Ginhatagan sing Kusog nga Labaw sa Kinaandan
“Ang gahom nga labaw sa kinaandan [iya] sang Dios kag indi aton.”—2 CORINTO 4:7.
1. Ano ang nahibaloan na nga daan ni Jehova nahanungod sa aton karon nga panag-on sa maragtas, kag paano niya ginpaandaman ang iya mga alagad tuhoy sini?
MADUGAY na nahibaloan ni Jehova ang ital-ital nga tion nga mahanabo sa tanan nga kapungsoran sa duta. Nahibaloan na niya nga ang kakagud kag kalaut sang katawhan magapatubas sa ulihi sing makahaladlok nga pag-ani sing kalautan kag kasingki. Si apostol Pablo ginpahulag sang espiritu ni Jehova nga ipalanog ining maathag nga paandam: “Apang hibaloa ini, nga sa katapusan nga mga adlaw magaabot ang ital-ital nga mga tion. Kay ang mga tawo magamahigugmaon sang kaugalingon, mahigugmaon sang kuarta, bugalon, palabilabihon, mapasipalahon, malalison sa mga ginikanan, dimapinasalamaton, dibalaan, walay pasunaid, dimalugpayan, mapatopatoon, dimapinugungon, mabangis, madumot sa kaayohan, maluib, dasudaso, nagahabok sa pagpadayaw, mahigugmaon sa kinasadya sa baylo sang sa Dios, nga may dagway sang pagkadiosnon apang nagapanghiwala sang gahom sini.” (2 Timoteo 3:1-5) Isa gid ini ka makatalagam nga panahon para sa nagatinguha nga alagdon ang Dios sang kamatuoran!
2. Mahapos bala para sa mga saksi ni Jehova nga himuon ang iya katuyoan para sa ila, kag ano ang kinahanglan nila agod magmadinalag-on?
2 Apang sa tunga sinang kahimtangan nga gintuyo ni Jehova nga ang iya ngalan kag Ginharian ipahayag sa bug-os nga duta. Ni sin-o? Sang katawhan nga sa ila ibuyagyag niya ang iya importante nga ngalan kag katuyoan—ang mga Saksi ni Jehova. (Isaias 43:10-12) Nahibaloan na niya nga magaagom sila sing pagpamatok gikan sa mga gumalahom nga magatamod sa Ginharian sang Dios subong isa ka hangkat kag karibal. (Salmo 2:2, 3) Nahibaloan niya nga ang iya mga saksi mapaidalom sa mga problema kag mga pag-antos nga kinaandan sa tanan nga tawo. Kinahanglan nila ang kusog nga labaw sa kon ano ang ila mismo matipon. Naghimu bala sing aman ang ila Dios para sa sina mismo nga kinahanglanon?
3. Ang aman ni Jehova para sa iya mga alagad sa sining ital-ital nga tion kaangay sa anong aman nga ginhimu para kay apostol Pablo?
3 Ang mga inagihan ni apostol Pablo nagahatag sing sabat sa sina nga pamangkot. Ang iban sa mga katalagman nga naagihan niya ginlista para sa aton sa 2 Corinto 11:23-27. Sanglit gintangdoan ni Jehova si Pablo subong apostol kag manunudlo sang mga pungsod, inang hilikuton sa pagtudlo amo ang iya panguna nga ginatalupangod. (Roma 11:23) Apang paano sia nakalampuwas sa tanan nga mga katalagman kag nakatapos sa hilikuton nga ginhatag sa iya nga himuon? Ginbantayan ni Jehova ang iya matutom nga alagad kag ginluwas sia, sing masami sa katapusan nga minuto, sa tagsa ka ital-ital nga higayon. Agod mahimu ni Pablo sing madinalag-on ang Cristianong ministeryo, ginhatagan sia sang Dios sing “gahom nga labaw sa kinaandan.” (2 Corinto 4:7) Naghimu ini sa apostol nga mabatas ang mga pag-antos kag mga pagbilanggo. Hayag nga ginkilala ni Pablo inang balaan nga bulig sang magsulat sia: “Makahimu ako sang tanan nga butang sa iya nga nagapabakud sa akon.”—Filipos 4:13.
4. Ginkilala bala ni Pablo ining balaan nga bulig kag ano ang epekto sini sa iya?
4 Busa maathag nga dugang sa milagruso nga pagpasilabot sang Dios tungod kay Pablo, yara man ang ‘pagpabakud’ sa iya. Nagpaposible ini nga mabatas sing madinalag-on kag matuman ni Pablo ang iya ministeryo. Sing nahisuno, nagsulat sia: “Wala ko ginakahuya ang maayong balita; ini amo ang gahom sang Dios nga sa kaluwasan sa tagsatagsa nga nagatuo.” (Roma 1:16) Upod sa kahulugan kag aplikasyon sang madamong mga tagna sang nagligad, ginpahayag ang maayong balita kay Pablo, kag kombinsido sia sa pagkamatuod sini. Sing walay duhaduha, ang ihibalo nahanungod sa kamatuoran kag ang apresasyon sa sini nangin ginhalinan man sang kusog sa iya.
Ang Matahom nga mga Aman ni Jehova
5. Indi bala mabinalak-on si Jehova sa mga kinahanglanon sang iya mga saksi karon sa duta?
5 Apang kamusta ang mga alagad ni Jehova sa duta sa sining katapusan nga mga adlaw? Nag-aman bala ang Dios tungod sa ila? Aba, huo! Kaangay kay apostol Pablo, madamu kita sing matahom nga mga tagna sa Balaan nga Kasulatan. Sanglit si Jehova may abanse nga ihibalo nahanungod sa mga kinahanglanon sang iya katawhan, maalwan nga gin-aman niya ining mga sinulatan para sa ila kasigurohan kag paumpaw. Ining mga tagna maathagan samtang ang mga adlaw sang ila katumanan nagaabot.
6. Paano ang tagna nga ginhatag sang Dios kay Isaias nagpaumpaw kag nagpabakud sa katawhan ni Jehova karon?
6 Ang isa sinang mga tagna ginrekord ni Isaias nga anak ni Amoz mga 700 ka tuig bag-o matawo si Jesucristo. (Isaias 1:1) Si Isaias nagsulat sing makusog nga pagpakamalaut indi lamang batok sa iya kaugalingon nga pungsod sang Israel kundi sa madamo man nagapalibot nga kadutaan, dalagku kag magamay. Kadungan sa sining mensahe sang paghukom naghatag man ang manalagna sing maayong balita para sa matutom nga mga sumilimba ni Jehova—balita nga magadul-ong sa ila sing paumpaw sa tanan nga mga kapipit-an nila. Kag subong nga ang matutom nga mga Judiyo sadtong panahon ni Isaias nakatigayon sing gahom kag paglaum gikan sa maayong balita ni Jehova, ang matutom man sa karon ginpaumpawan, ginpabakod kag ginapakamaayo paagi sa katumanan sa ila sang dalagku nga mga saad ni Jehova.
7, 8. (a) Paano ang ginasiling sang Isaias 32:1, 2 nagahatag sing kusog kag pagpalig-on sa dungganon nga mga Judiyo sang panahon ni Isaias, kag labi na bangod sang anong kahimtangan? (b) Paano ina man nga pulong maaplikar sa mga Saksi ni Jehova karon?
7 Sa Isaias kapitulo 32 masapwan naton ang subong sina nga pagpalig-on. Ang nahaunang duha ka bersikulo nagapresentar sing saad nga bisan karon nagakatuman na: “Yari karon! Ang isa ka hari magahari sa pagkamatarong; kag ang mga prinsipe magagahom sa katarungan. Kag ang isa ka tawo mangin subong sang palalipdan sa hangin kag palanagoan sa unos, subong sang mga ilig sang tubig sa duog nga kigas, subong sang landong sang daku nga igang sa duta nga makalalapyo.” Daw ano gid ina ka maayong balita para sa bunayag-tagipusuon nga mga similimba sang Dios sang panahon ni Isaias, pagkatapos sang ila malawig nga inagihan sa walay pagtuo nga mga hari kag mga prinsipe!
8 Apang daw ano ka maayong balita ini para sa mga Saksi ni Jehova karon! Labi na kutob sang 1919, ang ginpalingkod nga si Hari Jesucristo nakaagom sing maayo nga kahimtangan sa tunga sang iya mga sumulunod sa duta. Ginbutang niya sa tunga nila ang “mga prinsipe.” (Hebreo, sarim) nga sa pagkamatuod nagahatag sing makatarunganon kag mahigugmaon nga pagtatap. Kabaliskaran sa mapiguson kag makinaugalingon nga mga gumalahom nga lapnag sa bug-os nga kalibutan, ang Hari sa organisasyon sang Dios nag-aman sing responsable nga mga lalaki nga indi pagpadunggan subong hirarhiko nga “mga prinsipe sang iglesia,” ukon kaanggid sina. Sa baylo, mapainubuson sila nga mga alagad, mga tawo nga nagaulikid gid sa kaayohan sang tanan nga mga katulad-karnero nga gintipon ni Jehova sa isa ka panong. Ang pagtatap sining mga lalaki, nga palaabuton man nga “mga prinsipe” sang Bag-ong Kahimusan, napamatod-an nga makapasulhay gid.a
9. Ano nga pagbalhin ang natabo sa tunga sang katawhan ni Jehova?
9 Daw ano nga pagbalhin ang gindala sini sa organisasyon sang tutan-on nga mga alagad ni Jehova! Kasubong gid ini sa ginsiling sang Isaias 32:3: “Nian ang mga mata sang mga makakita indi magdulum, kag ang mga igdulungog sang mga nagapamati magatalupangod.” Bangod sang ila hanuot nga handum nga padunggan kag alagdon si Jehova, ginbuksan niya ang mga mata sang ila tagipusuon kag ang igdulungog sang ila paghangop. Ginhatagan niya sila sing makakulunyag nga paghantop nahanungod sa iya kabubut-on sa ila. Ang matutom nga mga Saksi wala nagasalig sa demokratiko nga panimuot kag mga paagi. Nagabugtaw sila sa katunayan nga nagaalagad sila sa isa ka teokratiko nga organisasyon, isa ka organisasyon diin ang kabubut-on sang Dios ginpasalig kag dayon gintuman. Ang kredito iya sang Dakung Teokrata nga nagbuyagyag sang iya mga katuyoan sa mapainubuson, kinabubut-on nga mga alagad sa duta.
10. Ano ang pila sa matahom nga mga pagpakamaayo ang ginaagom sang nasanagan nga katawhan ni Jehova?
10 Isipa, kon luyag mo, ang mga pagpakamaayo nga nabaton sang mga alagad ni Jehova. Isa sini, naagom nila ang sibu nga ihibalo nahanungod sa harianon nga presensia ni Jesucristo kutob sang 1914; sa maathag nga kinatuhayan sang makita nga organisasyon sang Dios kag ni Satanas; sa malayo sing nalab-otan nga kinaugali sang hilikuton nga pagbantala nga pagahimuon bag-o matapos ang kalibutan ni Satanas; sa pagkasagrado sang dugo; kag sa importansia sang paghatag sang mga butang sang Dios sa Dios. Sa organisasyon sang mga Saksi ni Jehova yara ang pagpasag-uli sang administrasyon nga kaangay sadtong iya sang nahaunang siglo nga mga Cristiano. Isa man ka bugana nga pagpakamaayo ang karon katulad-paraiso nga kahimtangan sa tunga sang matuod nga mga sumilimba. Ini tanan kag ang madamo pa nga dulot kay Jehova nagahatag indi lamang sing gahom kundi sing paghidait, paghiusa kag kaayawan sa iya katawhan, bisan sa sining makahalanguyos nga panahon sa maragtas.
11. Paano ginadisiplina ukon ginatudloan ni Jehova ang iya dutan-on nga mga tiglawas, kag anong teksto sa kasulatan ang nagapakita nga kinahanglanon ini?
11 Ang mga alagad ni Jehova ginhatagan sing napasad sa Biblia nga konsiensia, agod mabatian kag matalupangod nila ang iya mga pahanumdum, nagaaplikar sini sa ila matag-adlaw nga kabuhi. (Salmo 25:10) Ginpaandaman sila batok sa dimatinlo kag mahigko nga mga buhat nga ginadumtan sang Dios. Ang makagud, imoral, tago nga mga butang nga ginhimu sang iban sa ila sang nagligad ginpahigad na karon, subong nga ginpakamalaut na sing bug-os. (1 Pedro 4:3) Dapat amo sini para sa tanan nga magapadayon nga makigbahin sa mga pagpakamaayo sang Ginharian. Ang tanan dapat nga magmatinlo sa kaisipan, sa moral, sa pisikal agod makaagom sing pribilehiyo nga makapresentar kay Jehova sing halad sang mga pagdayaw, “isa ka dulot sa pagkamatarong.” (Malaquias 3:3; Isaias 52:11) Daw ano ka makalilipay nga pagbatyag sing kalig-onan ang naeksperiensiahan sang tanan matutom nga mga Saksi samtang nagapakig-upod sila sa kadam-an nga nahiusa sing tunay sa malipayon nga pag-alagad sa Manunuga!
Balaan nga Edukasyon
12. Paano ang Isaias 32:4 may katumanan sa tunga sang modernong-adlaw nga mga alagad ni Jehova?
12 Ang Isaias 32:4 padayon sa pagsiling: “Kag ang tagipusuon sang madalas magahangop sing ihibalo, kag ang dila sang mga ang-ang mahanda sa pagpamulong sing maathag.” Sadtong Inaway Kalibutanon I, ang hinaplas nga nagkalabilin ni Jehova wala sing nagakaigo nga paghangop, namatsahan pa sang Babilonianhon nga ideya kag wala sing nagapanghikot nga teokratiko nga paagi sa tunga nila. Apang sang 1919 ginhilway sila sang Dios gikan sa kahiolipnan sa Babilonia kag nagpadayon sa paghatag sa ila sing dugang pa nga ihibalo nahanungod sa iya kamatuoran. Paagi sa sinang kamatuoran naton-an nila nga magmangin rasonable, indi madalas. Nagapamulong na sila karon nga may kapat-oran sa pagpati, wala na nagaang-ang sa kahadlok kag walay kapat-oran. Kag paano kita personal nga magmangin hamtong, maisugon nga mga manugbantala sang maayong balita? Paagi sa bug-os nga paghimulos sa balaan nga instruksion, ang kalabanan sini ginahatag sa mga miting sa Kingdom Hall sang mga Saksi ni Jehova. Halimbawa, wala sing duhaduha nga ang Theocratic Ministry School amo ang isa sa mga paagi nga ginapakamaayo ni Jehova ang iya mga alagad kag ginahatagan sila sing ikasarang nga mahambal ang kamatuoran sing maisugon kag sing maathag.
13. Batok sa anong hambal kita mag-andam?
13 Busa, gintudloan sang balaan nga edukasyon ang katawhan sang Dios nga indi mahimu sing mga panaad nga wala nila ginatuyoa nga tumanon kag indi maghambal sing mapasipalahon ukon sing masakit nahanungod sa isa. Ang pagpakamaayo sang Dios ginpasalig sa mga magapamati sa iya laygay, nga narekord sa Manugwali 5:2: “Dili ka magdasodaso sang imo baba; kag ang imo tagipusuon indi magmadagmit sa pagmitlang sing bisan ano nga butang sa atubangan sang matuod nga Dios. Kay ang matuod nga Dios yara sa langit kag ikaw sa duta. Busa magdiutay ang imo mga pulong.” Busa importante gid nga indi maghambal sing malain nga pagmulay sa organisasyon sang Ginuo ukon sa iya gintangdo nga mga tiglawas. Si Jehova amo ang Hukom nga nakahibalo sang tanan sa atubangan niya pagahimuon ang paghusay para sa sini kag sa iban pa malaut nga mga hambal.—Mateo 12:36, 37; Levitico 19:16; Judas 8.
14. Ano nga paandam ang ginaaman diri para sa katawhan ni Jehova, kag paano ini ginapakita sang Hulubaton 29:20?
14 Yadtong nagatamay sa panudlo ni Jehova nagalakip sa mga indibidual nga nagamulay kag nagareklamo nahanungod sa matinlo nga organisasyon ni Jehova kag sa mga kasugoan sini sa pagmentinar sang paghidait kag kahim-ong. Diutay lamang ang kinatuhayan sa ulot nila kag sadtong direkta nga mga rebelde. Nasapwan ini ni Core kag sang iya mga sumalakdag nga sa ila bug-os nga kapahamakan sang magpamulong sila sing dasodaso batok sa alagad sang Dios nga si Moises. (Numeros 16:1-40) Sa sini man nga topiko, ang Hulubaton 29:20 nagasiling: “Nakakita ka bala sing tawo nga madalas sa iya mga pulong? May labi pa nga paglaum sa buangbuang sang sa iya.”
15. Paano ang ginasiling sang Isaias 32:5, 6 maaplikar sa mga alagad ni Jehova karon?
15 Ginapakamaayo man ni Jehova ang iya katawhan sing kaalam sa paghantop sa kon ano ang maayo kag kon ano ang malain. Nagabantay sila batok sa bisan sin-o nga nagakadto sa ila nga may malum-ok nga hambal kag matahom nga pulong, kag ayhan may dala nga mga regalo, agod limbongan ang tagipusuon sang mga dimabinantayon. (Ipaanggid ang 1 Timoteo 6:20; Judas 16.) Mahimu tinguhaan sang mga relihionista nga dalhon sa ila ang maayong balita nga luwas sa nabaton na nila gikan kay Jesucristo kag sa iya mga apostoles. Dugang pa, ang bisan sin-o nga buangbuang kag wala sing prinsipio nga mga indibiduwal wala ginatangdo subong mga alagad sa organisasyon ni Jehova. Nahisuno ini sa pinamulong: “Ang buangbuang indi na pagtawgon nga dungganon; ukon ang wala sing prinsipio pagatawgon nga maalwan; kay ang buangbuang magapamulong sing binuang, kag ang iya tagipusuon magahikot sing kalautan, sa paggawi sing mapasipalahon kag sa pagmitlang sing sayop [“binuang,” Delitzsch] batok kay Jehova, sa pagkuha sing sulod sang kalag sang mga gutom, kag sa pagpakulang sang ilimnon sang ginauhaw.”—Isaias 32:5, 6.
16. (a) Ano ang pila sa mga ideya nga ginpadaku sang mga apostata? (b) Sa sini nga bahin, ano ang ginsiling sa Isaias 32:7?
16 Indi bala matuod nga yadtong nagguwa gikan sa aton sing tinuig na bangod “indi sila tagaaton,” kag nagtinguha sa pagganyat sa iban nga sundon ang amo man makatalagam sa kabuhi nga dalanon, nagpahilayo na sang ila kaugalingon gikan sa tuboran sang matig-a espirituwal nga kalan-on kag makapabugnaw sa espirituwal nga tubig? (1 Juan 2:19) Kag ining mga buangbuang, nga indi gid maalwan kag mahinatagon sa katawhan nga ginagutom kag ginauhaw sa pagkamatarong, wala makakita sang pagkahilingagawon organisado nga hilikuton sa pagbantala sa panahon naton. Ginapahanugotan nila ang kada isa nga matuytuyan sang iya kaugalingon nga pagbasa kag pagpatpat sa Biblia sa baylo nga ihiusa sila sa katawhan nga ginhanas nga magkabuhi kag magpanghikot nahisuno sa mataas nga mga prinsipio kag mga pahanumdum sang Pulong sang Dios. (Salmo 133:1-3; 1 Corinto 1:10) Ginapatalang nila ang iban sa pagpati nga si Jehova walay katubtuban nga magapatawad sa mga makasasala basta magpakita sila sing hapaw nga paghinulsul. Makawiwili sa sini nga bahin amo ang ginasiling sang Isaias 32:7 nahanungod sa mga apostata sang dumaan nga Israel: “Ang mga galamiton [mga paagi sa pagtuman sang iya katuyoan] sang malimbungon malaut; sia nagapahito sing malaut nga mga kalalangan, sa paglaglag sang mga kubus sa mga pulong nga binutig, bisan kon ang nawad-an nagapamulong sing matarong.”
17. (a) Sin-o ang ginpili ni Jesus nga iya mga sumulunod? (b) Anong mga pamangkot ang nag-utwas nahanungod sa ila palaabuton nga mga hilikuton sa tunga sang nagalain nga mga kahimtangan sining malaut nga kalibutan?
17 Ang matuod nga mga sumulunod ni Jesus, nga ginpili niya bangod nabalaka sila sa ila espirituwal nga kinahanglanon, pat-od nga “nagapamulong sing matarong.” Apang ang buangbuang nga mga manugpamatok indi interesado sa matuod nga kaayohan sadtong nagapangita sa kamatuoran. Tuyo nila nga pahilayuon ang mga sumulunod sunod sa ila, walay sapayan sang katalagman nga ginabutang nila sa ila kaugalingon kag sa iban. Apang, pahanugotan bala ni Jehova ang mga bunayag-sing-tagipusuon nga masiod sa sayop nga pagpangatarungan? Naghimu bala sia sing aman agod pakamaayuhon ang iya kaugalingon nga mga alagad kag ang ila bug-os kalibutan nga pagbantala?
[Footnote]
a Tan-awa palihug ang The Watchtower sang Disiembre 1, 1951, pahina 716-29.
Paano Nimo Sabton?
◻ Paano ginahatagan ni Jehova sing kusog ang iya nga saksi karon?
◻ Paano maaplikar sa mga Saksi ni Jehova ang ginasiling sang Isaias 32:1, 2?
◻ Ano ang pila ka pagpakamaayo nga ginaagom sang nasanagan nga katawhan sang Dios?
◻ Paano ang Isaias 32:5, 6 naaplikar karon?
[Picture on page 17]
Wala mo bala ginapamatian ang malaut nga pagmulay sa organisasyon ni Jehova? Dapat gid