Paggamit sing Mikropono

ANG aton Cristianong mga kauturan nagahinguyang sing daku nga tion kag panikasog sa pagtambong sa Cristianong mga miting. Agod makabenepisyo sila sa kon ano ang ginahambal, dapat makabati sila sing maathag.

Sang panahon sang dumaan nga Israel, wala sing de-koryente nga kagamitan sa pagpabaskog sang tingog. Sang nagpamulong si Moises sa pungsod sang Israel sa Kapatagan sang Moab antes sila magsulod sa Ginsaad nga Duta, paano sia nabatian sang tanan niya nga tagpalamati, nga nagadamo sing minilyon? Posible nga gingamit ni Moises ang isa ka sistema sang pagpasapasa sang impormasyon diin ang iya ginpamulong pasunod nga ginsulit sang mga tawo nga nahamtang sa nagakaigo nga bal-ut sa bug-os nga kampo. (Deut. 1:1; 31:1) Wala madugay pagkatapos nga ginsugdan sang mga Israelinhon ang pagsakop sa duta sa nakatundan sang Jordan, gintipon ni Josue ang pungsod sa atubangan sang Bukid Gerizim kag Bukid Ebal, diin ang mga Levinhon maathag nga yara sa nalupyakan sa ulot sini. Didto ang tanan nga tawo nakabati kag nagsabat sa mga pagpakamaayo kag mga pagpakamalaut sang Dios nga ginpresentar sa ila. (Jos. 8:33-35) Mahimo nga sa sini man nga okasyon, gingamit ang pagpasahay sing mensahe paagi sa mga tawo, apang wala sing duhaduha nga nakabulig man ang plastada sang duog diin mahapos mabatian ang nagahambal.

Mga 1,500 ka tuig sang ulihi sang ang “daku gid nga kadam-an nagtipon” sa Dagat sang Galilea sa pagpamati kay Jesus, nagsakay sia sa isa ka sakayan, nagpatunga diutay, kag naglingkod sa paghambal sa kadam-an. (Mar. 4:​1, 2) Ngaa naghambal si Jesus gikan sa sakayan? Bangod ang tingog sang tawo nagalanog sing maathag sa makanay nga kadaygan sang tubig.

Tubtob sa maaga nga bahin sang ika-20 nga siglo, ang kabaskugon kag kaathag sang tingog sang humalambal amo pirme ang nagapat-od kon daw ano kadamo sa mga tagpalamati ang makabati sa ginahambal. Apang, sugod sang dekada 1920, ang mga alagad ni Jehova naggamit sang de-koryente nga kagamitan sa pagpabaskog sang tingog sang tawo sa ila mga kombension.

Kagamitan sa Tunog. Ini nga kagamitan sarang makapabaskog sang tingog sang humalambal sing pila ka pilo apang mahuptan gihapon sini ang kalidad kag tono sang iya tingog. Indi na kinahanglan nga painaton gid sang humalambal ang iya mga kuwerdas bokales (vocal cord). Indi na magpakabudlay pa ang mga tagpalamati agod lamang mabatian ang ginahambal. Sa baylo, makakonsentrar sila sa mensahe.

Daku gid ang ginhimo agod pat-uron nga may maayo nga kagamitan sa tunog sa mga kombension kag mga asambleya sang mga Saksi ni Jehova. Dugang pa, madamo nga mga Kingdom Hall ang nagagamit sang mga kagamitan sa tunog sa pagpabaskog sang tingog sang mga nagapamulongpulong, sang mga nagadumala sa mga miting, ukon sang mga nagabasa sa plataporma. Kag ang pila ka kongregasyon may mga mikropono man nga ginagamit sang mga tumalambong kon nagakomento sa mga miting. Kon ang inyo kongregasyon may amo sini nga kagamitan, tun-i nga gamiton ini sing maayo.

Pila ka Sadsaran nga Panuytoy. Agod magamit sing nagakaigo ang kagamitan, dumduma ang masunod nga mga punto: (1) Ang mikropono sa masami dapat mga apat tubtob anom ka pulgada ang kalayuon gikan sa imo baba. Kon ang mikropono tuman kalapit, mahimo mag-ugong ang imo ginahambal. Kon tuman ini kalayo, mangin indi maathag ang imo tingog. (2) Ang mikropono dapat sa atubangan mo, indi sa kilid. Kon iliso mo ang imo ulo sa tuo ukon sa wala, maghambal lamang kon nagaatubang ka sa mikropono. (3) Dugangi sing diutay pa ang katunugon kag kabaskugon sang imo tingog sangsa ginagamit mo sa pagpakighambal. Apang indi na kinahanglan nga magsinggit. Mahapos mapalab-ot sang kagamitan sa tunog ang imo tingog sa pinakamalayo nga tagpalamati. (4) Kon mag-igham ka ukon mag-ubo ukon mangatsi, siguraduha nga iliso ang imo ulo palayo sa mikropono.

Kon Nagapamulongpulong. Kon magtindog ka sa podyum, masami nga ginakay-o sang isa ka utod ang posisyon sang mikropono. Magtindog sing natural nga nagaatubang sa mga tagpalamati samtang ginahimo niya ini. Ibutang ang imo mga nota sa podyum, kag pat-ura nga wala ginalipnan sang mikropono ang imo pagtulok sa sini.

Kon maghambal ka na, pamatii ang imo tingog sa trompa. Tuman bala ini katunog, ukon nagasigabong bala ang pila ka tinaga? Ayhan kinahanglan nga mag-atras ka sing isa ukon duha ka pulgada. Kon nagapasiplat ka sa imo mga nota, dumduma nga dapat ka lamang maghambal kag magbasa kon ang imo baba natuon sa mikropono ukon naibabaw diutay, indi sa idalom sini.

Kon Nagabasa Gikan sa Plataporma. Mas maayo nga uyatan mo pataas ang imo Biblia kag ang iban nga publikasyon agod nga ang imo nawong masentro sa mga tagpalamati. Bangod ang mikropono mahimo nga direkta nga yara sa imo atubangan, ayhan kinahanglan ipakilid mo diutay ang imo ginauyatan nga balasahon. Nagakahulugan ini nga ang imo ulo dapat nasentro diutay sa pihak nga kilid sang mikropono. Nian kon magbasa ka, magatuon ang imo tingog sa mikropono.

Ang kalabanan nga mga kauturan nga nagabasa sa Pagtinuon sa Lalantawan nagatindog kag nagahambal sa mikropono nga may nagatindog nga bulutangan. Bangod sini nga posisyon, makaginhawa sila sing maayo kag makabasa sing mas maathag. Dumduma nga ang pagbasa sing mga parapo may daku nga bahin sa miting. Ang benepisyo nga matigayon sang mga tagpalamati nagadepende, sa daku nga kasangkaron, sa pagpamati sa ginabasa nga materyal.

Kon Nagakomento sa Tion Sang Miting. Kon ang inyo kongregasyon nagagamit sang mga mikropono para sa pagpakigbahin sang mga tagpalamati, dumduma nga kinahanglan gihapon ang paghambal sing maathag kag may nagakaigo nga kabaskugon. Kon nagakomento, tinguhai nga uyatan ang imo ginatun-an nga publikasyon ukon ang imo Biblia. Magabulig ini sa imo nga makita sing maathag ang materyal samtang nagahambal ka sa mikropono.

Sa pila ka kongregasyon ang mga kauturan nga lalaki ginatangduan sa paghatag sing mikropono sa mga ginatukso. Kon amo sini ang kahimtangan sa inyo kongregasyon, kon tuksuon ikaw, padayuna ang pagbayaw sang imo kamot agod makita sang utod nga nagauyat sang mikropono kon diin ka nagapungko kag makadtuan ka gilayon. Kon ang mikropono isa ka sahi nga ginauyatan ukon de-mano, maghanda nga daw-on ini. Indi pagsugdi ang imo komento kon wala pa maplastar ang mikropono. Kon matapos mo na ang pagkomento, ibalik gilayon ang mikropono.

Kon Nagapakigbahin sa Isa ka Pasundayag. Ang paggamit sang mikropono sa tion sang pasundayag nagakinahanglan sing abanse gid nga pagplano. Kon may bulutangan ang mikropono, hilway ang imo duha ka kamot sa pag-uyat sang imo Biblia kag mga nota. Ang paggamit sang de-mano nga mikropono mahimo makahatag sa imo sing dugang nga kahilwayan sa paghulaghulag, apang ayhan kinahanglan nga pauyatan mo ini sa imo kaupod. Sa amo, mangin hilway ang imo nga kamot sa pag-uyat sang Biblia. Dapat ensayuhon ninyo ini sang imo tagbalay agod mahibaluan sang imo kaupod ang nagakaigo nga pag-uyat sini. Dumduma man, nga kon yara sa plataporma, indi ka magtalikod sa mga tagpalamati, ilabi na kon nagahambal ka.

Sa mga pasundayag sa Miting sa Serbisyo, mahimo nga madamo ang nagapakigbahin, kag mahimo nga maglakatlakat sila sa plataporma. Sa amo, ayhan kinahanglan ang pila ka mikropono. Dapat abanse ini nga nabutang na sa nagakaigo nga mga duog sa entablado ukon ihatag sa mga may bahin kon magsaka sila sa plataporma. Ang pagpat-od nga ang mga mikropono yara sa husto nga duog sa husto nga tion nagakinahanglan sing abanse nga pagplano. Ang pag-ensayo sa mga pasundayag antes ini ipresentar nagahatag sing kahigayunan nga matudluan ang mga nagapakigbahin sa paggamit sing epektibo sa mga mikropono. Kon indi makaensayo sa plataporma, ayhan maalamon nga ang mga magapasundayag mag-uyat sang daw mikropono kadaku nga butang agod mahanas nila ang husto nga paggamit sini. Pagkatapos sang pasundayag, dapat ibutang sang mga nagpakigbahin ang mga mikropono sing mahinay, nagahalong nga indi nila masalawid ang mga kord sang iban nga mga mikropono samtang nagabiya sila sa plataporma.

Ang paghatag naton sing igtalupangod sa paggamit sang mga mikropono may yara direkta nga kaangtanan sa isa sang panguna nga mga tulumuron sang aton mga miting, nga amo, ang pagbenepisyo sang tagsatagsa sa pagbinagbinag naton sang Pulong sang Dios. (Heb. 10:​24, 25) Paagi sa pagtuon kon paano gamiton sing epektibo ang mga mikropono, makabulig kita sa sining importante nga tulumuron.