Leksion 14
Kon Paano Ginaorganisar ang mga Saksi ni Jehova
San-o nagsugod ang mga Saksi ni Jehova sa modernong-adlaw? (1)
Paano ginahiwat ang mga miting sang mga Saksi ni Jehova? (2)
Paano ginaatipan ang mga galastuhan? (3)
Sin-o ang nagapanguna sa kada kongregasyon? (4)
Anong mas dalagku nga mga miting ang ginahiwat kada tuig? (5)
Anong hilikuton ang ginahimo sa ila mga ulong-talatapan kag mga sanga talatapan? (6)
1. Ang mga Saksi ni Jehova nagsugod sa modernong-adlaw sadtong dekada 1870. Sang primero, gintawag sila nga mga Estudyante sang Biblia. Apang sang 1931 ginbaton nila ang Makasulatanhon nga ngalan nga Mga Saksi ni Jehova. (Isaias 43:10) Halin sa diutay nga ginsuguran ang organisasyon nagtubo sa minilyon ka mga Saksi, nga masako sa pagbantala sa kapin sa 230 ka kadutaan.
2. Ang kalabanan nga mga kongregasyon sang mga Saksi ni Jehova nagatipon sing tatlo ka beses kada semana. Ginaagda ka sa pagtambong sa bisan diin sini. (Hebreo 10:24, 25) Ang Biblia amo ang sadsaran sa kon ano ang ginatudlo. Ang mga miting ginabuksan kag ginatakpan sing pangamuyo. Ang tinagipusuon nga “espirituwal nga mga ambahanon” ginaamba man sa kalabanan nga mga miting. (Efeso 5:18, 19) Wala ini sing bayad, kag wala sing ginahimo nga pagpangolekta.—Mateo 10:8.
3. Ang kalabanan nga mga kongregasyon nagahiwat sing mga miting sa Kingdom Hall. Sa masami simple ini nga mga tinukod nga ginpatindog sang boluntaryo nga mga Saksi. Wala ka sing makita nga mga imahen, mga krusipiho, ukon mga butang kaangay sini sa Kingdom Hall. Ang mga balayran ginabayaran paagi sa boluntaryo nga mga donasyon. Para sa mga maluyag mag-amot, may yara isa ka kahon-alamutan.—2 Corinto 9:7.
4. Sa tagsa ka kongregasyon, may mga gulang, ukon mga manugtatap. Nagapanguna sila sa pagtudlo sa kongregasyon. (1 Timoteo 3:1-7; 5:17) Ginabuligan sila sang ministeryal nga mga alagad. (1 Timoteo 3:8-10, 12, 13) Ining mga lalaki wala ginabayaw nga mataas sa iban nga katapo sang kongregasyon. (2 Corinto 1:24) Wala sila ginahatagan sing pinasahi nga mga titulo. (Mateo 23:8-10) Wala sila nagapanapot sing tuhay sa iban. Wala sila ginabayaran tungod sang ila trabaho. Ang mga gulang kinabubut-on nga nagaatipan sang espirituwal nga mga kinahanglanon sang kongregasyon. Mahimo sila makaaaman sing lugpay kag panuytoy sa panahon nga may problema.—Santiago 5:14-16; 1 Pedro 5:2, 3.
5. Ang mga Saksi ni Jehova nagahiwat man sing dalagku nga mga asambleya ukon mga kombension kada tuig. Sa sining mga tion ang madamo nga kongregasyon nagatipon para sa isa ka pinasahi nga programa sang pagtuon sa Biblia. Ang pagbawtismo sa bag-ong mga disipulo isa ka regular nga bahin sang tagsa ka programa sang asambleya ukon kombension.—Mateo 3:13-17; 28:19, 20.
6. Ang ulong-talatapan sa bug-os nga kalibutan sang mga Saksi ni Jehova nahamtang sa New York. Makita didto ang Nagadumala nga Hubon, ang isa ka sentro nga grupo sang eksperiensiado nga mga gulang nga nagatatap sang mga kongregasyon sa bug-os nga kalibutan. May yara man kapin sa 100 ka sanga talatapan sa bug-os nga kalibutan. Sa sining mga duog, ang mga boluntaryo nagabulig sa pag-imprinta kag sa pagpadala sing mga literatura sa Biblia. Ginahatag man ang panuytoy sa pag-organisar sang pagbantala nga hilikuton. Ngaa indi ka magplano sa pagduaw sa pinakamalapit sa imo nga sanga talatapan?