Ang Paghukom nga Ginhimo sa Nalupyakan sang Desisyon
“Tuguti ang mga pungsod nga . . . magtaklad sa nalupyakan ni Josafat; kay didto magalingkod ako sa paghukom sa tanan nga pungsod.”—JOEL 3:12.
1. Ngaa may nakit-an si Joel nga mga kadam-an nga nagtipon sa “nalupyakan sang desisyon”?
“MGA kadam-an, mga kadam-an sa nalupyakan sang desisyon”! Mabasa naton ining makatalandog nga mga pulong sa Joel 3:14. Ngaa nagtipon ini nga mga kadam-an? Si Joel nagasabat: “Malapit na ang adlaw ni Jehova.” Amo ini ang daku nga adlaw sa pagbindikar kay Jehova—ang adlaw sa paghukom sa kadam-an nga nagsikway sa natukod na nga Ginharian sang Dios sa idalom ni Cristo Jesus. Sa katapusan, buy-an sang “apat ka anghel” sang Bugna kapitulo 7 ang ila hugot nga pagpugong sa “apat ka hangin sang duta,” nga magaresulta sa “dakung kapipit-an nga ang subong sini wala pa mahanabo kutob sa ginsuguran sang kalibutan tubtob karon, wala, kag indi na gid mahanabo.”—Bugna 7:1; Mateo 24:21.
2. (a) Ngaa ang duog sang paghukom ni Jehova nagakaigo nga gintawag “ang nalupyakan ni Josafat”? (b) Paano naghulag sing nagakaigo si Josafat sang ginsalakay sia?
2 Sa Joel 3:12, ang duog para sa sini nga paghukom gintawag nga “nalupyakan ni Josafat.” Sing nagakaigo, sadtong magamo nga tion sang maragtas sang Juda, si Jehova naghukom didto tungod sa mabuot nga si Hari Josafat, nga ang ngalan niya nagakahulugan sing “Si Jehova Hukom.” Ang pagbinagbinag sa natabo sadto magabulig sa aton nga mahangpan sing maayo ang mahanabo sa tion naton. Ang rekord masapwan sa 2 Cronica kapitulo 20. Sa bersikulo 1 sina nga kapitulo, aton mabasa nga “ang mga anak sang Moab kag ang mga anak sang Amon, kag upod sa ila ang iban sang mga Amonhon nag-abot batok kay Josafat sa pagpakig-away.” Ano ang reaksion ni Josafat? Ginhimo niya ang subong sang pirme nga ginahimo sang matutom nga mga alagad ni Jehova sa ital-ital nga tion. Nangayo sia sing panuytoy kay Jehova, nga nagapangamuyo sing tudok: “O Dios namon, indi mo bala paghukman sila? Kay wala kami sing kusog batok sa sining daku nga kadam-an nga nagakari batok sa amon; kag indi kami makahibalo kon ano ang himuon, apang ang amon mga mata yara sa imo.”—2 Cronica 20:12.
Si Jehova Nagasabat sing Pangamuyo
3. Anong mga instruksion ang ginhatag ni Jehova sa Juda sang ginsalakay sila sang kaiping nga mga pungsod?
3 Samtang ang “bug-os nga Juda nagtindog sa atubangan ni Jehova, upod sang ila mga magamay, sang ila mga asawa kag sang ila mga anak,” si Jehova naghatag sang iya sabat. (2 Cronica 20:13) Subong sang paggamit niya karon sa iya “matutom kag mainandamon nga ulipon,” paagi sa Levinhon nga manalagna nga si Jaziel, ginhatag sang Nagapamati sa pangamuyo ang Iya sabat sa sadtong nagtilipon. (Mateo 24:45) Aton mabasa: “Amo ini ang ginsiling ni Jehova sa inyo, ‘Dili kamo magkahadlok ukon magkahangawa bangod sining daku nga kadam-an; kay ang inaway indi inyo, kundi iya sang Dios. . . . Indi kinahanglan nga kamo mag-away sa sining inaway. Pahamtang kamo, pahimunong kamo kag tan-awa ang pagluwas ni Jehova tungod sa inyo. . . . Dili magkahadlok ukon magkahangawa. Buwas guwa kamo batok sa ila, kag si Jehova magaupod sa inyo.’ ”—2 Cronica 20:15-17.
4. Sa anong paagi ginsugo ni Jehova ang iya katawhan nga mangin aktibo, indi magpahimunong lamang, kon ginahangkat sila sang kaaway?
4 Wala ginsugo ni Jehova si Hari Josafat kag ang iya katawhan nga magpungko lamang, nga nagahulat sing milagruso nga pagluwas. Dapat sila maghulag agod madaug ang hangkat sang mga kaaway. Ang hari kag ang ‘bug-os nga Juda, upod sang ila mga magamay, sang ila mga asawa kag sang ila mga anak,’ nagpakita sing malig-on nga pagtuo samtang matinumanon sila nga nagbugtaw sing aga pa kag nagmartsa agod sugataon ang nagasalakay nga mga hangaway. Samtang yara sa dalanon, ang hari padayon nga naghatag sing teokratikong instruksion kag pagpalig-on, nga nagalaygay sa ila: “Magtuo kamo kay Jehova nga inyo Dios agod nga maglig-on kamo. Tuuhi ang iya mga manalagna kag magmadinalag-on.” (2 Cronica 20:20) Pagtuo kay Jehova! Pagtuo sa iya mga manalagna! Amo ina ang yabi para sa kadalag-an. Sa karon man, samtang padayon kita nga nagaalagad sing aktibo kay Jehova, kabay nga indi gid kita magduhaduha nga himuon niya ang aton pagtuo nga madinalag-on!
5. Paano nangin aktibo ang mga Saksi ni Jehova karon samtang ginadayaw nila si Jehova?
5 Kaangay sang mga taga-Judea sang mga adlaw ni Josafat, dapat naton ‘dayawon si Jehova, kay ang iya mahigugmaon nga kaayo tubtob sa walay katubtuban.’ Paano naton ginahimo ini nga pagdayaw? Paagi sa aton makugi nga pagbantala sing Ginharian! Subong nga yadtong mga taga-Judea ‘nagsugod sing malipayon nga pag-amba kag pagdayaw,’ ginadugangan man naton ang aton pagtuo sing mga buhat. (2 Cronica 20:21, 22) Huo, ipakita man naton ang tunay nga pagtuo samtang nagahanda si Jehova sa pagpanghikot batok sa iya mga kaaway! Walay sapayan nga daw malawig pa ang dalanon, mangin determinado kita sa pagbatas, aktibo sa pagtuo, subong sang ginahimo sang iya madinalag-on nga katawhan sa magamo nga mga duog sa duta sa karon. Sa pila ka kadutaan nga may paghingabot, kasingki, gutom, kag tuman nga kapigaduhon, ang matutom nga mga alagad sang Dios talalupangdon nga nagauswag, subong sang ginareport sang 1998 Yearbook of Jehovah’s Witnesses.
Ginaluwas ni Jehova ang Iya Katawhan
6. Paano ang mabakod nga pagtuo nagabulig sa aton nga magpabilin nga mainunungon karon?
6 Gintinguhaan sang didiosnon nga mga pungsod sa palibot sang Juda nga sakupon ang katawhan sang Dios, apang paagi sa dalayawon nga pagtuo ang mga alagad ni Jehova naghulag paagi sa pag-amba sing kadayawan sa iya. Mapakita naton ang kaanggid nga pagtuo sa karon. Paagi sa pagpuno sang aton kabuhi sing mga buhat sing kadayawan kay Jehova, ginapabakod naton ang aton espirituwal nga hinganib, nga wala ginatugutan nga makasulod ang malalangon nga mga padugi ni Satanas. (Efeso 6:11) Ang mabakod nga pagtuo magaupang sa pagsulay nga matublag sang malaw-ay nga kalingawan, materyalismo, kag indi pagsapak nga kinaandan sa nagatagumatayon nga kalibutan sa palibot naton. Ining mabakod nga pagtuo magabulig sa aton nga padayon nga mag-alagad sing mainunungon upod sa “matutom kag mainandamon nga ulipon” samtang padayon kita nga ginapakaon sang espirituwal nga pagkaon “sa nagakaigo nga tion.”—Mateo 24:45.
7. Paano naghulag ang mga Saksi ni Jehova sa madamo nga pag-atake sa ila?
7 Ang aton pasad-sa-Biblia nga pagtuo magapabakod sa aton nga magpabilin nga malig-on batok sa madinumtanon nga mga kampanya sadtong nagapadayag sing espiritu sang “malaut nga ulipon” sang Mateo 24:48-51. Nagatuman sini nga tagna sa talalupangdon nga paagi, ang mga apostata aktibo nga nagasab-ug sing mga kabutigan kag propaganda sa madamong kadutaan karon, nagapakighimbon pa gani sa mga may awtoridad sang mga pungsod. Kon nagakaigo, ang mga Saksi ni Jehova nagahulag, suno sa ginalaragway sang Filipos 1:7, paagi sa ‘pagpangapin kag legal nga pagpalig-on sa maayong balita.’ Halimbawa, sang Septiembre 26, 1996, sa isa ka kaso sa Gresya, ang siam ka huwes sang European Court of Human Rights, sa Strasbourg, hilisugot nga nagpamatuod liwat nga “ang mga Saksi ni Jehova mahimo gid matawag nga ‘kilala nga relihion,’ ” nga may kinamatarong sa pagtigayon sing kahilwayan sa hunahuna, konsiensia, kag pagtuluuhan, kag sing kinamatarong sa pagbantala sang ila pagtuo. Tuhoy sa mga apostata, ang paghukom sang Dios nagasiling: “Nahanabo sa ila suno sa matuod nga hulubaton: ‘Ang ido nagabalik sa iya kaugalingon nga suka, kag ang nayon nahugasan lamang sa pagtubog sa lunang.’ ”—2 Pedro 2:22.
8. Sang mga adlaw ni Josafat, paano ginhukman ni Jehova ang mga kaaway sang Iya katawhan?
8 Sadtong mga adlaw ni Josafat, ginhukman ni Jehova ang mga luyag maghalit sa Iya katawhan. Aton mabasa: “Nagbutang si Jehova sing mga manugpuot batok sa mga anak sang Amon, sang Moab kag sang bukid nga Seir nga nagkari batok sa Juda, kag naglinab-anay sila. Kag ang mga anak sang Amon kag sang Moab nagtindog batok sa mga pumuluyo sang Bukid nga Seir sa pagpatay kag sa paglaglag sa ila sing bug-os; kag sang natapos nila ang mga pumuluyo sang Seir, ang tagsatagsa nagbuligay sa paglaglag sa isa kag isa.” (2 Cronica 20:22, 23) Gintawag sang mga taga-Judea yadto nga lugar nga Nalupyakan ni Beraca, ang Beraca nagakahulugan sing “Pagpakamaayo.” Sa moderno man nga tion, ang paghukom ni Jehova sa iya mga kaaway magaresulta sa daku nga pagpakamaayo sa iya kaugalingon nga katawhan.
9, 10. Sin-o ang nagpakita nga takus sing malaglagon nga paghukom ni Jehova?
9 Mahimo nga mamangkot kita, Sin-o sa modernong tion ang makabaton sing malaglagon nga paghukom gikan kay Jehova? Agod masabat ina nga pamangkot, balikan naton ang tagna ni Joel. Ang Joel 3:3 nagapamulong tuhoy sa mga kaaway sang iya katawhan nga ‘nagbaylo sang bata nga lalaki sa isa ka makihilawason, kag nagbaligya sang bata nga babayi tungod sa alak.’ Huo, ginatamod nila ang mga alagad sang Dios nga kubos gid sa ila, ang ila kabataan subong katumbas lamang sang bili sang ginabayaran nga makihilawason ukon sang bili sang isa ka galon sang alak. Manabat sila tungod sina.
10 Takus man nga hukman amo yadtong nagahimo sing espirituwal nga pagpakighilawas. (Bugna 17:3-6) Kag ang labi gid ka makasasala amo yadtong nagasugyot sa politikal nga mga kagamhanan nga hingabuton ang mga Saksi ni Jehova kag punggan ang ila hilikuton, subong sang ginhimo sang mga manugtuga sing gamo nga mga relihiosong mga lider sa Nasidlangan nga Europa sining karon lang. Ginapakita ni Jehova ang iya determinasyon nga maghulag batok sa sinang manughimo sing kalautan.—Joel 3:4-8.
“Pakabalaana ang Inaway!”
11. Paano ginhangkat ni Jehova ang iya mga kaaway sa inaway?
11 Masunod, ginsugo ni Jehova ang iya katawhan nga hangkaton sa inaway ang mga pungsod: “Pakabalaana ang inaway! Pukawa ang mga tawo nga gamhanan! Papalapita sila! Pataklara sila, ang tanan nga mga tawo sang inaway!” (Joel 3:9) Isa ini ka deklarasyon sang pinasahi nga inaway—isa ka matarong nga inaway. Ang mainunungon nga mga Saksi ni Jehova nagasandig sa espirituwal nga mga hinganiban samtang ginapakigbatuan nila ang butig nga propaganda, ginabatuan ang kabutigan paagi sa kamatuoran. (2 Corinto 10:4; Efeso 6:17) Sa indi madugay, pakabalaanon sang Dios “ang inaway sang dakung adlaw sang Dios nga Labing Gamhanan.” (Bugna 16:14) Dulaon sini sa duta ang tanan nga nagapamatok sa pagkasoberano sang Dios. Ang iya katawhan sa duta indi magapakigbahin sing pisikal sa sini. Sing literal kag malaragwayon, ‘ginsalsal nila ang mga espada nga mga punta sang arado kag ang mga bangkaw nga mga galab nga inughagbas.’ (Isaias 2:4) Sa kabaliskaran, ginahangkat ni Jehova ang mga pungsod nga himuon ang kabaliskaran sini: “Salsala ang inyo mga punta sang arado nga mga espada kag ang inyo mga galab nga inughagbas nga mga bangkaw.” (Joel 3:10) Ginaagda niya sila nga gamiton ang ila bug-os nga tinago nga mga armas kag moderno nga mga armas sa inaway. Apang indi sila magamadinalag-on, kay ang inaway kag ang kadalag-an iya ni Jehova!
12, 13. (a) Walay sapayan nga natapos ang Cold War, paano ginpakita sang madamo nga pungsod nga mahuyugon gihapon sila sa inaway? (b) Ano ang wala mahandaan sang mga pungsod?
12 Sang maaga nga bahin sang katuigan 1990, ang mga pungsod nagsiling nga ang Cold War natapos na. Apang, natigayon gid bala sang Nasyones Unidas ang pangunang tulumuron sini nga paghidait kag kalig-unan? Wala gid! Ano ang ginasugid sa aton sang mga hitabo sa Burundi, sa Demokratiko nga Republika sang Congo, Iraq, Liberia, Rwanda, Somalia, kag sang anay Yugoslavia? Suno sa mga pinamulong sang Jeremias 6:14, sila nagasiling, “ ‘Paghidait! Paghidait!’ nga wala sing paghidait.”
13 Walay sapayan nga nag-untat ang mga inaway sa pila ka duog, ang katapo nga mga pungsod sang Nasyones Unidas padayon nga nagapaindisanay sa paghimo sing madamo pa nga moderno nga hinganiban sa inaway. Ang iban padayon nga nagatago sing nuklear nga mga hinganiban. Ang iban nagahimo sing kemikal ukon bakteryolohikal nga mga hinganiban nga makapatay sing madamo nga tawo. Samtang nagatipon ang mga pungsod sa simbuliko nga duog nga ginatawag Armagedon, ginahangkat niya sila: “Tuhoy sa maluya, pasilinga sia: ‘Mabakod ako.’ Dalidali kamo kag magkari, kamo tanan nga pungsod sa palibot, kag tilipon kamo sing tingob.” Nian ginsal-ot ni Joel ang iya pangabay: “O Jehova, padulhuga didto ang imo mga gamhanan.”—Joel 3:10, 11.
Ginaamligan ni Jehova ang Iya Katawhan
14. Sin-o ang mga gamhanan ni Jehova?
14 Sin-o ang mga gamhanan ni Jehova? Mga 280 ka beses sa Biblia, ang matuod nga Dios ginatawag nga si “Jehova sang mga kasuldadusan.” (2 Hari 3:14) Ining mga kasuldadusan amo ang hubon sang mga anghel sa langit nga nakahanda sa pagtuman sang sugo ni Jehova. Sang luyag dakpon sang mga Sirianhon si Eliseo, ginbuksan ni Jehova ang mata sang alagad ni Eliseo agod iya makit-an kon ngaa wala sila magmadinalag-on: “Yari karon! Ang bukid hil-ob sang mga kabayo kag sang mga kangga nga kalayo sa palibot ni Eliseo.” (2 Hari 6:17) Si Jesus nagsiling nga mahimo sia makapangabay sa iya Amay sing “kapin sa napulog-duha ka lehiyon nga anghel.” (Mateo 26:53) Nagalaragway kay Jesus nga nagasakay sa paghukom sa Armagedon, ang Bugna nagasiling: “Ang mga hangaway sang langit nagasunod sa iya sa mga kabayo nga puti, kag napanaptan sila sing maputi, matinlo, manipis nga lino. Kag gikan sa iya baba nagaguwa ang malaba nga espada nga matalom, nga sa sini lab-on niya ang mga pungsod, kag gahuman niya sila sa bilugon nga salsalon. Tasakon man niya ang linasan sang alak sang kapintas sang kasingkal sang Dios nga Labing Gamhanan.” (Bugna 19:14, 15) Inang malaragwayon nga linasan sang alak ginalaragway sing maathag subong “ang dakung linasan sang alak sang kasingkal sang Dios.”—Bugna 14:17-20.
15. Paano ginlaragway ni Joel ang pagpakig-away ni Jehova batok sa mga pungsod?
15 Paano, nian, ginasabat ni Jehova ang pangabay ni Joel nga padulhugon ang mga gamhanan mismo sang Dios? Paagi sa sining maathag nga nga pinamulong: “Maghulag ang mga pungsod kag magtaklad sa nalupyakan ni Josafat; kay didto magalingkod ako sa paghukom sa tanan nga pungsod sa palibot. Igulo ninyo ang galab, kay gulang na ang alanyon. Kari, linas kamo, kay ang ipitan puno. Nagaalawas ang mga kawa; kay daku ang pagkamalaut nila. Mga kadam-an, mga kadam-an sa nalupyakan sang desisyon, kay malapit na ang adlaw ni Jehova sa nalupyakan sang desisyon. Ang adlaw kag ang bulan magadulom, kag ang kabituunan magauntat sa pagsilak. Kag si Jehova magangurob gikan sa Sion, kag magapatunog sang iya tingog gikan sa Jerusalem. Kag ang mga langit kag ang duta magakurog.”—Joel 3:12-16.
16. Sin-o ang nalakip sa sadtong pagahukman ni Jehova?
16 Subong nga ang ngalan ni Josafat nagakahulugan sing “Si Jehova Hukom,” sing subong man kapat-od, si Jehova nga Dios, bug-os nga magabindikar sang iya pagkasoberano sa iya paghukom. Ginalaragway sang tagna ang mga makabaton sing malaglagon nga paghukom subong ‘mga kadam-an, mga kadam-an sa nalupyakan sang desisyon.’ Ang nabilin nga sumalakdag sang butig nga relihion malakip sa sinang mga kadam-an. Malakip man amo ang mga ginlaragway sa ikaduhang Salmo—ang mga pungsod, nasyonal nga mga grupo, mga hari sang duta, kag mataas nga mga opisyal—nga nagpasulabi sa garok nga sistema sining kalibutan sa baylo nga ‘mag-alagad kay Jehova sa kahadlok.’ Wala sila ‘maghalok sa anak nga lalaki.’ (Salmo 2:1, 2, 11, 12) Wala nila pagkilalaha si Jesus subong kaupod nga Hari ni Jehova. Dugang pa, ang kadam-an nga gintandaan para sa kalaglagan nagalakip sa tanan nga tawo nga pagahukman sang mahimayaon nga Hari subong “mga kanding.” (Mateo 25:33, 41) Sa gintalana nga tion ni Jehova sa pagngurob gikan sa langitnon nga Jerusalem, ang iya gintangdo nga Hari sang mga hari magasakay sa paghimo sina nga paghukom. Ang langit kag duta magatay-og gid! Apang, ginapasalig kita: “Si Jehova mangin dalangpan sang iya katawhan, kag pamakod sa katawhan sang Israel.”—Joel 3:16.
17, 18. Sin-o ang nakilal-an subong mga nakalampuwas sa dakung kapipit-an, kag ano nga kahimtangan ang matigayon nila?
17 Ginapakilala sang Bugna 7:9-17 yadtong nakalampuwas sa dakung kapipit-an subong “dakung kadam-an” nga ginahuman sadtong may pagtuo sa nagagawad nga gahom sang dugo ni Jesus. Makasapo sila sing pangamlig sa adlaw ni Jehova, samtang ang nagtipon nga mga kadam-an sa tagna ni Joel pagahukman sing malaglagon. Si Joel nagasiling sa mga makalampuwas: “Makilala ninyo nga ako amo si Jehova nga inyo Dios, nga nagapuyo sa Sion nga akon bukid nga balaan,” ang langitnon nga puluy-an ni Jehova.—Joel 3:17a.
18 Nian ginasugiran kita sang tagna nga ang sakop sang langitnon nga Ginharian sang Dios “mangin balaan nga duog; kag tuhoy sa mga dumuluong, indi na sila magaagi sa iya.” (Joel 3:17b) Sa langit kag sa duta nga sakop sinang langitnon nga Ginharian, wala na sing mga dumuluong, kay ang tanan mahiusa sa putli nga pagsimba.
19. Paano ginalaragway ni Joel ang tulad paraiso nga kalipay sang katawhan sang Dios sa karon?
19 Bisan sa karon, nagaluntad ang bugana nga paghidait sa tunga sang katawhan ni Jehova diri sa duta. Sing nahiusa, ginawali nila ang iya mga paghukom sa kapin sa 230 ka kadutaan kag sa kapin sa 300 ka lainlain nga hambal. Matahom nga gintagna ni Joel ang ila kabuganaan: “Sa sadtong adlaw ang kabukiran magapatubod sing matam-is nga alak, kag ang kabakuluran magapailig sing gatas, kag ang tanan nga kasapaan sa Juda magapailig sing mga tubig.” (Joel 3:18) Huo, si Jehova padayon nga magabubo sa iya mga dumalayaw sa duta sing nagaawas nga makalilipay nga mga kabulahanan kag kabuganaan kag dugang nga pag-ilig sang hamili nga kamatuoran. Ang pagkasoberano ni Jehova mabindikar sing bug-os sa nalupyakan sang desisyon, kag ang kalipay magabugana samtang nagapuyo sia sing dayon kaupod sang iya gintubos nga katawhan.—Bugna 21:3, 4.
Madumduman Mo Bala?
◻ Paano ginluwas ni Jehova ang iya katawhan sang mga adlaw ni Josafat?
◻ Sin-o ang ginhukman ni Jehova nga takus sing kalaglagan sa ‘nalupyakan sang desisyon”?
◻ Sin-o ang mga gamhanan sang Dios kag ano ang ila bahin sa katapusan nga inaway?
◻ Ano nga mga kalipay ang natigayon sang matutom nga mga sumilimba?
[Retrato sa pahina 21]
Ang Juda ginsilingan: ‘Indi magkahadlok kay ang inaway indi inyo kundi iya sang Dios’
[Retrato sa pahina 23]
Ginhangkat ni Jehova ang iya mga kaaway nga ‘salsalon ang ila mga arado nga mga espada’
[Retrato sa pahina 24]
Ginapakilala sang Biblia ang dakung kadam-an sang mga makalampuwas sa dakung kapipit-an