Paano Ka Nagaplano para sa Palaabuton?

“GINPLANO namon sing maayo ang palaabuton bangod ihinguyang namon ang nabilin sang amon kabuhi didto!” Ayhan ugyon ka sa sina nga pinamulong. Nakita sang kalabanan sa aton ang kaalam sang paghimu sing pila ka paghanda para sa palaabuton.

Sa iban nga komunidad, ang mga mag-asawa nagatinguha sa pagsagud sing daku na pamilya agod may magaatipan sa ila kon magtigulang na sila. Ang mga pamatan-on nagaeskwela sa kolehiyo agod ihanda ang ila kaugalingon para sa maayo nga obra. Mahimu ipuhonan sang mga hamtong ang ila sinuptan sa panikasog nga siguraduhon ang malig-on nga katigulangon. Kag madamu sang nagatamod sa kuarta subong labing maayong garantiya sa palaabuton ang nagahinguyang sing daku nila nga tion kag enerhiya, bisan kapagros, sa panikasog nga magmanggaranon.

Daw Ano ka Pat-od Ini?

Ining mga paagi sa paghanda para sa palaabuton amo ang mahimu naton matawag nga kombensional nga kaalam, kag may pagkapraktikal ang tuhoy sini. Ang problema amo nga wala ini pirme nagamadinalag-on. Ang imol nga mga ginikanan mahimu may madamu nga kabataan, kag makita lamang sila nga nagakapatay bangod sang balatian ukon malnutrisyon. Ukon madamung nagdalagku na nga kabataan ang wala nagaatipan sa ila mga ginikanan. Ang mga gradwado sa kolehiyo kon kaisa wala sing trabaho ukon dimalipayon. Bisan ang manggaranon katama nga mga lalaki kag mga babayi nakasapo kon daw ano katuod ining pinamulong ni Jesucristo: “Bisan ang tawo may kabuganaan ang iya kabuhi wala nagaresulta gikan sa mga butang nga iya ginapanag-iyahan.”—Lucas 12:15.

Luwas pa, ginakabalak-an sang madamu ang nagadugang nga polusyon, ang nagadamu nga nuklear arsenal, ang nagadugang nga pagkawalay kalig-onan sa internasyonal nga relasyon kag ang nagabag-obag-o nga kahimtangan sa ekonomiya, kag ang nagakalusod man nga moral. Indi sila mahim-os nga ang palaabuton nga ginplano nila sing maayo mapaslawan bangod sang mga hitabo nga indi kontrolado. Ginpautwas ni saykayatris Karl Menninger ang balatyagon sang madamu sang magsiling sia: “Ang kalibutan yara sa ginakulbaan, dimalig-on nga kahimtangan diin ang grabe nga mga butang sarang matabo.”

Dugang pa, masami ginapaslaw sang mga tawo ang ila kaugalingon nga plano para sa palaabuton. Walay sapayan sang nagadugang nga pamatuod nahanungod sa katalagman sang abuso sa droga, dugang kag dugang pa gid nga tawo ang nagadroga.

Ginpamatod-an sang pananalawsaw nga ang pagpanigarilyo sarang magadul-ong sa kanser kag iban pa makatalagam nga balatian. Apang madamu ang padayon nga nagapanigarilyo. Ang iban nagakapatay sa mga aksidente sa trapiko nga natabo bangod sila ukon ang iban nagamaneho samtang napaidalom sa impluensia sang alkohol. Apang ang mga tawo nagainum gihapon kag nagamaneho. Ang imoralidad masami nagaresulta sa ginliton sa sekso nga mga balatian, apang wala ina magpauntat sa iban gikan sa pagkaimoral.

May Butang nga Kulang

Ang kamatuoran amo nga may butang nga kulang sa kon paano ginaplano sang kalabanan nga tawo ang palaabuton. Wala ginabinagbinag sang kombensional nga kaalam ang tanan nga katunayan kag wala ginapaayawan ang mga kinahanglanon sang tanan nga tawo. Bangod sini, mahimu mawili ka sa paghibalo nga ang Biblia nagahambal tuhoy sa duha ka sahi sang kaalam—“ang kaalam sang kalibutan” kag “ang kaalam sang Dios.” (1 Corinto 1:20, 21) Bisan nga ang paghanda para sa palaabuton sa kinabatasan nga paagi may pat-od nga balor sa malip-ot nga tion, ang pagsunod sa kombensional nga kaalam halos wala gid sing balor sa paghanda para sa malawig nga termino sang palaabuton.

Si Jesus nagsiling: “Ang kaalam ginapamatod-an nga matarong paagi sa iya binuhatan.” (Mateo 11:19) Kon amo, ngaa indi maghinguyang sing pila ka minuto sa pagbinagbinag sa “kaalam sang Dios” kag tan-awon kon paano ini makaapekto sa imo pagtamod samtang imo ginaplano ang palaabuton?