Kalipay Walay Sapayan sang Malinapason, Walay Gugma nga Kalibutan
“Malipayon ang walay sala sa ila dalanon, ang mga nagalakat sa kasugoan ni Jehova.”—SALMO 119:1
1, 2. (a) Gikan kay sin-o naghalin ang matuod nga kalipay, kag daw ano kalawig ini posible nga maeksperiensiahan? (b) Sa baylo sang “the Beatitudes,” ano dapat ang itawag sa nagabukas nga bahin sang Sermon sa Bukid, kag ngaa?
ANG kalipay naghalin sa Manunuga sang tawo. Sia amo ang “malipayon nga Dios” nga may maayong balita para sa aton. (1 Timoteo 1:11) Ginhatag niya ang walay katapusan nga kalipay para sa iya tawhanon nga mga tinuga diri sa duta. Bisan karon, mahimu sila makasulod sa sini paagi sa pagpahisuno sang kaugalingon sa iya mga regulasyon.—Salmo 119:26, 33.
2 Sang nagligad nga napulog-siam ka siglo si Jesucristo, nga Anak sang “malipayon nga Dios,” namulongpulong sang ginatawag nga Sermon sa Bukid. Suno sa Mateo 5:1-12, ini nga sermon ginsugdan sang ginatawag nga “the Beatitudes” nga buot silingon “ang mga Pagbulahan.” Apang, suno sa Griegong pamulong, nga sa sini ginbadbad ang pagsaysay ni disipulo Mateo sa dutan-on nga pagkabuhi ni Jesucristo, dapat ini sa baylo tawgon nga “ang mga Kalipay.” Bisan ang pagsaysay ni Mateo sa Hebreong pamulong nagagamit sang Hebreong tinaga nga nagakahulugan “malipayon.”
3. (a) Kalipikado bala ang manunulat sang Salmo 119 nga makaagom sang pinasahi nga mga kalipay, nga ginpahamtang ni Jesucristo? Ipaathag. (b) Ilaragway ang ginpabutyag nga balatyagon sang salmista sa katipan sang Kasugoan nga ginpatung-an ni Moises.
3 Ang tawo nga kalipikado anay sa pag-agom sinang mga kalipay nga ginpahamtang sang Judiyong Mesias, nga si Jesucristo, amo ang inspirado nga Judiyong manunulat sang Salmo 119, ang pinakamalawig nga salmo sa Biblia. Nahisuno sa mga rason nga ginhatag ni Jesucristo agod magmalipayon, ang salmista nabalaka sa iya espirituwal nga kinahanglanon. Subong man, sia malalawon, sia malum-ok sa pagpangakig, sia ginagutom kag ginauhaw sa pagkamatarong, sia maluluy-on, ginpasipalahan kag ginhingabot sia, kag binutig nga ginsiling ang tanan nga sahi sang malaut nga butang batok sa iya. Ginsulat niya ang salmo ginatos ka tuig antes sang aton Kumon nga Dag-on, samtang ang pungsod sang Israel napaidalom pa sa katipan sang Kasugoan nga ginpatung-an ni manalagna Moises sa ulot ni Jehova nga Dios kag sang pungsod sang 1513 B.C.E. sa Bukid sang Sinai. Sing nagakaigo wala sing nakita nga sayop ang salmista sa katipan sang Kasugoan, kay hatag-Dios ini. Nahibal-an gid niya nga ang paganong kapungsoran sa palibot sang duta sang Israel wala sing mapanggid sa sinang balaan nga Kasugoan. Gintamod niya ini nga labing makapasanag, nga nagasiling sa mga bersikulo 105 kag 130: “Ang imo pulong suga sa akon mga tiil, kag kapawa sa akon banas. Ang pagbukas sang imo mga pulong nagahatag sing kapawa, nagahatag ini sing paghangop sa bunayag.”
4. (a) Sa anong pagkasunodsunod ginkomposo ang Salmo 119, kag paano ini isa ka bulig? (b) Paagi sa pagpatuhoy sa “tolon-an sang mga salmo,” si Jesus kag ang iya mga disipulo nagpahamtang sing talaksan para kay sin-o, kag para sa anong katuyoan?
4 Agod makabulig sa memorya ginhimu ini sang salmista nga isa ka alpabetiko nga salmo, agod nga sa 22 ka stanza ang tagsa sa 8 ka Hebreong mga linya ginasugdan sang amo man nga Hebreong letra, nga sunodsunod sa alpabetiko. Busa ang tagsa ka linya sang nahaunang stanza sa idalom sang nahaunang Hebreong letra nga Aleph subong ulong-dinalan ginasugdan sang nahaunang letra nga Aleph. Ang tagsa ka linya sang ikaduha nga stanza ginasugdan sang ikaduhang Hebreong letra nga Beth. Amo sini sa 22 ka stanza sang salmo, nga katumbas sa 22 ka letra sang Hebreong alpabeto. Nga may 8 ka Hebreong linya sa tagsa sang 22 ka bersikulo. Sa iya panudlo, ginpatuhoyan mismo ni Jesucristo ang “tolon-an sang Salmo.” (Lucas 20:42; 24:44) Sa sini nagpahamtang sia sing isa ka talaksan para sa iya mga disipulo.—Binuhatan 1:20; 13:33; 1 Corinto 14:26; Efeso 5:19; Colosas 3:16; Hebreo 4:7; Santiago 5:13.
5. Sa pagsugod sang Salmo 119, kay sin-o mga eksperiensia ang ginahunahuna sang manunulat?
5 Walay duhaduha nga ang salmista nagsulat gikan sa iya kaugalingon personal nga eksperiensia sang ginsugdan niya ang Salmo 119, nga nagasiling: “Malipayon ang walay sala sa ila dalanon, ang mga nagalakat sa kasugoan ni Jehova. Malipayon ang nagatuman sang iya mga pahanumdum . . . Nagalakat sila sa iya mga dalanon. Ginsugo mo kami sang imo mga sugo nga pagbantayan namon sila sing makugihon. Kabay kuntani nga ang akon mga dalanon malig-on sa pagtuman sang imo mga palatukoran! Sa sina indi ako mahuy-an, kon may pagtalupangod ako sa imo nga may pagkatadlong sa tagipusuon, kon maton-an ko ang imo matarong nga mga paghukom. Tumanon ko ang imo mga palatukoran. O indi ako pagbayai sing bug-os.”—Salmo 119:1-8.
6. (a) Anong yabi nga mga tinaga ang ginpatalupangod sa sining salmo? (b) Sa ano estudyante ang salmista, kag paano ini ginpakita?
6 Sa sinang nagabukas ng stanza sang 8 ka Hebreong linya nataluangdan naton ang mga yabi nga tinaga nga kasugoan, mga pahanumdom, mga sugo, mga palatukoran, mga mando, kag mga paghukom. Sa bug-os nga 176 ka Hebreong bersikulo, ginapadaku sang salmista yadtong mga pinamulong. Halimbawa, ginagamit niya ang tinaga “kasugoan” sing 25 ka beses, “mga sugo” sing 21 ka beses, “mga palatukoran” sing 21 ka beses, “mga mando” sing 20 ka beses “(mga) paghukom” sing 21 ka beses upod ang may labot nga tinaga nga “mando” nga gingamit sing makaduha sa salmo. Walay sapayan sang sulitsulit nga paggamit sang salmista sining mga tinaga nga daw legalistiko pamatian, wala sing pamatuod nga isa sia ka propesyonal nga abogado ukon hurado ukon Huwes. Isa gid sia ka estudyante sang narekord nga Pulong ni Jehova, diin ini nga kamatuoran ginpakita paagi sa paggamit niya sang ekspresyon nga “imo pulong” sing 15 ka beses. Kon isa sia ka hari sang pungsod sang Israel, napaidalom sia sa balaan nga mando nga isulat ang personal nga kopya sang Kasugoan sang katipan ni Jehova upod sa Israel agod ton-an kag gamiton niya sing kinaugalingon. (Deuternonomio 17:14-18) Wala masapwi sang salmista ang maid-id nga pagtuon sa “pulong” ni Jehova nga nagahunahuna sining mga bahin nga makatalaka, makakalapoy. Ginkahidlawan niya ang kon ano nga makabulig sa iya nga mangin masinulundon sa kasugoan. (Salmo 119:40, 131, 174) Kaangay bala kita sa iya?
7. (a) Paano kita makabenepisyo gikan sa paghibalo kag sa paglakat sa kasugoan sang Dios? (b) Sa ano nagapatuhoy ang “Torah,” apang sa idalom sang anong kahimusan nasapwan sang mga Cristiano ang ila kaugalingon?
7 Kon aton ipaanggid ang internasyonal kag nasyonal nga mga kasugoan sang mga kadutaan nga napaidalom sa dimakita nga pagkontrol sang “amay sang kabutigan,” si Satanas nga Yawa, sa kasugoan ni Jehova, sarang kita makabuylog sa salmista sa pagsiling: “Ang imo kasugoan kamatuoran. Malapit ka, O Jehova, kag ang tanan mong mando kamatuoran.” (Juan 8:44; Salmo 119:142, 151) Busa paagi sa ‘paglakat sa kasugoan ni Jehova,’ kaangay sang salmista, pagaamligan kita gikan sa paglakat sa dalanon sang kasaypanan sang kalibutan nga sa aton kaugalingon nga kahalitan, sa lawas kag espirituwal. Nagaresulta ini sa aton kalipay. (Salmo 119:1) Nagaresulta ini sa pagtigayon naton sang balaan na pagpakamaayo kag kahamuot. Nagaapektar ini sang aton mga tagipusuon, subong sang ginapakita sang Salmo 119:97, 126, 127. Ang salmista yara sa idalom sang katipan sang Mosaikong kasugoan nga nagaunod sang “Torah,” ang hubon sang balaan nga kasugoan nga ginahuman sang ginatosgatos ka nanuhaytuhay nga mga kasugoan. Ang hinaplas nga mga saksi ni Jehova karon napaidalom sa bag-ong katipan (diin si Jesucristo amo ang Manugpatunga) nga may “kasugoan” nga nasulat, kon hambalon pa, “sa ila tagipusuon.” (Jeremias 31:31-34) Paagi sa pagtuon sa Cristianong Griegong Kasulatan, naanad sila sa bag-ong katipan sang “kasugoan” kag sang mga mando sini.
8. (a) Ining malinapason nga kalibutan nagaatubang bala sing masanag nga palaabuton? (b) Paano ginlaragway sang salmista ang iya makahilibi nga pag-ulikid sa kapaslawan sang mga Judiyo nga tumanon ang Kasugoan sang Dios? (c) Paano matuman ang tagna ni Jesus nahanungod sa dimatutom nga Jerusalem, kag ano ang ginapaandam sini para sa Cristiandad?
8 Nagahilapit na ang gintangdo nga tion para sa makatarunganon nga Manughatag-Kasugoan, nga si Jehova, nga magpanghikot batok sa sining malinapason nga kalibutan. Yara sa unahan ang makahilibi nga palaabuton. Sang iya kaadlawan ang salmista, subong nagahigugma sa kasugoan, naghibi tungod sa kahimtangan. (Salmo 119:136) Mga pila ka adlaw antes makaagom sang mapintas nga kamatayon sang martir, naghibi si Jesucristo tungod sa nagasunod sa tradisyon apang malinapason sa kasugoan nga siudad sang Jerusalem. (Lucas 19:41) Katloan kag pito ka tuig sa tapos magdangat ang pagkamalinapason sa kasugoan sang mga Judiyo sa pagpapatay nila sa walay sala nga Mesias, si Jesucristo, sa mga kamut sang mga Gentil, naghulag si Jehova. (Salmo 119:126) Ang masubo nga mga butang nga nakita sing una ni Jesucristo nag-abot gid sa siudad sang 70 C.E. Karon inang ginalandongan sang Jerusalem, kag ang Judiyong katawhan nga iya ginagamhan, nadalahig sa mas masangkad nga kasangkaron. Ang Cristiandad, ang iya modernong-adlaw malinapason sa kasugoan nga katumbas, mas daku pa sang sa dumaan nga Jerusalem kag sa pungsod sang Israel. Sa iya kaugalingon nga paagi ibutang ni Jehova sa tagipusuon sang politikal nga mga elemento sining kalibutan nga balikdon ang tanan organisado nga relihion sang kalibutan, lakip ang Cristiandad, ang butig nga Ginharian ni Cristo.—Bugna, kapitulo 17.
9. (a) Ipaanggid ang nagapatulo sing dugo nga kurso sang Cristiandad sa panimuot kag pagginawi sang mga Saksi ni Jehova. (b) Nahisanto sa anong talaksan ang aton dalanon? (c) Tungod sa anong mga rason nga ginsikway ni Cristo ang Cristiandad karon?
9 Indi bala nga ang duha ka kalibutanon nga inaway ginsugdan sang Cristiandad, paagi sa pagsakdag sang iya klero sa sinang nagapatulo sa dugo nga mga inaway? Baliskad sing talalupangdon sa sinang nagalapas sa kasugoan sang bag-ong katipan sang Dios, nga nagamando sang utudnon nga gugma, ang salmista nagsiling subong isa ka talaksan para sa mga Saksi ni Jehova karon: “Ginadumtan ko ang kabutigan, ginakangil-aran ko ini. Ginahigugma ko ang imo kasugoan.” (Salmo 119:163) Luyag niya nga mangin bug-os tagipusuon sa iya pagtuman sa kasugoan. Ginapabutyag niya ang iya pagdisgusto sa dibug-os tagipusuon, maalabaab nga panimuot, nga nagasiling: “Ginadumtan ko ang dibug-os tagipusuon, apang ginahigugma ko ang imo kasugoan.” (Salmo 119:113) Amo man sini ang ginabatyag ni Jesucristo sa Cristiandad karon, kay nagalaragway ini sa kongregasyon sa dumaan nga Laodicea. Sa Cristiandad makatarunganon niya nga masiling: “Bangod nga maalabaab ka kag indi mainit ukon mabugnaw, ibuga ko ikaw sang akon baba.” (Bugna 3:16) Indi naton mahimu higugmaon ang malinapason, walay gugma nga kalibutan kag higugmaon si Cristo sa amo man nga tion. Wala sing neutral. Ang mainit nga gugma dapat nga amo ang nagapahulag nga puersa sa likod sang pagtuman sa Dios. Indi mahimu nga mainspirar ni Jehova ang iya bug-os tagipusuon nga alagad sa pagsiling sing bisan ano nga kubos ka makusog sang sa sini: “Magakalipay ako sa imo mga sugo nga akon ginhigugma.”—Salmo 119:47.
10. (a) Ano ang dapat naton kalipayan subong sang salmista anay? (b) Ano ang gindesinyo nga himuon sang kapipit-an sang salmista, apang sa anong dalanon sia nagpabilin, kag ano ang epekto sa aton?
10 Ang pagkalipay naton sa kasuguan ni Jehova nagadul-ong sa kaluwasan. Ginbaton ini sang salmista sang magsiling sia: “Kon wala ang imo kasugoan nangin akon kalipay, nawala na ako kuntani sa akon kapipit-an.” (Salmo 119:92) Ang iya kapipit-an indi ang makamamatay nga balatian. Napaidalom sia sa kapipit-an gikan sa mga matinaastaason (sa Dios), nga nagadumot kag nagahingabot sa iya. Sa idalom sang pag-ipit mahimu nga nagpadala sia sa mga tinutuyo sinang mga Israelinhon kag naghimu sing supak sa kabubut-on ni Jehova kon wala niya ginhigugma sing labi ang kasugoan sang Dios. Daw ano gid kaayo nga halimbawa ang salmista sa aton karon nga napaidalom sa sinang pag-ipit gikan sa kalibutan diin ang pagkamalinapason bugana tubtob nga ang gugma sang kalabanan nga katawhan nagbugna sa sining konklusion sang sistema sang mga butang!—Mateo 24:3, 12.
11. Sa ano naghalin ang aton kaluwasan, kag gani paano naton ginatamod ang mga buko sang tawo?
11 Paagi lamang sa pagtuman sa kasugoan sang Dios nga may sadsaran kita sa pagpaabot nga maluwas sing dayon. Ginakahidlawan naton ang kaluwasan pasulod sa bag-ong sistema sang Dios nga bag-ong mga langit kag bag-ong duta. Malapit na sa katapusan sang Salmo 119, ang bersikulo 174 nagapabutyag sini para sa aton, nga nagasiling: “Ginhandum ko ang imo kaluwasan, O Jehva, kag ang imo kasugoan akon kalipay.” Busa, ginasikway naton ang ginabuko nga tawhanon nga mga plano kag mga kahimusan para sa kaluwasan sining malinapason, walay gugma nga kalibutan.
Masinulundon sa Kasugoan sa Idalom sang Paghingabot
12. (a) Sin-o ang nagsugyot kag naghimu sang paghingabot sa “babayi” kag sa iya “binhi”? (b) Paano ginsabdong ang mga manughingabot?
12 Ang paghingabot sa bug-os kalibutan nga kasangkaron gintagna para sa mga Saksi ni Jehova sa sining katapusan nga mga adlaw sining nagatagumatayon nga daan nga sistema sang mga butang sa idalom sang batinggilan nga pagginahom sang simbuliko nga dragon, si Satanas nga Yawa. Ginapakita sang Bugna 12:17 ang iya puntariya, nga nagasiling: “Ang dragon naakig sa babayi [ang katulad-asawa nga organisasyon ni Jehova], kag nagkadto sa pagpakig-away sa nabilin sang iya kaliwat [luwas sa bag-ong nabun-ag nga Ginharian], nga nagabantay sang mga sugo sang Dios kag nagapamatuod kay Jesus.” Ang paghingabot labi na nga magahalin gikan sa mga mahimu nakasala sa ginasugo sang Dios para sa sining katapusan nga mga adlaw sang makita nga sistema sang mga butang sang dragon sa duta. Paagi sa mensahe sang Ginharian nga ginabantala sa bug-os kalibutan sang mga Saksi ni Jehova, ginsabdong ni Jehova ining mga ginpakamalaut, subong sang ginasiling sang Salmo 119:21: “Ginsabdong mo ang bugalon nga pinakamalaut, nga nagatalang gikan sa imo mga sugo.” Tuhay gid katama amo ang mga matutom nga ginapasipalahan kag ginatamay sinang matinaastaason nga mga manughingabot, subong nga amo man anay sa salmista: “Ang bugalon nagyubit sing daku sa akon. Apang wala ako magbulag sa imo kasugoan.”—Salmo 119:51.
13. (a) Walay sapayan sang malaut nga mga buko sang mga manughingabot, sa ano nga resulta nagdul-ong ang pagsunod sa kasugoan sang Dios? (b) Paano sa modernong tion ginpasundayag ini?
13 Nakita nga ang mga Saksi ni Jehova nagabuhat nahisuno sa kasugoan ni Jehova para sini nga tion, ginatinguhaan sang matinaastaason nga mga manughingabot nga pukanon ang masinulundon sa kasugoan nga mga Saksi, subong sang gin-ilustrar sa kaso sang salmista, nga nagsiling: “Ang mga bugalon nagkutkut sing mga boho nga sa akon, nga indi suno sa kasugoan.” (Salmo 119:85) Ang pagpakahuya sa matinaastaason nga mga manugbuko wala lamang nagakahulugan sing pagbuyagyag sang ila nagapatalang nga mga dalanon kundi, sing labi pa gid, sing pagbindikar kay Jehova subong matuod nga Dios. Busa nga wala sing malain nga hanudum ang salmista mahimu makapangamuyo: “Mahuy-an ang mga bugalon, kay gindaug nila ako sing binutig. Apang ako magapamalandong sa imo sugo.” (Salmo 119:78) Ginasiguro ni Jehova nga bisan ang mga paghingabot nagaresulta sa kaayohan kag ang mga manughingabot wala gid man sing malimbungon nga madaug. Ginasabat niya ang pangamuyo sa Salmo 119:22: “Mangin kalig-onan ka sa imo alagad tungod sa kaayohan. Indi ako pag-ipapigus sa mga bugalon.” Ang pagpatay sa daku nga kasangkaron nagpahog anay sa mga Saksi ni Jehova sadtong pagkadiktador nanday Benito Mussolini kag Adolf Hitler, apang paagi sa indi pagkalipat sa kasugoan kag mando sang ila Dios, nagtindog sila nga malig-on kag madamu ang nakalampuwas. Sa pinamulong sang Salmo 119:60, 61, ang mga nakalampuwas sarang makasiling: “Nagdalidali ako kag wala magpalantang sa pagtuman sang imo mga sugo. Ang mga lubid sang mga malauton naggapus sa akon. Apang wala ako malipat sang imo kasugoan.” Nautod ukon nabugto sang Dios nga Labing Gamhanan ang mga lubid sang pagpugong nga gingapus sa iya mga Saksi sang ila mga kaaway kag sa amo ginbuy-an ang iya mga alagad sa iya ginpat-od nga tion para sa hilikuton nga gintangdo niya sa ila nga himuon sa sining konklusion sang sistema sang mga butang.
14. (a) Kaanggid sa kaso sang salmista, ano ang naeksperiensiahan sang mga Saksi ni Jehova, kag ano ang resulta sang mga panikasog sang ila mga kaaway? (b) Sin-o ang nakasarang sa pagkasadya sa ila mga pag-antos, kag ngaa?
14 Suno sa iya pinamulong sa Salmo 119:84, 86, 161, ang salmista nakaagom sing paghingabot gikan mismo sa iya mga kasimanwa. Ang mga Saksi ni Jehova nagaagom sing paghingabot sa sulod kag sa guwa sang kadutaan sang Cristiandad diin ginadumilian sila sa karon. Apang, ang kaaway napaslawan sa katuyoan sang iya malaut kag dimakatarunganon nga paghingabot! Sa katingala sang kaaway, ang mga Saksi nga “nagalakat sa kasugoan ni Jehova” kag “nagatuman sang iya mga pahanumdum” napahulag nga magkasadya tungod sang ila mga pag-antos para kay Jehova nga Dios kag sa iya Cristo. Ginpahanumdum sila sang ginsiling ni Jesucristo sa iya listahan sang mga kalipay: “Malipayon kamo nga mga imol, kay inyo ang ginharian sang Dios. Malipayon kamo kon dumtan kamo sang mga tawo, kag kon subolon kamo sa ila kag kon pasipalahan kamo kag isikway ang inyo ngalan subong nga malaut bangod sa Anak sang tawo. Hinugyaw kamo sa sadtong adlaw, kay yari karon! ang inyo balus daku sa langit, kay sa amo nga bagay naghimu ang ila mga ginikanan sa mga manalagna [lakip ang salmista].” (Salmo 119:1, 2; Lucas 6:20, 22, 23) Nagapakigbahin sa kalipay ni Jehova, ang iya ginhingabot nga mga Saksi padayon sa “pagpakadaku sang kasugoan kag paghimu sini nga dungganon.”—Isaias 42:21.
Mga Benepisyo Gikan sa Salmo 119
◻ Paano gin-areglo ang Salmo 119, kag ngaa?
◻ Anong pinasahi nga pinamulong ang gingamit sang salmista sing sulitsulit?
◻ Kabaliskaran sa Cristiandad, ano ang balatyagon naton nahanungod sa kasuguan sang Dios?
◻ Ano ang dapat naton nga higugmaon, walay sapayan sang paghingabot sa mga Cristiano?
[Piktyur sa pahina 12, 13]
Ginaapresyar sing tudok sang salmista nga ang paghibalo kag pag-aplikar sa Pulong sang Dios nagadala sing kalipay
[Mga piktyur sa pahina 14]
Madamung mga Saksi ni Jehova ang nagtindog nga malig-on kag nakalampuwas sa paghingabot sang Nazi. Sarang sila makasiling sing malipayon: “Wala ako malipat sang imo kasugoan.”