TULUN-AN 51
Sibu sa Oras, Nagakaigo nga Pagbahinbahin
SAMTANG ang panguna nga empasis dapat ipahamtang sa kalidad sang imo panudlo, ang tayming sang imo mga pamulongpulong nagakadapat man nga hatagan sing igtalupangod. Ang aton mga miting naiskedyul nga magsugod kag matapos sa gintalana nga mga oras. Ang paghimo sini nagakinahanglan sing kooperasyon sang tanan nga may bahin sa programa.
Sang panahon sang Biblia, ang pagtamod sang mga tawo sa kabuhi tuhay sa kon ano ini sa madamo nga duog karon. Ang oras ginpabutyag sa pagbulubanta nga mga termino subong sang “mga ikatlo nga takna” ukon “mga ikanapulo nga takna.” (Mat. 20:3-6; Juan 1:39) Talagsa lang gid ginakabalak-an ang eksakto nga oras sa matag-adlaw nga mga hilikuton. Sa iban nga bahin sang kalibutan karon, may kaanggid man nga pagtamod sa oras.
Apang, bisan pa bangod sang lokal nga kustombre ukon personal nga luyag mahimo nga ang mga tawo mangin indi tanto ka estrikto sa oras, makabenepisyo kita sa pagtuon sa paghatag sing nagakaigo nga igtalupangod sa sini. Kon pila ka tawo ang ginahatagan sing mga bahin sa isa ka programa, dapat hatagan sing igtalupangod ang gintalana nga oras para sa tagsa ka bahin. Ang prinsipio nga “ang tanan nga butang himuon sing nagakaigo kag suno sa kahimusan” maaplikar sing maayo sa tayming sang aton mga asaynment sa miting.—1 Cor. 14:40.
Pagtigayon Sing Maayo nga Tayming. Ang paghanda amo ang yabi. Sa masami, ang mga humalambal nga nabudlayan sa pagsunod sa tayming wala makahanda sing maayo. Mahimo nga sobra ang ila kompiansa. Ukon mahimo nga subol na ang ila paghanda. Ang maayo nga tayming nagasugod sa apresasyon sa imo asaynment kag kahanda sa pagpreparar sing maayo.
Ang imo bala asaynment amo ang pagbasa? Una, repasuha ang Tulun-an 4 tubtob 7, nga nagalakip sang pagkatalunsay, pagdulog, pagpadaku sa yabi nga mga tinaga ukon mga prase, kag pagpadaku sa panguna nga mga ideya. Nian, iaplikar ini nga laygay samtang ginabasa mo sing matunog ang materyal nga gin-asayn sa imo. Orasi ang imo kaugalingon. Kinahanglan bala nga dasigon mo ang pagbasa agod makatapos sa gintalana nga oras? Dugangi ang imo kadasigon sa mga bahin nga indi tanto ka importante, apang padayuna ang paggamit sing pagdulog kag mahinay nga pagbasa agod mapadaku ang importante nga mga ideya. Sulitsulita ang pag-ensayo. Samtang nagauswag ang imo pagkatalunsay, mas mahapos nga pasibuon ang imo tayming.
Magapamulongpulong ka bala nga nagagamit sing mga nota? Indi kinahanglan nga malawig gid ang imo mga nota—nga halos manuskrito na—agod mapat-od ang nagakaigo nga tayming. Sang ginpangabudlayan mo ang Tulun-an 25, natun-an mo ang mas maayo nga paagi. Dumduma ining lima ka punto: (1) Maghanda sing maayo nga materyal, apang indi tuman kadamo. (2) Hunahunaa sing maathag ang panguna nga mga ideya, apang indi pagsauluha ang bug-os nga mga dinalan. (3) Markahi sa imo balayan kon daw ano kalawig nga tion ang ginabuko mo nga ihinguyang sa tagsa ka bahin sang imo pamulongpulong ukon kon daw ano kalawig nga tion ang dapat maglipas kon mag-abot ka sa pila ka punto. (4) Kon nagahanda, binagbinaga kon diin nga mga detalye ang mahimo dulaon kon masapwan mo nga sobra ka sa oras.(5) Ensayuha ang imo pamulongpulong.
Ang pag-ensayo importante. Samtang nagaensayo ka, bantayi ang tayming sang tagsa ka bahin sang imo pamulongpulong. Ensayuha ang imo pamulongpulong sing liwat kag liwat tubtob nga magsigo ang imo bug-os nga pamulongpulong sa gintalana nga oras. Indi pag-idasok ang tuman kadamo nga materyal. Pasobrahi diutay ang tion bangod ang pagpamulongpulong sa atubangan sang mga tagpalamati mahimo nga mas malawig diutay sangsa kon nagaensayo ka.
Pagbahinbahin sa mga Bahin. Ang maayo nga tayming naangot gid sa nagakaigo nga pagbahinbahin sa mga bahin sang isa ka pamulongpulong. Dapat ihinguyang ang daku gid nga tion sa paghatag sing kaundan. Diri sini nahamtang ang panguna nga mga punto sang instruksion. Dapat hustuhan lang ang kalawigon sang introduksion agod mahimo ang tatlo ka tulumuron nga ginbinagbinag sa Tulun-an 38. Ang kaundan indi dapat tuman kalawig amo nga wala na sing bastante nga oras para sa isa ka epektibo nga konklusion, nga nahisuno sa Tulun-an 39.
Ang imo mga panikasog nga matigayon ang maayo nga tayming magaresulta sa mas maayo nga pamulongpulong kag magapakita sang imo pagtahod sa iban nga may mga bahin sa programa kag sa bug-os nga kongregasyon.