Pamangkot

◼ Paano naton mapat-od nga ang mga miting sa kongregasyon matapos suno sa gintalana nga oras?

Madasig ang inoras kon nagapaambitay kita sing maayo nga mga butang upod sa aton mga abyan. Bangod sini, mahimo mabudlay ang paghatag sing mga bahin sa miting suno sa gintalana nga oras. Ano ang makabulig?

Magsugod sing eksakto sa oras. Sa pagtinipon sang bug-os nga kongregasyon, mahimo makabulig kon pangabayon ang tumalambong nga maglingkod na mga isa ukon duha ka minuto antes magsugod ang programa agod makasugod ang miting sa gintalana nga oras sa mahim-ong nga paagi. (Man. 3:1) Ang pagtinipon sa magamay nga mga grupo, subong sang mga miting para sa pag-alagad sa latagon, indi dapat awaton agod hulaton ang mga ulihi mag-abot.

Maghanda sing maayo. Ang isa ka paagi agod matapos suno sa gintalana nga oras ang miting amo ang abanse nga paghanda. Hupti sing maathag sa hunahuna ang tulumuron sang asaynment. Hibalua ang panguna nga mga punto, kag palutawa ini. Likawi nga matublag sang witiwiti nga mga detalye. Himua nga simple ang presentasyon. Kon ang bahin nagalakip sang mga pasundayag ukon mga interbyu, ensayuha ini sing abanse. Kon posible, orasi ang imo bahin samtang ginaensayo mo ini sing mabaskog.

Bahinbahina ang imo materyal. Pamulongpulong man ukon paghinun-anon upod sa tumalambong ang imo bahin, makabulig kon bahinbahinon mo ang materyal sa mga seksion. Mamat-od kon pila ka tion ang ihinguyang mo sa kada seksion, kag isulat ini sa marhin sang imo mga nota. Nian bantayi ang imo oras sa tion sang presentasyon. Sa paghinun-anon upod sa tumalambong, likawi ang madamo katama nga mga komento sa pamuno amo nga padalian mo ang pagbinagbinag sa mas importante nga punto sa naulihi nga bahin. Ang nagadumala sang Pagtinuon sa Lalantawan dapat magtigana sing bastante nga tion sa pagbinagbinag sa kahon para sa repaso sa katapusan. Dapat halungan man nila nga indi malaksam ang tion nga gintigana para sa nagatakop nga ambahanon kag pangamuyo.

Tapusa ang bahin suno sa gintalana nga oras. Kon ang miting may madamo nga bahin, subong sang Miting sa Serbisyo, ang tagsa ka humalambal dapat mangin mahunahunaon kon ano oras magasugod kag matapos ang iya bahin. Ano ang dapat himuon kon magasobra sa oras ang miting? Dapat palip-uton sang isa ukon kapin pa nga utod ang ila bahin paagi sa pagkonsentrar sa panguna nga mga punto kag indi na pag-ilakip ang indi tanto ka importante nga mga detalye. Ang ikasarang sa paghimo sini isa ka tanda sang lantip nga manunudlo.

Subong tumalambong, mabuligan naton ang utod nga nagadumala paagi sa aton pagkomento sing malip-ot kag direkta sa punto. Busa, kita tanan makabulig agod ang mga miting mangin “nagakaigo kag suno sa kahimusan.”​—⁠1 Cor. 14:​40, NW.