ni Behe ang makatilingala masibod nga mga sistema nga nahuman sang mga elemento nga naangot sa isa kag isa sa ila pagpanghikot. Ang iya konklusion? “Ang resulta sining paagisod nga mga panikasog nga usisaon ang selula—usisaon ang kabuhi sa molekula pa lamang—amo ang mabaskog, maathag, matagsing nga pagtuaw sing ‘desinyo!’ ”
Sin-o, nian, ang Desinyador sa likod sining tanan masibod nga mga sistema?
Sin-o ang Desinyador?
Makita ang sabat sa dumaan nga libro sang kaalam nga ginbalikwat kaina—ang Biblia. Sa nagabukas nga mga pulong sini, simple lamang kag maathag nga ginasabat sang Biblia ang pamangkot kon sin-o ang nagdesinyo sa tanan nga butang: “Sa ginsuguran gintuga sang Dios ang mga langit kag ang duta.”—Genesis 1:1.
Apang, agod ipatuhay ang iya kaugalingon gikan sa iban pa nga ginasiling man nga Dios, ginapakilala sang Manunuga ang iya kaugalingon paagi sa isa ka tumalagsahon nga ngalan: “Amo sini ang ginsiling sang matuod nga Dios, si Jehova, ang Manunuga sang mga langit . . . , ang Isa nga nagpasad sang duta kag sang patubas sini, ang Isa nga naghatag sing ginhawa sa mga tawo nga yari sa sini.” (Isaias 42:5, 8) Si Jehova amo ang ngalan sang Dios nga nagdesinyo sang uniberso kag naghimo sang mga lalaki kag mga babayi sa duta. Apang sin-o si Jehova? Ano sia nga sahi sang Dios? Kag ngaa dapat ikaw mamati sa iya?
Ang Kahulugan sang Iya Ngalan
Una sa tanan, ano ang kahulugan sang ngalan sang Manunuga nga Jehova? Ang balaan nga ngalan nasulat sa apat ka Hebreong letra (יהוה) kag halos 7,000 ka beses nga mabasa sa Hebreo nga bahin sang Biblia. Ini nga ngalan ginakabig nga amo ang causative nga porma sang Hebreong berbo nga ha·wahʹ (“mangin amo”) kag gani nagakahulugan sing “Ginapahanabo Niya nga Mangin Amo.” Kon sa aton pa, maalamon nga ginapahanabo ni Jehova ang bisan ano nga luyag niya agod tumanon ang iya mga katuyuan. Sia isa ka Manunuga, Hukom, Manluluwas, Manugsakdag sang kabuhi, kag iban pa, agod tumanon ang iya mga saad. Dugang pa, ang gramatiko nga porma sang Hebreo nga berbo nagapahangop sing aksion samtang ginatuman ang isa ka saad. Ginapakita sini nga ginatuman pa gihapon ni Jehova ang iya mga saad. Huo, sia isa ka buhi nga Dios!
Ang Talalupangdon nga mga Kinaiya ni Jehova
Ginapakita sang Biblia nga ining Manunuga kag manugtuman sang iya mga saad isa ka makagalanyat nga persona. Ginapahayag mismo ni Jehova ang iya pinasahi nga mga kinaiya kag nagsiling: “Si Jehova, si Jehova, isa ka Dios nga maluluy-on kag mainayuhon, mahinay sa pagpangakig kag bugana sa mahigugmaon nga kaayo kag sa kamatuoran, nga nagatipig sing mahigugmaon nga kaayo para sa linibo, nga nagapatawad sang kasaypanan kag paglapas kag sala.” (Exodo 34:6, 7) Ginalaragway si Jehova subong isa ka Dios nga nagapakita sing mahigugmaon nga kaayo. Ang Hebreong tinaga nga gingamit diri mabadbad man nga “mainunungon nga gugma.” Sa pagtuman sang iya dayon nga katuyuan, si Jehova mainunungon nga nagapadayon sa pagpakita sing gugma sa iya mga tinuga. Luyag mo bala ini nga sahi sang gugma?
Si Jehova mahinay man mangakig kag madali magpatawad sang aton mga sayop. Makalilipay updon ang isa ka tawo nga indi palapangita sing sayop kundi madali magpatawad sa aton. Apang wala ini nagakahulugan nga ginakunsinti ni Jehova ang kalainan. Sia nagsiling: “Ako, si Jehova, nagahigugma sang katarungan, nagadumot sang pagpangawat upod sang pagkadimatarong.” (Isaias 61:8) Subong Dios sang katarungan, indi niya pagpabay-an tubtob san-o ang batinggilan nga mga makasasala nga nagapadayon sa ila kalautan. Sa amo, mapat-od naton nga sa iya sibu nga tion, tadlungon ni Jehova ang inhustisya sa aton kalibutan.
Kinahanglan ang kaalam agod mabalanse sing himpit ang mga kinaiya nga gugma kag katarungan. Ginabalanse ni Jehova ining duha ka kinaiya sa isa ka makatilingala nga paagi kon nagapakig-angot sia sa aton. (Roma 11:33-36) Sa pagkamatuod, ang iya kaalam makita bisan diin. Ginapamatud-an ini sang mga kalatingalahan sang kinaugali.—Salmo 104:24; Hulubaton 3:19.
Apang, indi lamang kaalam ang kinahanglan. Agod matuman sing bug-os ang iya ginahunahuna, dapat man nga bug-os ang gahom sang Manunuga. Ginapakita sang Biblia nga subong sini ang Dios: “Itangla ang inyo mga mata kag tan-awa. Sin-o bala ang nagtuga sini nga mga butang? Ini amo ang Isa nga nagapaguwa sang ila kasuldadusan sa isip . . . Bangod sa pagkabugana sang dinamiko nga enerhiya, . . . wala sing isa nga nakulang.” (Isaias 40:26) Sa pagkamatuod, ‘bugana ang dinamiko nga enerhiya’ ni Jehova agod tumanon niya ang iya kabubut-on. Wala ka bala naganyat kay Jehova bangod sini nga mga kinaiya?
Mga Benepisyo sang Pagkilala kay Jehova
‘Wala gintuga [ni Jehova ang duta] sa walay pulos’ kundi ‘ginhuman [niya] ini agod nga puy-an’ sang mga tawo nga may suod nga kaangtanan sa iya. (Isaias 45:18; Genesis 1:28) Nagaulikid sia sa iya mga tinuga sa duta. Ginhatagan niya ang katawhan sing himpit nga panugod sa isa ka tulad-hardin nga puluy-an, isa ka paraiso. Apang, wala nahamuot si Jehova nga ginalaglag ini sang mga tawo. Walay sapayan sini, subong ginapakita sang iya ngalan, tumanon ni Jehova ang iya una nga katuyuan sa katawhan kag sa duta. (Salmo 115:16; Bugna 11:18) Ipasag-uli niya ang Paraiso sa duta para sa mga tawo nga handa sa pagtuman sa iya subong iya mga anak.—Hulubaton 8:17; Mateo 5:5.
Ginalaragway sang katapusan nga tulun-an sang Biblia ang sahi sang kabuhi nga maagom mo sa sina nga Paraiso: “Pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” (Bugna 21:3, 4) Amo ini ang matuod nga kabuhi nga luyag ni Jehova nga maagom mo. Maayo gid sia nga Amay! Luyag mo bala makatuon sing dugang pa tuhoy sa iya kag kon ano ang ginapatuman sa imo agod mabuhi ikaw sa Paraiso?
Luwas kon tuhay ang ginapakita, ang tanan nga binalikwat sa Biblia naghalin sa New World Translation of the Holy Scriptures.