Ila ‘Ginhalad ang Ila Kaugalingon sing Kinabubut-on’
ANG Suriname isa ka tropikal nga pungsod, kag isa sang kapin sa 200 ka duta diin ang mga Saksi ni Jehova aktibo. Sining karon lang, isa ka misyonero nga mag-asawa sa Suriname ang naglakbay sing 200-milyas (320 km) nga sakay pang dyip agod duawon ang minahan sang bauxite kag makighambal sa mga nagatrabaho didto tuhoy sa mga katuyoan sang Dios. Nakasapo sila sing daku nga interes.
Sa ila una nga gindulogan, ang manedyer sang kampo nagsiling: “Nalipay ako nga nagduaw kamo. Kinahanglan gid namon ang subong sini.” Nian ginpatapik niya sa kapeterya ang pahibalo nahanungod sa isa ka pamulongpulong sa Biblia kag pagpasalida sing slide nga pagahiwaton sadto nga gab-i sa 7:30. Pag-abot sang tion, 70 ka tawo ang nagkadto kag namati sing maayo sa pamulongpulong sa kon paano kilalahon ang Dios paagi sa pagpanuga kag paagi sa Biblia, kag dayon nagtan-aw sila sang pinili nga slide nga nagapakita sang bug-os kalibutan nga hilikuton sa pagbantala.
Pagkatapos sadto, ginpaguwa sang mga misyonero ang lainlain nga mga publikasyon nga magabulig sa tumalambong nga matigayon ang dugang nga impormasyon. “Luyag ko ang isa ka libro,” siling sang isa ka tigulang nga tawo, nga nagkadto sa atubangan. Senyales yadto sa iban. Naubos ang dala sang mga misyonero, kag ang bana nagdalidali pakadto sa dyip agod magkuha sang bag-o nga suplay, samtang ang asawa masaku nga nagalista sang mga direksion sadtong maluyag duawon.
Amo lamang yadto ang nahauna nga gab-i sang ila palibot. Nakahinguyang sing isa ka semana ang mag-asawa nga misyonero sa sina nga lugar, kag nakasapo sila sing kaanggid nga kadalag-an bisan diin sila magkadto. Ang ila inagihan isa ka pasundayag sang daku nga handum nga yara pa sa madamung mga tagipusuon nga pamatian ang kamatuoran kag maton-an ang tuhoy sa kabubut-on ni Jehova. Agod paayawan ina nga handum nga ang linibo ka Saksi ni Jehova sa sining katapusan nga mga adlaw naghanda sang ila kaugalingon nga ipadala sa mga pungsod subong sang Suriname agod buligan ang lokal nga mga Saksi nga maatipan inang tanan nga interes. Sa amo natuman nila ang saad sang salmista: “Ang imo katawhan nagahalad sang ila kaugalingon sing kinabubut-on sa adlaw sang imo gahom.” (Salmo 110:3) Kag bugana sila nga ginapakamaayo ni Jehova tungod sini.
Luyag mo bala makigbahin sa mga pagpakamaayo nga ila ginaagom? Ayhan magasabat ka: ‘Apang indi ako mahimu mangin misyonero!’ Kag ayhan matuod ina. Apang, ayhan isa ikaw sang madamu nga nakaagom na sang importante nga papel sa matahom nga mga inagihan nga naagom sang mga misyonero sa palibot sang kalibutan. Sa anong paagi?
‘Ihatag Ini sa mga Misyonero’
Sa paagi man nga ginhimu sang isa ka bata nga babayi nga nagahingalan kay April. Indi, si April indi misyonera, bisan pa nga ayhan pila ka adlaw luyag niya. Apang sa karon bata pa sia sa paglakbay sa luwas nga pungsod kag makaagom sinang makalilipay nga mga inagihan. Apang, luyag niya mangin bahin sa sini, gani nagsulat sia sa ulong-talatapan sang Watchtower Society sa Brooklyn: “May naghatag sa akon sing isa ka dolyar sa sirkito nga asambleya. Luyag ko ini ihatag sa inyo agod ihatag sa mga misyonero sa pagbulig sa ila nga matudloan ang mga tawo nahanungod kay Jehova.” Busa, sa importante katama nga paagi, ang bata nga si April nakaagom sing bahin sa bug-os kalibutan nga hilikuton sa pagmisyonero. Nag-amot sia sing kuarta agod buligan gastuhan ini.
Ang isa pa ka sulat naghalin sa isa nga mas gulanggulang sang sa kay April. Nagsulat sia: “Ginalakip ko ang tseke nga $100 agod gamiton sa hilikuton sang Ginharian. Isa ini ka dulot nga bag-o lang ginhatag sa akon, gani ginapasa ko ini sa inyo . . . Payunir ako sa sulod sang 46 ka tuig. Apang, manug-90 na ako kag dapat nga maghinay.” Ining hanuot, madugay nga nga alagad ni Jehova indi mismo makamisyonero. Apang luyag niya nga makigbahin, kag ginhimu niya ini paagi sa pag-amot sang kuarta.
Ining duha ka sulat nagapadaku sang isa pa ka paagi diin ang katawhan ni Jehova ‘naghalad sang ila kaugalingon sing kinabubut-on sa adlaw sang gahom ni Jehova.’ Gintuman nila ang laygay sang hulubaton sang Biblia: “Padunggi si Jehova sang imo mga pagkabutang kag sang nahauna nga mga bunga sang tanan nga patubas.” (Hulubaton 3:9) Bangod sang pila ka rason, wala nila mahalad ang ila kaugalingon sa pisikal tubtob sa kasangkaron nga masarangan sang iban. Apang, nakaamot sila sing “hamili nga mga pagkabutang” kag sa amo nakabulig sa pagpaposible para sa iban nga himuon ina. Sang nagligad nga tion, inang kinabubut-on nga paghatag nagpasundayag sang pila ka importante nga mga prinsipio. Tan-awon naton kon ano ina nga mga prinsipio, kag kon bala importante gihapon ini karon.
Ang Ila “Tagipusuon Nagtandog sa Ila”
Sang panahon ni Moises may isa ka buluhaton nga dapat himuon. Dapat tukuron ang isa ka tabernakulo agod mangin sentro sang matuod nga pagsimba sa pungsod sang Israel. Gin-agda ang kalipikado nga mga Israelinhon nga iamot ang ila tion kag ikasarang sa hilikuton sa pagpatindog. (Exodo 35:10) Kag gin-agda ang tanan nga mag-amot gikan sa iya materyal nga mga pagkabutang agod gastuhan ini. Ang resulta: daku nga kontribusyon, nga sobra pa sang sa kinahanglanon. Kag talalupangdon nga ginhimu sang maalwan sing tagipusuon ang mga pag-amot. Ang rekord nagasugid sa aton nga ang ila “tagipusuon nagtandog sa ila,” ang ila “tagipusuon nagpukaw sa ila.” Huo, ang ila pag-amot pagpakita sing pagtuo kay Jehova kag pasundayag sing pagsakdag sa katuyoan sang tabernakulo—ang matuod nga pagsimba.—Exodo 35:20-29; 36:4-7.
Sang panahon ni Ezequias, isa pa ka hilikuton ang dapat himuon. Pagkatapos sang tinuig nga pagpatumbaya, ang templo dapat tinloan kag ang katawhan gintudloan nga tahuron ang kasugoan ni Jehova. Ang mga Israelinhon ginpahibalo tuhoy sa kinahanglanon para sa materyal nga mga amot “agod ang [mga saserdote kag mga Levita] magpanugyan sang ila kaugalingon sa kasugoan ni Jehova.” (2 Cronica 31:4) Mapagsik kaayo ang sabat sang mga tawo amo kon ngaa ang mataas nga saserdote nga si Azarias naghinakop: “Ginpakamaayo ni Jehova ang iya katawhan.”—2 Cronica 31:10.
Busa, ang pagkahanda sang mga Israelinhon sa paghatag pagpasundayag sang ila maayo nga kahimtangan sang tagipusuon kag sang ila pagsakdag sa matuod nga pagsimba, subong man sang pagpakamaayo ni Jehova sa ila. Kamusta karon?
Ginpakamaayo ni Jehova ang Iya Katawhan
Bueno, may isa pa ka pinasahi nga hilikuton nga hilimuon karon. Si Jesus nagtagna: “Iwali ining maayong balita sang ginharian sa bug-os napuy-an nga duta nga panaksi sa tanan nga pungsod; kag ugaling magaabot ang katapusan.” (Mateo 24:14) Nagtagna man ang Biblia nga ining hilikuton nga pagbantala pagaupdan sang hilikuton nga pagpanudlo kag sang pagtipon sing tingob sang matuod nga mga sumilimba. (Isaias 2:3, 4; 54:13; Zacarias 8:23; Mateo 28:19, 20; Bugna 7:9) May bahin bala ang pag-amot sa sining hilikuton?
May yara gid. Halimbawa, ang pagpadala sa isa ka misyonero sa Watchtower Bible School Gilead kag ang pagtatap sa iya didto samtang nagatuon, kag ang pagpadala sa iya sa isa ka pungsod subong sang Suriname kag ang pagtatap sa iya didto sa madamung tinuig, nagabili sing linibo ka dolyar. Apang ang Watchtower Society nakapadala sing kapin sa 6,000 ka misyonero kutob sang nahauna nga ginbuksan ang Gilead School.
Sa pagkamatuod, bahin lamang ini sang mga gasto may kaangtanan sa pagbantala sang maayong balita. Yara man ang mga manugtatap sa sirkito kag distrito kag ang ila mga asawa, kag ang mga nagapangabudlay sa mga puluy-an Bethel sang Sosiedad, nga sa ila mga pribilehiyo sa pag-alagad indi nila masuportar ang ila kaugalingon paagi sa sekular nga trabaho. Yara man ang mga espesyal payunir nga nagabaton sing pinansial nga bulig agod makaalagad sila sa mabudlay nga mga teritoryo. Apang pagsakdag lamang ina sa mga nagapangabudlay!
Idugang sa sina ang bili sang bag-ong printing presses kag kagamitan sa pagbind, subong man ang gasto sa bag-o nga mga pasilidad sa Bethel nga ginapatindog sa palibot sang kalibutan, kaupod sang mga Assembly Halls, kag ginatos ka bag-ong mga Kingdom Hall. Dumduma man, ang “tinago” nga mga gasto, subong regular nga pagpadala sa mga sulat nga ginsulat sa kapin 46,000 ka kongregasyon, kag ang pag-imprinta sa madamung mga porma kag mga dokumento nga kinahanglanon para sa teokratikong organisasyon. Karon narealisar mo ang daku nga kantidad sang kuarta nga ginagasto kada tuig sa pagbantala sang “maayong balita” kag sa pagpat-od nga ang “mga karnero” may mga duog nga tiponan kag espirituwal nga pagkaon nga matigayon.
Ang makatilingala nga butang amo nga ginpaposible ini ni Jehova. Paano? Sa kalabanan, paagi sa pagpahulag sa tagipusuon sang mga tawo nga mag-amot sing boluntaryo. Sa amo, ang indibiduwal nga mga Cristiano nagaamot sing kuarta—subong man nagaamot sang ila tion kag kusog—agod suportahon ang lokal nga mga proyekto subong sang mga Kingdom Hall kag mga Assembly Hall. Madamung mga kongregasyon ang nagapadala sing regular nga amot sa Watchtower Society ukon, sa guwa sang Estados Unidos, sa sanga talatapan nga yara sa ila pungsod. Ang mga indibiduwal nagaamot man sa lainlain nga paagi sing direkta sa Sosiedad. (Tan-awa ang kahon.) Ang resulta? Bisan sa sining mabudlay nga panahon sa palangabuhian, ginapahulag ni Jehova ang mga tagipusuon sang iya katawhan agod ihatag kon ano ang kinahanglanon sa pagtapos sang hilikuton nga iya gintangdo.
Ano nga konklusion ang mahinakop naton gikan sa sini? Nga, subong sang kaadlawan ni Ezequias, “ginpakamaayo ni Jehova ang iya katawhan.” Ginpakita niya ang iya pagsakdag sa makatilingala nga paagi sa hilikuton nga ila ginahimu. Subong man, subong sang pagsakdag sang katawhan ni Jehova sang Iya kahimusan sang kaadlawan ni Moises, makita naton karon nga ang katawhan ni Jehova 100 porsiento nga nagasakdag sa hilikuton nga pagbantala sang maayong balita sang Ginharian sang Dios kag sa pagtipon sa mga interesado. Nag-amot sila indi bangod nahaylo sila sang hambal sang propesyonal nga mga nagapangayo sing amot, kundi bangod ang ila mga tagipusuon “nagtandog sa ila,” huo, “nagpukaw sa ila.”
‘Ginatapos Ini’ ni Jehova
Sang nahaunang siglo si apostol Pablo nakigbahin sa misyonero nga hilikuton kag nakatigayon sing matahom nga mga eksperiensia—kaangay sadtong iya sang misyonero nga mag-asawa sa Suriname. Sia man, masami nga ginsuportar paagi sa mga amot sang iya mga masigka tumuluo. Ang isa ka kongregasyon nga labi na nga mabuligon amo ang sa Filipos. Busa, nagasulat sa ila, napahulag si Pablo sa pagpabutyag sining mga pulong: “Nagapasalamat ako sa akon Dios sa tanan ko nga pagpanumdom sa inyo sa gihapon sa tagsa ka pangamuyo nakon tungod sa inyo tanan ginahimu ko ang pangamuyo nga may kalipay, nga nagapasalamat tungod sang pagpakig-ambit ninyo sa pagpauswag sang maayong balita kutob sang nahaunang adlaw tubtob karon. Nagasalig ako nga sia nga nagsugod sing maayong buhat sa inyo magahimpit sini sa adlaw ni Jesucristo.”—Filipos 1:3-6; 4:16.
Ang mga Cristiano karon, napalig-on man sing kasubong sina. Matuod sa saad ni Jehova, ginpahulag niya ang iya katawhan nga ‘ihalad ang ila kaugalingon sing kinabubut-on’ sa madamung nagakalainlain nga paagi sa pag-alagad sa iya. Busa ang mga Saksi ni Jehova ‘nagapasalamat sa Dios’ kag nagasalig nga si Jehova, nga nagpalambo sinang maayo nga espiritu sa iya modernong-adlaw nga katawhan, magatapos sang iya hilikuton.
[Kahon sa pahina 24]
Mga Dulot: Ang iban nga indibiduwal direkta nga nagahatag sing dulot kag amot sa Watch Tower Bible ang Tract Society of Pennsylvania, ukon sa sanga talatapan sa pungsod diin sila nagaistar. Ina nga dulot dapat pirme updan sang malip-ot nga sulat nga nagasiling nga ang kuarta gintuyo subong boluntaryo nga amot.
Mga Dulot nga May Pinasahi nga Aman: Sa idalom sini nga kahimusan, ang mga indibiduwal nagaamot sing kuarta nga may pinasahi nga kahimusan nga kon kinahanglan nila ang iban ukon ang tanan sini samtang buhi sila, igabalik ini sa ila. Ukon, agod likawan ang gasto kag pagkadimasaligan sang testamento, ang iban nagahatag sa Sosiedad sing mga stocks, bonds ukon lote. Ang iban nagahimu sina nga dulot, nga nagareserba sang kinamatarong sa sini samtang buhi.
Seguro: Ginhimu sang madamu ang Watch Tower Society nga benepisyaryo sang ila polisa sa life insurance.
Mga Testamento: Ang iban, sa bulig kag laygay sang ila mga abogado, nagahimu sa Sosiedad nga benepisyaryo sa ila mga testamento.
Ang dugang nga impormasyon ukon laygay nahanungod sa sinang mga bagay matigayon paagi sa pagsulat sa lokal nga sanga talatapan sang Sosiedad, ukon sa masunod nga direksion: Watch Tower Bible and Tract Society of Pennsylvania, Office of the Secretary and Treasurer, 25 Columbia Heights, Brooklyn, New York, 11201.
[Piktyur sa pahina 23]
Kinabubut-on nga ginasakdag sang katawhan ni Jehova ang pag-uswag sang Ginharian