Ang mga Pahanumdom ni Jehova Nagapukaw Bala sa Aton sa Espirituwal?

¹ Ang salmista nagdayaw kay Jehova, nga nagasiling: “Ang Imo mga pahanumdom amo ang akon pamalandungan.” (Sal. 119:99) Ang Hebreong tinaga para sa “mga pahanumdom” nagapaalinton sang panghunahuna nga ginabalik ni Jehova sa aton hunahuna kon ano ang ginapahayag sa iya mga sugo. Kon kita nagatuman, magapukaw ini sa aton sa espirituwal kag magapahalipay sa aton.​—Sal. 119:2.

² Subong katawhan ni Jehova, tayuyon kita nga nagabaton sing laygay. Nabatian na naton ang madamo sini. Bisan pa ginaapresyar naton ining laygay, nahuyog kita sa pagkalipat. (Sant. 1:25) Si Jehova mapailubon nga nagaaman sing mahigugmaon nga mga pahanumdom. Ginrekord ni apostol Pedro ang iban nga mga pahanumdom agod ‘pukawon ang aton maathag nga mga ikasarang sa paghunahuna.’​—1 Ped. 3:1.

³ Sing sulitsulit ginapahanumdom kita nahanungod sa pagkaimportante sang personal nga pagtuon kag pagtambong sa mga miting. Ginahimo ini bangod kinahanglanon gid ini sa aton espirituwal nga kaayuhan.​—1 Tim. 4:15; Heb. 10:​24, 25.

⁴ Ang pinakadaku nga hangkat para sa iban amo ang pagtuman sa Cristianong hilikuton sa pagbantala. Nagakinahanglan ini sing panikasog kag determinasyon. Apang, ginabuligan kita sa “pagtindog nga malig-on” paagi sa ‘pagsuklob sa aton mga tiil sing kasangkapan sang maayong balita.’​—Efe. 6:​14, 15.

⁵ Si apostol Pablo nagapahanumdom sa aton nga ginaaman sang tagipusuon ang pangpahulag nga ginakinahanglan naton agod makahimo sing “dayag nga pagpahayag para sa kaluwasan.” (Roma 10:10) Kon ihuyog naton ang aton tagipusuon ayon sa mga pahanumdom ni Jehova, magapahulag ini sa aton sa pagpamulong sa kadayawan sang iya ngalan.​—Sal. 119:36; Mat. 12:34.

⁶ Kon nagatinguha kita sa paghimo sing maayo, mapaabot gid naton nga magahatag ini sa aton sing kalipay. (Manugw. 2:10) Ginapakilala ni Pablo ang kalipay subong isa ka bunga sang espiritu ni Jehova. (Gal. 5:22) Si Pedro nagdugang nga ang “hanuot nga panikasog” pagapadyaan sing mabungahon nga ministeryo, nga nagaresulta sa kalipay.​—2 Ped. 1:​5-8.

⁷ Kon nagaatubang kita sing hangkat, dapat naton dumdumon ang malig-on nga tindog sang mga apostoles sang nagsiling sila, “indi kami makauntat sa pagpamulong nahanungod sa mga butang nga amon nakita kag nabatian.” (Binu. 4:20) Ginapabakod kita sa pagpadayon kon dumdumon naton nga ‘paagi sa paghimo sining mga butang, maluwas naton ang aton kaugalingon kag yadtong nagapamati sa aton.’​—1 Tim. 4:16.

⁸ Wala kita nagabatyag sing kaakig bangod sang pagbaton sing dalayon nga mga pahanumdom. Sa baylo, ginaapresyar naton sing tudok ang daku nga balor sini. (Sal. 119:129) Sa sining makahalanguyos nga mga tion, nagapasalamat kita nga si Jehova padayon nga nagapadala sa aton sing mga pahanumdom sa pagpukaw sa aton sa espirituwal kag sa pagpahulag sa aton nga mangin makugi sa maayong mga buhat!​—2 Ped. 1:​12, 13.