Ang Miting sa Serbisyo Nagasangkap sa Aton Para sa Tagsa ka Maayo nga Buhat
1 Ang katuyuan sang Miting sa Serbisyo amo ang pagsangkap sa aton nga makapakigbahin sing bug-os sa ministeryo sa latagon. (2 Tim. 3:17) Apang, kon indi naton handaan ukon iaplikar ang aton natun-an, diutay lamang ang mga benepisyo.
2 Ang abanse nga paghanda magabulig sa imo nga mahangpan sing maayo pa ang panudlo. Repasuha ang mga publikasyon nga pagagamiton, kag dalha ini agod masundan mo ang humalambal kag makapakigbahin.
3 Ang nagadumala nga manugtatap nagarepaso sing mahalungon sang naiskedyul nga mga bahin sa miting. Ang sangkol, kalipikado nga mga gulang kag ministeryal nga mga alagad ginatangdo agod mahanda ini. (om p. 70) Ang mga kongregasyon nga diutay lamang ang mga gulang kag ministeryal nga mga alagad mahimo nga magtangdo sing iban pa nga kalipikado nga mga kauturan nga lalaki sa pagbulig sa ila. Ang tagsa ka humalambal dapat maghanda sing maayo, magsunod sing suod sa gin-aman nga panuytoy, kag magpat-od nga wala sia nagasobra sa oras.
4 Ang utod nga gintangdo sa mga pahibalo dapat makigsugilanon sing abanse sa nagadumala nga manugtatap agod hibaluon kon ano nga mga butang ang kinahanglan nga sambiton. Mahimo ini maglakip sang mga sulat halin sa Sosiedad ukon mga pahanumdom nahanungod sa mga kahimusan ukon mga report sa pag-alagad. Ayhan nabalitaan naton nga may mga nagamasakit nga nagakinahanglan sing pagduaw ukon nakabati sang mga aktibidad nga ginaplano sang kongregasyon para sa palaabuton. Talupangda ini sing maayo agod mangin handa ka nga himuon ang imo bahin.
5 Kon ang isa ka bahin nagakinahanglan sang pagpakigbahin sang tumalambong, maghanda paagi sa pagbasa sa materyal kag pagtan-aw sa mga kasulatan. Hunahunaa kon paano mo ginaplano nga iaplikar ang mga panugda kag kon ano ang imo ikomento. Ayhan ipakita mo ang praktikal nga kabilihanan sang panudlo paagi sa pagsugid sing malip-ot nga eksperiensia.
6 Kon may pasundayag, tilawi nga hunahunaon kon ano ang isiling mo sa sina nga kahimtangan. Talupangda ang mga argumento nga gingamit. Tilawi nga dumdumon ang ginsiling mo sang nagligad nga tion nga yara ka sa sini nga sahi sang kahimtangan, kag binagbinaga kon paano ang mga punto nga ginpasundayag nakabulig sa imo sa pagtigayon sing maayo pa nga mga resulta sa palaabuton.
7 Ang mga may bahin sa mga pasundayag kag mga interbyu dapat ensayuhon sing maayo sing abanse. Dapat mahibaluan sang kada isa kon ano ang igahambal niya kag himuon sa plataporma. Ang wala maensayo nga mga bahin masunson nga wala nagapahulag ukon nagapalig-on sa tumalambong. Ginaensayo sang iban ang ila bahin pagkatapos sang Pagtinuon sa Lalantawan sa Domingo agod makaensayo sila sa plataporma kag mahibaluan kon anong mga mikropono kag mga siya ang kinahanglanon.
8 Luyag naton ‘maghanda para sa tagsa ka maayo nga buhat.’ (2 Tim. 2:21) Ang Miting sa Serbisyo nagabulig sa aton sa paghimo sina. Ang pagtuon kag pag-aplikar sa natun-an naton magabulig sa aton nga ‘matuman sing bug-os ang [aton] ministeryo.’—2 Tim. 4:5.