Ginpili ni Moises nga Simbahon si Jehova

Sa Egipto, nakilala ang pamilya ni Jacob bilang mga Israelinhon. Sang napatay na si Jacob kag si Jose, may bag-o nga Paraon nga naggahom. Nahadlok sia basi mangin mas gamhanan pa ang mga Israelinhon sangsa mga Egiptohanon. Gani gin-ulipon sang Paraon ang mga Israelinhon. Ginpilit niya sila nga maghimo sing mga tisa kag mag-obra sing todo sa uma. Pero nagadamo gihapon ang mga Israelinhon, bisan grabe ang pagpabudlay sa ila. Wala nalipay ang Paraon sa sina, gani nagsugo sia nga patyon ang tanan nga lapsag nga lalaki nga Israelinhon. Maimadyin mo bala ang kahadlok sang mga Israelinhon?

Ang Israelinhon nga babayi nga si Jocebed may lapsag nga lalaki. Para proteksionan sia, ginbutang niya ini sa basket kag gintago sa mga tabun-ak sa Suba Nilo. Ang utod sang lapsag, nga si Miriam, ara lang sa malapit para makita niya kon ano ang matabo.

Naligo ang bata nga babayi sang Paraon sa suba kag nakita niya ang basket. Nakita niya nga may nagahibi nga lapsag sa sulod, kag naluoy gid sia. Namangkot si Miriam: ‘Gusto mo bala nga mangita ako sing babayi nga magaatipan sang bata para sa imo?’ Sang nagpasugot ang bata sang Paraon, gin-upod ni Miriam ang iya nanay nga si Jocebed pabalik didto. Ang bata sang Paraon nagsiling kay Jocebed: ‘Dal-a ini nga bata, atipana sia para sa akon, kag bayaran ko ikaw.’

Sang medyo daku na ang bata, gindala sia ni Jocebed sa bata sang Paraon. Ginngalanan niya ini nga Moises kag ginpadaku sia bilang iya mismo bata. Nagdaku si Moises nga isa ka prinsipe kag makuha niya ang bisan ano nga gustuhon niya. Pero wala malipatan ni Moises si Jehova. Nahibaluan niya nga isa sia ka Israelinhon kag indi Egiptohanon. Kag ginpili niya nga alagaron si Jehova.

Sang 40 anyos si Moises, nagdesisyon sia nga buligan ang iya katawhan. Sang nakita niya nga ginasakit sang Egiptohanon ang isa ka Israelinhon nga ulipon, ginlampusan niya sing todo ang Egiptohanon kag napatay ini. Gintampukan ni Moises ang bangkay sing balas. Sang nabal-an ini sang Paraon, gusto niya patyon si Moises. Pero nalagyo si Moises sa duta sang Midian. Gin-atipan sia ni Jehova didto.