Nag-abot Na ‘ang Takna Sang Paghukom’

ANG Bugna, ang katapusan nga tulun-an sang Biblia, nagapahibalo sa aton nga ang isa ka anghel nga nagalupad sa tunga sang langit may “maayong balita nga dayon nga ibantala.” Sia nagsiling sa mabaskog nga tingog: “Kahadluki ninyo ang Dios kag hatagi sia sing himaya, kay nag-abot na ang takna sang iya paghukom.” (Bugna 14:6, 7) Ina nga ‘takna sang paghukom’ nagalakip sang pagpahayag kag paghimo sang paghukom sang Dios. Ang “takna” isa ka malip-ot nga tion. Ang paghukom magaabot subong talipuspusan sang “katapusan nga mga adlaw” nga aton karon ginakabuhian.—2 Timoteo 3:1.

Ang ‘takna sang paghukom’ isa ka maayong balita sa mga nagahigugma sa pagkamatarong. Tion ina nga paumpawan sang Dios ang iya mga alagad nga nag-antos sa sining masingki, walay gugma nga sistema sang mga butang.

Sa karon, antes matapos ‘ang takna sang paghukom’ paagi sa kalaglagan sang malaut nga sistema sang mga butang karon, ginapalig-on kita: “Kahadluki ninyo ang Dios kag hatagi sia sing himaya.” Ginahimo mo bala ina? Indi lamang ini pagsiling sing, “Nagatuo ako sa Dios.” (Mateo 7:21-23; Santiago 2:19, 20) Ang nagakaigo nga kahadlok sa Dios dapat magpahulag sa aton nga magpakita sing masimbahon nga pagtahod sa iya. Dapat ini magpahulag sa aton nga sikwayon ang malaut. (Hulubaton 8:13) Dapat ini magbulig sa aton nga higugmaon ang maayo kag dumtan ang malaut. (Amos 5:14, 15) Kon ginapadunggan naton ang Dios, mamati kita sa iya nga may dakung pagtahod. Indi naton pagpatumbayaan ang regular nga pagbasa sang iya Pulong, ang Biblia, bangod masako kita. Magasalig kita sa iya sa tanan nga tion kag sa aton bug-os nga tagipusuon. (Salmo 62:8; Hulubaton 3:5, 6) Ang mga nagapadungog sa iya nagakilala nga subong ang Manunuga sang langit kag duta, sia ang Bug-os Uniberso nga Soberano, kag mahigugmaon nga nagapasakop sila sa iya subong ang Soberano sang ila kabuhi. Kon narealisar naton nga dapat kita maghatag sing dugang pa nga igtalupangod sa sining mga butang, himuon naton ini sa gilayon.

Ang takna sang paghukom nga ginsambit sang anghel ginatawag man nga “adlaw sang GINUO.” Ina nga “adlaw” nag-abot sa dumaan nga Jerusalem sang 607 B.C.E. bangod ang mga pumuluyo sini wala mamati sa mga paandam ni Jehova paagi sa iya mga manalagna. Bangod wala sila magpati nga malapit na ang adlaw ni Jehova, dugang pa nga ginbutang nila sa katalagman ang ila kabuhi. Si Jehova nagpaandam sa ila: “Malapit ini kag nagadalidali sing tama.” (Sofonias 1:14) Ang isa pa ka “adlaw sang GINUO” nag-abot sa dumaan nga Babilonia sang 539 B.C.E. (Isaias 13:1, 6) Bangod nagsalig sila sa ila mga kuta kag sa ila mga dios, wala ginsapak sang mga Babilonianhon ang mga paandam sang mga manalagna ni Jehova. Apang sa isa lang ka gab-i, napukan ang dakung Babilonia sa mga Medianhon kag mga Persianhon.

Ano ang malapit na mag-abot sa aton karon? Amo ang isa pa kag mas lapnag nga “adlaw sang Dios.” (2 Pedro 3:11-14) Ang paghukom sang Dios ginpahayag na batok sa “Babilonia nga Daku.” Suno sa Bugna 14:8, ang anghel nagsiling: ‘Napukan ang Babilonia nga Daku.’ Napukan na sia. Indi na niya mapunggan ang mga sumilimba ni Jehova. Madamo ang nakahibalo gid sang iya kagarukan kag pagkanadalahig sa inaway. Malapit na ang iya bug-os nga pagkalaglag. Bangod sina, ginapalig-on sang Biblia ang mga tawo bisan diin: “Gua ka sa iya [Babilonia nga Daku] . . . agod indi kamo makaambit sa iya mga sala, agod nga indi kamo makaagom sang iya mga kalalat-an; kay ang iya mga sala natumpi tubtob sa langit, kag ang Dios nakadumdom sang iya mga kalautan.”—Bugna 18:4, 5.

Ano ang Babilonia nga Daku? Amo ini ang bug-os kalibutan nga sistema sang relihion nga kaanggid sa dumaan nga Babilonia. (Bugna, kapitulo 17, 18) Binagbinaga ang pila sang mga pagkaanggid:

• Ang mga saserdote sang dumaan nga Babilonia nadalahig sa politika sang pungsod. Amo man ang kalabanan nga mga relihion karon.

• Masami nga ginsakdag sang mga saserdote sang Babilonia ang pagpakig-away sang pungsod. Ang relihion karon masami nga nagapanguna sa pagbendisyon sa mga soldado kon mag-inaway ang mga pungsod.

• Ang mga panudlo kag mga buhat sang dumaan nga Babilonia nagdul-ong sa pungsod sa malaut nga imoralidad. Kon ginasikway sang relihioso nga mga lider karon ang talaksan sang Biblia sa moralidad, ang imoralidad nagalapnag sa tunga sang mga klero kag mga lego. Talalupangdon man ang katunayan nga bangod ang Babilonia nga Daku nagapakighilawas sa kalibutan kag sa politikal nga sistema sini, ginalaragway sia sang Bugna subong isa ka makihilawason nga babayi.

• Nagasiling man ang Biblia nga ang Babilonia nga Daku nagakabuhi nga may ‘pagpatuyang.’ Sa dumaan nga Babilonia, ang organisasyon sang templo nakatigayon sing malapad nga kadutaan, kag nangin prominente ang mga saserdote sa pagnegosyo. Sa karon man, wala labot sa mga duog sang pagsimba, ang Babilonia nga Daku nagapanag-iya sing madamo nga negosyo kag propiedad. Ang iya mga panudlo kag mga selebrasyon nagahatag sing daku nga kamanggaran sa iya kag sa iban pa nga mga negosyante.

• Ang paggamit sing mga imahen, madyik, kag binabaylan kinaandan sa dumaan nga Babilonia, subong nga amo man karon sa madamo nga mga duog. Ang kamatayon gintamod subong isa ka pagliton sa isa pa ka sahi sang pagkabuhi. Ang Babilonia napuno sing mga templo kag mga kapilya para sa kadungganan sang iya mga dios, apang ginpamatukan sang mga Babilonianhon ang mga sumilimba ni Jehova. Ang Babilonia nga Daku may pareho man sini nga mga pagtuluuhan kag mga padugi.

Sang dumaan nga mga tion, ginmaniobra ni Jehova ang gamhanan nga politikal kag militar nga mga pungsod agod silutan ang mga nagsikway sa iya kag sa iya kabubut-on. Sa amo ginlaglag sang mga Asirianhon ang Samaria sang 740 B.C.E. Ang Jerusalem ginhapay sang mga Babilonianhon sang 607 B.C.E. kag sang mga Romano sang 70 C.E. Ang Babilonia naman gindaug sang mga Medianhon kag mga Persianhon sang 539 B.C.E. Para sa aton adlaw, ginatagna sang Biblia nga ang politikal nga mga gobierno, kaangay sang sapat nga mapintas, magaliso batok sa “makihilawason nga babayi” kag magapahubo sa iya, nga ginabuyagyag kon sin-o gid sia. Laglagon nila sia sing bug-os.—Bugna 17:16.

Himuon gid bala ini sang mga gobierno sang kalibutan? Ang Biblia nagasiling nga ‘ibutang ini sang Dios sa ila tagipusuon.’ (Bugna 17:17) Magaabot ini sing hinali, makapakibot, makapahayanghag, indi mahibal-an sing abanse ukon amat-amat.

Ano ang dapat mo himuon? Pamangkuta ang imo kaugalingon: ‘Nagapabilin bala ako gihapon sa isa ka relihioso nga organisasyon nga nadagtaan sang mga panudlo kag mga padugi nga nagamarka sini subong bahin sang Babilonia nga Daku?’ Bisan pa kon indi ikaw katapo sini, mahimo mo pamangkuton ang imo kaugalingon: ‘Nagapaimpluwensia bala ako sa espiritu sini?’ Ano nga sahi sang espiritu? Ang espiritu sang pagbaton sa lugak nga moral, gugma sa materyal nga mga pagkabutang kag pagpangalipay sa baylo sang gugma sa Dios, ukon ang hungod nga pagsikway (bisan gani sa daw diutay lamang nga mga butang) sa Pulong ni Jehova. Pamensari sing maayo ang imo isabat.

Agod matigayon naton ang kahamuot ni Jehova, importante nga sa aton mga buhat kag sa mga handum sang aton tagipusuon, nagahatag kita sing ebidensia nga indi gid kita bahin sang Babilonia nga Daku. Wala sing tion sa pagpalantang. Sa pagpaandam sa aton nga ang katapusan hinali nga magaabot, ang Biblia nagasiling: “Sa amo ang Babilonia nga dakung banwa itagbong sing hinali, kag indi na gid makita.”—Bugna 18:21.

Apang may dugang pa. Sa isa ka bahin sinang ‘takna sang paghukom,’ sukton ni Jehova nga Dios ang bug-os kalibutan nga politikal nga sistema, ang mga manuggahom sini, kag ang tanan nga nagsikway sa iya kinamatarong sa paggahom paagi sa iya langitnon nga Ginharian sa mga kamot ni Jesucristo. (Bugna 13:1, 2; 19:19-21) Ginlaragway sang matagnaon nga palanan-awon nga narekord sa Daniel 2:20-45 ang politikal nga paggahom kutob sang tion sang dumaan nga Babilonia tubtob sa karon subong isa ka higante nga imahen nga human sa bulawan, pilak, saway, salsalon, kag daga. Tuhoy sa aton adlaw, ang tagna nagsiling: “Magapatindog ang Dios sang langit sing ginharian nga dili gid malaglag.” Kag tuhoy sa kon ano pa ang himuon sina nga Ginharian sa tion sang ‘takna sang paghukom’ ni Jehova, ang Biblia nagasiling: “Dugmukon sini kag papason ini tanan nga [hinimo sang tawo nga mga] ginharian kag ini magapadayon sa gihapon.”—Daniel 2:44.

Ang Biblia nagapaandam sa matuod nga mga sumilimba batok sa paghigugma sa “mga butang nga yara sa kalibutan”—kon sayuron, ang sahi sang pagkabuhi nga ginasakdag sining kalibutan nga nahamulag sa matuod nga Dios. (1 Juan 2:15-17) Ginapakita bala sang imo mga desisyon kag mga buhat nga pabor gid ikaw sa Ginharian sang Dios? Ginauna mo gid bala ini sa imo kabuhi?—Mateo 6:33; Juan 17:16, 17.

[Kahon sa pahina 14]

San-o Magaabot ang Katapusan?

“Sa takna nga wala ninyo paghunahunaa magakari ang Anak sang tawo.”—Mateo 24:44.

“Bantay kamo, kay wala kamo makahibalo sang adlaw ukon sang takna.”—Mateo 25:13.

“Indi ini magpalantang.”—Habacuc 2:3.

[Kahon sa pahina 14]

May Kinatuhay Bala Kon Nahibaluan Mo Lang?

Kon sigurado ka nga malayolayo pa ang paghukom sang Dios, bag-uhon bala sina ang imo pagkabuhi karon? Kon ang katapusan sining daan nga sistema wala mag-abot suno sa imo ginpaabot, magahinayhinay ka bala sa imo pag-alagad kay Jehova?—Hebreo 10:36-38.

Ang aton indi pagkahibalo sang eksakto nga tion nagahatag sa aton sing kahigayunan nga pamatud-an sa Dios nga putli ang aton motibo sa pag-alagad sa iya. Narealisar sang mga nakakilala kay Jehova nga ang paghingagaw lamang nga pagpakita sing kakugi indi magapahamuot sa Dios, nga makakita sang kahimtangan sang tagipusuon.—Jeremias 17:10; Hebreo 4:13.

Para sa mga nagahigugma gid kay Jehova, si Jehova ang una pirme. Kaangay sang iban nga mga tawo, nagatrabaho man ang matuod nga mga Cristiano. Apang, indi ang pagmanggaranon ang ila tulumuron kundi ang makatigayon lamang sing bastante nga materyal nga mga kinahanglanon kag sing diutay pa nga mapaambit naman sa iban. (Efeso 4:28; 1 Timoteo 6:7-12) Nagapaliwaliwa man sila kag nagapahuwayhuway gikan sa ila rutina, apang ang ila handum amo ang marepreskuhan, indi agod himuon ang ginahimo man sang iban. (Marcos 6:31; Roma 12:2) Kaangay ni Jesucristo, nagakalipay sila sa paghimo sang kabubut-on sang Dios.—Salmo 37:4; 40:8.

Ang matuod nga mga Cristiano nagahandum nga mabuhi agod alagdon si Jehova sing dayon. Ina nga paglaum hamili gid gihapon bisan pa dapat nila hulaton ang pila ka pagpakamaayo sing madugaydugay pa sangsa ginapaabot sang iban sa ila.

[Kahon/Retrato sa pahina 15]

Ang Hulusayon Tuhoy sa Pagkasoberano

Agod mahangpan kon ngaa ginatugutan sang Dios ang tuman gid nga pag-antos, dapat naton mahangpan ang hulusayon tuhoy sa pagkasoberano. Ano ang pagkasoberano? Amo ini ang pinakamataas nga awtoridad.

Bangod si Jehova ang Manunuga, may kinamatarong sia nga maggahom sa duta kag sa tanan nga nagapuyo sa sini. Apang, ginapaathag sang Biblia nga sa pagsugod pa lang sang maragtas sang tawo, ginduhaduhaan ang pagkasoberano ni Jehova. Nagsiling si Satanas nga Yawa nga wala sa lugar ang pagkaestrikto ni Jehova, nga nagbinutig Sia sa aton unang mga ginikanan tuhoy sa kon ano ang mahanabo sa ila kon sikwayon nila ang sugo sang Dios kag himuon ang luyag nila, kag mas magaayuhan gid sila kon mangin independiente sila sa Dios.—Genesis, kapitulo 2, 3.

Kon ginlaglag dayon sang Dios ang mga rebelde, mahimo nga nakita kuntani sadto ang iya gahom, apang indi kuntani nahusay ang mga hulusayon nga ginpautwas. Sa baylo nga laglagon dayon ang mga rebelde, gintugutan ni Jehova ang tanan nga intelihente nga mga tinuga nga makita ang resulta sang pagrebelde. Bisan pa nagdalahig ini sing pag-antos, naghatag man ini sing kahigayunan nga matawo kita.

Dugang pa, subong daku nga pagsakripisyo ni Jehova, mahigugmaon nga naghimo sia sing kahimusan agod ang mga tawo nga magatuman sa iya kag magatuo sa halad nga gawad sang iya Anak mahilway gikan sa sala kag sa mga resulta sini kag magpuyo sa Paraiso. Kon kinahanglanon, mahimo nga matigayon ini paagi sa pagkabanhaw gikan sa minatay.

Ang pagtugot sing tion para mahusay ang hulusayon naghatag man sa mga alagad sang Dios sing kahigayunan agod mapakita nila nga may ikasangkol sila sa pag-apresyar sa gugma sang Dios kag pamatud-an ang ila integridad kay Jehova bisan ano man ang matabo. Ang paghusay sa hulusayon tuhoy sa pagkasoberano sang Dios, upod ang naangot nga hulusayon tuhoy sa integridad sang tawo, importante agod mapaluntad ang nagakaigo nga pagtahod sa kasuguan sa uniberso. Kon wala sini, indi gid mangin posible ang matuod nga paghidait.a

[Nota]

[Retrato]

Ang bug-os kalibutan nga sistema sang politikal nga paggahom magadangat sa iya katapusan