Kingdom News No. 36

Ang Bag-ong Milenyo—Ano ang Imo Palaabuton?

Ang Bag-ong Milenyo—Pamanagbanag Bala Sang Isa ka Bag-o nga Dag-on?

SANG tungang-gab-i sang Disiembre 31, 1999, natapos ang ika-20 nga siglo.a Isa ini ka siglo sang daku nga kagamo. Apang tion man ini nga nagpamanagbanag ang bag-o nga mga teknolohiya, daku nga mga pag-uswag sa medisina, pagbaha sang impormasyon, kag madasig nga pagtin-ad sang ekonomiya sa bug-os nga kalibutan. Busa madamo ang nag-abiabi sa bag-ong milenyo subong isa ka simbulo sang paglaum kag pagbag-o. Tion ayhan ini nga matapos na ang inaway, kaimulon, polusyon sa palibot, kag balatian?

Madamo ang nagalaum sini. Apang ano ang posibilidad nga mahanabo sa bag-ong milenyo ang mga pagbag-o nga makahatag sa imo sing benepisyo—mga pagbag-o nga magahimo sang kabuhi nga walay katalagman kag may kalig-unan para sa imo kag sa imo pamilya? Binagbinaga ang kadakuon sang pila lamang ka problema nga ginaatubang naton.

Polusyon

Ang industriyalisado nga mga pungsod “nagatuga sing halit sa palibot sa bug-os kalibutan nga kasangkaron kag sing lapnag nga polusyon kag pagguba sa kinaugali nga mga sistema.” Kon magpadayon ini nga huyog, “dugang pa nga mahalitan ang kinaugali nga palibot.”—“Global Environment Outlook—2000,” United Nations Environment Programme.

Balatian

“Sa tuig 2020, pito sa kada napulo sa nagapauswag nga mga rehiyon ang mapatay bangod sa indi makalalaton nga mga balatian, ipaanggid sa wala pa sa katunga karon.”—“The Global Burden of Disease,” Harvard University Press, 1996.

Ang iban nga mga eksperto nagasiling nga “sa tuig 2010, 66 milyones ka tawo na lang ang [buhi] sa 23 ka pungsod nga may grabe gid nga epidemya sa [AIDS].”—“Confronting AIDS: Evidence From the Developing World,” report sang European Commission kag sang World Bank.

Kaimulon

“Halos 1.3 bilyon ka tawo ang nagakabuhi sa kubos sa isa ka dolyar [U.S.] kada adlaw, kag malapit sa 1 ka bilyon ang wala sing bastante nga makaon.”—“Human Development Report 1999,” United Nations Development Programme.

Inaway

“Ang kasingki sa sulod sang [nanuhaytuhay nga pungsod] mahimo makadangat sa walay tupong nga kadakuon. Bangod sang [pagbinahinbahin] sa minoridad nga kaliwatan, tribo, kag relihion, . . . ini nga kasingki mangin amo . . . ang labing kinaandan nga sahi sang inaway sa masunod nga duha ka pulog-lima ka tuig . . . , nga magapatay sing ginatos ka libo ka tawo kada tuig.”—“New World Coming: American Security in the 21st Century,” U.S. Commission on National Security/21st Century.

Busa ang paghugyaw kag kakunyag bangod sang bag-ong milenyo nagahinago sang kamatuoran nga ang polusyon, balatian, kaimulon, kag inaway labi pa nga makahaladlok karon. Ang gamot sining mga problema amo ang kakagod, walay pagsalig, kag kadalok—mga kinaiya nga indi madula paagi lamang sa pagpanalawsaw sang siensia, teknolohiya, ukon politika.

Ang Milenyo nga Magapakamaayo sa Katawhan

ANG isa ka dumaan nga manunulat nagsiling anay: “Ang dalanon sang tawo wala natungod sa iya kaugalingon. Wala sa tawo nga nagalakat bisan ang pagtuytoy sa iya tikang.” (Jeremias 10:23) Ang tawo wala sing ikasarang kag kinamatarong man sa paggahom sa duta. Ang aton Magbubuhat, si Jehova nga Dios, lamang ang may kinamatarong kag ihibalo sa paglubad sa mga problema sang katawhan.—Roma 11:33-36; Bugna 4:11.

Apang san-o? Paano? Madamo gid ang pamatuod nga nagahingapos na ang “katapusan nga mga adlaw.” Buksi, palihug, ang imo Biblia, kag basaha ang 2 Timoteo 3:1-5. Maathag nga ginalaragway sini ang mga batasan sang mga tawo sa sining “makahalanguyos nga mga tion.” Ginalaragway man sang Mateo 24:3-14 kag Lucas 21:10, 11 ang “katapusan nga mga adlaw.” Ginapatalupangod sini ang pisikal nga mga hitabo sugod sang 1914, subong sang bug-os kalibutan nga inaway, mga piste, kag lapnag nga kakulang sa pagkaon.

Sa indi madugay matapos na ang “katapusan nga mga adlaw.” Ang Daniel 2:44 nagasiling: “Ang Dios sang langit magapatindog sing ginharian nga indi gid malaglag. . . . Dugmukon sini kag papason ini tanan nga [dutan-on nga] ginharian, kag magapadayon ini tubtob sa walay katubtuban.” Sa amo gintagna nga ang Dios magapatindog sing isa ka Ginharian, ukon panguluhan, nga magagahom sa duta. Suno sa Bugna 20:4, ining panguluhan magagahom sing isa ka libo ka tuig—isa ka milenyo! Binagbinaga ang pila lamang sang mga paagi nga ang mga kahimtangan sang pagkabuhi magauswag para sa tanan nga katawhan sa tion sining mahimayaon nga Milenyo:

Pangabuhi. “Pat-od nga magapatindog sila sing mga balay kag magapuyo sa sini; kag pat-od nga magatanom sila sing mga ulubasan kag magakaon sang bunga sini. Indi sila magpatindog kag iban ang magapuyo; indi sila magtanom kag iban ang magakaon.”—Isaias 65:21, 22.

Panglawas. “Sa amo nga tion ang mga mata sang mga bulag pamuklaton, kag ang mga igdulungog sang mga bungol mabuksan. Sa amo nga tion ang piang magataklad subong sang lalaki nga usa, kag ang dila sang apa magaamba sa kalipay.” “Kag wala sing pumuluyo nga magasiling: ‘Nagamasakit ako.’”—Isaias 33:24; 35:5, 6.

Palibot. ‘Laglagon [sang Dios] ang mga nagalaglag sang duta.’—Bugna 11:18.

Pagpakig-angot Sang mga Tawo. “Indi sila magahimo sing bisan ano nga halit ukon magatuga sing bisan ano nga kagulub-an sa bug-os ko nga bukid nga balaan; bangod ang duta pat-od gid nga matugob sang ihibalo ni Jehova.”—Isaias 11:9.

Minilyon ang nagatuo sa sini nga mga saad sang Biblia kag sa amo malaumon nga ginasaligan nila ang palaabuton. Amo kon ngaa malandas nila ang mga pag-ipit kag mga problema sang kabuhi. Paano ang Biblia mangin isa ka nagatuytoy nga puwersa sa imo kabuhi?

Ang Ihibalo nga Nagadul-ong sa Kabuhi!

ANG siensia kag teknolohiya makadalayaw kon kaisa! Walay sapayan sini, wala gihapon mahimo sang ihibalo sang tawo ang kabuhi nga may kalig-unan kag makalilipay para sa kalabanan nga tawo. Sa Juan 17:3, ginalaragway sang Biblia ang lamang nga ihibalo nga makahimo sini, nga nagasiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”

Ini nga ihibalo masapwan sa mga pahina sang Biblia. Bisan pa madamo ang nagpabutyag sing mabaskog nga mga opinyon tuhoy sa sining sagrado nga tulun-an, pila gid lamang ang nakausisa sini para sa ila kaugalingon. Kamusta ka? Matuod, kinahanglan ang daku nga panikasog agod mabasa ang Biblia. Apang takus ini. Ang Biblia amo lamang ang tulun-an nga “ginbugna sang Dios kag mapuslanon sa pagpanudlo, sa pagsabdong, sa pagtadlong sang mga butang, sa pagdisiplina sa pagkamatarong.”—2 Timoteo 3:16.

Paano ka, nian, makasugod agod mahibaluan mo ang kaundan sang Biblia? Ngaa indi mo batunon ang bulig sang mga Saksi ni Jehova? Ginatudluan nila ang minilyon ka tawo sa ila puluy-an, nga wala sing bayad. Agod mabuligan ka sa sining bahin, nagagamit sila sing nanuhaytuhay nga napasad-sa-Biblia nga publikasyon, subong sang brosyur nga Ano ang Ginapatuman sang Dios sa Aton? Nagahatag ini sing malip-ot nga mga sabat sa madamo nga pamangkot sa Biblia nga mahimo ginapamangkot mo man, subong sang: Sin-o ang Dios? Ano ang katuyuan sang Dios para sa duta? Ano ang Ginharian sang Dios? Paano mapauswag sang Biblia ang pagkabuhi sang inyo pamilya?

Kon luyag mo nga duawon ka sang isa sang mga Saksi ni Jehova sa imo puluy-an, sulati palihug ang kupon sa ubos. Malipay sila sa paghatag sa imo sing dugang pa nga impormasyon tuhoy sa mahimayaon nga Milenyo nga Paggahom sang Ginharian sang Dios!

□ Luyag ko makabaton sing brosyur nga Ano ang Ginapatuman sang Dios sa Aton?

□ Palihug pakig-anguti ako tuhoy sa walay bayad nga pagtuon sa Biblia sa puluy-an

[Nota]