Nagpakita si Jesus sa mga Mangingisda

Wala madugay pagkatapos nagpakita si Jesus sa mga apostoles, nagdesisyon si Pedro nga mangisda sa Dagat sang Galilea. Nag-upod man sa iya si Tomas, si Santiago, si Juan, kag ang iban pa nga disipulo. Bilog nga gab-i sila nga nangisda, pero wala sila sing nakuha.

Sang kaagahon na, may nakita sila nga tawo nga nagatindog sa baybayon. Nagsinggit ini sa ila: ‘May nakuha bala kamo nga isda?’ Nagsabat sila: “Wala!” Nagsiling ang lalaki: “Iladlad ang inyo pukot sa tuo nayon sang sakayan.” Sang ginhimo nila ini, napuno ang pukot sang tama kadamo nga isda amo nga indi na nila ini mapasaka sa ila sakayan. Nakilala dayon ni Juan nga si Jesus ang tawo, gani nagsiling sia: “Ang Ginuo ina!” Hinali nga naglukso si Pedro sa tubig kag naglangoy pakadto sa higad. Ang iban nga disipulo nagsunod sa iya nga nagasakay sa sakayan.

Pag-abot nila sa higad, nakita nila ang tinapay kag ang ginasugba nga isda. Ginsilingan sila ni Jesus nga dal-on sa iya ang iban nga isda para idugang sa ila pagkaon. Dayon nagsiling sia: ‘Dali kamo, mamahaw kita.’

Pagkatapos nila pamahaw, ginpamangkot ni Jesus si Pedro: ‘Mas palangga mo bala ako sangsa pagpangisda?’ Si Pedro nagsabat: ‘Huo, Ginuo, nakabalo ka nga palangga ko ikaw.’ Si Jesus nagsiling: “Pahalba ang akon mga kordero.” Namangkot liwat si Jesus: ‘Pedro, palangga mo bala ako?’ Si Pedro nagsabat: ‘Ginuo, nakabalo ka nga palangga ko ikaw.’ Si Jesus nagsiling: “Bantayi ang akon magagmay nga mga karnero.” Sa ikatlo nga beses, ginpamangkot pa gid sia ni Jesus. Ginsubuan si Pedro. Sia nagsiling: ‘Ginuo, nakabalo ka sang tanan; nakabalo ka nga palangga ko ikaw.’ Si Jesus nagsiling: “Pahalba ang akon magagmay nga mga karnero.” Dayon ginsilingan niya si Pedro: “Padayon ka nga magsunod sa akon.”