Ang Pulong sang Dios Buhi

Diin nga Dios ang Imo Alagaron?

ANG pamangkot sa hitaas nagakaigo karon subong nga amo man anay halos 3,000 ka tuig na ang nagligad. Ginpamangkot sadto sang manalagna ni Jehova nga si Elias ang katawhan sang Israel: “Tubtob pa bala san-o magpiniang kamo sa tunga sang duha ka panghunahuna?” Ang katawhan indi makapamat-od kon diin nga Dios ang ila alagaron. Gani si Elias nagsiling: “Kon si Jehova amo ang matuod nga Dios, sunda sia; apang kon si Baal, nian sunda sia.”

Paano makapamat-od ang katawhan? Ginpanugda ni Elias ang pagtilaw sa kalayo. ‘Papilia ang inyo 450 ka manalagna ni Baal sing isa ka tinday nga baka,’ siling niya, ‘hiwahiwaa ini kag itungtong ini sa gatong subong halad, apang indi nila ini pagsindotan. Kag magakuha ako sing isa pa ka tinday nga baka kag himuon man ini. Nian patawga sila sa ngalan ni Baal, kag magapanawag ako sa ngalan ni Jehova. Kag ang Dios nga nagasabat paagi sa kalayo amo ang matuod nga Dios.’ Tanan sila nag-ugyon nga maayo ini nga pagtilaw.

Una nga naghanda ang mga manalagna ni Baal sing isa ka tinday nga baka sa ila halaran. Nian, kutob sa aga tubtob gid sa udto, nanawag sila: “O Baal, sabta kami!” Apang wala sing sabat. Kag sa udto si Elias nag-uligyat sa ila: “Singgit kamo sing mabaskog, kay ayhan nagapamus-on sia. Ukon ayhan nagakatulog kag dapat pukawon.’ Bangod sini, ang mga manalagna ni Baal nagtuaw sing mabaskog kag ginpilas nila ang ila kaugalingon sang mga sundang kag mga bangkaw tubtob nga nag-agay ang dugo sa ila. Apang wala gihapon magsabat si Baal. Karon ginkay-o ni Elias ang halaran ni Jehova nga nawagwag. Ginhiwahiwa niya ang tinday nga baka kag ginbutang ini sa gatong. Nian tatlo ka beses nga ginbasa niya ang halad, ang kahoy kag ang bato sa halaran. Kag ginpuno man niya sing tubig ang daku nga kalog nga ginhimu niya sa palibot sang halaran.

Sang ulihi, sang maggab-i na, nangamuyo si Elias: “Pamatii ako, O Jehova, pamatii ako, agod nga ini nga katawhan magkilala nga ikaw, si Jehova, amo ang matuod nga Dios.” Sa sina, ang kalayo gikan kay Jehova nahulog. Gin-upos sini ang halad nga sinunog, ang gatong, ang bato kag ang yab-ok, kag ang tubig man sa kalog. Sang makita ini sang katawhan, naghapa sila kag nagsiling: “Si Jehova ang matuod nga Dios!”—1 Hari 18:21-40.

Nakapamat-od ka na bala kon diin nga Dios ang imo alagaron? Indi mahimu nga magpiniang ka sa duha ka panghunahuna. Isa lamang ang husto nga paagi. Ginasimba karon ang Dios sining sistema sang mga butang, si Satanas nga Yawa, apang indi paagi sa pag-alagad sa pila ka lokal nga dios sa agrikultora, subong kay Baal sang dumaan nga panahon. Sa baylo si Satanas ginasimba kon ginauna sang katawhan ang materyal nga mga butang, nagaalagad sang ila kaugalingon nga intereses sa baylo nga himuon ang kabubut-on sang ila Manunuga, si Jehova nga Dios. Gani yara sa imo ang pagpili. Ginpakita ni Jesucristo ang husto sang ginkutlo niya ang Pulong sang Dios kag nagsiling: “Si Jehova nga imo Dios ang imo dapat simbahon, kag sa iya lamang ikaw maghimu sang balaan nga pag-alagad.”—Mateo 4:10.