“Magpabilin Kamo sa Gugma sang Dios”
1. Ano ang katuyuan sang libro nga “Magpabilin Kamo sa Gugma sang Dios”?
1 Ginakalangkagan gid naton nga tun-an ang bag-ong libro nga “Magpabilin Kamo sa Gugma sang Dios” sa Pagtinuon sang Kongregasyon sa Biblia nga magasugod sa semana sang Pebrero 23! Ang sulat sang Nagadumala nga Hubon para sa tanan nga nagahigugma kay Jehova nagahinakop sa sining mga pulong: “Nagalaum gid kami nga ining libro makabulig sa imo nga padayon nga maaplikar ang kamatuoran sa imo kabuhi agod makapabilin ka ‘sa gugma sang Dios . . . nga nagadul-ong sa kabuhi nga walay katapusan.’—Judas 21.”
2. Sa ano nga mga bahin sang kabuhi makabulig sa aton ining bag-o nga libro?
2 Kon Ano ang Mapaabot: Paano naaplikar ang mga prinsipio sang Biblia sa aton mga pagpakig-upod, kalingawan, pagtahod sa awtoridad, pamatasan, pag-asawahay, panghambal, kag kinabatasan? Dihunon sini ang aton konsiensia nahisuno sa mataas nga mga talaksan sang pagkamatarong nga ginpahayag sa Pulong sang Dios. (Sal. 19:7, 8) Samtang nagasangkad ang aton paghangop sa mga dalanon ni Jehova, labi nga nagabaskog ang aton handum nga pahamut-an sia, kag amo ini ang nagapahulag sa aton nga mangin matinumanon sa iya sa tanan nga bahin sang aton kabuhi.—Hulu. 27:11; 1 Juan 5:3.
3. Ngaa dapat naton himuon ang aton labing masarangan nga makigbahin sa pagtinuon kada semana?
3 Magpakigbahin: Samtang nagahanda ka, himua nga tulumuron nga madayaw ang Dios sa tunga sang iya nagatipon nga katawhan. (Heb. 13:15) Ining bag-o nga publikasyon binagbinagon sing tingob sang bug-os nga kongregasyon. Bangod diutay lang nga parapo ang pagatun-an, mahandaan naton ini sing maayo, kag mas may kompiansa kita sa pagpaambit sang aton natun-an. Ang aton nahanda sing maayo kag malip-ot nga mga komento magapahulag sa iban sa gugma kag sa maayong mga buhat kag makaamot sa mapagsik kag impormatibo nga pagbinagbinag sa materyal. (Heb. 10:24) Dugang pa, mas malipayon kita kon nagakomento kita tuhoy sa aton pagtuo.
4. Ngaa dapat naton tumanon ang mga sugo ni Jehova?
4 Sa katapusan nga gab-i sang iya kabuhi sa duta subong tawo, gin-angot ni Jesus ang pagtuman sa mga sugo ni Jehova sa pagpabilin sa gugma sang Dios. (Juan 15:10) Paagi sa bulig sang libro nga “Magpabilin Kamo sa Gugma sang Dios,” labi pa nga magabaskog ang aton determinasyon nga iaplikar ang mga prinsipio sang Biblia sa aton matag-adlaw nga kabuhi kag ‘magpabilin sa gugma sang Dios.’—Jud. 21.