1914—Ang Pinakasentro

“KON ano gid ang matabo sa 1914 wala kita makahibalo, apang isa ka butang ang pat-od: Makita sang tuig 1914 ang ginsugoran sang pinakamalain nga tion sang kagamo sa duta nga wala pa gid matabo; kay ginatagna ina sang tuman kadamu nga tagna sa Biblia. Ang aton pagtuo makusog kag ang aton mga paglaum napasad sing labi pa sa pakotpakot lamang sang tawo.”

Paagi sa sining pulong, si A. H. Macmillan, awtor sang labing mabakal nga Faith on the March sang 1957, naglaragway sang iya pagpati anay nga ang 1914 mangin ang pinakasentro sang tagna sang Biblia. Kapin sa 40 ka tuig pagkatapos sang 1914, wala magbag-o ang iya pagpati.

Kon ang mga Hitabo Magtipontion

Ang “pinakasentro” ukon focal point ginalaragway subong “sentro sang hilikuton kukon sang ginakawilihan: ang punto nga magtipontipon ang madamu nga mga aksion.” Pinakasentro bala ang 1914 sa sina nga kahulugan? Huo. Binagbinaga kon ano ang ginpaabot ni Macmillan kag sang madamu pa nga mga Estudyante sang Biblia tuhoy sa sina nga tuig.

Ginalaragway sang Marso 1880 nga guwa sang Zions’s Watch Tower and Herald of Christ’s Presence ang duha ka hitabo nga may makapatay-ug sa duta nga importansia nga ginahulat nga mahanabo sang 1914: “Naglab-ot tubtub sang 1914 ang ‘Panag-on sang mga Gentil,’ kag ang langitnon nga ginharian indi magapanghikot sing bug-os tubtub sadto.” Busa, ginapaabot sang madamung estudyante sang Biblia nga ang Ginharian sang Dios matukod sing bug-os sa sina nga tuig. Magakahulugan ini sang pamuno sang tion nga si Cristo ‘magagahom sa tunga sang iya mga kaaway.’ Bangod kinahanglanon, magakahulugan man ini sang pamuno sang “konklusion sang [malauton] nga sistema sang mga butang.”—Salmo 110:1, 2; Mateo 24:3; Bugna 12:10, 12.

Nalab-ot sining hanuot nga mga Estudyante sang Biblia ini nga konklusion pagkatapos marepaso sing maayo ang kronolohiya sang Biblia. Apang ang kronolohiya sang Biblia isa lamang ka linya sang pamatuod—isa ka saksi, kon hambalon pa. Suno sa Biblia, ang Ginharian sang Dios langitnon, busa dimakita. Busa paano mahibaloan sang mga estudyante sang Biblia kon bala ang ila mga paglaum natuman ukon wala? Dapat nga may yara makita nga pamatuod, isa ka tanda.

Nangabay sina nga tanda ang mga disipulo ni Jesus sang magsiling sila: “Ano bala ang tanda sang imo presensia kag sang konklusion sang sistema sang mga butang?” (Mateo 24:3) Paagi sa paghatag sina nga tanda, gindugangan ni Jesus ang pamatuod nahanungod sa ikaduha nga panaksi nga nagatudlo sa 1914. Nahisanto ini sa prinsipio sang Biblia “nga sa baba sang duha ukon tatlo ka saksi mapalig-on ang tagsa ka pulong.”—Mateo 18:16.

Samtang ang mga pamatuod sa kronolohiya nagatudlo padulong sa 1914, ang grupo nga tanda ni Jesus gindesinyo agod itudlo pabalik ang 1914 subong pamuno sang bag-o nga dag-on. Kon amo ang 1914 napamatod-an nga “ang punto nga magtipontipon ang madamu nga mga aksion.”

Amo bala? Ang tanda nga ginhatag ni Jesus makita gid bala sa mga hitabo kutob sang 1914? Ginaagda namon kamo nga usisaon kag dayon sabton ini mismo sa imo kaugalingon.