Kon Paano Gin-amligan si Jesus

NAGAHIMO kon kaisa si Jehova sing mga butang sa isa ka makatilingala nga paagi agod amligan ang mga bata nga indi makapangapin sang ila kaugalingon. Kon magdayandayan ka sa uma, mahimo nga makita mo ang isa ka paagi nga ginahimo ini ni Jehova. Apang mahimo nga indi mo gid mahangpan sa primero kon ano ang nagakatabo.

Nakita mo ang isa ka pispis nga naghapon sa duta malapit sa imo. Daw nahalitan sia. Ginasagnoy niya ang isa sang iya mga pakpak apang nagpalayo sia sang nagpalapit ka. Samtang ginasundan mo ang pispis, padayon sia nga nagapalayo. Nian, sa hinali lamang, naglupad ang pispis. Wala gali mahalitan ang iya pakpak! Nahangpan mo bala kon ngaa ginhimo ini sang pispis?⁠—

Bueno, didto nayon sa ginhapunan sang pispis malapit sa imo, ang iya mga boto natago sa mga kahoykahoy. Nahadlok ang pispis nga basi makita mo ini kag halitan sila. Gani nagpakunokuno sia nga nahalitan agod indi ka makapalapit sa iya mga boto. Nahibaluan mo bala kon sin-⁠o ang makaamlig sa aton kaangay sang pag-amlig sang pispis sa iya mga boto?⁠— Sa Biblia, si Jehova ginapaanggid sa isa ka pispis nga ginatawag nga agila, nga nagabulig sa iya mga boto.​​—⁠Deuteronomio 32:​11, 12.

Ang labing hamili nga anak ni Jehova amo ang iya pinalangga nga Anak, nga si Jesus. Sang si Jesus didto sa langit, isa sia ka gamhanan nga espiritu nga persona kaangay sang iya Amay. Maatipan niya ang iya kaugalingon. Apang sang matawo si Jesus subong isa ka lapsag sa duta, wala sia sing mahimo sa iya kaugalingon. Kinahanglan nga amligan sia.

Agod matuman ang kabubut-on sang Dios para sa iya sa duta, dapat si Jesus magdaku kag mangin isa ka himpit, hamtong nga tawo. Apang, nagtinguha si Satanas nga patyon si Jesus antes ini matabo. Ang pagtinguha nga patyon si Jesus sang gamay pa sia kag kon paano sia gin-amligan ni Jehova isa gid ka makakulunyag nga sugilanon. Luyag mo bala pamatian ini?⁠—

Wala pa lang madugay sang matawo si Jesus, naghimo si Satanas sing daw isa ka bituon nga nagasiga sa langit sa Sidlangan. Nakita ini sang mga astrologo, nga nagatuon sa mga bituon, kag ginsumay nila ang bituon tubtob sa Jerusalem walay sapayan nga malayo ini. Pag-abot nila didto, namangkot sila kon sa diin matawo ang isa nga mangin hari sang mga Judiyo. Sang ginpamangkot nila ang mga tawo nga nakahibalo sang ginasiling sang Biblia tuhoy sa sini, sila nagsabat: “Sa Betlehem.”​​—⁠Mateo 2:​1-6.

Sang mabatian ni Herodes, ang malaut nga hari sa Jerusalem, ang tuhoy sa sining bag-⁠o nga hari nga bag-⁠o pa lang matawo sa kaiping nga banwa sang Betlehem, ginsingganan niya ang mga astrologo: ‘Pangitaa ninyo ang bata, kag sugiri ako kon makita ninyo sia.’ Nahibaluan mo bala kon ngaa luyag ni Herodes mahibaluan kon diin si Jesus?⁠— Bangod nahisa si Herodes kag luyag niya patyon si Jesus!

Paano gin-amligan sang Dios ang iya Anak?⁠— Bueno, sang makita sang mga astrologo si Jesus, naghatag sila sing mga regalo sa iya. Nian, paagi sa damgo, ginpaandaman sang Dios ang mga astrologo nga indi magbalik kay Herodes. Gani nag-agi sila sa lain nga dalan amo nga wala sila makabalik sa Jerusalem. Sang mabalitaan ni Herodes nga nakahalin na ang mga astrologo, naakig gid sia. Gani agod mapatay niya si Jesus, ginpapatay ni Herodes ang tanan nga lalaki nga lapsag sa Betlehem nga nagaedad sing duha ka tuig paubos! Apang sini nga tion, wala na didto si Jesus.

Nahibaluan mo bala kon paano nakalikaw si Jesus?⁠— Sang makalakat na ang mga astrologo, ginpaandaman ni Jehova ang bana ni Maria, nga si Jose, nga magpalagyo sila pa Egipto. Didto, luwas si Jesus gikan sa malaut nga si Herodes. Pagligad sang pila ka tuig, sang magbalik si Maria kag si Jose gikan sa Egipto nga kaupod si Jesus, ginpaandaman liwat sang Dios si Jose. Paagi sa damgo, ginsugo sang Dios si Jose nga magsaylo sila sa Nazaret, diin luwas si Jesus.​—⁠Mateo 2:​7-​23.

Nahibaluan mo na bala karon kon paano gin-amligan ni Jehova ang iya Anak?⁠— Sin-⁠o sa banta mo ang kaangay sang mga boto nga gintago sang ila iloy sa mga kahoykahoy ukon ang kaangay ni Jesus sang gamay pa sia? Indi bala kaangay ka nila?⁠— May yara man nga luyag maghalit sa imo. Nahibaluan mo bala kon sin-⁠o?⁠—

Ang Biblia nagasiling nga si Satanas kaangay sang nagangurob nga leon nga luyag magtukob sa aton. Kag subong nga masami ginapuntariya sang mga leon ang magamay nga mga sapat, masami man ginapuntariya ni Satanas kag sang iya mga demonyo ang mga kabataan. (1 Pedro 5:⁠8) Apang mas makusog si Jehova sangsa kay Satanas. Maamligan ni Jehova ang iya mga anak ukon madula niya ang bisan ano nga halit nga himuon sa ila ni Satanas.

Nadumduman mo bala gikan sa Kapitulo 10 sini nga libro kon ano ang ginasulay sa aton sang Yawa kag sang iya mga demonyo nga himuon naton?⁠— Huo, ginasulay nila kita nga himuon ang seksuwal nga paghirupay nga siling sang Dios malain. Apang sin-⁠o lamang ang makahimo sing seksuwal nga paghirupay?⁠— Huo, amo ang isa ka hamtong nga lalaki kag isa ka hamtong nga babayi nga nakasal na.

Apang, makapasubo nga luyag sang iban nga mga hamtong na nga maghimo sing seksuwal nga pagpakighirop sa mga bata. Kon himuon nila ini, mahimo nga ang mga bata nga lalaki kag mga bata nga babayi magasugod sa paghimo sing malain nga mga butang nga natun-an nila gikan sa sining hamtong na nga mga tawo. Nagasugod man sila nga gamiton ang ila kinatawo sa sayop nga paagi. Amo sini ang natabo sang una sa siudad sang Sodoma. Ang Biblia nagasiling nga ang mga tawo didto, “halin sa bata nga lalaki tubtob sa tigulang nga lalaki,” nagtinguha nga makighilawas sa mga lalaki nga nagduaw kay Lot.​​—⁠Genesis 19:​4, 5.

Gani subong nga si Jesus kinahanglan nga amligan, dapat man ikaw amligan gikan sa mga hamtong na​—⁠kag bisan gani gikan sa iban pa nga mga kabataan⁠—​nga mahimo magtinguha nga magpakighilawas sa imo. Ini nga mga tawo masami nga nagapakunokuno nga mga abyan mo sila. Mahimo nga tanyagan pa gani nila ikaw sing isa ka butang kon manaad ka nga indi ka manugid sa iban kon ano ang luyag nila himuon sa imo. Apang ini nga mga tawo makagod, kaangay ni Satanas kag sang iya mga demonyo, kag luyag lamang nila lipayon ang ila kaugalingon. Kag nagatinguha sila nga matigayon ini nga kalipay paagi sa seksuwal nga pagpakighirop sa mga bata. Sayop gid ini!

Nahibaluan mo bala kon ano ang mahimo nga himuon nila agod lipayon ang ila kaugalingon?⁠— Bueno, mahimo nga hikaphikapon nila ang imo kinatawo. Ukon idampidampi pa gani nila ang ila kinatawo sa imo kinatawo. Apang indi gid pagtuguti ang bisan sin-⁠o nga hampangan ang imo kinatawo. Indi, bisan ang imo utod nga lalaki ukon utod nga babayi ukon ang imo iloy ukon amay. Ini nga mga bahin sang imo lawas imo lamang.

Paano mo maamligan ang imo lawas gikan sa mga tawo nga nagahimo sing malain nga mga butang kaangay sini?⁠— Una sa tanan, indi pagtuguti ang bisan sin-⁠o nga hampangan ang imo kinatawo. Kon may maghimo sini, singgana sia sing serioso apang sa mabaskog nga tingog: “Untati ina! Isugid ko ikaw!” Kag kon magsiling ini nga tawo nga ikaw ang may sala sa natabo, indi ini pagpatihi. Indi ini matuod. Isugid sia bisan sin-⁠o man sia! Dapat mo sia isugid bisan pa kon magsiling sia nga ang inyo ginahimo sekreto ninyo lamang nga duha. Bisan pa kon manaad ini nga tawo nga hatagan ka niya sing matahom nga mga regalo ukon pahugon ka niya, dapat ka magpalayo sa iya kag isugid sia.

Indi ka dapat mahadlok, apang dapat ka maghalong. Kon paandaman ka sang imo mga ginikanan tuhoy sa makatalagam nga mga tawo ukon mga duog, dapat ka mamati sa ila. Kon himuon mo ini, indi makahigayon ang malain nga tawo nga halitan ka.