Pagsaludo sa Bandera, Pagbotar, kag Pagserbisyo Subong Sibilyan

Pagsaludo sa Bandera. Ang mga Saksi ni Jehova nagapati nga ang pagyaub ukon pagsaludo sa bandera, nga masami dungan sa pungsudnon nga ambahanon, isa ka buhat sang pagsimba nga nagasalig sing kaluwasan, indi sa Dios, kundi sa Pungsod ukon sa mga lider sini. (Isaias 43:11; 1 Corinto 10:14; 1 Juan 5:21) Ang isa sa mga lider nga naghimo sini amo ang hari sang dumaan nga Babilonia nga si Nabocodonosor. Agod magdayaw ang mga tawo sa iya pagkahalangdon kag pagkarelihioso, ining gamhanan nga hari nagpatindog sing daku kag mataas nga larawan kag ginpayaub sa sini ang iya mga sakop samtang nagatokar ang musika, kaangay sang isa ka pungsudnon nga ambahanon. Apang ang tatlo ka Hebreo nga sanday Sadrac, Mesac, kag Abednego, wala nagyaub sa larawan, bisan pa silutan sila sing kamatayon.—Daniel, kapitulo 3.

Sa aton panahon, “ang panguna nga simbulo sang pagtuo kag panguna nga ginasimba sa nasyonalismo amo ang bandera,” sulat sang istoryador nga si Carlton Hayes. “Ang mga lalaki nagahukas sang ila mga kalo kon maglabay ang bandera; ang mga mamalaybay nagasulat sing mga binalaybay kag ang kabataan nagakanta agod dayawon ang bandera.” Nagsiling man sia nga ang nasyonalismo may “mga kapiestahan” subong man “mga santos kag mga baganihan” kag “mga templo.” Sa isa ka publiko nga seremonya sa Brazil, ang isa ka ministro heneral sang mga soldado nagsiling: “Ang bandera ginapadunggan kag ginasimba . . . subong nga ang dutang natawhan ginasimba.” Huo, “ang bandera sagrado kaangay sang krus,” siling sadto sang The Encyclopedia Americana.

Sining karon lang, nagsiling man ini nga ensiklopedia nga ang pungsudnon nga mga ambahanon “mga pagpabutyag sing patriotiko nga balatyagon kag masami nagalakip sing pagpangabay sa Dios sing panuytoy kag proteksion sa katawhan ukon sa ila mga manuggahom.” Gani, ang mga alagad ni Jehova makatarunganon sa ila pagtamod nga ang patriotiko nga mga seremonya nga nagalakip sing pagsaludo sa bandera kag pungsudnon nga ambahanon relihioso nga mga buhat. Ang matuod, sang nagkomento parte sa pagpangindi sang kabataan sang mga Saksi ni Jehova sa pagsaludo sa bandera ukon pagpanumpa sing katutom sa mga eskwelahan sa Estados Unidos, ang libro nga The American Character nagsiling: “Gindeklarar sang Korte Suprema sa madamo nga kaso nga ining adlaw-adlaw nga mga ritwal relihioso nga mga buhat.”

Ang katawhan ni Jehova wala nagapakigbahin sa mga seremonya nga ginatamod nila nga indi Makasulatanhon, apang ginatahod nila ang kinamatarong sang iban nga himuon ini. Ginatahod man nila ang mga bandera sang pungsod subong simbulo kag ginakilala ang ginpili nga mga opisyal sang gobierno subong “mas mataas nga mga awtoridad” nga nagaserbisyo subong ‘mga alagad sang Dios.’ (Roma 13:1-4) Gani ginatuman sang mga Saksi ni Jehova ang laygay nga mangamuyo “para sa mga hari kag sa tanan nga may mataas nga posisyon.” Apang ginahimo naton ini “agod magkabuhi kita sing matawhay kag malinong nga may bug-os nga diosnon nga debosyon kag pagkaserioso.”—1 Timoteo 2:2.

Pagbotar sa eleksion sa pulitika. Ginatahod sang matuod nga mga Cristiano ang kinamatarong sang iban nga magbotar. Wala sila nagaprotesta batok sa mga eleksion, kag nagakooperar sila sa nagdaug nga mga opisyales. Apang, nagapabilin sila nga neutral kon tuhoy sa hilikuton sa pulitika sang pungsod. (Mateo 22:21; 1 Pedro 3:16) Ano ang dapat himuon sang isa ka Cristiano nga nagaistar sa mga pungsod nga obligado ang pagbotar ukon sa mga duog nga ginahingabot ang mga wala nagakadto sa presinto sa tion sang eleksion? Dumdumon naton nga sanday Sadrac, Mesac, kag Abednego nagkadto sa kapatagan sang Dura, gani ang isa ka Cristiano mahimo magkadto man sa presinto kon ginatugot ini sang iya konsiensia. Apang, dapat sia maghalong nga indi niya makompromiso ang iya neutralidad. Dapat niya binagbinagon ang masunod nga anom ka prinsipio:

1. Ang mga sumulunod ni Jesus ‘indi bahin sang kalibutan.’—Juan 15:19.

2. Ang mga Cristiano nagarepresentar sa Cristo kag sa iya Ginharian.—Juan 18:36; 2 Corinto 5:20.

3. Ang Cristianong kongregasyon nahiusa sa ila pagpati, kag ang mga katapo sini ginahugpong sang tulad-Cristo nga gugma.—1 Corinto 1:10; Colosas 3:14.

4. Ang mga nagabotar may salabton man sa tanan nga ginahimo sang ila ginpili nga opisyal.—Talupangda ang mga prinsipio sa 1 Samuel 8:5, 10-18 kag 1 Timoteo 5:22.

5. Gintamod ni Jehova ang handum sang mga Israelinhon nga mangayo sing tawhanon nga manuggahom subong pagsikway sa Iya.—1 Samuel 8:7.

6. Ang mga Cristiano dapat may kahilwayan sa paghambal kon nagabantala sila sa mga tawo nga may lainlain nga pagtamod sa pulitika parte sa Ginharian sang Dios.—Mateo 24:14; 28:19, 20; Hebreo 10:35.

Pagserbisyo subong sibilyan. Sa pila ka kadutaan, ginapatuman sang Pungsod nga ang indi mag-entra sa militar makigbahin sa pila ka porma sang pagserbisyo subong sibilyan sa sulod sang pila ka tion. Kon nagadesisyon tuhoy sa sini, dapat kita mangamuyo, ayhan makighambal sa isa ka hamtong nga Cristiano, kag dayon magdesisyon suno sa aton nahanas nga konsiensia.—Hulubaton 2:1-5; Filipos 4:5.

Ginalaygayan kita sang Pulong sang Dios nga “mangin matinumanon sa mga panguluhan kag mga awtoridad, mangin handa para sa tagsa ka maayong buhat, . . . mangin makatarunganon.” (Tito 3:1, 2) Base sa sini, mahimo naton pamangkuton ang aton kaugalingon: ‘Kon magserbisyo ako subong sibilyan, makompromiso bala ang akon Cristianong neutralidad ukon madalahig bala ako sa butig nga relihion?’ (Miqueas 4:3, 5; 2 Corinto 6:16, 17) ‘Kon himuon ko ini, mabudlayan bala ako ukon maupangan sa pagtuman sang akon mga responsibilidad subong Cristiano?’ (Mateo 28:19, 20; Efeso 6:4; Hebreo 10:24, 25) ‘Sa pihak nga bahin, ang iskedyul bala sa paghimo sini nga serbisyo magatugot sa akon nga mapasangkad ang akon pag-alagad subong Cristiano, ayhan makaalagad pa ako sing bug-os tion?’—Hebreo 6:11, 12.

Kon ang konsiensia sang isa ka Cristiano nagatugot nga magserbisyo sia subong sibilyan sa baylo nga magpapriso, dapat tahuron sang mga masigka-Cristiano ang iya desisyon. (Roma 14:10) Kon sa pamatyag niya indi sia makahatag sini nga serbisyo, dapat man ini tahuron sang iban.—1 Corinto 10:29; 2 Corinto 1:24.