Pag-alagad Subong mga Mangingisda sing mga Tawo
“Si Jesus nagsiling kay Simon: ‘Dili mahadlok. Kutob karon magapangisda ka sing mga tawo.’”—LUCAS 5:10.
1, 2. (a) Anong papel ang ginatungod sang pagpangisda sa maragtas sang tawo? (b) Anong sahi sang pagpangisda ang ginpakilala sang nagligad nga halos 2,000 ka tuig?
SA LINIBO ka tuig, ang mga tawo nangisda sing kalan-on sa mga dagat, mga linaw, kag mga suba sang duta. Ang isda halin sa Nilo importante nga bahin sang pagkaon sa Egipto anay. Sang ang tubig sang Nilo nangin dugo sang adlaw ni Moises, ang mga Egiptohanon nag-antos indi lamang bangod sang kakulang sing tubig nga nagresulta kundi bangod man sang pagkalamatay sang isda, nga nag-apektar sang ila suplay sang pagkaon. Sang ulihi, sa Sinai, sang ginhatag ni Jehova sa Israel ang Kasuguan, ginsugo niya sa ila nga ang iban nga isda mahimo makaon apang ang iban nga dimatinlo, indi makaon. Nagapakita ini nga ang mga Israelinhon magakaon sang isda kon magkadto sila sa Ginsaad nga Duta, gani ang iban sa ila mahimo nga mangin mga mangingisda.—Exodo 7:20, 21; Levitico 11:9-12.
2 Apang, sang nagligad nga halos 2,000 ka tuig, ang isa pa ka sahi sang pagpangisda ginpakilala sa katawhan. Amo ini ang espirituwal nga sahi sang pagpangisda nga magabenepisyo indi lamang sa mga mangingisda kundi sa isda man! Ini nga sahi sang pagpangisda ginahimo gihapon sa karon, nga may daku nga benepisyo sa minilyon sa bug-os nga kalibutan.
“Magapangisda Ka sing mga Tawo”
3, 4. Sin-o ang duha ka mangingisda nga nagpakita sing dakung interes kay Jesucristo?
3 Sang tuig 29 C.E., si Jesus, ang Isa nga magapakilala sining bag-ong dagway sang pagpangisda, ginbawtismuhan sa suba Jordan ni Juan Bautista. Pagligad sang pila ka semana, gintudlo ni Juan si Jesus sa duha niya ka disipulo kag nagsiling: “Yari karon, ang Kordero sang Dios!” Ang isa sining mga disipulo, nga si Andres ang ngalan, maabtik nga nagsiling sa iya utod nga si Simon Pedro: “Nakita namon ang Mesias”! Sing makawiwili, pagpangisda ang obra nanday Andres kag Simon.—Juan 1:35, 36, 40, 41; Mateo 4:18.
4 Pagligad sang mga pila ka tion, si Jesus nagbantala sa kadam-an sa higad sang Dagat sang Galilea, indi malayo sa ginaistaran nanday Pedro kag Andres. Ginsugo niya ang mga tawo: “Hinulsol kamo, kay ang ginharian sang langit malapit na.” (Mateo 4:13, 17) Mahanduraw naton nga sanday Pedro kag Andres nalangkag sa pagpamati sang iya mensahe. Apang, mahimo nga wala sila makahibalo nga ang ihambal ni Jesus sa ila magabalhin sang ila kabuhi sing dayon. Dugang pa, ang isiling kag himuon ni Jesus sa atubangan nila may importante nga kahulugan para sa aton tanan karon.
5. Paano nakaalagad kay Jesus ang mangingisda nga si Pedro?
5 Aton mabasa: “Sang nagdaguso ang kadam-an sa iya sa pagpamati sang pulong sang Dios, nagatindog sia sa baybayon sang linaw sa Genesaret. Kag nakita niya ang duha ka sakayan nga didto sa bibi sang linaw, apang ang mga mangingisda nagpanaug sa ila kag naghugas sang ila mga pukot.” (Lucas 5:1, 2) Sadto anay, ang propesyonal nga mga mangingisda nagapangisda sa gab-i, kag ginatinluan nila ang ila mga pukot pagligad sang isa ka gab-i nga pagpangisda. Namat-od si Jesus nga gamiton ang isa sang ila mga sakayan agod makabantala sing labi ka epektibo sa kadam-an. “Sang nagasakay sia sa isa sang mga sakayan, nga iya ni Simon, nagpangayo sia sa iya nga itulak sing diutay ang sakayan. Kag naglingkod sia, kag nagpanudlo sa mga kadam-an gikan sa sakayan.”—Lucas 5:3.
6, 7. Anong milagro nahanungod sa pagpangisda ang ginhimo ni Jesus, nagadul-ong sa anong pinamulong tuhoy sa pagpangisda?
6 Talupangda nga may labi pa nga ginpamensar si Jesus sang sa pagtudlo sa kadam-an: “Sang nakatapos sia sa paghambal, nagsiling sia kay Simon: ‘Palawud kag iladlad ang inyo mga pukot sa pagpangisda.’” Dumduma, ining mga mangingisda nagpangisda na sa bug-os nga gab-i. Dimakakilibot nga si Pedro nagsabat: “Magtutuon, sa bug-os nga gab-i nagpangabudlay kami kag wala gid sing nadakop, apang sa imo pulong iladlad ko ang mga pukot.” Ano ang natabo sang ginhimo nila ini? “Nakasakop sila sing daku nga luta sang mga isda. Sa katunayan, nagakagisi ang ila mga pukot. Gani ginpaypay nila ang ila mga kumbuya sa lain nga sakayan nga magpalapit sila kag magbulig sa ila; kag nagpalapit sila, kag ginpuno nila ang duha ka sakayan, sa bagay nga nagakalunod sila.”—Lucas 5:4-7.
7 Si Jesus naghimo sing isa ka milagro. Sa bug-os nga gab-i ang dagat wala sing isda; karon puno ini sing isda. May daku nga epekto kay Pedro ini nga milagro. “Nagyaub si Simon Pedro sa mga tuhod ni Jesus, nga nagasiling: ‘Palayo sa akon, O Ginuo, kay ako tawong makasasala.’ Kay naorongan sia kag ang tanan nga upod niya tungod sa madamong isda nga ila nakuha, kag subong man si Santiago kag si Juan, nga mga anak ni Zebedeo, nga mga kumbuya ni Simon.” Ginpakalma ni Jesus si Pedro kag nian nagsiling sang mga pulong nga nagbalhin sang kabuhi ni Pedro. “Dili mahadlok. Kutob karon magapangisda ka sing mga tawo.”—Lucas 5:8-10.
Mga Mangingisda sing mga Tawo
8. Ano ang sabat sang apat ka propesyonal nga mangingisda sa imbitasyon nga ‘mangisda sing mga tawo’?
8 Busa ginpaanggid ni Jesus ang tawo sa isda, kag gin-agda niya ining kubos nga mangingisda sa pagbiya sang iya palamugnan para sa daku pa nga dagway sang pagpangisda—ang pagpangisda sing mga tawo. Ginbaton ni Pedro, kag sang iya utod nga si Andres, ang pangagda. “Sa gilayon ginbayaan nila ang mga pukot kag nagsunod sa iya.” (Mateo 4:18-20) Masunod nga ginkadtuan ni Jesus sanday Santiago kag Juan, nga nagapuna sang ila mga pukot sa ila sakayan. Gin-agda man niya sila nga mangin mga mangingisda sing mga tawo. Ano ang sabat nila? “Sa gilayon ginbayaan nila ang sakayan kag ang ila amay, kag nagsunod sa iya.” (Mateo 4:21, 22) Ginpakita ni Jesus ang ikasarang subong isa ka mangingisda sing mga kalag. Sa sining okasyon nakapangisda sia sing apat ka tawo.
9, 10. Anong pagtuo ang ginpakita ni Pedro kag sang iya mga kumbuya, kag paano sila ginhanas sa espirituwal nga pagpangisda?
9 Ang isa ka propesyonal nga mangingisda nagapangabuhi paagi sa pagbaligya sang iya napangisda, apang indi ina mahimo sang isa ka espirituwal nga mangingisda. Gani, ining mga disipulo nagpakita sing dakung pagtuo sang ginbayaan nila ang tanan agod magsunod kay Jesus. Apang, wala sila magduhaduha nga ang ila espirituwal nga pagpangisda magamadinalag-on. Nahimo ni Jesus ang dimapatubason nga tubig nga mapuno sang literal nga isda. Sa kaanggid, sang ginladlad nila ang ila mga pukot sa tubig sang Israelinhon nga pungsod, nakapat-od ang mga disipulo nga, sa bulig sang Dios, makapangisda sila sing mga tawo. Inang hilikuton sang espirituwal nga pagpangisda nga nagsugod sadto anay nagapadayon, kag si Jehova nagahatag gihapon sing bugana nga ani.
10 Sa kapin sa duha ka tuig, yadtong mga disipulo ginhanas ni Jesus sa pagpangisda sing mga tawo. Sang isa ka bes ginhatagan niya sila sing tul-id nga instruksion kag ginpauna sila sa pagbantala. (Mateo 10:1-7; Lucas 10:1-11) Sang ginluiban kag ginpatay si Jesus, ang iya mga disipulo hinadlukan. Apang ang kamatayon ni Jesus nagkahulugan bala nga indi na mangisda sing mga tawo? Ang mga hitabo sang ulihi naghatag sang sabat.
Pagpangisda sa Dagat sang Katawhan
11, 12. Pagkatapos sang iya pagkabanhaw, anong milagro ang ginhimo ni Jesus may kaangtanan sa pagpangisda?
11 Wala madugay pagkatapos mapatay si Jesus sa guwa sang Jerusalem kag sang ginbanhaw sia, ang mga disipulo nagbalik sa Galilea. Sang isa ka okasyon ang pito sa ila mag-ulupod malapit sa Dagat sang Galilea. Si Pedro nagsiling nga mangisda sia, kag ang iban nag-upod sa iya. Subong sang kinaandan, nangisda sila sa gab-i. Sa katunayan, ginladlad nila liwat ang ila pukot sa dagat sa bug-os nga gab-i nga wala sing nadakpan nga bisan ano. Nian sang kaagahon, isa ka tawo nga nagatindog sa baybayon ang nagpanawag sa ila sa dagat: “Mga anak, may isda bala kamo?” Ang mga disipulo nagsabat: “Wala!” Gani ginsilingan sila sang tawo nga nagatindog sa baybayon: “‘Iladlad ninyo ang pukot sa tuo sang sakayan kag makakita kamo.’ Gani ginladlad nila ini, kag karon indi na sila makasarang sa pagbatak sini bangod sang kadamuon sang isda.”—Juan 21:5, 6.
12 Daw ano ka tumalagsahon nga eksperiensia! Mahimo nga nadumduman sang mga disipulo ang naunang milagro tuhoy sa pagpangisda, kag nakilala sang isa sa ila kon sin-o ang tawo sa baybayon. “Yadtong gintutun-an nga ginhigugma ni Jesus nagsiling kay Pedro: ‘Ang Ginuo ini!’ Sang pagkabati ni Simon Pedro nga ang Ginuo yadto, nagsuklob sia sang iya panapton, kay hubo sia, kag nagsugbo sa dagat. Apang ang iban nga mga gintutun-an nagdungka sa sakayan, kay indi sila malayo sa duta, kundi mga isa ka gatos ka yarda.”—Juan 21:7, 8.
13. Pagkatapos nagkayab si Jesus sa langit, anong programa sang internasyonal nga pagpangisda ang ginsugdan?
13 Ano ang ginpakita sining milagro? Nga ang hilikuton sa pagpangisda sing mga tawo wala pa matapos. Ginpadaku ining katunayan sang tatlo ka beses nga ginsingganan ni Jesus si Pedro—kag paagi sa iya ang tanan nga disipulo—nga pakaunon ang mga karnero ni Jesus. (Juan 21:15-17) Huo, yara sa unahan ang programa sang espirituwal nga pagpakaon. Antes sia mapatay, nagtagna sia: “Ining maayong balita sang ginharian pagaibantala sa bug-os napuy-an nga duta nga panaksi sa tanan nga kapungsuran.” (Mateo 24:14) Karon na ang tion para ang unang-siglo nga katumanan sinang tagna magasugod. Iladlad sang iya mga disipulo ang ila mga pukot sa dagat sang katawhan, kag ang ila mga pukot indi pagabatakon nga walay unod.—Mateo 28:19, 20.
14. Sa anong paagi ang pagpangisda sang mga sumulunod ni Jesus ginpakamaayo sang mga tuig antes ginlaglag ang Jerusalem?
14 Antes sia magkayab sa trono sang iya Amay sa langit, si Jesus nagsiling sa iya mga sumulunod: “Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.” (Binuhatan 1:8) Sang ang balaan nga espiritu ginpasagahay sa mga disipulo sang Pentecostes 33 C.E., ang dakung hilikuton sang espirituwal nga pagpangisda nagsugod sing internasyonal. Sang adlaw sang Pentecostes lamang, tatlo ka libo ka kalag ang napangisda, kag sang ulihi pa “ang kadamuon sang mga tawo mga lima ka libo.” (Binuhatan 2:41; 4:4) Ang pagdugang nagpadayon. Ang rekord nagasugid sa aton: “Nagdugang pa gid ang mga tumuluo sa Ginuo, mga kadam-an sang mga lalaki kag mga babayi.” (Binuhatan 5:14) Sang ulihi, ang mga Samariahanon nagbaton sang maayong balita, kag wala madugay sang ulihi ang disirkunsidado nga mga Gentil man. (Binuhatan 8:4-8; 10:24, 44-48) Mga 27 ka tuig pagligad sang Pentecostes, si apostol Pablo nagsulat sa mga Cristiano sa Colosas nga ang maayong balita “ginwali sa bug-os nga tinuga sa idalom sang langit.” (Colosas 1:23) Sing maathag, ang mga disipulo ni Jesus nangisda malayo sa dagat sang Galilea. Ginladlad nila ang ila mga pukot sa tunga sang mga Judiyo nga naglinapta sa palibot sang Emperyo sang Roma, subong man sa daw dimabungahon nga dagat sang mga di-Judiyo. Kag ang ila mga pukot napuno. Para sa mga kinahanglanon sang unang-siglo nga mga Cristiano, ang tagna ni Jesus sa Mateo 24:14 natuman antes ginlaglag ang Jerusalem sang 70 C.E.
Pagpangisda sing mga Tawo sa “Adlaw sang Ginuo”
15. Sa tulun-an sang Bugna, anong dugang pa nga hilikuton sa pagpangisda ang gintagna, kag san-o ini ginhimo?
15 Apang, madamo pa ang yara sa unahan. Sadtong talipuspusan sang unang siglo, ginhatagan ni Jehova ang katapusan nga apostol nga nabuhi, si Juan, sing bugna sang mga butang nga mahanabo sa “adlaw sang Ginuo.” (Bugna 1:1, 10) Ang isa ka talalupangdon nga bahin amo ang pagbantala sang maayong balita sa bug-os nga kalibutan. Aton mabasa: “Nakita ko ang isa na man ka manugtunda nga nagalupad sa tunga sang langit, nga may maayong balita nga dayon nga ibantala sa mga nagapuyo sa duta, sa tagsa ka pungsod kag kabikahan kag hambal kag katawhan.” (Bugna 14:6) Sa idalom sang panuytoy sang manugtunda ang mga alagad sang Dios literal nga nagabantala sang maayong balita sa bug-os napuy-an nga duta, indi lamang sa bug-os nga Emperyo sang Roma. Ang tugob-globo nga hilikuton sa pagpangisda sing mga kalag dapat himuon, kag nakita naton karon ang katumanan sina nga palanan-awon.
16, 17. San-o ginsugdan ang ulihi nga hilikuton sang espirituwal nga pagpangisda, kag paano ini ginpakamaayo ni Jehova?
16 Kamusta ang pagpangisda sining ika-20 ka siglo? Sadto anay, diutay lamang ang mga mangingisda. Sang natapos ang Inaway Kalibutanon I, may yara lamang apat ka libo ka aktibo nga mga manugbantala sang maayong balita, mapisan nga mga lalaki kag mga babayi nga ang kalabanan mga hinaplas. Ginladlad nila ang ila mga pukot bisan diin nga ginbuksan ni Jehova ang dalan, kag madamong kalag ang napangisda. Pagkatapos sang ikaduhang kalibutanon nga inaway, ginbuksan ni Jehova ang bag-ong tubig nga pangisdaan. Ang mga misyonero nga nag-eskwela sa Watchtower Bible School of Gilead nanguna sa hilikuton sa madamong kadutaan. Ang mga pungsod subong sang Japan, Italya, kag Espanya, nga daw wala sing mapangisda anay, naghatag sang ulihi sing bugana nga ani sang mga kalag. Nahibaluan man naton sining karon lang kon daw ano ka madinalag-on ang pagpangisda sa Nasidlangan nga Europa.
17 Karon, sa madamong pungsod ang mga pukot daw halos mabusdik. Ang dakung ani sang mga kalag nagkinahanglan nga organisahon ang bag-ong mga kongregasyon kag mga sirkito. Agod mahimo ini, ang bag-ong mga Kingdom Hall kag mga Assembly Hall gintukod sa tanan nga tion. Dugang nga mga gulang kag ministeryal nga mga alagad ang ginkinahanglan sa pag-atipan sa pag-uswag. Ang daku nga hilikuton ginsugdan sang mga matutom sadtong 1919. Sa literal nga paagi, ang Isaias 60:22 natuman. ‘Ang diutay nangin isa ka libo,’ kay yadtong apat ka libo ka mangingisda nangin kapin sa apat ka milyon karon. Kag wala pa ini matapos.
18. Paano naton mailog ang maayong halimbawa sang unang-siglo nga espirituwal nga mga mangingisda sang tawo?
18 Ano ang kahulugan sini tanan para sa aton subong mga indibiduwal? Ang kasulatan nagasiling nga sang gin-agda sanday Pedro, Andres, Santiago, kag Juan nga mangin mga mangingisda sing mga tawo, “binayaan nila ang tanan kag nagsunod [kay Jesus].” (Lucas 5:11) Daw ano kaayo nga halimbawa sang pagtuo kag dedikasyon! Sarang bala naton mapalambo ini man nga espiritu sang pagsakripisyo sa kaugalingon, ini man nga kahanda sa pag-alagad kay Jehova bisan ano man ang bili? Minilyon ang nagsabat nga masarangan nila. Sang unang siglo, ang mga disipulo nangisda sing mga tawo sa kon diin ginatugot ni Jehova. Sa tunga man sang mga Judiyo ukon mga Gentil, nangisda sila sing bug-os. Magbantala man kita sa tanan nga wala sing pagdumili ukon pagkamaynadampigan.
19. Ano ang dapat naton himuon kon ang tubig nga ginapangisdaan naton daw dimapatubason?
19 Apang, kamusta kon ang imo teritoryo sa karon daw dimabungahon? Indi magluya ang imo buot. Dumduma, ginpuno ni Jesus ang mga pukot sang mga disipulo pagkatapos nga nagpangisda sila sa bug-os nga gab-i nga wala sing dakop. Amo man ang matabo sa espirituwal nga paagi. Sa Irlanda, halimbawa, ang matutom nga mga Saksi nagpangabudlay sing mga tinuig nga may limitado lamang nga resulta. Apang, nagbalhin ina sining karon lang. Ang 1991 Yearbook of Jehovah’s Witnesses nagreport nga pagkatapos sang 1990 nga tuig sang pag-alagad, ang Irlanda nag-agom sing 29 ka alagisod nga pag-uswag! Ayhan sa pila ka adlaw ang inyo teritoryo magapatubas man sing kaanggid. Tubtob ginatugot ni Jehova, magpadayon sa pagpangisda!
20. San-o kita dapat magpangisda sing mga tawo?
20 Sa Israel, ang mga mangingisda nagpangisda sa gab-i, samtang ang iban nagapainit-init kag komportable sa higdaan. Nangisda sila, indi kon ini kombeniente sa ila, kundi kon madamo sila sing mapangisda. Dapat man naton tun-an ang aton teritoryo agod mangisda kita, kon hambalon pa, kon ang kalabanan nga tawo yara sa balay kag magapamati. Mahimo ini sa gab-i, sa talipuspusan sang semana, ukon sa iban pa nga tion. Kon san-o man ini, himuon naton ang tanan nga masarangan naton sa pagpangita sang matarong sing tagipusuon nga mga tawo.
21. Ano ang dapat naton dumdumon kon ang aton teritoryo masunson ginapangabudlayan?
21 Kamusta kon ang aton teritoryo masunson ginatuptupan? Ang propesyonal nga mga mangingisda sa kalibutan masami nagareklamo nga ang ila palangisdaan pirme ginapangisdaan. Apang mahimo bala nga ang aton espirituwal nga palangisdaan pirme ginapangisdaan? Indi gid man! Madamong teritoryo ang nagapatubas sing pag-uswag bisan pa masunson ginatuptupan. Ang iban nagapatubas sing maayo pa bangod nga ginapangabudlayan sing maayo. Apang, kon ang mga balay masunson ginaduaw, pat-ura gid nga ang tanan nga balay nga wala sing tawo ginasulat kag ginakadtuan sa ulihi. Magtuon sang lainlain nga topiko nga mahambalan. Dumduma nga may isa pa nga magaduaw sa ulihi, gani indi magdugay ukon indi hungod nga baison ang tagbalay. Kag palambua ang imo ikasarang sa pagpangabudlay sa dalan kag subong man sa dipormal nga pagpanaksi. Iladlad ang imo espirituwal nga mga pukot sa tanan nga okasyon kag sa tanan nga posible nga paagi.
22. Anong dakung pribilehiyo ang ginaagom naton sini nga tion?
22 Dumduma, sa sining pagpangisda lunsay ang mga mangingisda kag mga isda nagabenepisyo. Kon ang napangisda naton magpadayon, mahimo sila mabuhi sing dayon. Si Pablo naglaygay kay Timoteo: “Magpadayon sa sina, kay sa paghimo sini maluwas mo ang imo kaugalingon kag ang mga nagapamati sa imo.” (1 Timoteo 4:16) Si Jesus amo ang naghanas sa iya mga disipulo sa espirituwal nga pagpangisda, kag ining hilikuton ginahimo gihapon sa idalom sang iya panuytoy. (Ipaanggid ang Bugna 14:14-16.) Daw ano ka daku ang aton pribilehiyo nga magpangabudlay sa idalom niya agod mahimo ini! Padayon naton nga iladlad ang aton mga pukot tubtob ginatugot ni Jehova. Ano ang mahimo nga daku pa nga hilikuton sang sa pagpangisda sing mga tawo?
Madumduman Mo Bala?
◻ Sa anong hilikuton ginhanas ni Jesus ang iya mga sumulunod?
◻ Paano ginpakita ni Jesus nga ang espirituwal nga pagpangisda nga hilikuton wala matapos sang mapatay sia?
◻ Sa anong paagi ginpakamaayo ni Jehova ang espirituwal nga pagpangisda nga hilikuton sang unang siglo?
◻ Anong bugana nga ani sang isda ang ginpangisda sang “adlaw sang Ginuo”?
◻ Paano kita subong mga indibiduwal mangin labi pa ka madinalag-on nga mga mangingisda sing mga tawo?
[Laragway sa pahina 15]
Pagkatapos ginbanhaw si Jesus, ginpasangkad sang iya mga apostoles ang balaan nga hilikuton sang pagpangisda sing mga tawo