Ang Ila Bug-os Kalibutan nga Organisasyon kag Hilikuton

ANG pila ka sugpon-sugpon nga mga bahin ginagamit sa pagdumala sa pagpanaksi nga hilikuton sa kapin sa 230 ka kadutaan. Ang kabilugan nga pagdumala nagagikan sa Nagadumala nga Hubon sa bug-os kalibutan nga ulong-talatapan sa Brooklyn, New York. Ang Nagadumala nga Hubon nagapadala sing mga tiglawas kada tuig sa nanuhaytuhay nga rehiyon sa bug-os nga kalibutan agod makig-angot sa mga tiglawas sang sanga sa sini nga mga rehiyon. Sa mga sanga talatapan, may Komite sang Sanga nga may tatlo tubtob pito ka katapo agod magdumala sa hilikuton sa mga pungsod nga nasakupan nila. Ang iban nga mga sanga may mga imprintahan, ang iban nagagamit sing mga high-speed rotary press. Ang pungsod ukon duog nga ginaalagaran sang tagsa ka sanga ginabahin sa mga distrito, kag ang mga distrito, naman, ginabahin sa mga sirkito. Ang tagsa ka sirkito may mga 20 ka kongregasyon. Ang manugtatap sang distrito nagaduaw sa mga sirkito sa iya distrito sing pasunod. Duha ka asambleya ang ginahiwat kada tuig para sa tagsa ka sirkito. May yara man manugtatap sang sirkito, kag nagaduaw sia sa tagsa ka kongregasyon sa iya sirkito sa masami makaduha kada tuig, nga nagabulig sa mga Saksi sa pag-organisar kag kon paano himuon ang pagbantala nga hilikuton sa teritoryo nga gin-asayn sa sina nga kongregasyon.

Ang lokal nga kongregasyon kag ang Kingdom Hall sini amo ang sentro sa pagsugid sing maayong balita sa inyo komunidad. Ang mga duog sa idalom sang tagsa ka kongregasyon ginabahinbahin sa diutay nga mga teritoryo. Ginaasayn ini sa indibiduwal nga mga Saksi nga nagapanikasog sa pagduaw kag sa pagpakighambal sa mga tawo sa tagsa ka puluy-an diri. May mga gulang nga gintangdo sa tagsa ka kongregasyon, nga ginahuman sang pila lamang tubtob sa mga 200 ka Saksi, agod mag-atipan sang nanuhaytuhay nga mga katungdanan. Ang indibiduwal nga manugwali sing maayong balita importante sa organisasyon sang mga Saksi ni Jehova. Ang tagsa ka Saksi, nga nagaalagad sa bug-os kalibutan nga ulong-talatapan, sa mga sanga, ukon sa mga kongregasyon, nagahimo sining hilikuton sa latagon nga isugid sing personal sa iban ang nahanungod sa Ginharian sang Dios.

Ang mga report tuhoy sa sining hilikuton nagadangat sa bug-os kalibutan nga ulong-talapan, kag isa ka tuigan nga Yearbook ang ginatipon kag ginabalhag. Subong man, may tsart nga ginabalhag kada tuig sa Enero 1 nga guwa sang Ang Lalantawan. Ining duha ka publikasyon nagahatag sing detalyado nga mga report tuhoy sa mga nahimuan kada tuig sa pagpanaksi kay Jehova kag sa iya Ginharian sa idalom ni Cristo Jesus. Sang nagligad nga mga tinuig mga 14,000,000 ka Saksi kag mga interesado ang nagtambong sa Memoryal sang kamatayon ni Jesus kada tuig. Ang mga Saksi ni Jehova nagahinguyang sing kapin sa 1,000,000,000 ka oras kada tuig sa pagwali sing maayong balita, kag kapin sa 300,000 ka bag-uhan ang ginabawtismuhan. Ginatos ka milyon nga kopya sang literatura ang kabilugan nga ginapanagtag.