Ano Na ang Natabo sa Cristianong Pagkamabinantayon?

ANG ginsiling ko sa inyo ginsiling ko sa tanan, Magbantay.” Ina nga pinamulong ni Jesucristo pirme nga mabatian sang sinsero nga mga Cristiano sing siniglo. Apang pila ka katapo sang Romano Katoliko, Nasidlangan nga Ortodokso ukon dalagkung Protestante nga mga Iglesia ang pirme gihapon makabati sinang nagapukaw nga paandam?—Marcos 13:37, King James Version.

Ngaa dapat pirme magbantay ang mga Cristiano? Si Jesus bag-o lang magsiling: “Magbantay sing dayon, kay wala kamo makahibalo kon san-o maabot ang agalon sang balay, . . . basi kon mag-abot sia sa hinali masapwan niya kamo nga nagakatulog.” (Marcos 13:35, 36) Busa dapat pirme magbantay ang mga disipulo ni Jesus sa pag-abot sang Agalon, kon sayuron, sa pag-abot ni Cristo.

Ano ang katuyoan sang pag-abot ni Cristo? Ang iya mando nga magmabinantayon ginhatag subong bahin sang iya sabat sa sining pamangkot nga ginpakiana sa iya sang iya mga disipulo: “Ano ang tanda sang imo presensia kag sang konklusion sang sistema sang mga butang [”katapusan sang kalibutan,” KJ]?” (Mateo 24:3) Suno sa kaanggid nga kasaysayan, sa tapos mahatag ang madamu sing bahin nga tanda, si Cristo nagsiling: “Nian makita nila ang Anak sang tawo nga nagakari sa panganud nga may gahom kag dakung himaya. Karon kon ining mga butang magsugod sa pagkahanabo, maghangad kamo kag bayawa ang inyo mga ulo, kay ang pagtubos sa inyo nagapalapit. . . . Kon makita ninyo nga nagakahanabo ining mga butang, makilala ninyo nga malapit na ang ginharian sang Dios.”—Lucas 21:27-31.

Maayong mga Rason nga Magmabinantayon

Busa, ginhatagan ni Jesucristo ang iya mga disipulo sing maayong mga rason nga magpabilin nga alisto sa espirituwal agod bantayan ang katumanan sang “tanda.” Magakahulugan ini nga ang ila Agalon dimakita nga presente,’ kay indi na kinahanglan ang tanda kon ang iya presensia pisikal, makita. Apang ang espirituwal nga presensia magakahulugan man nga ining malaut nga “kalibutan,” ukon “sistema sang mga butan,” nagsulod na sa iya “konklusion,” ukon panag-on sang katapusan. Kag para sa mga Cristiano, magakahulugan ini nga ang ila ‘pagtubos malapit na.’ Huo, magakahulugan ini nga “malapit na ang ginharian sang Dios.”

Indi bala amo gid sini ang kahulugan sang paglaum sang Cristiano? Indi bala amo gid sini ang gintudlo sa mga Cristiano nga ipangamuyo, nga amo: “Amay namon sa langit, pakabalaanon ang imo ngalan, pakaria ang imo ginharian, himoa ang imo kabubut-on, sa duta subong sang sa langit”? (Mateo 6:9, 10, The New Jerusalem Bible) Agod mangin makatarunganon, indi bala ang mga Katoliko nga nagasulitsulit sang ila Paternoster (Pangamuyo sang Ginuo) ukon ang mga katapo sang iban pa nga iglesia nga nagapangadi sang Pangamuyo sang Ginuo mangin mabinantayon agod tan-awon nga ang ila pangamuyo matuman? Ukon mahimu bala nga ginkuha sang mga panudlo sang ila mga iglesia ang kalabanan nga kahulugan sina nga pangamuyo, amo kon ngaa diutay na lamang katama ang nabilin para sa ila nga bantayan?

Kon Ngaa Madamu ang Indi Na Mabinantayon

Dapat bantayan sang mga Cristiano ang tanda sang presensia ni Cristo [sa Griego, pa·rou·siʹa, ginbadbad nga “pag-abot” sa madamung bersion sang Biblia]. Ngaa? Bangod magakahulugan ini nga ang Ginharian sang Dios, ang ila mismo katubusan kag ang katapusan sang “kalibutan,” ukon ang karon malauton nga “sistema sang mga butang,” malapit na. Ginbuligan kuntani sang lainlain nga iglesia sang Cristiandad ang ila mga katapo nga mangin alisto sa espirituwal agod indi sila maabtan nga nagakatulog kon mag-abot ang Agalon. Natuman bala sang mga iglesia ang ila hilikuton sa sini nga bahin?

Ang isa ka maalamon nga reperensya nagasiling: “Samtang nagaligad ang tion nga ang parousia wala mahanabo nagadugang ini pahilayo sa palaabuton kon tuhoy sa iglesia, kag sang ulihi ginsikway tanan subong butang nga tuohan.”—The New International Dictionary of New Testament Theology.

Sa katunayan, amo sini ang natabo. Gin-untatan na sang mga iglesia sang Cristiandad ang Cristianong pagkamabinantayon nga ginsugo ni Jesus sa iya mga disipulo nga indi pagpatumbayaan. Indi na sila alisto sa presensia ni Cristo kag sa pagkari sang Ginharian sang Dios. Ginpalantang nila ang “konklusion sang sistema sang mga butang,” ukon “ang katapusan sang kalibutan.”

Ang Pranses nga isa ka tomo nga ensayklopedia nga QUID 1984 nga nagahatag sing suno-sa-panahon nga depinasyon sa relihioso nga pagpati nahanungod sa katapusan sang kalibutan. Sa idalom sang “Characteristics of the Catholic Religion,” ini nagasiling: “Sining karon lang daw ginasaysay sang Iglesia ang katapusan sang kalibutan subong nga indibiduwal nga pagtilaw nga ginaatubang sang tagsa ka tawo kon mapatay sia.” Nagapasangkad sang problema, ang The New Encyclopædia Britannica nagasiling: “Ang mas establisado nga Cristianong mga iglesia wala maglakip sang eskatolohiya (ang panudlo sa “Katapusan nga mga Butang”) subong walay kahulugan ukon subong indi importante nga mito.”

Gani, ano ang makakilibot apang indi malikawan nga sabat sa pamangkot “Ano na ang natabo sa Cristianong pagkamabinantayon?” Ginpatay ini sang “mas establisado nga Cristianong mga iglesia,” kon sayuron sang Romano Katoliko, Nasidlangan nga Ortodokso kag dalagku Protestante nga mga iglesia. Bisan indi mabasol ang mga katapo sining mga iglesia, madamu sa ila ang mahimu magapalibog kon paano kag kon ngaa ginpalantang sang ila iglesia ang presensia ni Cristo, ang pagkari sang Ginharian sang Dios kag ang katapusan sang karon malauton nga sistema sang mga butang. Ang maragtason nga katunayan nga nagdul-ong sa sini pagausisaon sa masunod nga artikulo.