NAGAHINAKOP NGA PAGHINUN-ANON UPOD SA MGA KANDIDATO SA BAWTISMO

Ang mga bawtismo masami ginahiwat sa mga asembleya kag mga kombension sang mga Saksi ni Jehova. Sa katapusan nga bahin sang pamulongpulong sa bawtismo, ang mga kandidato sa bawtismo pangabayon sang humalambal sa pagtindog kag sa pagsabat sing mabaskog sa masunod nga mga pamangkot:

1. Ginhinulsulan mo na bala ang imo mga sala, gindedikar ang imo kaugalingon kay Jehova, kag ginbaton ang iya kahimusan sa kaluwasan paagi kay Jesucristo?

2. Nahangpan mo bala nga ang imo pagpabawtismo nagapakilala sa imo bilang isa sa mga Saksi ni Jehova nga nagapakig-upod sa organisasyon ni Jehova?

Ang sabat nga huo sa sining mga pamangkot isa ka dayag nga pagpahayag sang mga kandidato sa bawtismo nga nagatuo sila sa gawad kag bug-os nila nga gindedikar ang ila kaugalingon kay Jehova. (Roma 10:9, 10) Luyag sang mga kandidato sa bawtismo nga mapangamuyuon nga hunahunaon sing abanse ining mga pamangkot agod makasabat sila nahisanto sa ila personal nga kombiksion.

Nadedikar mo na bala ang imo kaugalingon kay Jehova sa pangamuyo, nga nagapromisa nga sia lamang ang imo pagasimbahon kag himuon nga pinakaimportante sa imo kabuhi ang paghimo sang iya kabubut-on?

Kumbinsido ka na gid bala nga dapat ka magpabawtismo sa pinakaposible nga kahigayunan?

Ano ang nagakaigo nga panapton sa bawtismo? (1 Tim. 2:9, 10; Juan 15:19; Fil. 1:10)

Dapat ang aton pamayo nagapakita sang “kaugdang kag maligdong nga hunahuna” para ipakita nga kita “nagasimba sa Dios.” Gani, ang mga balawtismuhan indi dapat magsuksok sang indi maugdang nga inugpaligo ukon bayo nga may mga pasayod ukon eslogan. Dapat ang ila bayo mahipid, matinlo, maayo tulukon, kag nagakaigo sa okasyon.

Paano dapat maggawi ang isa kon ginabawtismuhan sia? (Luc. 3:21, 22)

Ang bawtismo ni Jesus nagapahamtang sang halimbawa para sa Cristianong mga bawtismo karon. Nahangpan niya nga ang bawtismo isa ka serioso nga tikang, kag nakita ini sa iya panimuot kag mga buhat. Gani, indi ini ang lugar para sa paglahoglahog, paghampang, paglangoy, ukon iban pa nga paggawi nga nagadula sang pagkaserioso sang okasyon; ukon makunyag sing daku ang isa ka bag-o nga Cristiano nga daw nagdaug sia. Walay sapayan nga ang bawtismo isa ka makalilipay nga okasyon, dapat ipakita ina nga kalipay nga may dignidad.

Paano ang regular nga pagtambong sa mga miting kag pagpakig-upod sa kongregasyon makabulig sa imo para ikabuhi ang imo dedikasyon kay Jehova?

Sa tapos sang imo bawtismo, ngaa kinahanglan nga huptan mo ang isa ka maayo nga iskedyul sang personal nga pagtuon kag regular nga pagpakigbahin sa ministeryo?

MGA INSTRUKSION SA MGA GULANG SANG KONGREGASYON

Kon ipahibalo sang isa ka di-bawtismado nga manugbantala ang iya handum nga magpabawtismo, dapat sia palig-unon nga repasuhon sing maayo ang “Mga Pamangkot Para sa mga Luyag Magpabawtismo,” nga makita sa pahina 185-207 sini nga libro. Dapat ipatalupangod sa iya ang “Mensahe sa Di-bawtismado nga Manugbantala,” sugod sa pahina 182, nga nagapaathag kon paano sia makahanda para sa paghinun-anon upod sa mga gulang. Subong sang ginasiling didto, mahimo gamiton sang nagaplano nga magpabawtismo ang iya personal nga nota kag buksan ini nga libro sa tion sang paghinun-anon. Apang, indi kinahanglan nga may isa nga magarepaso sang mga pamangkot sa iya antes sia repasuhon sang mga gulang.

Ang bisan sin-o nga luyag magpabawtismo dapat magpahibalo sa koordenitor sang hubon sang mga gulang. Sa tapos mabasa sang nagpangabay nga magpabawtismo ang “Mga Pamangkot Para sa mga Luyag Magpabawtismo,” pamangkuton sia sang koordenitor sang hubon sang mga gulang kon bala nakahimo na sia sang personal nga dedikasyon sa pangamuyo kay Jehova para himuon ang Iya kabubut-on. Kon nakahimo na sia sang dedikasyon, ang koordenitor sang hubon sang mga gulang magahimo sing mga kahimusan para mahinun-anunan sang duha ka gulang upod sa iya ang “Mga Pamangkot Para sa mga Luyag Magpabawtismo.” Dapat indi ang gulang nga gin-asayn sa Bahin 1 ang magahinun-anon upod sa iya sang Bahin 2. Indi na kinahanglan nga hulaton pa nga maanunsio ang asembleya ukon kombension antes himuon ini nga paghinun-anon.

Ang duha ka bahin masami nga makobrehan sa duha ka sesyon nga mga tig-isa ka oras, apang kon kinahanglanon, wala sing malain kon maglampas ini sa isa ka oras. Nagakaigo nga buksan kag takpan ang tagsa ka sesyon sa pangamuyo. Ang kandidato ukon ang mga gulang indi dapat magdali sa paghinun-anon sa mga pamangkot. Dapat mangin prioridad sang naasayn nga mga gulang sa ila iskedyul ini nga paghinun-anon.

Mas maayo nga repasuhon ang mga pamangkot upod sa kada kandidato sa bawtismo, sa baylo nga upuron ang mga kandidato. Paagi sa komento sang kada kandidato sa tagsa ka pamangkot, mangin maathag sa mga gulang kon daw ano kadalom ang iya paghangop, sa amo mapat-od gid kon bala handa na sia para sa bawtismo. Dugang pa, ang isa nga nangabay nga magpabawtismo mahimo mas komportable sa pagpabutyag sang iya kaugalingon sa sini nga kahimtangan. Ang mag-asawa mahimo repasuhon sing dungan sa mga sesyon.

Kon ang kandidato sa bawtismo isa ka babayi, ang paghinun-anon dapat himuon sa lugar nga makita sila sang iban apang sa distansia nga indi sila mabatian. Kon kinahanglanon gid nga may kaupod, dapat ang mag-upod isa ka gulang ukon ministeryal nga alagad, depende sa bahin nga ginarepaso, subong sang ginasiling sang masunod nga parapo.

Sa mga kongregasyon nga diutay lang ang gulang, ang sangkol nga mga ministeryal nga alagad nga nagapakita sang ikasarang sa paghimo sang maayo nga desisyon kag paghantop mahimo makarepaso sa mga pamangkot para sa luyag magpabawtismo sa “Bahin 1: Ang Ginapatihan sang mga Cristiano.” Mga gulang lamang ang dapat maghinun-anon sang “Bahin 2: Cristianong Pagkabuhi.” Kon ang kongregasyon wala sing bastante nga kalipikado nga mga utod, puede kontakon ang manugtatap sang sirkito agod mahibaluan kon makabulig ang malapit nga kongregasyon.

Kon ang kandidato sa bawtismo menor-de-edad, ang iya tumuluo nga (mga) ginikanan dapat yara sa tagsa ka sesyon. Kon indi puede ang (mga) ginikanan, duha ka gulang (ukon isa ka gulang kag isa ka ministeryal nga alagad, depende sa ginarepaso nga bahin) ang dapat maghiwat sang repaso sa kada sesyon.

Pat-uron sang mga gulang nga ang isa nga luyag magpabawtismo may bastante nga paghangop sa sadsaran nga mga panudlo sang Biblia. Dugang pa, dapat nila pat-uron kon bala ginaapresyar gid niya ang kamatuoran kag ginapakita ang nagakaigo nga pagtahod sa organisasyon ni Jehova. Kon indi niya mahangpan ang sadsaran nga mga panudlo sang Biblia, ang mga gulang magahimo sing kahimusan agod makabaton sia sing personal nga bulig agod mangin kalipikado sa bawtismo sa ulihi. Ang iban mahimo kinahanglan hatagan sing tion agod mapakita ang dugang nga apresasyon sa pag-alagad sa latagon ukon pagpasakop sa mga kahimusan sang organisasyon. Yara sa mga gulang ang pagdesisyon kon paano tungatungaon ang isa ka oras ukon kapin para sa tagsa ka sesyon agod mahibaluan kon bala handa na ang isa sa pagpabawtismo. Bisan pa mas madamo nga tion ang mahinguyang sa pila ka pamangkot kag diutay naman nga tion sa iban, ang tanan nga pamangkot dapat repasuhon.

Ang mga gulang nga gin-asayn sa pagrepaso sini nga mga pamangkot magasapol pagkatapos sang ikaduha nga sesyon kag magapamat-od kon bala ang isa dapat batunon para sa bawtismo ukon indi. Dapat binagbinagon sang mga gulang ang gindak-an, ikasarang, kag iban pa nga sirkunstansia sang tagsa ka tawo. Interesado kita sa mga tawo nga nagliso sang ila tagipusuon kay Jehova kag nakahangop sang sadsaran nga mga kamatuoran sang Biblia. Upod ang inyo mahigugmaon nga bulig, ang mga nagaplano sa pagpabawtismo mangin handa gid sa pagtuman sang ila importante nga asaynment subong mga ministro sang maayong balita.

Pagkatapos sini, dapat sia hambalon sang isa ukon sang duha ka gin-asayn nga gulang kag pahibaluon kon bala kalipikado sia para sa bawtismo ukon indi. Kon kalipikado sia, dapat repasuhon sang mga gulang sa iya ang “Nagahinakop nga Paghinun-anon Upod sa mga Kandidato sa Bawtismo,” nga makita sa pahina 206-207. Kon ang kandidato sa bawtismo wala pa makatapos sa iya pagtuon sa Magkabuhi sing Wala Katapusan! nga libro, dapat palig-unon sia sang mga gulang nga tapuson ini pagkatapos sang bawtismo. Ipahibalo sa kandidato nga ang petsa sang iya bawtismo idugang sa iya Congregation’s Publisher Record. Ipahanumdom sa iya nga kinahanglan sang mga gulang ini nga personal nga impormasyon para padayon nga maatipan sang organisasyon ang hilikuton sang mga Saksi ni Jehova sa bug-os nga kalibutan kag agod makapakigbahin sia sa espirituwal nga mga hilikuton kag makabaton sang espirituwal nga pagsakdag. Ipahanumdom man sa bag-o nga manugbantala nga ang bisan ano nga personal nga impormasyon ginatipigan suno sa Global Data Protection Policy sang mga Saksi ni Jehova, nga makita sa jw.org. Sa masami ini nga paghinun-anon magalawig sing mga napulo lamang ka minuto ukon kubos pa.

Isa ka tuig pagkatapos mabawtismuhan ang manugbantala, duha ka gulang ang makig-istorya sa iya para maghatag sing pagpalig-on kag mapuslanon nga mga panugda. Ang isa sa mga gulang dapat manugtatap sang grupo nga iya ginapakig-updan. Kon menor-de-edad sia, ang iya tumuluo nga (mga) ginikanan dapat yara man. Dapat mangin makapalig-on ini nga pagpakig-istorya sa iya. Hinun-anunan sang mga gulang ang iya pag-uswag sa espirituwal kag magahatag sila sing praktikal nga mga panugda kon paano niya mapadayon ang maayo nga rutina sang personal nga pagtuon kag pagbasa sang Biblia adlaw-adlaw, pagsimba subong pamilya kada semana, regular nga pagtambong kag pagpakigbahin sa mga miting, kag pagpakigbahin sa pag-alagad sa latagon kada semana. (Efe. 5:15, 16) Kon wala pa niya matapos ang iya pagtuon sa Magkabuhi sing Wala Katapusan! nga libro, maghimo sing kahimusan ang mga gulang nga may magabulig sa iya sa pagtapos sini. Dapat maghatag sing mahigugmaon nga komendasyon ang mga gulang. Sa masami, ang laygay kag mga panugda sa isa ukon duha ka punto bastante na.