PAMANGKOT 6
Ano ang Himuon Ko Kon Ginahingabot Ako sang Akon mga Kaedad?
ANO ANG HIMUON MO?
Pamensari ini nga sitwasyon: Samtang nagapalapit ang duha ka skulmeyt ni Brian, ginakulbaan sia. Duha ka beses na sini nga semana nga ginapilit nila sia nga manigarilyo. Ikatlo na ini nga bes subong.
Naghambal ang isa sa ila:
“Wala ka naman upod? May ipakilala ako nga migo sa imo.”
Gintunog gid niya ang tinaga nga “migo” dala pangilay samtang may ginakuot sia sa iya bulsa kag gindaho ini kay Brian.
Nakita ni Brian ang sigarilyo nga ginauyatan niya. Ginkulbaan na gid si Brian.
“Sorry gid,” hambal ni Brian. “Naghambal lang gid ’ko nga wala ’ko . . . ”
Naghambal ang isa pa: “Katalawit sa imo!”
“Indi a!” hambal ni Brian bisan pa ginakulbaan sia.
Gin-agbayan sia sini kag ginhutikan, “Testingi lang bala.”
Ginpalapit na gid sang isa ang sigarilyo sa guya ni Brian kag ginhutikan sia: “Indi kami manugid a. Wala sing may makabalo.”
Kon ikaw si Brian, ano ang himuon mo?
PAMENSARA ANAY!
Nahibaluan gid bala sang mga kaedad ni Brian ang ila ginahimo? Gusto gid bala nila nga himuon ini? Mahimo nga indi. Siguro nagpadala sila sa impluwensia sang iban. Gusto nila nga batunon sila, gani ginpasugtan nila nga kontrolon sila sang iban.
Kon matabo ini sa imo, ano ang himuon mo para maatubang ang paghingabot sang imo mga kaedad?
MAGHANDA
Ang Biblia nagasiling: “Makita sang tawo nga maalamon ang katalagman kag nagapanago sia, apang ang kulang sing kinaalam nagadiretso lang kag nagaantos sang malain nga resulta.”—Hulubaton 22:3.
Sa masami, makita mo kon may malain nga matabo. Halimbawa, nakita mo sa unhan ang grupo sang imo mga skulmeyt nga nagapanigarilyo. Kon nahibaluan mo ang posible nga matabo, mangin handa ka sa pag-atubang sini.
PAMENSARA
Ang Biblia nagasiling: “Hupti ninyo ang maayo nga konsiensia.”—1 Pedro 3:16.
Pamangkuta ang imo kaugalingon, ‘Ano ang batyagon ko sa ulihi kon magsunodsunod lang ako sa iban?’ Matuod, mahimo nga manamian sa imo ang imo mga kaedad kon magsunod ka sa ila. Pero ano ang epekto sini sa imo sa ulihi? Isakripisyo mo bala ang imo identidad para lang malipay ang imo mga klasmeyt?—Exodo 23:2.
MAGDESISYON
Ang Biblia nagasiling: “Ang tawo nga maalamon nagahalong.” —Hulubaton 14:16.
Ang kada isa sa aton dapat maghimo sing desisyon kag mangin handa sa resulta sini. Ang Biblia nagasugid parte sa mga lalaki pareho nanday Jose, Job, kag Jesus, nga naghimo sing husto nga desisyon. Nagasugid man ini parte kanday Cain, Esau, kag Judas, nga naghimo sing sala nga desisyon. Ano ang himuon mo?
Ang Biblia nagasiling: “Magmatutom ka.” (Salmo 37:3) Kon napamensaran mo na nga daan ang mangin resulta kag nakadesisyon ka na, mahapos para sa imo nga ihambal ang imo panindugan kag maayo gid ang resulta sini.
Indi magkabalaka—indi man kinahanglan nga sermonan mo ang imo mga kaedad. Mahimo bastante na ang malig-on nga INDI. Ukon puede ka maghambal:
“Indi ’ko!”
“Wala ’ko nagahimo sina!”
“Kabalo ka na gid lang nga wala ’ko nagaamo sina!”
Ang sekreto amo ang pagsabat dayon nga may kaisog. Kon himuon mo ini, untatan na sang imo mga kaedad ang paghingabot sa imo!
PAG-ATUBANG SA PAGPAKALAIN
Kon magsunodsunod ka sa imo mga kaedad, daw pareho ka sang robot nga sila ang nagakontrol
Ano abi kon ginapakalain ka sang imo mga kaedad? Ano abi kon magsiling sila, “Katalawit sa imo!” Pamensara nga amo ini ang paghingabot sang imo mga kaedad. Ano ang himuon mo? May duha ikaw ka pililian.
Batunon ang ila pagpakalain. (“Tuod gid man, talawit ’ko!” Dayon isugid ang imo rason.)
Puede mo ibalik ang paghingabot. Ihambal ang imo rason kon ngaa indi ka, dayon puede mo sia hambalon, “Abi ko nakahibalo ka nga makahalit sa lawas ang sigarilyo!”
Kon ginapakalain ka gihapon sang imo mga kaedad, magpalayo ka sa ila! Dumduma nga kon indi ka dayon maghalin, mas ipiton ka pa gid nila. Kon maghalin ka, ginapakita mo nga indi mo gusto nga kontrolon ka sang iban.
Matuod makaatubang ka sang paghingabot sang imo mga kaedad. Pero makadesisyon ka kon ano ang imo himuon, isugid ang imo panindugan, kag indi magpadala sa ila. Kay man, ikaw ang nagadesisyon!—Josue 24:15.