“Ang Inaway Indi Inyo, Kundi Iya sang Dios”
“Magtuo kamo kay Jehova . . . agod nga magmadinalag-on kamo.”—2 CRONICA 20:20.
1. Sa anong mga paagi ginalaragway ni Josafat ang ginpalingkod nga si Jesus?
SI Josafat sang Juda mabuot nga hari. “Wala sia maglipas . . . sa paghimu sang matarong sa itololok ni Jehova.” (2 Cronica 20:32) Ang iya ngalan nagakahulugan “Si Jehova Hukom.” Ginpakadaku niya ang ngalan ni Jehova, nagadangop sa iya agod tuytuyan sa dalan sang pagkamatarong kag agod buligan sa paghukom sa Iya katawhan. Gin-atipan niya nga matudloan sila sa kasugoan ni Jehova. Personal nga ginakadtoan niya ang mga taga-Judea agod palig-unon sila nga magbalik sa matuod nga pagsimba kay Jehova. Gin-organisar niya ang ginharian para sa teoratikong pagsimba. Sa sining tanan, nagakaigo nga ginalaragway niya ang Hari, si Jesucristo, nga bag-o mapalingkod sa iya langitnon nga trono sang 1914 kag karon nagatipon sang katawhan ni Jehova para sa kaluwasan, samtang ginatipon sang demonikong mga puersa ang kapungsoran sa katapusan nga inaway sang Armagedon.—Mateo 25:31-34; Bugna 16:13, 14, 16.
2. (a) Anong daku na krisis ang nag-utwas sa mga taga-Judea? (b) Anong kaanggid nga kahimtangan ang ginaatubang sang mga Saksi ni Jehova karon? (c) Anong mga elemento sang kalibutan ni Satanas ang katumbas sa Amon, Moab kag Bukid sang Seir?
2 Sa tapos mahatagan ni Josafat sing igtalupangod ang pagpasag-uli sa teokratikong kahimusan sa Juda, nag-utwas ang daku nga krisis. Isa ka gamhanan nga kasumpong, “isa ka dakung kadam-an,” ang naghalin sa mga rehiyon sang Amon, Moab kag Bukid sang Seir, nagapahog nga laglagon ang katawhan ni Jehova. (2 Cronica 20:1, 2, 22) Amo man sina ang kahimtangan karon. Ang mga Saksi ni Jehova, bangod “dili bahin sang kalibutan,” ginadumtan sang kalibutan ni Satanas kag masami nga ginahingabot sing mapintas sang mga kaaway sang Dios. (Juan 15:19; 1 Juan 5:19) Ang paggahom sa duta sang katawhan ni Jehova—ang Juda (nagakahulugan, “Pagdayaw”)—amo ang hulusayon sang panahon ni Josafat. Apang karon, sunod sa talaksan sang dumaan nga Amon kag Moab, ang mga kagamhanan sa politika kag ang dalagkung negosyo (lakip ang mga manughimu sang mga hinganiban sa “adlaw sang pamatbat”) karon nagaagaway para sa bug-os kalibutan nga paggahom. Bangod sina, ginasakop man nila ang duog nga iya sing makatarunganon, kutob sang 1914, sang Mesianikong Ginharian sang Dios. (Bugna 11:15, 18) Ang Bukid sang Seir nangin ang duta sang pangulohan sang apostatang Edom, ang mga kaliwat sang kapid ni Jacob nga si Esau. Sing nagakaigo, nian, ang taga-Bukid sang Seir nagalandong sa bugalon nga apostatang Cristiandad karon.—Genesis 32:3.
3. Paano ang aksion ni Josafat kag sang mga taga-Judea kaanggid sa iya sang maunungon nga mga Saksi karon?
3 Ginapahog karon sinang nagalikop nga kabon, ano ang himuon ni Josafat? Bueno, ano ang pirme nga ginahimu sang maunungon nga mga alagad ni Jehova kon ginaatubang sang mga emerhensia, mga paghingabot ukon katalagman sang kabuhi? Si Josafat “nagtapat sang iya kaugalingon sa pagdangop kay Jehova.” Kag gikan sa tanan nga siudad sang Juda ang katawhan “nag-abot sa pagpangita kay Jehova” sa iya balay sang matuod nga pagsimba.—2 Cronica 20:3-5.
4. (a) Anong mga kahimtangan ang paabuton sang katawhan ni Jehova? (b) Diin ang nagadugang nga “dakung kadam-an” nagadangop para sa kaluwasan?
4 Daw ano kaayo nga halimbawa para sa katawhan sang Dios karon! Ining dag-on sang kasingki nagapadulong na sa iya putokputokan sa Har-Magedon. Ang kahimtangan sa kalibutan ni Satanas indi na mangin kubos kasingki. (2 Timoteo 3:1, 13) Sing masami, ang kabuhi mismo sang katawhan ni Jehova mahimu nga nabutang sa katalagman. Diin sila makasapo sing pangamlig? Masapwan ini sa aton paghiusa sa pagsimba. Sa aton mga Kingdom Hall kag sa iban pa nga mga sentro sa pagtuon sa Biblia, nagatipon kita agod makig-ambit sa makasustine nga espirituwal nga pagkaon kag agod maorganisar ang aton dayag nga pag-alagad sa pagdayaw kay Jehova. Sing malipayon, “ang dakung kadam-an” padayon nga nagakari gikan sa tanan nga pungsod, agod makigbuylog sa katawhan sang Dios sa ila “balaan nga pag-alagad.” Ining mga bag-ohan nagadugok sa ‘bukid sang balay sang pagsimba ni Jehova.’ Nagakahulugan man ini sang ila kaluwasan.—Bugna 7:9, 15; Isaias 2:3.
5. Ano ang ginapanugda sang “bag-o nga luwang” ni Josafat nahanungod sa organisasayon ni Jehova karon?
5 Si Josafat nagtindog sa “sa balay ni Jehova sa atubangan sang luwang nga bag-o.” Sing maathag ang programa sang hari sa pagtindog sa Juda naglakip sang pagpasangkad sa mga pasilidad sa pagsimba sa templo sang Jerusalem. Amo man karon, sa idalom sang pagtuytuy sang nagagahom karon nga hari, si Jesucristo, ginahimu ang daku nga programa sa espirituwal nga pagpatindog, amo kon ngaa sa dutan-on nga luwang sang templo ni Jehova may nagakaigo nga hulot para sa minilyon sang disaserdotenhon nga “dakung kadam-an.” Daw ano ka makalilipay ang mangin didto!—Salmo 27:1-5.
Pagliso kay Jehova
6. (a) Anong mga bagay ang natuptupan sa pangamuyo ni Josafat? (b) Paano kita makasapo sing kabakud sa panahon sang pagtilaw?
6 Sa balay ni Jehova, gintugyan ni Josafat ang bug-os nga bagay sa atubangan sang iya Dios sa pangamuyo. Ginkilala niya ang pagkahari, gahom kag kagamhanan ni Jehova, kag ginrepaso ang mga binuhatan ni Jehova tungod sa iya katawhan. Ginpatuhoyan niya ang hanuot nga pangamuyo ni Solomon sadtong gindedikasyonan ang templo kag mapainubuson nga naghinakop paagi sa pagsiling: “Indi kami makahibalo kon ano ang himuon, apang ang amon mga mata yara sa imo.” (2 Cronica 20:5-12; 6:12-14, 34, 35) Nakita mo na bala ang kahimtangan nga kasubong sina—nga daw wala na sing dalan nga malisuan? Sang panahon sang mga apostoles masami nga si Pablo yara sa sinang mga alagyan. Dapat gid sia magsalig kay Jehova. Apang prime sia nga makasiling, “Kay kon maluya ako, nian gamhanan ako.” Kay kon mabatyagan niya nga indi makasarang sa iya kaugalingon, ang iya bug-os nga pagsalig kay Jehva nangin ang tuboran sang dimadaug nga kusog. Ikaw, man, mahimu magmakusog!—2 Corinto 12:10; Hulubaton 18:10.
7. Anong instruksion ni Moises ang ginasunod sang mga taga-Judea?
7 Handurawa, kon masarangan mo, ang danyag didto sa masangkad nga templo sa Jerusalem: “Samtang ang bug-os nga Juda nagtindog sa atubangan ni Jehova, upod sang ila mga magamay, sang ila mga asawa kag sang ila mga anak.” (2 Cronica 20:13) Walay duhaduha nga nadumduman nila ang prangka nga instruksion ni Moises sa katuyoan sinang pagtilipon, subong narekord sa Deuteronomio 31:12. Gutok na sa sadtong daku nga asambleya samtang ang mga pamilya matinahuron nga naghulat kay Jehova, alisto kag handa sa paghimu sang iya sugo.
Alagyan ni Jehova
8. Kilalaha ang alagyan sang komunikasyon ni Jehova (a) sang kaadlawan ni Josafat (b) sa adlaw naton.
8 Paano sabton sang Soberanong Ginuong Jehova ang pangamuyo ni Josafat? Si Jehova nag-aman sang alagyan sang komunikasyon. Amo ini si Jahaziel, sang tribo ni Levi. Bisan pa nga si Jahaziel indi saserdote, ginpili sia ni Jehova nga iwali ang isa sang iya labing makapulokaw nga mensahe sang pagpalig-on sa bug-os nga Kasulatan. Ang importante nga butang amo nga “ang espiritu ni Jehova nag-abot kay Jahaziel sa tunga sang kongregasyon.” (2 Cronica 20:14) Nag-aman bala si Jehova sang katumbas nga palaagyan sa tunga sang iya katawhan karon? Huo gid! Ginsambit ini ni Jesus sa iya tagna sa “konklusion sang sistema sang mga butang” sang ginpatuhoyan ang hinaplas nga “matutom kag mainandamon nga ulipon” nga klase, nga gintugyanan sang Agalon sang tanan niyang “pagkabutang” diri sa duta.—Mateo 24:3, 45-47.
9. (a) Paano nagakaigo ang ngalan ni Jahaziel? (b) Ano ang mensahe ni Jehova, kag paano kita sini ginapalig-on karon?
9 Ang ngalan ni Jahaziel nagakahulugan “Nakakita ang Dios.” Makita matuod sang Dios ang tanan nga nadalahig sa sina nga krisis. Makita niya nga daan ang dalanon nga himuon sang katawhan sang Dios. Makita niya ang katapusan nga resulta. Gani, ano nga mensahe ang ginpaalinton ni Jehova paagi kay Jahaziel? Pamatii! Amo ini: “Pamati kamo, bug-os nga Juda kag kamo nga mga pumuluyo sang Jerusalem kag ikaw Hari Josafat! Amo ini ang ginasiling ni Jehova sa inyo, ‘Dili kamo magkahadlok ukon magkahangawa, bangod sining dakung kadam-an; kay ang inaway indi inyo kundi iya sang Dios.’ ” (2 Cronica 20:15) Daw ano siguro ang kalipay sadtong nahiusa nga kadam-an! Kag daw ano karon ang aton kalipay nga mahibaloan nga, bisan kon daw ano ang pagsalakay ni Satanas kag sang iya kabon sa aton—bisan kon daw ano ang pagtilaw sa aton pagtuo kag integridad—kita, subong nahiusa nga katawhan, makabutang sang aton bug-os nga pagsalig kay Jehova, makasalig nga ipakig-away niya ang inaway tungod sa aton!—Exodo 15:2, 3; Salmo 24:8; 37:3-7; Zacarias 14:3.
Kinahanglan ang Nahiusa nga Aksion!
10. (a) Anong pagtilaw sang integridad ang alatubangon sang mga taga-Judea? (b) Anong hilikuton ang nagdul-ong sa ‘makatilingala nga binuhatan’ ni Jehova?
10 Apang, ang mga taga-Judea indi dapat magtindog nga wala sing ginahimu paagi sa paghulat sa bisan ano man nga kahilwayan nga pahanabuon ni Jehova. Dapat sila mangin katawhan sang aksion! Dapat nila ipakita ang pagkamatinumanon kay Jehova kag himuon ang mga butang sa iya paagi kon luyag nila nga makalampuwas. Walay duhaduha nga madamu sa ila ang nagbatyag nga ang mga instruksion nga naghalin kay Jehova daw dikinaandan. Gintilawan sini ang ila integridad. Sa amo man nga paagi, antes himuon ni Jehova ang iya ‘makatilingala nga buluhaton, ang iya dikinaandan nga buhat,’ sa paglaglag sa Cristiandad sa ginsugoran sang “dakung kapipit-an,” ginakinahanglan niya sa iya mga saksi nga makigbahin sing nahiusa sa buluhaton nga daw dikinaandan sa madamu. Ila balaan nga pag-alagad nga kadtoan ang mga balay sang tawo, sa liwatliwat, agod paandaman sila sang nagahilapit nga kalaglagan.—Isaias 28:21; Mateo 24:14, 21.
11, 12. (a) Anong dikinaandan nga sugo ang ginhatag kay Jahaziel, apang ano ang reaksion sang mga taga-Judea? (b) Paano man kita makapakita sing pagsalig kay Jehova?
11 Ginlandongan ini sang mga sugo nga ginhatag ni Jahaziel sa katawhan sang Juda. Nagapatuhoy sa kaaway nga kabon, nagsiling sia: “Buas dulhog kamo batok sa ila. . . . Dili kinahanglan nga kamo makig-away sa sining inaway. Pahamtang kamo, pahimunong kamo kag tan-awa ang kalusawan ni Jehova upod sa inyo, O Juda kag Jerusalem, dili magkahadlok ukon magkahangawa. Busa guwa kamo batok sa ila, kay si Jehova nagaupod sa inyo.” (2 Cronica 20:16, 17) Inang wala sing hinganiban nga kadam-an sang mga lalaki, kag babayi kag mga kabataan ginmandoan nga magguwa batok sa tingob nga kasoldadosan sang kasumpong!—Ipaanggid ang Salmo 148:12, 13.
12 Hanuot nga gin-apresyar ni Josafat kag sang mga taga-Judea ang direksion nga gin-aman ni Jehova paagi kay Jahaziel. “Nian si Josafat nagyaub nayon sa duta, kag ang bug-os nga Juda kag ang mga pumuluyo sang Jerusalem naghapa sa atubangan ni Jehova nga nagasimba kay Jehova.” (2 Cronica 20:18) Ginpakita sang Mas Daku nga Josafat, si Jesucristo, inang masinakupon nga pagsalig kay Jehova nga Dios samtang yari sia sa duta, kag makapat-od kita nga magadangop sia kay Jehova sa iya tuo magabuno sang mga hari sa adlaw sang iya kasingkal.’ (Salmo 110:5, 6) Sa amo man nga paagi, ang mga Saksi ni Jehova malipayon nga “nagasimba” sa Dios nga ila ginasaligan, samtang nagaalagad sa iya mga luwang.—Salmo 84:10-12; 122:1-4.
13. Sin-o karon ang nagadayaw kay Jehova “sa lakas kabaskog nga tingog,” nga nagaresulta sa ano?
13 Suno sa 2 Cronica 20:19, ang mga manug-amba sa templo “nagtindog sa pagdayaw kay Jehova, ang Dios sang Israel, sa lakas kabaskog nga tingog.” Kag sin-o, karon, sa idalom sang pagtuytuy sang hinaplas nga nagkalabilin, ang nagagamit sang “lakas kabaskog nga tingog” sa pagdayaw kay Jehova sa atubangan sang iya mga kaaway? Sing una sa unahan sang katawhan ni Jehova amo ang padayon nga nagadugang nga grupo sang payunir nga mga misyonero—yadtong nagapanguna sa pagdayaw kay Jehova sa latagon—nagaagom sing 19-porsiento nga pag-uswag sadtong 1983. Ang ‘pag-amba nila nakahimu sing lakas kabaskog nga amot sa makahayanghag nga kabug-osan sang 436,720,991 ka oras—13.5 porsiento nga pagdugang—nga ginhinguyang sa Cristianong pag-alagad sang nagligad nga tuig.
14. Sunod sa halimbawa sang mga taga-Judea, paano ginapakita karon sang madamu ang pagtuo paagi sa buhat?
14 Sadto anay sa Jerusalem indi yadto tion nga magtulogtulog. Sing matinumanon, ang katawhan “nagbangon sing aga pa kag nagkadto sa kamingawan sang Tekoa.” (2 Cronica 20:20) Nalangkag sila nga ipakita ang ila pagtuo paagi sa mga buhat. (Ipaanggid ang Santiago 2:4.) Amo man karon, ang mga ministro sang Dios masami ginakinahanglan nga magtemprano sa trabaho. Ang asawa nga mga payunir kag ang iban pa nagabangon sing aga pa agod atipanon ang mga hilikuton sa balay agod makahinguyang sila sang bilog nga aga sa pag-alagad kay Jehova. May katawhan gikan sa kalibutan ni Satanas nga ‘nagapanghayhay kag nagabakho,’ kag dapat nga tandaan para sa kaluwasan sa “dakung kapipit-an.” Determinado ang mga Saksi ni Jehova nga makita sila.—Ipaanggid ang Ezequiel 9:4.
Abante sa Inaway!
15. (a) Kay sin-o nagtuo ang mga taga-Judea? (b) Paano kita “magmadinalag-on” karon?
15 Ang rekord sa 2 Cronica 20:20 nagapadayon: “Kag sang nagalakat sila, si Josafat nagdulog kag nagsiling: ‘Pamatii ako, O Juda kag kamo nga mga pumuluyo sang Jerusalem! Magtuo kamo kay Jehova nga inyo Dios agod nga maglig-on kamo. Tuohi ang iya mga manalagna agod nga mag-uswag kamo.’” Sing kaanggid, ang ulo sang Cristianong kongregasyon, ang aton nagagahom karon nga Hari, naghatag sa iya katawhan sing daku nga pagpalig-on sa pagtuo. Masapwan naton ini sa kasulatan subong sang masunod: Mateo 10:27, 28; 24:9-13; Juan 16:33. Tuohi si Jehova, tuohi ang ginagamit niya nga mga humalambal, huo, tuohi ang iya organisasyon! Sang ‘nagalakat’ kita sa pag-alagad kay Jehova karon, daw ano ka importante nga buhaton naton ina nga pagtuo! Amo ini ang dalan padulong sa sigurado nga kadalag-an—nga pagabatunon sang tanan dedikado, bawtismado nga mga Saksi nga nagatuo kay Jehova kag sa iya mga kahimusan. Nagalakip ini sa iya makatilingala nga aman nga kabuhi nga walay katapusan, nga ginapaposible paagi sa halad sang iya Anak.—Juan 3:16; 17:3.
16. (a) Diin nga “mga manug-amba” ang masami nga nagapanguna sa pag-alagad? (b) Paano ginadayaw sang tanan si Jehova nga “may balaan nga panaput”?
16 Dugang pa, si Josafat “nagapakigsapul sa katawhan kag gintangdoan niya ang mga manug-amba ni Jehova kag manugdayaw sa iya nga may balaan nga panaput sa nagaguwa sila sing una sa hangaway, kag nagasiling: “Dayawa ninyo si Jehova, kay ang iya mahigugmaon nga kaluoy nagapadayon sa gihapon.’” (2 Cronica 20:21) Diri ang mga manug-amba sa templo nanguna sa pagpakadto sa inaway. Subong man sa karon, sa idalom sang direksion sang hinaplas nga nagkalabilin may mga payunir kag mga misyonero, nagalakbay nga mga manugtatap kag ang ila mga asawa, subong man yadtong nagaalagad sa mga puluy-an Bethel, subong man ang mga gulang sa kongregasyon kag mga ministeryal nga suluguon, nga masami nagapanguna sa paghimu sang balaan nga pag-alagad, nagapahulag sa tanan nga nagapakig-upod sa kongregasyon nga manghikot. Sila tanan nagadayaw kay Jehova nga “may balaan nga panaput,” nga nagamartsa sa teokratikong kahimusan. Ang ila espirituwal nga panaput nagalakip man sa ‘bag-ong Cristianong personalidad, nga nagapakita sang matuod nga pagkamatarong kag pakamainunungon.’ (Efeso 4:24; Galacia 5:22, 23) Daw ano nga pribilehiyo karon nga mangin bahin sining tugob-globo nga hublag, nagapakadaku sa ngalan kag mahigugmaon nga kaluoy ni Jehova!—Salmo 144:1, 2; 136:1-26.
17. (a) Ngaa ang katawhan sang Dios “dili kinahanglan nga mag-away”? (b) Anong “katuyoan” ni Jehova ang nagakahulugan sing kalaglagan sa butig nga relihion?
17 Ginsilingan ni Jehova ang iya katawhan: “Dili kinahanglan nga kamo mag-away sa sining inaway.” Kag amo gid sini. “Kag sang nagsugod sila sa pag-amba kag pagdayaw,” ginpuot ni Jehova ang nagalikop nga mga hangaway, amo kon ngaa “ang mga tawo sang Amon kag sang Moab nagtindog batok sa mga pumuluyo sang Bukid sang Seir sa pagpatay kag paglaglag sa ila sing bug-os.” (2 Cronica 20:17, 22, 23) Daw ano gid kaathag nga ginailustrar sini kon ano ang mahanabo sa kalibutan ni Satanas! Subong sang ginapakita sang Bugna 17:16, 17, si Jehova may “katuyoan” tuhoy sa Babilonia nga Daku, ang Cristiandad subong ang pinakabalasulon nga bahin sini. Pahanabuon niya ang militar nga katapo sang mga pungsod sang NU nga tigayunon ining amo man nga “katuyoan,” paagi sa pagbalikid sa butig nga relihion, sa paghapay kag sa paglaglag sa iya. Ang dakung apostata nga sistema sang Cristiandad, kaangay sang mga Edominhon gikan sa Bukid sang Seir, pagadugmokon!
18. Paano laglagon ang modernong Amon kag Moab sa Har-Magedon?
18 Apang, indi lamang amo sina! Ang modernong Amon kag Moab magapabilin! (Ipaanggid ang Bugna 18:9, 10, 15-17.) Tuyo gihapon nila nga laglagon ang mga nagadayaw kay Jehova, ang mga taga-Judea sang karon. Apang panahon na ni Jehova nga maghukom. Subong sang ginalaragway sang Bugna 19:11-16, ang Hari, si Jesucristo, magalakat agod ‘tasakon ang linasan sang alak sang kasingkal sang Dios nga Labing Gamhanan,’ nagalaglag sa nabilin nga mga bahin sang bug-os kalibutan nga sistema ni Satanas. Sa kainit sinang dakung inaway, ang nagahuramentado nga nagkalabilin sang politikal nga kapungsoran kag ang ila militar nga kaupdanan walay duhaduha nga magasakitay sa kada isa paagi sa ila hinganiban sa paglaglag. Amo sina sa Amon kag Moab, sang “ang tagsatagsa nagbuligay sa paglaglag sa isa kag isa.” Apang indi gid sila pagpahanugotan ni Jehova nga gamiton ang ila nuklear nga mga kagamitan tubtob sa punto nga laglagon ang katawhan sang Dios, ukon ang iya binuhatan, ang aton duta.
19. (a) Ano ang reaksion sang modernong mga taga-Judea samtang ginasurbe nila ang patag-awayan? (b) Ano ang ginalandongan sang ‘pagtipon sa Nalupyakan sang Beraca’?
19 “Tuhoy sa Juda, nangin torre nga balantayan ini sa kamingawan. Sang naglantaw sila sa kadam-an, yari karon, mga bangkay sila nga napukan sa duta, wala gid sing nakapalagyo.” Sang ang modernong-adlaw nga “mga taga-Judea,” kaupod sang ila kaupdanan nga mga sumilimba, nagsurbe sa resulta sang inaway sang Har-Magedon, dayawon nila si Jehova bangod sinang dakung kadalag-an. Indi na kinahanglan nga magkuha sila sang literal nga inatihan, kundi magakasadya sila nga makigtipon sa simbuliko nga “Nalupyakan sang Beraca”—ang Beraca nagakahulugan “Pagpakamaayo.” Sing masinadyahon, ang disaserdotenhon nga “dakung kadam-an” magasulod sa natinloan nga duta, sa idalom sang pagginahom sang Ginharian, nga malangkagon nga nagahulat sang ila nagahilapit nga pribilehiyo—agod himuon ang duta nga isa ka katamnan nga paraiso. Sa isa ka libo ka tuig ang harianon nga sakop sang Mas Daku nga Josafat, si Jesucristo, wala na sing tublag, kag ang iya Dios, si Jehova, padayon nga magapahuway anay.—2 Cronica 20:24-30.
Pagrepaso sa 2 Cronica 20
◻ Sin-o karon ang katumbas sang mga hangaway sang Amon, Moab kag sang Bukid sang Seir?
◻ Sin-o ang ginalaragway ni Josafat, Jahaziel kag sang mga taga-Judea?
◻ Paano ang modernong-adlaw nga mga taga-Judea naghimu sing maayo nga sabat?
◻ Ano ang nagahatag sa aton sing pagsalig sa resulta sang “dakung kapipit-an”?
[Mga piktyur sa pahina 16 kag 17]
Kaangay ni Josafat, ang ginpalingkod nga si Jesus nagabulig karon sa katawhan sang Dios nga “magmadinalag-on” sa pagdayaw kay Jehova