Sarang Mo Matigayon ang Malipayon nga Palaabuton
GINAPAKITA sang isa ka talalupangdon nga hitabo sang nahaunang siglo sang aton Kumon nga Dag-on kon paano ang labi pa sa kombensional nga kaalam kinahanglan agod makaplano kita sing madinalag-on nga palaabuton. Sadto anay ang kalabanan sa kalibutan napaidalom sa imperyal nga paggahom sang Roma. Ang tumandok nga duta ni Jesucristo, ang Palestina, diutay lamang nga bahin sang daku nga Romanong Emperyo. Apang ang mga Judiyo didto may daku nga mga ideya. Supak sila sa Romanong pagginahom kag masami nga nagrebelde. Isa sini, ginapatihan sang kombensional nga kaalam nga ang Dios yara sa ila kiliran.
Sang ikapito nga dekada sang nahaunang siglo, ginapanikasogan katama sang mga Judiyo nga balion ang gota sang Romano. Nagkari batok sa ila ang Romanong kasoldadosan kag halos naagaw ang siudad sang Jerusalem kag dayon nagmartsa palayo. Abi sang mga rebelde nagdaug sila paagi sa bulig sang Dios. Apang, nagtagna na si Jesus nga ang siudad pagalaglagon. Busa gingamit sang matutom nga mga Cristiano ang pag-isol sang mga Romano subong kahigayunan nga magpalagyo gikan sa siudad. (Mateo 23:33-39; Lucas 21:20-24) Dili madugay nga nakahalin sila, ang mga Romano nagbalik. Sang 70 C.E. ang siudad sang Jerusalem ginlaglag kag ang mga pumuluyo sini ginpamatay ukon ginbaligya sa kahiolipnan. Yadto lamang ang namati sing maalamon sa paandam ni Jesus ang nakapalagyo sa sinang makangilidlis nga eksperiensia.
Dramatiko yadto nga demonstrasyon sang pagkamatuod sining hulubaton sa Biblia: “Ang kaalam pangapin subong nga ang kuarta pangapin; apang ang pagkalabaw sa ihibalo amo nga ang kaalam nagatipig sang kabuhi sang may iya sini.” (Manugwali 7:12) Paagi kay Cristo, ang Dios naghatag sa mga sumulunod ni Jesus sing ihibalo sa kon ano ang mahanabo. Maalamon sila nga naghulag suno sa sina nga ihibalo, kag inang “kaalam sang Dios” nagluwas sa ila sa isa ka kahimtangan diin ang kuarta, sekular nga edukasyon kag iban pa wala gid sing balor.—1 Corinto 1:21.
Sa dipat-od nga kalibutan karon, madamu ang nahadlok nga magadangat sila kaangay sadtong mga Judiyo sa Jerusalem. Ang tanan nila nga plano para sa palaabuton mapaslawan bangod sang kapahamakan nga indi nila personal nga kontrolado. Gani, ang kinahanglan naton amo ang amo man nga sahi sang kaalam sang nahaunang siglo nga mga Cristiano—ang paghangop sa kon ano gid ang ginatigana sang palaabuton kag kon ano ang labing maalamon nga himuon.
Diin Naton Masapwan Ina nga Kaalam?
Kada tuig linibo ka tolon-an ang ginabalhag, nagatuptop sang kada topiko nga mahanduraw. Apang, walay sapayan sining impormasyon, ang palaabuton daw makatalagam. Karon, walay sapayan, may isa ka tolon-an nga tuhay gikan sa tanan iban nga publikasyon. Ang pagsulat sini nagsugod na antes sang kaadlawan ni Solomon, kag narekord sa sini ang madamung “pinamulong sang maalam” nga kaangay sang “suntok”—nagatiklod sa mabinatunon nga tawo nga maghulag sing maalamon. (Manugwali 12:11) Sang magkari si Jesus sa duta, ang dakung bahin sining tolon-an nasulat na, kag gingamit niya ang laygay sini sing hilway sa pagbulig sa iya mga sumulunod nga maghulag sing maalamon. Ginpatuhoyan ni Jesus ining maalam nga pinamulong sang magsiling sia: “Nasulat na, ‘Ang tawo mabuhi, indi lamang sa tinapay, kundi sa tagsa ka pulong nga nagaguwa sa baba ni Jehova.’”—Mateo 4:4.
Siempre, ina nga tolon-an amo ang Biblia. Apang paano ang Biblia tuhay gikan sa walay katapusan nga raya sang mga tolon-an nga ginbalhag karon? Isa ka butang, nagahatag ini sang tuhay nga sahi sang ihibalo. Diin ka pa makatuon sang kamatuoran nahanungod sa kon paano gintuga ang tawo kag kon ngaa nagakapatay sia? Anong iban nga tolon-an ang nagasabat sa mga pamangkot subong sini: Ngaa ginapahanugotan sang Dios ang kalautan? Ano ang madangatan sining kalibutan? May katuyoan bala sa kabuhi? Ang Biblia nagahatag sing matinuoron nga mga sabat sa sini kag sa madamu pa iban nga pamangkot.
Ang Biblia nagahatag man sa aton sing maalam kag praktikal nga laygay sa matag-adlaw nga pagkabuhi. Nagapaandam ini batok sa malain nga mga resulta sang pagpahubog, seksuwal nga imoralidad kag pisikal nga kahigku. Ginapadaku sini ang maayong mga epekto sang gugma, pagpugong sa kaugalingon kag pagkadimakagud. Nagahatag ini sang talaksan para sa pag-asawahay nga magamdinalag-on gid kag nagahatag sang hamili nga bulig sa pagtigayon sang malipayon nga pagkabuhi sang pamilya. Ang pagsunod sa laygay sang Biblia magahimu sa aton nga maplano ang makapaladya nga palaabuton.—1 Corinto 6:9-11; 13:4-8; Galacia 5:22-24; Efeso 5:21–6:4.
Kinahanglan Gid nga Impormasyon
Apang, ang Biblia labi na nga daku sing balor bangod nagasugid ini sa aton tuhoy kay Jehova nga Dios, ang Manunuga. Ang pahibalo nahanungod kay Jehova importante bangod sia ang Tuboran sang tanan nga ihibalo. Ti, bisan ang mga butang nga naton-an sang mga tawo nahanungod sa pagpanuga kag uniberso makatudlo sa ila nahanungod sa Dios! Ang Biblia nagasiling: “Ang mga langit nagapahayag sang himaya sang Dios; kag ang kahawaan nagapakita sang binuhatan sang iya mga kamut.” Sa pagkamatuod, ang iya sang Dios ‘dimakita nga mga kinaiya mahantupan paagi sa mga butang nga nahimu.’ (Salmo 19:1; Roma 1:20) Ang mga mananalawsaw kag mga sientipiko nga wala nagabinagbinag sa Dios mahimu gid nga makahimu sing sayop ukon dikompleto nga konklusion.
Ang paghibalo nahanungod kay Jehova importante man bangod ginapakita sini nga ang Dios may iya kaugalingon nga mga katuyoan para sa duta kag katawhan. “May madamu nga mga pahito sa tagipusuon sang tawo, apang ang laygay ni Jehova magapadayon.” (Hulubaton 19:21) Bisan ano man ang nahimu sang tawo, kon ang ila plano wala nahisuno sa katuyoan sang Dios, indi gid sila magmadinalag-on.—Salmo 127:1.
“Ang kahadlok kay Jehova amo ang pamuno sang ihibalo,” siling ni Hari Solomon. (Hulubaton 1:7) Ang kaalam nga napasad sa sina nga ihibalo may matuod nga balor sa pagplano sang tawo para sa palaabuton. Apang ginpakilala man sang Biblia si Jesucristo subong ang “Makatilingala nga Manuglaygay.” (Isaias 9:6) Gani paano naton madinalag-on nga maplano ang palaabuton kon ginapasapayan naton sia? Dapat naton pamatian ang iya “pulong sang kabuhi nga walay katapusan” nga naamligan sa Biblia. (Juan 6:68) Dugang pa, dapat naton sia kilalahon subong ang dakung gintangdo nga Hari sang Dios, ang Isa nga magahukom sa tanan nga katawhan. (Juan 5:22) Kag dapat kita maghulag sa sinang dakung gugma nga ginpakita niya sa paghatag sa iya kabuhi subong halad para sa mga sala sang katawhan.—Juan 3:16; 1 Juan 2:1, 2.
Huo, si Jesus importante gid katama nga pigura sa maragtas sang tawo, kag ang bisan anong plano nga wala nagabinagbinag sa iya indi malig-on. Matuod gid ini kon binagbinagon naton ang ginsiling ni manalagna Daniel nahanungod sa iya. Nagahambal tuhoy sa Ginharian sang Dios sa idalom ni Jesucristo, nagsiling sia: “Ang Dios sang langit magapatindog sang ginharian nga dili gid malaglag. Kag ang ginharian dili ibilin sa iban nga katawhan. Dugmokon sini kag papason ini tanan nga ginharian kag ini magapadayon sa gihapon.” (Daniel 2:44; Salmo 2:1, 9) Busa, sa dili madugay, buslan sang Ginharian sang Dios sa idalom ni Hari Jesucristo ang tanan ng ginharian sa sining duta. Bangod sini, ang mga butang nga nagagamo karon sa katawhan—polusyon, pamahog sa nuklear nga inaway, pagkawalay kalig-onan sa ekonomiya kag politika—mangin butang sang nagligad sa dili madugay. (Bugna 11:18) Huo, ang imo palaabuton mangin malipayon gid sa nagapakari dutan-on nga Paraiso sa idalom sang pagginahom sang Ginharian.—Lucas 23:43.
Ini nga ihibalo nagahatag sa aton sing pagbatyag sang pagkatimbang kon binagbinagon naton ang pagkawalay ikasarang sang mga gumalahom sang kalibutan sa paglubad sa mga krisis. Apang may isa ka problema nga landason.
Indi Magkahadlok sa Maalam
Sang nahaunang siglo, nagpanudlo si Jesus sang wala pa gid matudlo ni bisan sin-o. Ang iya awtoridad ginpasundayag sang gin-ayo niya ang masakiton, bulag kag piang, kag ginbanhaw pa gani niya ang minatay. (Mateo 11:5, 6) Ining makatilingala nga mga milagro gin-updan sang kaugalingon walay dagta nga estilo sang pagkabuhi ni Jesus. (Hebreo 7:26) Sa pagkamatuod, ina nga mga butang nagpamatuod nga si Jesus amo ang madugay na ginpanaad nga Mesias. Apang wala sia magbantala suno sa kombensional nga kaalam, kag ang kalabanan nga mga Judiyo nagsikway sa iya.
Mga pila ka tuig sang ulihi ginbantalaan sang Cristianong apostol nga si Pablo si Hari Agripa. Nagsabat sa hanuot nga mga pinamulong ni Pablo, si Agripa nagsabat: “Sa diutay nga tion himuon mo ako nga Cristiano.” (Binuhatan 26:28) Sing maathag, nabatyagan niya ang puersa sang mensahe. Apang indi ini kombensional kag mahimu nga nagkinahanglan sing dakung mga pagbalhin sa iya estilo sang pagkabuhi. Gani si Agripa wala gid mangin Cristiano.
Kaangay kay Hari Agripa ukon sa mga Judiyo nga wala maghulag sa mga pinamulong ni Jesus, madamu karon ang mas nahaposan nga sundon ang kombensional nga kaalam sang sa batunon ang kaalam sang Dios. Apang dumduma nga yadto lamang mga Judiyo nga naghulag sa mensahe ni Jesus ang nakalampuwas sa kalaglagan sang Jerusalem.
Sing kaanggid karon, paagi lamang sa paghulag sa kaalam sang Dios nga kita nga mga tawo makasarang sa pagpanghikot sing maalamon sa pagplano sang aton palaabuton. Matuod, tubtob yari ining sistema dapat man naton gamiton ang sentido kumon samtang ginaplano naton ang aton kabuhi. Apang kon ang aton mga plano para sa palaabuton naangkla sa sining sistema sang mga butang, sa ulihi indi ini magmadinalag-on, kay malapit na ang katapusan sini. Dalanon sang matuod nga kaalam nga basahon sing maayo ang Biblia agod mahibal-an ang nahanungod sa mga katuyoan sang Dios. Dapat naton ton-an ini sing mapinangamuyuon para sa aton karon. Kag magapanghikot kita sing maalamon kon maukod nga aton ginatuman ina nga kabubut-on.
“Ang kaalam sang Dios” nagapamunga sing maayo. Ang utod sa iloy ni Jesus nga si Santiago nagsiling: “Sin-o bala ang maalam kag mahangpunon sa inyo? Magpakita sia sa iya maayong kabuhi sang iya mga binuhatan sa pagkamapainubuson sang kaalam. . . . Ang kaalam nga gikan sa hitaas sa nahauna putli, ugaling mahidaiton, malulo, masinulugton, puno sang kaluoy kag maayong mga bunga, walay pagpangduhaduha ukon pagkasalimpapaw.” (Santiago 3:13-17) Ina nga kaalam sa pagkamatuod ‘magaamlig nga buhi sa mga nagapanag-iya sini”! (Manugwali 7:12) Magahimu ini sa imo nga magmadinalag-on sa pagplano sang malipayon nga palaabuton.