Pagpalambo sa Interes nga Napukaw sang Kingdom News Num. 36
1 Napanagtag na bala ninyo tanan ang ginhatag sa inyo nga Kingdom News Num. 36? May suno-sa-tion ini nga pamangkot nga dapat pamalandungan sang tanan: “Ang Bag-ong Milenyo—Ano ang Imo Palaabuton?” Samtang nagahinampot ang tuig 2000, lainlain ang mga ginapaabot sa bag-ong milenyo. Ginabinagbinag sang Kingdom News Num. 36 ang pila sining mga ginapaabot kag ginapahanumdom sa aton nga ang mga kahimtangan sa kalibutan wala nagahatag sing basihan para sa masanag nga paglaum. Ang lamang nga milenyo nga magahatag sing paghidait kag kalig-unan nga ginapangita sang kalabanan nga tawo amo ang Isa ka Libo ka Tuig nga Paggahom ni Cristo Jesus. Ang aton pagsalig nga ang iya Ginharian matuod nagpahulag sa aton nga ipanagtag ang Kingdom News Num. 36 sa tanan nga masarangan naton.
2 Mga Reaksion sa Kingdom News: Ang nagligad nga mga pagpanagtag sing Kingdom News nangin isa ka maayo nga pangpapagsik sa aton sa hilikuton naton. Tuhoy sa Kingdom News Num. 35, ang sanga sang Canada nagsulat: “Ining pinasahi nga kampanya mapagsik nga ginsuportahan sang mga manugbantala kag mga payunir sa latagon, kag madamong makapalig-on nga mga eksperiensia ang naagom.” Pat-od gid nga nagpakita kamo sing amo man nga kapagsik sa pagpanagtag sing Kingdom News Num. 36.
3 Ang karon nga kampanya sa Kingdom News natalana nga matapos sa Nobiembre 17, 2000. Ang tanan bala nga teritoryo nga gintangdo sa inyo kongregasyon natuptupan na? Kon wala pa, mahimo nga pangabayon kamo sang mga gulang nga padayunon ang kampanya tubtob sa katapusan sang Nobiembre.
4 Ano na ang nangin reaksion sang pagpanagtag sing Kingdom News Num. 36 sa inyo lugar? Sulatan sang pila ka tawo ang kupon kag magapangabay sing isa ka kopya sang Ginapatuman nga brosyur kag/ukon sing isa ka pagtuon sa Biblia sa puluy-an. Apang, ang kalabanan sang nagpakita anay sing interes sa tema tuhoy sa milenyo mahimo nga indi maghulag tubtob may magduaw liwat nga isa sang mga Saksi ni Jehova. Ang tanan nga nagpakita sing interes dapat duawon liwat. San-o ang maayo nga tion sa paghimo sini? Dapat ini himuon sa gilayon kon mahimo.
5 Talupangda ining mga eksperiensia nga resulta bangod sang pagbalik sa mga napahamtangan sing Kingdom News Num. 35. Isa ka payunir sa Ireland ang nagbilin sing Kingdom News sa tag-iya sang isa ka restawran. Naluyagan sang babayi ang mensahe kag ginpabalik ang sister. Ang sister nagbalik pagligad sang duha ka adlaw, kag isa ka pagtuon sa Biblia ang nasugdan. Sa Denmark, isa ka kopya sang Kingdom News ang ginbilin sa balay nga wala sing tawo. Sadto mismo nga adlaw ang babayi nga nagaistar didto nagpadala sing kupon sa sanga talatapan, nga nagpadala naman sini sa lokal nga kongregasyon. Antes magligad ang isa ka semana, duha ka sister ang nagduaw, isa ka pagtuon ang ginhimos, kag nagtambong ang babayi sa iya nahauna nga miting sa Kingdom Hall!
6 Kon Ano ang Isiling sa Inyo Pagbalik: Ang mga pagduaw liwat sa mga napahamtangan sing Kingdom News mahapos kag isa ka makalilipay nga bahin sang aton ministeryo. Kon nagahimo sini, maayo nga magdala kamo sing isa ka kopya sang Kingdom News Num. 36, kay ang tagbalay mahimo nga wala na sing kopya. Mahimo ninyo tilawan ining mga panugda.
7 Sa tapos mapahanumdom ang tagbalay kon sin-o kamo, mahimo kamo makasiling:
◼ “Nagbilin anay ako sa imo sing isa ka balasahon nga natig-uluhan ‘Ang Bag-ong Milenyo—Ano ang Imo Palaabuton?’ Indi bala makapalig-on mabasa nga sa dili madugay ang Isa ka Libo ka Tuig nga Paggahom ni Cristo Jesus magasugod, nga magapaluntad sang mga kahimtangan sang Paraiso sa duta? [Ipakita ang mga laragway sang Paraiso sa Kingdom News Num. 36.] Sa likod nga pahina, ginaagda ka sa pagpangabay sing isa ka kopya sang brosyur nga Ano ang Ginapatuman Sang Dios sa Aton?” Ipakita ang brosyur, buksi sa leksion 5, basaha ang nahaunang pamangkot kag ang parapo 1 kag 2, kag pakomentuha ang tagbalay. Basaha kag ipaathag ang isa ukon duha ka kasulatan. Kon mahimo, binagbinaga ang isa pa ka pamangkot kag parapo, nian maghimo sing kahimusan sa pagbalik kag sa pagpadayon sang paghambalanay.
8 Sanglit ang ‘follow-up’ nga tanyag para sa Nobiembre amo ang “Ginapatuman” nga brosyur ukon ang “Ihibalo” nga libro, mahimo kamo makasiling:
◼ “Sang nagligad nga pagduaw ko sa imo, nagbilin ako sing isa ka kopya sang ‘Ang Bag-ong Milenyo—Ano ang Imo Palaabuton?’ Nagatanyag ini sing walay bayad nga pagtuon sing Biblia sa puluy-an. Nagbalik ako agod ipakita sa imo ang bulig sa pagtuon nga ginagamit namon. [Ipakita ang Ginapatuman nga brosyur, kag buksi ang likod nga panghapin; ukon ipakita ang Ihibalo nga libro, kag buksi ang pahina 188-9.] Ang Milenyo nga ginhambalan sa Biblia magapaluntad sang mga kahimtangan subong sang makita mo sa sining laragway. Agod mangin kalipikado sa pagkabuhi sa Paraiso, dapat kita magkuha sing sibu nga ihibalo tuhoy sa Dios. Palihug tuguti ako nga ipasundayag sa malip-ot kon paano kami nagatuon sing Biblia.”
9 Ang pagpanagtag sing Kingdom News Num. 36 nagpahulag sa aton nga dugangan ang aton bahin sa ministeryo, nga nagaresulta sa daku nga panaksi. Mahimo nga nagpukaw ini sang interes sang madamo nga indibiduwal sa teritoryo. Ang aton nahiusa nga panikasog sa pagpalambo sini nga interes, sa bulig ni Jehova, magaresulta sa aton malipayon nga pagpangita sa madamo pa nga tulad-karnero.—Mat. 10:11; Binu. 13:48, 49, 52.