Ginpat-od Bala sang Dios ang Imo Kapalaran?

MADAMU ang kombinsido nga ginpat-od nga daan sang Dios ang kapalaran sang tawo. Kag nagbatyag sila nga sigurado nga ginapamatod-an ini sang Biblia nga Matuod.

Halimbawa, mahimu itudlo sang iban ang kaso nanday Esau kag Jacob. Yara pa sila sa taguangkan sang nagtagna ang Dios: “Alagaron sang magulang ang manghud.” (Genesis 25:23) Sing kaanggid, nahibal-an sing abanse sang Dios nga si Samson, si Jeremias kag si Juan Bautista magahimu sang gamhanan nga mga buhat sa pag-alagad sa iya. (Hukom 13:3-5; Jeremias 1:5; Lucas 1:13-17) Wala bala ini nagakahulugan nga gintangdo na sila nga daan sa dayon nga kaluwasan?

Dugang pa, kamusta naman si Judas Iscariote? Antes pa sia matawo, ang mga tagna sa Kasulatan nagahambal nahanungod sa pagluib kay Jesus. (Sal. 41:9; 55:12, 13) Ang Biblia nagasiling pa gani nga “kutob sa ginsugoran” nahibal-an ni Jesucristo kon sin-o ang magaluib sa iya.—Juan 6:64.

Sa kapawa sang nasambit na nga mga punto, ano ang masiling mo? Nagatudlo bala ang Biblia nga ginatangdo nga daan sang Dios ang iban sa dayon nga kaluwasan kag ang iban pa gid sa katagudilian? Ginpat-od bala sang Dios ang imo kapalaran?

Kapalaran—Ang mga Ideya

Antes sabton ining mga pamangkot, binagbinaga ang ideya sang kapalaran. Kon matuod ini nga doktrina, magakahulugan ini nga nahibal-an na nga daan sang Dios ang tanan nga mahimu nga resulta sang pagtuga niya sa tawo—ang pagtalikod nanday Adan kag Eva, ang mga inaway, ang krimen, ang imoralidad, ang pagpigos, ang pagbutig, ang pagkasalimpapaw, ang balatian. Paagi sa paghambal, “Himuon ta ang tawo,” kon amo, hungod nga gintangdo sang Dios ang tanan diri nga kalautan nga ginabuhat! (Genesis 1:26) Busa, ang pagbutang sang Dios kanday Adan kag Eva sang paglaum nga kabuhi nga walay katapusan pakunokuno lamang. Gani amo man ang pangagda sang Biblia, “Ang buot magkuha sang tubig sang kabuhi sa walay katapusan.”—Bugna 22:17.

Apang ang Biblia nagasiling nga si Jehova Dios nga “bugana sa mahigugmaon nga kaluoy kag kamatuoran.” (Exodo 34:6) Indi gid sia magatanyag sang pila ka butang nga nahibal-an niya nga imposible para sa isa nga tigayunon. Si Jesucristo namangkot: “Sin-o bala ang tawo sa inyo nga kon ang iya anak magpangayo sing tinapay—magahatag sa iya sing bato? .. . . Nian, kon kamo, nga malaut, makahibalo maghatag sing maayo nga mga dulot sang inyo mga anak, daw ano pa gid nga maayo nga mga butang ang ihatag sang inyo Amay nga yara sa langit sa mga nagapangayo sa iya?” (Mateo 7:9-11) Dugang pa, kon gintangdo na anay sang Dios sing sibu kon sin-o ang makatigayon sang dayon nga kaluwasan kag kon sin-o ang dayon nga laglagon, ngaa ang Biblia nagasiling nga “Si Jehova . . . mabinatason sa inyo nga wala nagahandum nga mawala ang bisan sin-o kundi nga ang tanan makadangat sang paghinulsul”?—2 Pedro 3:9.

Busa, ang kapalaran nagasumpakil sa kon ano gid ang ginatudlo sang Biblia nahanungod sa Dios. ‘Apang indi bala nga ang paglatid sa ihibalo sang Dios sa palaabuton magapadiutay sang iya pagkalabing gamhanan? mahimu ipamangkot mo, indi gid. Sa Tito 1:2, Halimbawa, aton naton-an nga “ang Dios . . . indi makabutig.” Apang nagapakadiutay bala ini sa pagkalabing gamhanan sang Dios? Indi, sa baylo, nagapadaku ini sa pagkamaminatud-on sang Dios.

Ginlaygayan ni apostol Pablo ang mga Cristiano nga ginhatagan sang dulot sa pagpanagna: “Ang mga dulot sang mga espiritu sang mga manalagna ginapasakop sa mga manalagna. Kay ang Dios indi Dios sang kagamo kundi sang paghidait.” (1 Corinto 14:32, 33) Inang mga manalagna indi magahambal sing magamo kundi magapaambit sang ila matagnaon nga mga mensahe sa mahim-ong nga paagi. Agod mahimu ini, kinahanglan ang pagpugong sa kaugalingon. Sa pagkamatuod, nian, ang Dios makasarang man sa paggamit sang iya paghibalo nga daan sing mapilion, nagagamit lamang sini kon may kabangdanan ukon katuyoan sa paghimu sini.—Ipaanggid ang Genesis 22:1, 12.

Ang Ihibalo nga Daan sang Dios

Mga 40 ka tuig sa tapos maorganisar ang Israelinhon subong isa ka pungsod, gintagna sang Dios nga lapason nila ang iya katipan upod sa ila. Apang, ining paghibalo nga daan indi nga wala sing sadsaran, subong nga ang pungsodnon nga pagkadimatinumanon kag pagrebelde natabo na. Gani, ang Dios nagsiling: “Kay nahibaloan ko ang ila painoino nga ginahuman nila sining adlaw sa wala ko pa sila mapasulod sa duta nga ginsumpa ko.” (Deuteronomio 31:20, 21) Subong nga ang may ikasarang nga manunukod mahimu makapakot sang pagkapukan sang isa ka tinukod nga may mapigaw nga materyalis, makita man ni Jesus ang direksion nga ginapadulongan sang pungsod. Apang, ang mga indibiduwal sarang kag naghulag kag gani nakabenepisyo gikan sa laygay nga ginhatag paagi sa mga manalagna sang Dios.—Jeremias 21:8, 9; Ezequiel 33:1-20.

Si Jesucristo man nagtagna sing kalaglagan para sa relihiosong mga lider nga kilala subong mga escriba kag mga Fariseo. (Mateo 23:15, 33) Apang, wala ini nagakahulugan nga ang kada kag tagsa ka Fariseo ukon escriba nagapadulong sa Gehena. Si apostol Pablo mismo isa anay ka makugi nga Fariseo!—Binuhatan 26:4, 5.

Matuod, natagna sang Dios ang dalanon sang pila ka indibidual, subong nanday Jacob kag Esau. Apang indi ini kapalaran. Sa kaso nanday Esau kag Jacob, nahibaloan lamang sang Dios kon diin ang pungsodnon nga mga grupo nga magahalin sa ila ang makatigayon sing pagginahom sa ibabaw sang isa. (Genesis 25:23-26) Apang, wala sing ginapakita nga ginpat-od sang Dios ang ila dayon nga destinasyon. Ang kalabanan sang disposisyon kag temperamento sang bata daw nahuman bangod sang genetiko nga mga rason. Mahimu nga ginbinagbinag ni Jehova ang genetiko nga pagkahuman nanday Esau kag Jacob sa pagpat-od kon diin nga bata ang magagahom.—Ipaanggid ang Salmo 139:14-16.

Sing kaanggid, gingamit ni Jehova nga iya paghibalo nga daan nahanungod kanday Samson, Jeremias kag Juan Bautista. Apang, ining ihibalo nga daan, wala nagagarantiya nga magapabilin sila nga matutom tubtob kamatayon. Nagtagna man ang Dios nga ang isa sa mga anak nga lalaki ni David pagahingalanan nga Solomon kag nga si Solomon pagagamiton sa pagpatindog sa templo. (1 Cronica 22:9, 10) Apang, si Solomon nahulog sa apostasya sang ulihi niya nga tinuig.—1 Hari 11:4, 9-13.

Apang kamusta si Judas Iscariote? Indi bala nga ang maluibon nga dalanon sang isa sang mga disipulo ni Jesus maathag na nga daan nga gintagna? Huo, apang ang mga tagna wala nagapakilala kon sin-o sa mga disipulo ang magaluib. Sa pagkamatuod, ano abi kon nahibal-an ni Jesus nga si Judas ang magaluib? Kon amo ang pagtangdo ni Jesus kay Judas subong apostol magahimu sa iya nga “umalambit” sa mga sala sinang maluib. (Ipaanggid ang 1 Timoteo 5:22) Ang Dios mismo mahimu nga maumid, sanglit gin-unahan ni Jesus ang iya pagpili kay Judas sing hanuot nga pangamuyo kay Jehova.—Lucas 6:12-16.

Apang, si Jehova ‘indi ignorante sa mga pahito ni Satanas.’ (Ipaanggid ang 2 Corinto 2:11) Nahibal-an niya nga gingamit anay ni Satanas nga Yawa ang suod nga abyan sang tawo subong ang maluib, subong sang ginhimu niya sa kaso sang abyan ni David nga si Ahitofel. Busa, si Satanas, indi ang Dios “ang nagbutang sa tagipusuon ni Judas Iscariote, nga anak ni Simon, nga luiban” si Jesucristo. (Juan 13:2; 2 Samuel 15:31) Sa baylo nga batoan ang impluensia ni Satanas ginpahanugotan ni Judas ang sala nga mangibabaw sa iya. Kag sa pila ka punto nabasa ni Jesus ang tagipusuon ni Judas kag gani matagna ang iya pagluib. (Juan 13:10, 11) Kon amo nahibal-an ni Jesus ang nahanungod sa pagluib ni Judas “kutob sa ginsugoran”—indi sang makilala niya si Judas kundi kutob sa “ginsugoran” sang maluibon nga paghulag niya.—Juan 6:64.

Gintangdo nga Daan sang Dios

Busa, ang paghibalo nga daan sang Dios indi gid bangod sang pila ka kapritso. Ginsilingan ni apostol Pablo ang masigkahinaplas nga mga Cristiano: “Gintangdoan kita nga daan suno sa katuyoan niya [ni Jehova nga Dios] nga nagatuman sang tanan nga butang suno sa laygay sang iya kabubut-on.” (Efeso 1:11) Kutob sang mahulog ang tawo sa sala, tuyo na sang Dios nga bindikahon ang Iya ngalan paagi sa iya Ginharian. Bangod sina, kon kaisa gingamit sang Dios ang iya ikasarang agod makita sang Dios ang iya ikasarang agod makita nga daan ang palaabuton. Halimbawa, gintangdo niya nga daan nga may yara isa ka klase sang mga masigkamanunubli kaupod ni Jesucristo sa Ginharian, bisan pa nga ang mga indibiduwal dapat pamatod-an nga matutom agod mangin bahin sini.—2 Pedro 1:10, 11.

Ang paghibalo sa maathag nga panudlo sang Biblia sa sini nga bagay magabulig sa imo nga makatigayon sing maayo nga pagtamod sa palaabuton. Wala ginapat-od nga daan sang Dios ang imo kapalaran. Sa baylo, magamit mo ang hilway nga kabubut-on nga ginhatag ni Jehova nga Dios sa mga tinuga nga ginhimu “sa iya larawan.” (Genesis 1:27) Sarang ka makapili sang maalamon nga pili kag bug-os tagipusuon nga makasabat sa tanyag ni Jehova nga Dios nga kabuhi nga walay katapusan.—Juan 17:3.