Sulat sang Nagadumala nga Hubon

Pinalangga Namon nga Nagahigugma kay Jehova:

“Mahibaluan ninyo ang kamatuoran, kag ang kamatuoran magahilway sa inyo,” siling ni Jesus. (Juan 8:32) Makapalig-on gid ini nga mga pulong! Huo, posible nga mahibaluan naton ang kamatuoran, bisan sa sining makahalanguyos nga “katapusan nga mga adlaw” nga puno sing kabutigan. (2 Timoteo 3:1) Madumduman mo bala kon san-o mo natun-an ang kamatuoran nga ginapaathag sang Pulong sang Dios? Makalilipay gid ina nga eksperiensia!

Apang, bisan pa importante ang pagtigayon sing sibu nga ihibalo sang kamatuoran kag ang regular nga pagpakigbahin sa pagsugid sini sa iban, dapat man nga maggawi kita suno sa kamatuoran. Agod mahimo naton ini, dapat kita magpabilin sa gugma sang Dios. Ano ang nadalahig sa sini? Ginasabat ini sang mga pinamulong ni Jesus sang gab-i antes sia napatay. Ginsilingan niya ang iya matutom nga mga apostoles: “Kon ginatuman ninyo ang akon mga sugo, magapabilin kamo sa akon gugma, subong nga ginatuman ko ang mga sugo sang Amay kag nagapabilin ako sa iya gugma.”—Juan 15:10.

Talupangda nga nakapabilin si Jesus sa gugma sang Dios paagi sa pagtuman sa mga sugo sang iya Amay. Dapat man naton ini himuon karon. Agod makapabilin sa gugma sang Dios, dapat naton iaplikar sa aton kabuhi ang kamatuoran. Sa sina man nga gab-i, si Jesus nagsiling: “Bangod nahibaluan ninyo ini, malipayon kamo kon himuon ninyo ini.”​—Juan 13:17.

Nagalaum gid kami nga ining libro makabulig sa imo nga padayon nga maaplikar ang kamatuoran sa imo kabuhi agod makapabilin ka “sa gugma sang Dios . . . nga nagadul-ong sa kabuhi nga wala sing katapusan.”​—Judas 21.