Ginhimo Nila ang Kabubut-on ni Jehova

Ang Pagtuo sang mga Ginikanan Ginpadyaan

PARA sa mga Israelinhon, ang pagkabun-ag sang bata nga lalaki ginabangdan anay sing daku nga kalipay. Nagkahulugan ini nga ang linya sang kaliwat magapadayon kag nga ang palanublion nga duta magapabilin sa pamilya. Apang sang mga tuig 1593 B.C.E., ang pagbun-ag sa bata nga lalaki daw isa ka pagpakamalaut sangsa pagpakamaayo para sa mga Hebreo. Ngaa? Bangod hinadlukan ang Faraon sang Egipto sa madasig nga pagdamo sang mga Judiyo sa teritoryo nga iya gingamhan, amo nga nagmando sia nga ang tanan nga bag-ong bun-ag nga bata nga lalaki pamatyon.​—⁠Exodo 1:​12, 15-​22.

Sa tion sining makakulugmat nga pagpapas sa rasa nga si Amram kag si Jocabed, mag-asawa nga Hebreo, nangin mga ginikanan sa isa ka maambong nga lapsag nga lalaki. Mahapos handurawon kon paano ang ila kalipay nalabawan sang kahadlok sang madumduman nila ang mando ni Faraon. Apang, samtang ginatulok nanday Amram kag Jocabed ang ila lapsag nga lalaki, namat-od sila sing malig-on nga indi sia pagpabay-an, bisan ano man ang matabo.​—⁠Exodo 2:​1, 2; 6:​20.

Pagpanghikot sa Pagtuo

Gintago nanday Amram kag Jocabed ang ila lapsag sa sulod sang tatlo ka bulan. (Exodo 2:⁠2) Apang, makatalagam ini sanglit magkaiping lamang ang ginapuy-an sang mga Hebreo kag mga Egiptohanon. Ang bisan sin-o nga madakpan nga nagalapas sa mando ni Faraon silutan gid sing kamatayon​—⁠kag patyon man ang bata. Ano, nian ang sarang mahimo sining debotado nga mga ginikanan agod maluwas ang ila anak nga lalaki kag ang ila kaugalingon?

Nanguha si Jocabed sing pila ka salingsing sang papiro. Kaangay sa kawayan, ang papiro isa ka mahunit nga tanom, kag may tatlo-ka-kilid nga sanga nga daw tudlo ang kadamulon. Mahimo ini magtaas tubtob sa 6 ka metro. Ginagamit sang mga Egiptohanon ining tanom sa paghimo sing papel, mga banig, mga layag, mga sandalyas, kag mga bangka.

Naghimo si Jocabed sing isa ka takupis nga human sa mga sanga sang papiro nga hustuhan lang ang kadakuon agod makaigo ang iya lapsag. Dayon gingalagalahan niya ini sing aspalto kag balaw agod magkipo ang takupis kag agod indi masudlan sang tubig. Nian ginsulod ni Jocabed ang lapsag sa takupis kag ginpahamtang ini sa kabagaasan sa pangpang sang Suba Nilo.​—⁠Exodo 2:⁠3.

Nakita ang Lapsag

Ang anak nga babayi ni Jocabed nga si Miriam, nagtindog sa unhan agod tan-awon kon ano ang masunod nga matabo. Nian ang anak nga babayi ni Faraon nagkadto sa Nilo agod maligo.a Ayhan nahibal-an ni Jocabed nga pirme nagakadto ang prinsesa sa sining bahin sang Nilo kag gintuyo nga ibilin ang takupis sa duog nga madali ini makit-an. Sa amo, wala magdugay nasat-uman sang anak nga babayi ni Faraon ang takupis nga nahamtang sa kabagaasan, kag gintawag niya ang isa sang iya mga alagad agod kuhaon ini. Sang makita niya ang nagahibi nga bata sa sulod, naluoy sia sa iya. Nahantop niya nga isa ini ka Hebreong lapsag. Apang, paano niya mapapatay ining isa ka maambong nga bata? Luwas sa tawhanon nga pagkamabuot, ayhan naimpluwensiahan ang anak nga babayi ni Faraon sang bantog nga pagpati sang mga Egiptohanon nga ang pagbaton sa ila sa langit nasandig sa rekord sang maayo nga mga binuhatan samtang nagakabuhi ang isa.b​—⁠Exodo 2:​5, 6.

Si Miriam, nga nagabantay sa unhan, nagpalapit sa anak nga babayi ni Faraon. “Magalakat bala ako sa pagtawag para sa imo sing isa ka nagabatiti nga babayi gikan sa mga babayi nga Hebreo agod mabatiti niya ang bata para sa imo?” pamangkot niya. Ang prinsesa nagsabat: “Lakat!” Nagdalagan si Miriam pakadto sa iya iloy. Wala magdugay, nagatindog si Jocabed sa atubangan sang anak nga babayi ni Faraon. “Dalha ining bata kag batitia sia para sa akon,” siling sang prinsesa sa iya, “kag ako magasuhol sa imo.” Mahimo nga sa sining tion nahisayran sang anak nga babayi ni Faraon nga si Jocabed amo ang iloy sang lapsag.​—⁠Exodo 2:​7-9.

Gin-atipan ni Jocabed ang iya bata tubtob nga ginlutas sia.c Naghatag ini sa iya sing madamong hamili nga kahigayunan sa pagtudlo sa iya tuhoy sa matuod nga Dios, si Jehova. Nian ginbalik ni Jocabed ang bata sa anak nga babayi ni Faraon, nga naghingalan sa bata nga Moises, nga nagakahulugan “ginsagop gikan sa tubig.”​—⁠Exodo 2:​10, footnote.

Leksion Para sa Aton

Ginpanginpuslan sing bug-os nanday Amram kag Jocabed ang malip-ot nga kahigayunan nila nga matudluan ang ila bata nga lalaki sing mga prinsipio sang matuod nga pagsimba. Amo man ang dapat nga himuon sang mga ginikanan karon. Sa pagkamatuod, dapat gid nila ini himuon. Si Satanas nga Yawa ‘nagaluyong kaangay sa isa ka nagangurob nga leon, nga nagapangita sang iya tulukbon.’ (1 Pedro 5:⁠8.) Luyag niya biktimahon ang hamili nga mga pamatan-on​—⁠mga lalaki kag babayi​—⁠nga may paglaum nga mangin maayo nga mga alagad ni Jehova. Wala sing simpatiya si Satanas sa mga pamatan-on! Bangod sini, ginahanas sang maalamon nga mga ginikanan ang ila lapsag nga kabataan nga mahadlok sa matuod nga Dios, si Jehova.​—⁠Hulubaton 22:6; 2 Timoteo 3:​14, 15.

Sa Hebreo 11:​23, ginrekord ang panikasog nanday Amram kag Jocabed sa pagtago sa ila lapsag sa una nga tatlo ka bulan sang iya kabuhi subong isa ka buhat sang pagtuo. Ining duha ka mahinadlukon sa Dios nga ginikanan nagpakita sing pagsalig sa gahom ni Jehova sa pagluwas paagi sa indi pagsikway sa ila bata, kag bangod sini ginpakamaayo sila. Dapat man naton sundon sing estrikto ang mga kasuguan kag mga prinsipio ni Jehova, nagasalig nga bisan ano man ang ginatugot ni Jehova nga matabo sa aton magaresulta sa ulihi para sa aton dayon nga kaayuhan kag kalipay.​—⁠Roma 8:⁠28.

[Mga footnote]