Mga Pahanumdom kag Mga Sugo sang Dios sang Bag-ong Sistema
“Gintuman ko ang imo mga sugo kag ang imo mga pahanumdom kay ang tanan kong dalanon yara sa atubangan mo.”—SALMO 119:168
1. Sa anong mga paagi ginapahalipay sang mga pahanumdom ang katawhan ni Jehova?
MALAPIT na ang matarong nga bag-ong sistema sang Dios! Ang mga Saksi ni Jehova, nga nagahigugma sa iya matarong nga kasugoan, dapat nga magakuha sing mga pahanumdom gikan sa iya Pulong kag paagi sa iya organisasyon sa importante nga mga tion. Bangod ila ginatuman ang balaan nga mga pahanumdom, malipayon sila. Ina nga mga pahanumdom nagapahulag sa ila nga pangitaon sia, nga nagaresulta sa kalipay. Ang pagbadbad sa Ingles sang Hebreong tinaga nga ‘edothʹ subong “reminders” (”mga pahanumdom” sa Hiligaynon) sa baylo sang “testimonies” (“mga pagpamatuod” sa Hiligaynon) (martyriʹa, suno sa Griegong Septuagint Version) mas makusog kag mas matinuyuon. Ginapakita sini nga si Jehova, subong ginapangayo sang kahimtangan, nagapahanumdom liwat sa aton mga painoino kon ano ang iya kasugoan, ang iya mga sugo, ang iya mga palatukoran, ang iya mando kag ang iya mga pagsulondan. Sa amo wala niya ginapahanugoti nga kalimtan naton ini sing bug-os. Kon indi kita maugot sa sinang mga pahanumdom, mangin malipayon kita bangod sang pagtuman sa sini.
2. Ano ang sadsaran sang manunulat sang Salmo 119 nga ipadaku ang tuman kadamu nga mga pahanumdom?
2 Kon nagasulat sa talipusposan sang ikalima nga siglo bag-o sang aton Kumon nga Dag-on, mahimu nga natigayon sang salmista ang Hebreong Kasulatan halin sa Genesis tubtob sa Malaquias. Ang ikalima nga libro ginatawag nga Dueterononomio (ang Griegong Septuagint Version, subong sang makita sa ibabaw), nga ang ngalan nagakahulugan “Ikaduhang Kasugoan.” Sing maathag ang mga kaundan sini nga tolon-an ginkabig, sa kalabanan nga bahin, nga pagpaathag sa (katipan sang) Kasugoan nga ginhimu ni Jehova upod sa Israel paagi sa pagpatunga ni manalagna Moises. Busa ang Deuteronomio dapat nga nagaunod sing mga pahanumdom, apang ang tanan iban pa nga mga tolon-an magaunod man sang mga pahanumdom sang Dios sa aton.
3. (a) Ano ang ginapahanumdom sa aton sang mga kinutlo gikan sa Hebreong Kasulatan? (b) Paano nga ang aton kalipay mas daku sang sa naagom anay sang salmista?
3 Ang ginatos ka mga kinutlo nga ginhimu gikan sa Hebreong Kasulatan sa Cristianong Griegong Kasulatan nagapangalagad subong mga pahanumdom indi lamang sa kon ano ang gintudlo ni Jehova sa iya katawhan sa idalom sang Kasugoan kundi sang iya man makatilingala nga mga katuyoan nahanungod sa Cristianong kongregasyon kag sa gintubos nga rasa sang tawo. Ang mga disipulo karon ni Jesucristo, ang Mas Daku nga Moises, mas madamu sing mga pahanumdom gikan kay Jehova nga Dios sang sa salmista, kag paagi sa matutom nga pagtuman sa sini dapat nga mas daku ang ila kalipay sang sa salmista. Sa pagpangita sa Iya mga pahanumdom paagi sa pagtuon sa Biblia, tunay nga ginapangita nila si Jehova sa bug-os nilang tagipusuon
4. Sa baylo nga maugot sa mga pahanumdom sang Dios, ano ang husto nga panimuot subong pag-ilog sa salmista?
4 Nga ina nagahatag sa aton sing maayong laygay kag nagapahilayo sa aton gikan sa pag-ambit sa gin-abtan sang malauton isa ka butang nga dapat apresyahon. Amo sina ang ginbatyag sang salmista nahanungod sa mga pahanumdom sang Dios. (Salmo 119:24, 119, 167) Ang mga Saksi ni Jehova man karon wala naugot bangod nakita sang Dios nga maayo nga pahanumdumon sila sang mga butang nga may kahilabtanan sa iya kasugoan ayhan sa ila pagtuon sa Biblia ukon paagi sa iya organisasyon. Matutom nga ginpili nila nga magpabilin sa iya mga pahanumdom. “Nagakapyot ako sa imo mga pahanumdom, O Jehova, indi ako pagpakahuy-i.”—Salmo 119:31.
5. (a) Ano ang kauyoan sang mga pahanumdom gikan sa Pulong sang Dios kag sa iya organisasyon? (b) Paano naton sing personal mapakita ang mataas nga pagtahod sa mga pahanumdom ni Jehova nga iya man anay sang salmista?
5 Wala ginhatag sang Dios ang iya mga pahanumdom agod pakahuy-an ang iya mga Saksi, kundi nga paagi sini maamligan niya sila batok sa makahuloya nga dalanon. Luyag nila nga ang ila tagipusuon magasalig sa mga butang nga mapuslanon gid para sa tanan nga tion magakari; gani nagabuylog sila sa salmista sa pagpangamuyo: “Pahuyoga ang akon tagipusuon sa imo mga pahanumdom, kag indi sa pagkamahamkunon.” (Salmo 119:36) Indi katingalahan nga indi naton luyag nga mawasi ang pagpanag-iya sining mapuslanon nga mga butang sa walay katubtoban paagi sa pagpadayon sa pagtuon sa Biblia ukon sa tayuyon nga pagpakig-upod sa dedikado nga katawhan ni Jehova. (Salmo 119:111) Ang paghigugma sa ila Dios upod sa ila bug-os tagipusuon nagatiklod sa ila sa sining dalanon. Bisan nga mahimu ini magakahulugan sing sobra nga pagtadlong para sa ila, ang mga Saksi ni Jehova nagakasadya nga ginatuytoyan sila ni Jehova sa dalanon sang iya mga pahanumdom, agod huptan sila nga indi magtalang kag mawasi sing dayon: “Nagkalipay ako sa dalanon sang imo mga pahanumdom, subong sang sa tanan nga manggad.”—Salmo 119:14.
6. Paano ginapanikasogan sang mga Saksi ni Jehova nga magbunayag sa ila kaugalingon sa atubangan sang Dios?
6 Bisan nga ginmulay kag ginpasipalahan pa sila katama sang madamu bangod nga nakahimu sing mga sayop, ang mga Saksi ni Jehova bunayag sa ila kaugalingon sa atubangan sang ila Dios. Luyag nila nga maglakat sa dalanon nga ginatudlo sa ila sang iya tolon-an sang mga pahanumdom. Ang ila modernong maragtas nagapakita nga naghulag sila kasubong sa ginhimu sadto sang salmista: “Naghunahuna ako sa akon mga dalanon, nagliso sang akon mga tiil sa imo mga pahanumdom.” (Salmo 119:88) Nagatuad nga mga ulipon sila sang Dios bangod sang ila pagdedikar sang ila kaugalingon sa Dios paagi kay Cristo kag nga dapat nila tigayunon ang matuod nga kahulugan sang kon ano ang iya ginpahamtang sa iya nasulat nga Pulong, nagasiling sila: “Ako imo alagad. Hatagi ako sing paghangop, agod nga mahibaloan ko ang imo mga pahanumdom.”—Salmo 119:125.
7. Ano ang ila mga rason nga magpasalamaton, kag ano ang ila ginapangamuyo?
7 Ang mga butang nga ginbuyagyag sang Dios sa iya Pulong kutob sang Inaway Kalibutanon I sang 1918 makatilingala sa ila amo kon ngaa luyag nila nga himuon kon ano ang ginatudlo sa ila sining mga pagbuyagyag. (Salmo 119:129) Makatarunganon gid nga ginpatalupangod ni Jehova ang iya mga pahanumdom sa aton kag sa paghatag sini sa aton subong mga mando. Nalipay kita sa pagkilala sini sing mapinangamuyoon sa mga pinamulong sang salmista: “Ginmandoan mo ang imo mga pahanumdom sa pagkamatarong kag totoo nga pagkatutom.” (Salmo 119:138) Salamat sa sinang maunungon nga Dios!
8. Sa anong paagi ang kabuhi nga dayon nasandig sa paghangop kag sa pagtuman sa mga pahanumdom sang Dios?
8 Karon nahangpan sing maayo sang mga Saksi ni Jehova nga ang pagtigayon nila sing kabuhi nga dayon sa matarong nga bag-ong sistema sang mga butang sang Dios nagadepende sa pagtigayon nila sing paghangop sa kon ano ang ginapatalupangod niya sa ila kag sa ila maalamon nga pagtuman. (Salmo 119:144) Sa isa ka mapintas nga kalibutan dapat sila mangamuyo sa balaan nga Nagapamati sang Pangamuyo nga luwason sila gikan sa labi ka makatalagam nga mga kahimtangan, labi na sa sining mga adlaw nga ang tanan nga kapungsoran gintipon para sa “inaway sang dakung adlaw sang Dios nga Labing Gamhanan” sa Har-magedon. (Bugna 16:13-16) Nagakaigo gid ang pangamuyo: “Nagpanawag ako sa imo, O luwasa ako! Kag tumanon ko ang imo mga pahanumdom.”—Salmo 119:146.
9. Ano ang pasalig sa aton nga ang balaan nga mga pahanumdom padayon nga matigayon naton?
9 Bisan pa nga ang tanan nga nasulat nga mga pahanumdom ni Jehova nga Dios ginpasad 1,900 ka tuig ang nagligad paagi sa pagkatapos sang Biblia nga may 66 ka tolon-an, matigayon ini karon kag padayon nga magamit naton sa dinapat-od nga palaabuton. Ang Salmo 119:152, subong ginpatuhoy sa Dios, napamatod-an nga matuod: “Kutob sa dumaan nakahibalo ako gikan sa imo mga pahanumdom, nga gintukod mo sila sing dayon.” Bangod sang paghibalo sang iban sa mga pahanumdom ni Jehova, ang magasin nga Zion’s Watch Tower and Herald of Christ’s Presence ginsugdan nga ibalhag sang Hulyo sang 1879. Karon, pagkatapos sang 105 ka tuig nga pagbalhag, ini nga magasin padayon nga nasirkular, kag nga sa bug-os kalibutan nga kasangkaron sa 102 ka pamulong. Bisan pa kon ang mga kaaway sang mga Saksi ni Jehova mahimu pahanugotan nga punggan ang magasin, indi gid nila masarangan nga tapuson ang Balaan nga Biblia nga nagaunod sang mga pahanumdom ni Jehova nga nahamtang sa dayon, ukon walay katubtuban, nga sadsaran.
Pagtuman sa mga Sugo sang Aton Superyor
10. Anong pagkilala ang ginhatag sang Salmo 119 sa “mga sugo” sang Dios?
10 Sa tapos madayaw sang salmista sa iya nagabukas duha ka bersikulo ang kalipay sadtong nagalakat sa dalanon ni Jehova kag nagatuman sa iya mga pahanumdum, padayon sia sa pagsiling: “Wala man sila nagahimu sing pagkadimatarong. Nagalakat sila sa iya mga dalanon. Ginsugo mo kami sang imo mga sugo nga pagbantayan namon sila sing makugihon.” (Salmo 119:3, 4) Sa sining salmo ginagamit sang manugkomposo ang tinaga nga “mga sugo” 21 ka beses, sa amo nagapahanumdom sini.
11. (a) Ngaa ang salmista nagahalong nahanungod sa iya pagginawi subong sang ginapakita sa Salmo 119:168? (b) Ano ang puersa sa likod sang tinaga nga “mga sugo”?
11 Ginasugiran kita sang salmista kon ano ang iya balatyagon kag kon ano ang iya ginhimu nahanungod sadtong balaan nga “mga sugo.” Sa sining paagi isa sia ka masaligan nga halimbawa para sa aton karon. Gin-apresyar niya nga ining dalanon sang kabuhi napaidalom sa pagpanilag sang Dios kag nga dapat sia maghalong sa kon paano sia nagagawi sa idalom sang katipan sang Kasugoan ni Jehova. Bangod sa maayong rason nga nagsiling sia: “Gintuman ko ang imo mga sugo kag ang imo mga pahanumdom, kay ang tanan kong dalanon yara sa atubangan mo.” (Salmo 119:168) Ang mga pahanumdom pangpapagsik sa memorya, apang ang mga sugo mga sugo nga ginapatuman sang isa ka superyor sa isa ka tinawo. Ginalaragway sini kon ano ang himuon kag kon paano ini himuon sang isa ka alagad, ulipon, mamumugon ukon soldado sa paagi nga upod ang balatyagon sang katungdanan. Ang mga sugo mas makusog sang sa pagsulondan; kag ang Hebreong tinaga nga ginbadbad, nga amo ang piqudimʹ, nagakahulugan “mga asaynment; mga instruksion.” Ining balaan nga mga sugo daw mabug-at bala ukon indi maayo sa salmista, labi na kon ang pagtuman sa sini magahimu sa isa nga isumbong sing sayop ukon irepresentar sing sayop? Pamatian naton sia: “Talupangda kon daw ano ang paghigugma ko sang imo mga sugo, O Jehova, buhia ako suno sa imo malig-on nga paghigugma.”—Salmo 119:159, 169.
12, 13. (a) Paano ang talaksan nga ginpahamtang sang salmista nagahimu sa mga alagad sang Dios nga mabatas ang mga pagtilaw sadto kag sa tapos sang Inaway Kalibutanon I? (b) Bisan ‘ginpahitoan sila sing kabutigan,’ kay sin-o mga sugo ang ginatuman sang nagkalabilin?
12 Daw ano kaayo nga talaksan nga ginpahamtang sang salmista para sa matuod nga mga Cristiano nga nagapakig-upod sa makita nga organisasyon ni Jehova sa tunga sining malinapason, walay gugma nga kalibutan! Ang pagpabilin sa sini napamatod-an nga makapaladya. Sa ila palibot nga puno sang mga kaaway sang ila Dios, kasubong sang “dumuluong nga pumuluyo” ang ila ginbatyag kaangay sang ginbatyag sang salmista. (Salmo 119:19, 54) Apang nagabatyag sila nga wala sing makatumbas sa mga palatukoran sang Dios para sa nagakaigo nga pagkabuhi. Haluson sila nga nakapalagyo sadtong Inaway Kalibutanon I sang 1914-18. Sadtong nabuang sa inaway nga tinuig natandog sang mga kaaway lakip na ang mga katapo sang makita nga organisasyon ni Jehova agod padalion ang kalaglagan sang iya katawhan, tubtob sa punto sang pagbilanggo sing sayop sa presidente kag iban pa mataas sing katungdanan nga mga lalaki sa ulong talatapan sang Watch Tower Bible ang Tract Society. Ang inagihan kaangay gid sa ginalaragway sang Salmo 119:69: “Ang bugalon magpahito sing kabutigan batok sa akon. Sa bug-os ko nga tagipusuon bantayan ko ang imo mga sugo.” Ang Labing Mataas nga Dios, ang ila Superyor, dapat nga tumanon sa baylo sang sa tumanon ang mga tawo tubtob diri sa talapakan sang Dios.
13 Huo, sa putokputokan sang Inaway Kalibutanon I, paagi sa sinang daw naguwa nga kadalag-an batok sa mga nagatuman sa mga sugo sang Dios, abi sang mga kaaway ila na madula ang iya matinumanon dedikado nga katawhan. Gani makasiling sila: “Dali na lamang mapapas nila ako sa duta; apang ako wala magbiya sang imo mga sugo.” (Salmo 119:87) Ginpaslaw sang Isa nga Supremo ang tinalawit nga buko sang bugalon nga mga kaaway.
14. Sa anong kahulugan mapabutyag sang nagkalabilin ang mga pinamulong sang Salmo 119:45?
14 Pagkatapos nga mahilway sila sa inaway, nabatyagan nila ang pagkinahanglan nga pangitaon ang mga sugo sang Dios subong wala pa gid matabo anay agod mahibal-an kon ano ang tuyo niya para sa ila nga himuon sa wala ginapaabot nga panag-on sang paghidait. Mahambal nila ang pinamulong sang Salmo 119:45: “Kag magalakat ako sa kahilwayan, kag ginpangita ko ang imo sugo.”
Karon kag sa Palaabuton
15. (a) Ano nga pagtamod ang ginapabutyag sa Salmo 119 nga ginhimu sang katawhan sang Dios nga ila kaugalingon? (b) Sa ano sila nagkonsentrar kutob sang 1919?
15 Bangod sang pagsangkad sang ila hilikuton sa Ginharian tubtob sa kaukbongan sang duta, nagdamu ang ila mga kaaway. Apang wala ini magpahadlok sa ila nga kalimtan ang mga intstruksion sang Dios. Sing mapinamat-uron nagpadayon sila. (Salmo 119:93, 94) Bangod sang indi malimuton nga tagpalamati sang Pulong sang Dios, lakip sang iya positibo nga mga sugo, kundi nangin mga manughimu sang iya hilikuton, ano ang masiling nila karon nga wala nagapabugal, nagahatag sang kredito kay Jehova? Amo ini: “Nagahangop ako sing labi pa sa mga tigulang, bangod nga ginbantayan ko ang imo mga sugo.” (Salmo 119:100, 104) Gani kutob sang tapos-inaway nga tuig sang 1919 padayon, wala nila ginkabalak-i ang mga plano kag mga kahimusan sang mga pangulohan. Walay pagbalhin nga ila ginbantala ang Ginharian sang Dios paagi kay Cristo subong ang isa kag lamang nga paglaum sang katawhan, sa baylo sang Liga de Nasyones kag sa nagbulos sini karon, ang Nasyones Unidas. Daw ano nga ‘paghangop’!
16. Bisan ginaipit kita sa paghimo sing sayop, sa ano kita nakombinse?
16 Sang ginsingganan kita sang Pulong sang Dios nga nagakabuhi sa sining dag-on sang Nasyones Unidas nga dili paghigugmaon ini nga kalibutan kag ang mga butang sini, ginasingganan kita sang balaan nga mga sugo para sa aton. Dapat gid kag nagakaigo nga kabigon naton ini nga husto; kag amo gid ini! Ang aton tindog pareho sa Salmo 119:128: “Busa ginakabig ko nga matarong ang tanan mong sugo nahanungod sa tanan nga butang; ginadumtan ko ang tagsa ka dalanon nga dimatuod.” Tungod sang aton wala nagakompromiso nga tindog mahimu kita pakanubuon sang tagakalibutan, apang ang importante amo ang pagtamod sang Dios sa aton, kag indi naton luyag nga kalimtan ang iya mga pagsulondan.—Salmo 119:141.
17. Ano ang mga palaabuton sa unahan, kag paano masapwan ang balaan nga pangamlig kon magasalakay na ang mga manugpamatok sa katawhan ni Jehova?
17 Walay sapayan sang dugang nga pagbantala sang Ginharian sang Dios paagi kay Cristo subong ang lamang nga paglaum sang katawhan sa kapin na karon sa 60 ka tuig, wala gihapon namati ang mga manugbuko kag mga manugplano sang mga hitabo sa kalibutan. Karon nagapamahog ang paghapay sa bug-os nga panimalay sang tawo paagi sa inaway sang nuklear nga hinganiban. Indi lamang ini, kundi ang batok sa relihion nga dumot nagapapait pa gid sa dugang kag dugang nga tagipusuon sang tawo. Sa tapos malaglag ang tanan nga sahi sang butig nga relihon, ang mga kaaway sang Dios makig-atubang sa mga Saksi ni Jehova. Kon salakayon na sang direlihioso nga mga manugpamatok sang Ginharian sang Dios ang nakalampuwas nga mga Saksi ni Jehova, subong sang wala pa gid matabo anay nagakinahanglan sila sing labaw sa tawo nga bulig. Dapat sila tabonan sang nagaamlig nga landong sang labing gamhanan nga kamut, ang kamut sang Dios. May rason sila nga makapangabay sinang balaan nga kamut nga magakari sa pagbulig sa ila, subong sang ginasiling sang Salmo 119:173: “Maghanda ang imo kamut sa pagtabang sa akon, kay ginpili ko ang imo mga sugo.” Sa idalom sadtong makahalangkat nga mga kahimtangan, ang kamut ni Jehova indi mapamatod-an nga tuman kalip-ot sa ikasarang sa paglab-ot amo kon ngaa indi sini maluwas ang mahinadlukon sa Dios nga mga nagatuman sang iya mga sugo.—Isaias 50:2.
18. (a) Ngaa ang pagkayara sang isa sa husto nga kaupdanan may kahilabtanan sa kaluwasan sa katapusan sining sistema sang mga butang? (b) Nakahibalo sang resulta para sa mga nagakahadlok kay Jehova, padayon nga kabalak-an naton ang ano?
18 Samtang nagahilapit kita sa makapahamak nga katapusan sining malinapason, walay gugma nga sistema sang mga butang kag katapusan sang pagpainpain sa mga tawo sang kapungsoran, subong sang pagpainpain sang manugbantay sa iya mga karnero gikan sa mga kanding. Kay sin-o pagpakig-upod luyag naton nga masapwan? Sa pagpakig-upod bala sang katulad-kanding nga pagautdon sa walay katapusan gikan sa bug-os nga pagluntad ukon sa pagpakig-upod sa mga katulad-karnero nga nagahigugma kay Jehova nga Dios? (Mateo 25:31-46) Karon na ang pagpili sa husto nga mga kaupod. Karon na nga himuon ang ginpili sang salmista, nga nagsiling tuhoy sa isa nga Supremo: “Kaupod ako sang tanan nga nagakahadlok sa imo, kag sang mga nagatuman sang imo mga sugo.” (Salmo 119:63) Nahibaloan naton kon mangin ano ang bahin sadtong nagakahadlok kay Jehova, kag luyag naton makigbahin upod sa ila sa sining makaalayaw sa kalag nga bahin, nga sa kalipay mismo ni Jehova. Bangod ginahigugma naton sia, nabalaka kita sing hanuot kag sing dalayon nga kahamut-an sia paagi sa paghimu sa kon ano ang ginapangayo niya sa aton. Ginapaathag sing maayo sang salmista ang aton determinasyon, nga nagasiling: “Magapamalandong ako sa imo mga sugo, kag may pagtalupangod sa imo mga dalanon.”—Salmo 119:15.
19. Anong makatilingala nga binuhatan ang ginahimu karon?
19 Kutob sang matapos ang inaway kalibutanon, ang nahauna nga sahi sini, sang 1918, ginhimu sang Labing Mataas nga Dios ang makatilingala nga hilikuton sa tunga sang nagapamatok nga kalibutan. Amo ini ang hilikuton nga ipabantala sa iya mga Saksi ang “maayong balita sang ginharian . . . sa bug-os napuy-an nga duta nga panaksi sa tanan nga kapungsoran,” bangod sang nagahilapit nga “katapusan” sining linibo na ang edad nga sistema sang mga butang. (Mateo 24:14) Luyag naton nga makigbahin upod sa iya sa iya mga hilikuton. Luyag naton nga himuon ang iya kabubut-on, kag ginapangabay naton sia nga pahimuon kita sang iya kabubut-on. Ang aton tinagipusuon nga pangamuyo amo gihapon ang sa Salmo 119:27: “Pahangpa ako sang dalanon sang imo mga sugo, sa amo magapamalandong ako sa imo makatilingala nga mga binuhatan.”
20. Diin sa labing makatilingala nga mga binuhatan sang Dios ang hilimuon pa, kag ano ang isiling sadtong pagaamligan nga buhi nahanungod sa mga sugo sang Dios?
20 Ang isa sang labing makatilingala nga binuhatan sang Dios, nga hilimuon pa, amo ang pag-amlig sa iya matutom kag maunungon nga mga saksi sa nagapakari nga katapusan sining sistema sang mga butang pasulod sa Bag-ong Kahimusan. (2 Pedro 3:13) Mangin matarong sa bahin niya nga amligan sila tubtob sa kamatayon sining nagabalatian katama nga sistema sang mga butang. Magasabat sia sa sining inspirado nga pangamuyo nila: “Yari karon! Nahandum ko ang imo mga sugo. Buhia ako sa imo pagkamatarong.” (Salmo 119:40) Himoa ina nga mangin ang imo pangamuyo. Nian, sa tapos sang pinakadaku nga kapipit-an sa bug-os nga maragtas sang kalibutan kag subong nga wala na sing peligro sa sulod sang ganhaan sang bag-o kag matarong nga sistema sang mga butang, hanuot ka nga mapahulag sa pagsiling: “Indi ako nga mas-a malipat sang imo mga sugo, kay sa ila ginbuhi mo ako.”—Salmo 119:63.
Bulig sa Pagdumdom
◻ Anong “mga pahanumdom” gikan sa Dios ang matigayon mo?
◻ Paano ikaw makabenepisyo gikan sa mga pahanumdom sang Dios?
◻ Ano ang “mga sugo” ni Jehova?
◻ Ngaa luyag mo ini tumanon?
[Mga piktyur sa pahina 18]
Ang mga alagad sang Dios karon mas madamu sing “mga pahanumdom” nga mahimuslan nila
[Picture on page 20]
Ginpili mo bala nga mangin ‘kaupod sang “karnero” nga nagatuman sang mga sugo sang Dios’?